अथ समयक्रिया ॥ (१।१)

राजद्रोहसाहसेषु यथाकामम् ॥ (२।१)

निक्षेपस्तेयेष्व् अर्थप्रमाणं ॥ (३।१)

सर्वेष्व् एवार्थजातेषु मूल्यं कनकं कल्पयेत् ॥ (४।१)

तत्र कृष्णलोने शूद्रं दूर्वाकरं शापयेत् ॥ (५।१)

द्विकृष्णलोने तिलकरम् ॥ (६।१)

त्रिकृष्णलोने रजतकरम् ॥ (७।१)

चतुःकृष्णलोने सुवर्णकरम् ॥ (८।१)

पञ्चकृष्णलोने सीतोद्धृतमहीकरम् ॥ (९।१)

सुवर्णार्धोने कोशो देयः शूद्रस्य ॥ (१०।१)

ततः परं यथार्हं धटाग्न्युदकविषाणाम् अन्यतमम् ॥ (११।१)

द्विगुणे ऽर्थे यथाभिहिताः समयक्रिया वैश्यस्य ॥ (१२।१)

त्रिगुणे राजन्यस्य ॥ (१३।१)

कोशवर्जं चतुर्गुणे ब्राह्मणस्य ॥ (१४।१)

न ब्राह्मणस्य कोशं दद्यात् ॥ (१५।१)

अन्यत्रागामिकालसमयनिबन्धनक्रियातः ॥ (१६।१)

कोशस्थाने ब्राह्मणं सीतोद्धृतमहीकरम् एव शापयेत् ॥ (१७।१)

प्राग्दृष्टदोषे स्वल्पे ऽप्यर्थे दिव्यानाम् अन्यतमम् एव कारयेत् ॥ (१८।१)

सत्सु विदितं सच्चरितं न महत्यर्थे ऽपि ॥ (१९।१)

अभियोक्ता वर्तयेच्छीर्षम् ॥ (२०।१)

अभियुक्तश् च दिव्यं कुर्यात् ॥ (२१।१)

राजद्रोहसाहसेषु विनापि शीर्षवर्तनात् ॥ (२२।१)

स्त्रीब्राह्मणविकलासमर्थरोगिणां तुला देया ॥ (२३।१)

सा च न वाति वायौ ॥ (२४।१)

न कुष्ठ्यसमर्थलोहकाराणाम् अग्निर् देयः ॥ (२५।१)

शरद्ग्रीष्मयोश् च ॥ (२६।१)

न कुष्ठिपैत्तिकब्राह्मणानां विषं देयम् ॥ (२७।१)

प्रावृषि च ॥ (२८।१)

न श्लेष्मव्याध्यर्दितानां भीरूणां श्वासकासिनाम् अम्बुजीविनां चोदकम् ॥ (२९।१)

हेमन्तशिशिरयोश् च ॥ (३०।१)

न नास्तिकेभ्यः कोशो देयः ॥ (३१।१)

न देशे व्याधिमरकोपसृष्टे च ॥ (३२।१)

सचैलस्नातम् आहूय सूर्योदय उपोषितम् । (३३।१)

कारयेत् सर्वदिव्यानि देवब्राह्मणसंनिधौ ॥ (३३।२)