परनिपानेषु न स्नानम् आचरेत् ॥ (१।१)

आचरेत् पञ्च पिण्डान् उद्धृत्यापस् तदापदि ॥ (२।१)

नाजीर्णे ॥ (३।१)

न चातुरः ॥ (४।१)

न नग्नः ॥ (५।१)

न रात्रौ ॥ (६।१)

राहुदर्शनवर्जम् ॥ (७।१)

न संध्ययोः ॥ (८।१)

प्रातःस्नानशीलो ऽरुणताम्रां प्राचीम् आलोक्य स्नायात् ॥ (९।१)

स्नातः शिरो नावधुनेत् ॥ (१०।१)

नाङ्गेभ्यस् तोयम् उद्धरेत् ॥ (११।१)

न तैलवत् संस्पृशेत् ॥ (१२।१)

नाप्रक्षालितं पूर्वधृतं वसनं बिभृयात् ॥ (१३।१)

स्नात एव सोष्णीषे धौते वाससी बिभृयात् ॥ (१४।१)

न म्लेच्छान्त्यजपतितैः सह संभाषणं कुर्यात् ॥ (१५।१)

स्नायात् प्रस्रवणदेवखातसरोवरेषु ॥ (१६।१)

उद्धृतात् भूमिष्ठम् उदकं पुण्यं स्थावरात् प्रस्रवत् तस्मान् नादेयं तस्माद् अपि साधुपरिगृहीतं सर्वत एव गाङ्गम् ॥ (१७।१)

मृत्तोयैः कृतमलापकर्षो ऽप्सु निमज्ज्योपविश्यापो हि ष्ठेति तिसृभिर् हिरण्यवर्णेति चतसृभिर् इदम् आपः प्रवहतेति च तीर्थम् अभिमन्त्रयेत् ॥ (१८।१)

ततो ऽप्सु निमग्नस् त्रिर् अघमर्षणं जपेत् ॥ (१९।१)

तद्विष्णोः परमं पदम् इति वा ॥ (२०।१)

द्रुपदां सावित्रीं च ॥ (२१।१)

युञ्जते मन इत्यनुवाकं वा ॥ (२२।१)

पुरुषसूक्तं वा ॥ (२३।१)

स्नातश्चार्द्रवासा देवपितृतर्पणम् अम्भःस्थ एव कुर्यात् ॥ (२४।१)

परिवर्तितवासाश्चेत् तीर्थम् उत्तीर्य ॥ (२५।१)

अकृत्वा देवपितृतर्पणं स्नानशाटीं न पीडयेत् ॥ (२६।१)

स्नात्वाचम्य विधिवद् उपस्पृशेत् ॥ (२७।१)

पुरुषसूक्तेन प्रत्यृचं पुरुषाय पुष्पानि दद्यात् ॥ (२८।१)

उदकाञ्जलींश्च ॥ (२९।१)

आदाव् एव दैवेन तीर्थेन देवानां तर्पणं कुर्यात् ॥ (३०।१)

तदनन्तरं पित्र्येण पितॄणाम् ॥ (३१।१)

तत्रादौ स्ववंश्यानां तर्पणं कुर्यात् ॥ (३२।१)

ततः संबन्धिबान्धवानाम् ॥ (३३।१)

ततः सुहृदाम् ॥ (३४।१)

एवं नित्यस्नायी स्यात् ॥ (३५।१)

स्नातश्च पवित्राणि यथाशक्ति जपेत् ॥ (३६।१)

विशेषतः सावित्रीम् ॥ (३७।१)

पुरुषसूक्तं च ॥ (३८।१)

नैताभ्याम् अधिकम् अस्ति ॥ (३९।१)

स्नातो ऽधिकारी भवति दैवे पित्र्ये च कर्मणि । (४०।१)

पवित्राणां तथा जप्ये दाने च विधिबोधिते ॥ (४०।२)

अलक्ष्मीः कालकर्णी च दुःस्वप्नं दुर्विचिन्तितम् । (४१।१)

अम्मात्रेणाभिषिक्तस्य नश्यन्त इति धारणा ॥ (४१।२)

याम्यं हि यातनादुःखं नित्यस्नायी न पश्यति । (४२।१)

नित्यस्नानेन पूयन्ते ये ऽपि पापकृतो नराः ॥ (४२।२)