गर्भस्य स्पष्टताज्ञाने निषेककर्म ॥ (१।१)

स्पन्दनात् पुरा पुंसवनम् ॥ (२।१)

षष्ठे ऽष्टमे वा मासि सीमन्तोन्नयनम् ॥ (३।१)

जाते च दारके जातकर्म ॥ (४।१)

आशौचव्यपगमे नामधेयम् ॥ (५।१)

मङ्गल्यं ब्राह्मणस्य ॥ (६।१)

बलवत् क्षत्रियस्य ॥ (७।१)

धनोपेतं वैश्यस्य ॥ (८।१)

जुगुप्सितं शूद्रस्य ॥ (९।१)

चतुर्थे मास्य् आदित्यदर्शनम् ॥ (१०।१)

षष्ठे ऽन्नप्राशनम् ॥ (११।१)

तृतीये ऽब्दे चूडाकरणम् ॥ (१२।१)

एता एव क्रियाः स्त्रीणाम् अमन्त्रकाः ॥ (१३।१)

तासां समन्त्रको विवाहः ॥ (१४।१)

गर्भाष्टमे ऽब्दे ब्राह्मणस्योपनयनम् ॥ (१५।१)

गर्भैकादशे राज्ञः ॥ (१६।१)

गर्भद्वादशे विशः ॥ (१७।१)

तेषां मुञ्जज्याबल्बजमय्यो मौञ्ज्यः ॥ (१८।१)

कार्पासशाणाविकान्युपवीतानि वासांसि च ॥ (१९।१)

मार्गवैयाघ्रबास्तानि चर्माणि ॥ (२०।१)

पालाशखादिरौदुम्बरा दण्डाः ॥ (२१।१)

केशान्तललाटनासादेशतुल्याः ॥ (२२।१)

सर्व एव वा ॥ (२३।१)

अकुटिलाः सत्वचश्च ॥ (२४।१)

भवदाद्यं भवन्मध्यं भवदन्तं च भैक्ष्यचरणम् ॥ (२५।१)

आ षोडशाद् ब्राह्मणस्य सावित्री नातिवर्तते । (२६।१)

आ द्वाविंशात् क्षत्रबन्धोर् आ चतुर्विंशतेर् विशः ॥ (२६।२)

अत ऊर्ध्वं त्रयो ऽप्येते यथाकालम् असंस्कृताः । (२७।१)

सावित्रीपतिता व्रात्या भवन्त्यार्यविगर्हिताः ॥ (२७।२)

यद्यस्य विहितं चर्म यत् सूत्रं या च मेखला । (२८।१)

यो दण्डो यच्च वसनं तत् तद् अस्य व्रतेष्वपि ॥ (२८।२)

मेखलाम् अजिनं दण्डम् उपवीतं कमण्डलुम् । (२९।१)

अप्सु प्रास्य विनष्टानि गृह्णीतान्यानि मन्त्रवत् ॥ (२९।२)