नान्नम् आसनम् आरोपयेत् ॥ (१।१)

न पदा स्पृशेत् ॥ (२।१)

नावक्षुतं कुर्यात् ॥ (३।१)

तिलैः सर्षपैर् वा यातुधानान् विसर्जयेत् ॥ (४।१)

संवृते च श्राद्धं कुर्यात् ॥ (५।१)

न रजस्वलां पश्येत् ॥ (६।१)

न श्वानम् ॥ (७।१)

न विड्वराहम् ॥ (८।१)

न ग्रामकुक्कुटम् ॥ (९।१)

प्रयत्नात् श्राद्धम् अजस्य दर्शयेत् ॥ (१०।१)

अश्नीयुर् ब्राह्मणाश्च वाग्यताः ॥ (११।१)

न वेष्टितशिरसः ॥ (१२।१)

न सोपानत्काः ॥ (१३।१)

न पीठोपहितपादाः ॥ (१४।१)

न हीनाङ्गा अधिकाङ्गाः श्राद्धं पश्येयुः ॥ (१५।१)

न शूद्राः ॥ (१६।१)

न पतिताः ॥ (१७।१)

न महारोगिणः ॥ (१८।१)

तत्कालं ब्राह्मणं ब्राह्मणानुमतेन भिक्षुकं वा पूजयेत् ॥ (१९।१)

हविर्गुणान् न ब्राह्मणा ब्रूयुर् दात्रा पृष्टाः ॥ (२०।१)

यावद् ऊष्मा भवत्यन्ने यावद् अश्नन्ति वाग्यताः । (२१।१)

तावद् अश्नन्ति पितरो यावन् नोक्ता हविर्गुणाः ॥ (२१।२)

सार्ववर्णिकम् अन्नाद्यं संनीयाप्लाव्य वारिणा । (२२।१)

समुत्सृजेद् भुक्तवताम् अग्रतो विकिरन् भुवि ॥ (२२।२)

असंस्कृतप्रमीतानां त्यागिनां कुलयोषिताम् । (२३।१)

उच्छिष्टं भागधेयं स्याद् दर्भेषु विकिरश्च यः ॥ (२३।२)

उच्छेषणं भूमिगतम् अजिह्मस्याशठस्य च । (२४।१)

दासवर्गस्य तत् पित्र्ये भागधेयं प्रचक्षते ॥ (२४।२)