पिता चेत् पुत्रान् विभजेत् तस्य स्वेच्छा स्वयम् उपार्जिते ऽर्थे ॥ (१।१)

पैतामहे त्वर्थे पितृपुत्रयोस् तुल्यं स्वामित्वम् ॥ (२।१)

पितृविभक्ता विभागानन्तरोत्पन्नस्य भागं दद्युः ॥ (३।१)

अपुत्रधनं पत्न्यभिगामि ॥ (४।१)

तदभावे दुहितृगामि ॥ (५।१)

तदभावे पितृगामि ॥ (६।१)

तदभावे मातृगामि ॥ (७।१)

तदभावे भ्रातृगामि ॥ (८।१)

तदभावे भ्रातृपुत्रगामि ॥ (९।१)

तदभावे बन्धुगामि ॥ (१०।१)

तदभावे सकुल्यगामि ॥ (११।१)

तदभावे सहाध्यायिगामि ॥ (१२।१)

तदभावे ब्राह्मणधनवर्जं राजगामि ॥ (१३।१)

ब्राह्मणार्थो ब्राह्मणानाम् ॥ (१४।१)

वानप्रस्थधनम् आचार्यो गृह्णीयात् ॥ (१५।१)

शिष्यो वा ॥ (१६।१)

संसृष्टिनस् तु संसृष्टी सोदरस्य तु सोदरः । (१७।१)

दद्याद् अपहरेच्चांशं जातस्य च मृतस्य च ॥ (१७।२)

पितृमातृसुतभ्रातृदत्तम् अध्यग्न्युपागतम् आधिवेदनिकं बन्धुदत्तं शुल्कम् अन्वाधेयकम् इति स्त्रीधनम् ॥ (१८।१)

ब्राह्मादिषु चतुर्षु विवाहेष्वप्रजायाम् अतीतायां तद्भर्तुः ॥ (१९।१)

शेषेषु च पिता हरेत् ॥ (२०।१)

सर्वेष्व् एव प्रसूतायां यद्धनं तत् दुहितृगामि ॥ (२१।१)

पत्यौ जीवति यः स्त्रीभिर् अलंकारो धृतो भवेत् । (२२।१)

न तं भजेरन् दायादा भजमानाः पतन्ति ते ॥ (२२।२)

अनेकपितृकाणां तु पितृतो ऽंशप्रकल्पना । (२३।१)

यस्य यत् पैतृकं रिक्थं स तद् गृह्णीत नेतरः ॥ (२३।२)