अब्राह्मणे दत्तं तत्समम् एव पारलौकिकम् ॥ (१।१)

द्विगुणं ब्राह्मणब्रुवे ॥ (२।१)

सहस्रगुणं प्राधीते ॥ (३।१)

अनन्तं वेदपारगे ॥ (४।१)

पुरोहितस् त्व् आत्मन एव पात्रम् ॥ (५।१)

स्वसा दुहितृजामातरश्च ॥ (६।१)

न वार्यपि प्रयच्छेत बैडालव्रतिके द्विजे । (७।१)

न बकव्रतिके पापे नावेदविदि धर्मवित् ॥ (७।२)

धर्मध्वजी सदा लुब्धश्छाद्मिको लोकदाम्भिकः । (८।१)

बैडालव्रतिको ज्ञेयो हिंस्रः सर्वाभिसंधकः ॥ (८।२)

अधोदृष्टिर् नैकृतिकः स्वार्थसाधनतत्परः । (९।१)

शठो मिथ्याविनीतश्च बकव्रतपरो द्विजः ॥ (९।२)

ये बकव्रतिनो लोके ये च मार्जारलिङ्गिनः । (१०।१)

ते पतन्त्यन्धतामिस्रे तेन पापेन कर्मणा ॥ (१०।२)

न धर्मस्यापदेशेन पापं कृत्वा व्रतं चरेत् । (११।१)

व्रतेन पापं प्रच्छाद्य कुर्वन् स्त्रीशूद्रदम्भनम् ॥ (११।२)

प्रेत्येह चेदृशो विप्रो गर्ह्यते ब्रह्मवादिभिः । (१२।१)

छद्मनाचरितं यच्च व्रतं रक्षांसि गच्छति ॥ (१२।२)

अलिङ्गी लिङ्गिवेषेण यो वृत्तिम् उपजीवति । (१३।१)

स लिङ्गिनां हरत्येनस् तिर्यग्योनौ प्रजायते ॥ (१३।२)

न दानं यशसे दद्यान् न भयान् नोपकारिणे । (१४।१)

न नृत्यगीतशीलेभ्यो धर्मार्थम् इति निश्चितम् ॥ (१४।२)