अथाग्निं परिसमुह्य पर्युक्ष्य परिस्तीर्य परिषिच्य सर्वतः पाकाद् अग्रम् उद्धृत्य जुहुयात् ॥ (१।१)

वासुदेवाय संकर्षणाय प्रद्युम्नायानिरुद्धाय पुरुषाय सत्यायाच्युताय वासुदेवाय ॥ (२।१)

अथाग्नये सोमाय मित्राय वरुणाय इन्द्राय इन्द्राग्निभ्यां विश्वेभ्यो देवेभ्यः प्रजापतये अनुमत्यै धन्वन्तरये वास्तोष्पतये अग्नये स्विष्टकृते च ॥ (३।१)

ततो ऽन्नशेषेण बलिम् उपहरेत् ॥ (४।१)

भक्षोपभक्षाभ्याम् ॥ (५।१)

अभितः पूर्वेणाग्निम् ॥ (६।१)

अम्बा नामासीति दुला नामासीति नितत्नी नामासीति चुपुणीका नामासीति सर्वासाम् ॥ (७।१)

नन्दिनि सुभगे सुमङ्गलि भद्रंकरीति स्वश्रिष्व् अभिप्रदक्षिणम् ॥ (८।१)

स्थूणायां ध्रुवायां श्रियै हिरण्यकेश्यै वनस्पतिभ्यश्च ॥ (९।१)

धर्माधर्मयोर् द्वारे मृत्यवे च ॥ (१०।१)

उदधाने वरुणाय ॥ (११।१)

विष्णव इत्युलूखले ॥ (१२।१)

मरुद्भ्य इति दृषदि ॥ (१३।१)

उपरि शरणे वैश्रवणाय राज्ञे भूतेभ्यश्च ॥ (१४।१)

इन्द्रायेन्द्रपुरुषेभ्यश्चेति पूर्वार्धे ॥ (१५।१)

यमाय यमपुरुषेभ्य इति दक्षिणार्धे ॥ (१६।१)

वरुणाय वरुणपुरुषेभ्य इति पश्चार्धे ॥ (१७।१)

सोमाय सोमपुरुषेभ्य इत्युत्तरार्धे ॥ (१८।१)

ब्रह्मणे ब्रह्मपुरुषेभ्य इति मध्ये ॥ (१९।१)

ऊर्ध्वम् आकाशाय ॥ (२०।१)

स्थण्डिले दिवाचरेभ्यो भूतेभ्य इति दिवा ॥ (२१।१)

नक्तंचरेभ्य इति नक्तम् ॥ (२२।१)

ततो दक्षिणाग्रेषु दर्भेषु पित्रे पितामहाय प्रपितामहाय मात्रे पितामह्यै प्रपितामह्यै नामगोत्राभ्यां च पिण्डनिर्वापणं कुर्यात् ॥ (२३।१)

पिण्डानां चानुलेपनपुष्पधूपनैवेद्यादि दद्यात् ॥ (२४।१)

उदककलशम् उपनिधाय स्वस्त्ययनं वाचयेत् ॥ (२५।१)

श्वकाकश्वपचानां भुवि निर्वपेत् ॥ (२६।१)

भिक्षां च दद्यात् ॥ (२७।१)

अतिथिधर्मअतिथिपूजने च परं यत्नम् आतिष्ठेत ॥ (२८।१)

सायम् अतिथिं प्राप्तं प्रयत्नेनार्चयेत् ॥ (२९।१)

अनाशितम् अतिथिं गृहे न वासयेत् ॥ (३०।१)

यथा वर्णानां ब्राह्मणः प्रभुर् यथा स्त्रीणां भर्ता तथा गृहस्थस्यातिथिः ॥ (३१।१)

तत्पूजया स्वर्गम् आप्नोति ॥ (३२।१)

अतिथिर् यस्य भग्नाशो गृहात् प्रतिनिवर्तते । (३३।१)

तस्मात् सुकृतम् आदाय दुष्कृतं तु प्रयच्छति ॥ (३३।२)

एकरात्रं हि निवसन्न् अतिथिर् ब्राह्मणः स्मृतः । (३४।१)

अतिथि:: निरुक्तिअनित्यं हि स्थितो यस्मात् तस्माद् अतिथिर् उच्यते ॥ (३४।२)

नैकग्रामीणम् अतिथिं विप्रं सांगतिकं तथा । (३५।१)

उपस्थितं गृहे विन्द्याद् भार्या यत्राग्नयो ऽपि वा ॥ (३५।२)

यदि त्व् अतिथिधर्मेण क्षत्रियो गृहम् आगतः । (३६।१)

भुक्तवत्सु च विप्रेषु कामं तम् अपि भोजयेत् ॥ (३६।२)

वैश्यशूद्राव् अपि प्राप्तौ कुटुम्बे ऽतिथिधर्मिणौ । (३७।१)

भोजयेत् सह भृत्यैस् ताव् आनृशंस्यं प्रयोजयन् ॥ (३७।२)

इतरान् अपि सख्यादीन् संप्रीत्या गृहम् आगतान् । (३८।१)

प्रकृतान्नं यथाशक्ति भोजयेत् सह भार्यया ॥ (३८।२)

स्ववासिनीं कुमारीं च रोगिणीं गुर्विणीं तथा । (३९।१)

अतिथिभ्यो ऽग्र एवैतान् भोजयेद् अविचारयन् ॥ (३९।२)

अदत्त्वा यस् तु एतेभ्यः पूर्वं भुङ्क्ते ऽविचक्षणः । (४०।१)

भुञ्जानो न स जानाति श्वगृध्रैर् जग्धिम् आत्मनः ॥ (४०।२)

भुक्तवत्सु च विप्रेषु स्वेषु भृत्येषु चैव हि । (४१।१)

भुञ्जीयातां ततः पश्चाद् अवशिष्टं तु दंपती ॥ (४१।२)

देवान् पितॄन् मनुष्यांश्च भृत्यान् गृह्याश्च देवताः । (४२।१)

पूजयित्वा ततः पश्चाद् गृहस्थः शेषभुग् भवेत् ॥ (४२।२)

अघं स केवलं भुङ्क्ते यः पचत्यात्मकारणात् । (४३।१)

यज्ञशिष्टाशनं ह्येतत् सताम् अन्नं विधीयते ॥ (४३।२)

स्वाध्यायेनाग्निहोत्रेण यज्ञेन तपसा तथा । (४४।१)

न चाप्नोति गृही लोकान् यथा त्व् अतिथिपूजनात् ॥ (४४।२)

सायं प्रातस् त्व् अतिथये प्रदद्याद् आसनोदके । (४५।१)

अन्नं चैव यथाशक्त्या सत्कृत्य विधिपूर्वकम् ॥ (४५।२)

प्रतिश्रयं तथा शय्यां पादाभ्यङ्गं सदीपकम् । (४६।१)

प्रत्येकदानेनाप्नोति गोप्रदानसमं फलम् ॥ (४६।२)