न नक्तं गृहीतेनोदकेन देवपितृकर्म कुर्यात् ॥ (१।१)

चन्दनमृगमददारुकर्पूरकुङ्कुमजातीफलवर्जम् अनुलेपनं न दद्यात् ॥ (२।१)

न वासो नीलीरक्तम् ॥ (३।१)

न मणिसुवर्णयोः प्रतिरूपम् अलंकरणम् ॥ (४।१)

नोग्रगन्धि ॥ (५।१)

नागन्धि ॥ (६।१)

न कण्टकिजम् ॥ (७।१)

कण्टकिजम् अपि शुक्लं सुगन्धिकं तु दद्यात् ॥ (८।१)

रक्तम् अपि कुङ्कुमं जलजं च दद्यात् ॥ (९।१)

न धूपार्थे जीवजातम् ॥ (१०।१)

न घृततैलं विना किंचन दीपार्थे ॥ (११।१)

नाभक्ष्यं नैवेद्यार्थे ॥ (१२।१)

न भक्ष्ये अप्यजामहिषीक्षीरे ॥ (१३।१)

पञ्चनखमत्स्यवराहमांसानि च ॥ (१४।१)

प्रयतश्च शुचिर् भूत्वा सर्वम् एव निवेदयेत् । (१५।१)

तन्मनाः सुमना भूत्वा त्वराक्रोधविवर्जितः ॥ (१५।२)