दृष्ट्वा श्रियं देवदेवस्य विष्णोर् गृहीतपादां तपसा ज्वलन्तीम् । (१।१)

सुतप्तजाम्बूनदचारुवर्णां पप्रच्छ देवीं वसुधा प्रहृष्टा ॥ (१।२)

उन्निद्रकोकनदचारुकरे वरेण्ये उन्निद्रकोकनदनाभिगृहीतपादे । (२।१)

उन्निद्रकोकनदसद्मसदास्थितीते उन्निद्रकोकनदमध्यसमानवर्णे ॥ (२।२)

नीलाब्जनेत्रे तपनीयवर्णे शुक्लाम्बरे रत्नविभूषिताङ्गि । (३।१)

चन्द्रानने सूर्यसमानभासे महाप्रभावे जगतः प्रधाने ॥ (३।२)

त्वम् एव निद्रा जगतः प्रधाना लक्ष्मीर् धृतिः श्रीर् विरतिर् जया च । (४।१)

कान्तिः प्रभा कीर्तिर् अथो विभूतिः सरस्वती वाग् अथ पावनी च ॥ (४।२)

स्वधा तितिक्षा वसुधा प्रतिष्ठा स्थितिः सुदीक्षा च तथा सुनीतिः । (५।१)

ख्यातिर् विशाला च तथानसूया स्वाहा च मेधा च तथैव बुद्धिः ॥ (५।२)

आक्रम्य सर्वं तु यथा त्रिलोकीं तिष्ठत्ययं देववरो ऽसिताक्षि । (६।१)

तथा स्थिता त्वं वरदे तथापि पृच्छाम्यहं ते वसतिं विभूतेः ॥ (६।२)

इत्येवम् उक्ता वसुधां बभाषे लक्ष्मीस् तदा देववराग्रतःस्था । (७।१)

सदा स्थिताहं मधुसूदनस्य देवस्य पार्श्वे तपनीयवर्णे ॥ (७।२)

अस्याज्ञया यं मनसा स्मरामि श्रिया युतं तं प्रवदन्ति सन्तः । (८।१)

संस्मारणे चाप्यथ यत्र चाहं स्थिता सदा तच्छृणु लोकधात्रि ॥ (८।२)

वसाम्यथार्के च निशाकरे च तारागणाढ्ये गगने विमेघे । (९।१)

मेघे तथा लम्बपयोधरे च शक्रायुधाढ्ये च तडित्प्रकाशे ॥ (९।२)

तथा सुवर्णे विमले च रूप्ये रत्नेषु वस्त्रेष्व् अमलेषु भूमे । (१०।१)

प्रासादमालासु च पाण्डुरासु देवालयेषु ध्वजभूषितेषु ॥ (१०।२)

सद्यः कृते चाप्यथ गोमये च मत्ते गजेन्द्रे तुरगे प्रहृष्टे । (११।१)

वृषे तथा दर्पसमन्विते च विप्रे तथैवाध्ययनप्रपन्ने ॥ (११।२)

सिंहासने चामलके च बिल्वे छत्रे च शङ्खे च तथैव पद्मे । (१२।१)

दीप्ते हुताशे विमले च खड्ग आदर्शबिम्बे च तथा स्थिताहम् ॥ (१२।२)

पूर्णोदकुम्भेषु सचामरेषु सतालवृन्तेषु विभूषितेषु । (१३।१)

भृङ्गारपात्रेषु मनोहरेषु मृदि स्थिताहं च नवोद्धृतायाम् ॥ (१३।२)

क्षीरे तथा सर्पिषि शाद्वले च क्षौद्रे तथा दध्नि पुरंध्रिगात्रे । (१४।१)

देहे कुमार्याश्च तथा सुराणां तपस्विनां यज्ञहुतां च देहे ॥ (१४।२)

शरे च संग्रामविनिर्गते च स्थिता मृते स्वर्गसदःप्रयाते । (१५।१)

वेदध्वनौ चाप्यथ शङ्खशब्दे स्वाहास्वधायाम् अथ वाद्यशब्दे ॥ (१५।२)

राज्याभिषेके च तथा विवाहे यज्ञे वरे स्नातशिरस्यथापि । (१६।१)

पुष्पेषु शुक्लेषु च पर्वतेषु फलेषु रम्येषु सरिद्वरासु ॥ (१६।२)

सरःसु पूर्णेषु तथा जलेषु सशाद्वलायां भुवि पद्मखण्डे । (१७।१)

वने च वत्से च शिशौ प्रहृष्टे साधौ नरे धर्मपरायणे च ॥ (१७।२)

आचारसेविन्यथ शास्त्रनित्ये विनीतवेषे च तथा सुवेषे । (१८।१)

सुशुद्धदान्ते मलवर्जिते च मृष्टाशने चातिथिपूजके च ॥ (१८।२)

स्वदारतुष्टे निरते च धर्मे धर्मोत्कटे चात्यशनाद् विमुक्ते । (१९।१)

सदा सपुष्पे ससुगन्धिगात्रे सुगन्धलिप्ते च विभूषिते च ॥ (१९।२)

सत्ये स्थिते भूतहिते निविष्टे क्षमान्विते क्रोधविवर्जिते च । (२०।१)

स्वकार्यदक्षे परकार्यदक्षे कल्याणचित्ते च सदा विनीते ॥ (२०।२)

नारीषु नित्यं सुविभूषितासु पतिव्रतासु प्रियवादिनीषु । (२१।१)

अमुक्तहस्तासु सुतान्वितासु सुगुप्तभाण्डासु बलिप्रियासु ॥ (२१।२)

संमृष्टवेश्मासु जितेन्द्रियासु कलिव्यपेतास्व् अविलोलुपासु । (२२।१)

धर्मव्यपेक्षासु दयान्वितासु स्थिता सदाहं मधुसूदने च ॥ (२२।२)

निमेषमात्रं च विना कृताहं न जातु तिष्ठे पुरुषोत्तमेन ॥ (२३।१)