अथोत्तमर्णो ऽधमर्णाद् यथादत्तम् अर्थं गृह्णीयात् ॥ (१।१)

द्विकं त्रिकं चतुष्कं पञ्चकं च शतं वर्णानुक्रमेण प्रतिमासम् ॥ (२।१)

सर्वे वर्णा वा स्वप्रतिपन्नां वृद्धिं दद्युः ॥ (३।१)

अकृताम् अपि वत्सरातिक्रमेण यथाविहितम् ॥ (४।१)

आध्युपभोगे वृद्ध्यभावः ॥ (५।१)

दैवराजोपघाताद् ऋते विनष्टम् आधिम् उत्तमर्णो दद्यात् ॥ (६।१)

अन्तवृद्धौ प्रविष्टायाम् अपि ॥ (७।१)

न स्थावरम् आधिम् ऋते वचनात् ॥ (८।१)

गृहीतधनप्रवेशार्थम् एव यत् स्थावरं दत्तं तत् गृहीतधनप्रवेशे दद्यात् ॥ (९।१)

दीयमानं प्रयुक्तम् अर्थम् उत्तमर्णस्यागृह्णतस् ततः परं न वर्धते ॥ (१०।१)

हिरण्यस्य परा वृद्धिर् द्विगुणा ॥ (११।१)

धान्यस्य त्रिगुणा ॥ (१२।१)

वस्त्रस्य चतुर्गुणा ॥ (१३।१)

रसस्याष्टगुणा ॥ (१४।१)

संततिः स्त्रीपशूनाम् ॥ (१५।१)

किण्वकार्पाससूत्रचर्मायुधेष्टकाङ्गाराणाम् अक्षया ॥ (१६।१)

अनुक्तानां द्विगुणा ॥ (१७।१)

प्रयुक्तम् अर्थं यथा कथंचित् साधयन् न राज्ञो वाच्यः स्यात् ॥ (१८।१)

साध्यमानश् चेद् राजानम् अभिगच्छेत् तत्समं दण्ड्यः ॥ (१९।१)

उत्तमर्णश् चेद् राजानम् इयात् तद्विभावितो ऽधमर्णो राज्ञे धनदशभागसंमितं दण्डं दद्यात् ॥ (२०।१)

प्राप्तार्थश् चोत्तमर्णो विंशतितमम् अंशम् ॥ (२१।१)

सर्वापलाप्य् एकदेशविभावितो ऽपि सर्वं दद्यात् ॥ (२२।१)

तस्य च भावनास् तिस्रो भवन्ति लिखितं साक्षिणः समयक्रिया च ॥ (२३।१)

ससाक्षिकम् आप्तं ससाक्षिकम् एव दद्यात् ॥ (२४।१)

लिखितार्थे प्रविष्टे लिखितं पाटयेत् ॥ (२५।१)

असमग्रदाने लेख्यासंनिधाने चोत्तमर्णः स्वलिखितं दद्यात् ॥ (२६।१)

धनग्राहिणि प्रेते प्रव्रजिते द्विदशाः समाः प्रवसिते वा तत्पुत्रपौत्रैर् धनं देयम् ॥ (२७।१)

नातः परम् अनिच्छुभिः ॥ (२८।१)

सपुत्रस्य वाप्य् अपुत्रस्य वा रिक्थग्राही ऋणं दद्यात् ॥ (२९।१)

निर्धनस्य स्त्रीग्राही ॥ (३०।१)

न स्त्री पतिपुत्रकृतम् ॥ (३१।१)

न स्त्रीकृतं पतिपुत्रौ ॥ (३२।१)

न पिता पुत्रकृतम् ॥ (३३।१)

अविभक्तैः कृतम् ऋणं यस् तिष्ठेत् स दद्यात् ॥ (३४।१)

पैतृकम् ऋणम् अविभक्तानां भ्रातॄणां च ॥ (३५।१)

विभक्ताश् च दायानुरूपम् अंशम् ॥ (३६।१)

गोपशौण्डिकशैलूषरजकव्याधस्त्रीणां पतिर् दद्यात् ॥ (३७।१)

वाक्प्रतिपन्नं नादेयं कस्यचित् ॥ (३८।१)

कुटुम्बार्थे कृतं च ॥ (३९।१)

यो गृहीत्वा ऋणं सर्वं श्वो दास्यामीति सामकम् । (४०।१)

न दद्याल्लोभतः पश्चात् तथा वृद्धिम् अवाप्नुयात् ॥ (४०।२)

दर्शने प्रत्यये दाने प्रातिभाव्यं विधीयते । (४१।१)

आद्यौ तु वितथे दाप्यावितरस्य सुता अपि ॥ (४१।२)

बहवश् चेत् प्रतिभुवो दद्युस् ते ऽर्थं यथाकृतम् । (४२।१)

अर्थे ऽविशेषिते त्व् एषु धनिकच्छन्दतः क्रिया ॥ (४२।२)

यम् अर्थं प्रतिभूर् दद्याद् धनिकेनोपपीडितः । (४३।१)

ऋणिकस् तं प्रतिभुवे द्विगुणं दातुम् अर्हति ॥ (४३।२)