अथाशौचव्यपगमे सुस्नातः सुप्रक्षालितपाणिपादः स्वाचान्तस् त्वेवंविधान् एव ब्राह्मणान् यथाशक्ति उदङ्मुखान् गन्धमाल्यवस्त्रालंकारादिभिः पूजितान् भोजयेत् ॥ (१।१)

एकवन्मन्त्रान् ऊहेद् एकोद्दिष्टे ॥ (२।१)

उच्छिष्टसंनिधावेकम् एव तन्नामगोत्राभ्यां पिण्डं निर्वपेत् ॥ (३।१)

भुक्तवत्सु ब्राह्मणेषु दक्षिणयाभिपूजितेषु प्रेतनामगोत्राभ्यां दत्ताक्षय्योदकः चतुरङ्गुलपृथ्वीः तावदन्तराः तावदधःखाताः वितस्त्यायताः तिस्रः कर्षूः कुर्यात् ॥ (४।१)

कर्षूसमीपे चाग्नित्रयम् उपसमाधाय परिस्तीर्य तत्रैकैकस्मिन् आहुतित्रयं जुहुयात् ॥ (५।१)

सोमाय पितृमते स्वधा नमः ॥ (६।१)

अग्नये कव्यवाहनाय स्वधा नमः ॥ (७।१)

यमायाङ्गिरसे स्वधा नमः ॥ (८।१)

स्थानत्रये च प्राग्वत् पिण्डनिर्वपणं कुर्यात् ॥ (९।१)

अन्नदधिघृतमधुमांसैः कर्षूत्रयं पूरयित्वा एतत् त इति जपेत् ॥ (१०।१)

एवं मृताहे प्रतिमासं कुर्यात् ॥ (११।१)

संवत्सरान्ते प्रेताय तत्पित्रे तत्पितामहाय तत्प्रपितामहाय च ब्राह्मणान् देवपूर्वान् भोजयेत् ॥ (१२।१)

अत्राग्नौकरणम् आवाहनं पाद्यं च कुर्यात् ॥ (१३।१)

संसृजतु त्वा पृथिवी समानी च इति च प्रेतपाद्यपात्रे पितृपाद्यपात्रत्रये योजयेत् ॥ (१४।१)

उच्छिष्टसंनिधौ पिण्डचतुष्टयं कुर्यात् ॥ (१५।१)

ब्राह्मणांश् च स्वाचान्तान् दत्तदक्षिणांश् चानुव्रज्य विसर्जयेत् ॥ (१६।१)

ततः प्रेतपिण्डं पाद्यपात्रोदकवत् पिण्डत्रये निदध्यात् ॥ (१७।१)

कर्षूत्रयसंनिकर्षे ऽप्येवम् एव ॥ (१८।१)

सपिण्डीकरणं मासिकार्थवत् द्वादशाहं श्राद्धं कृत्वा त्रयोदशे ऽह्नि वा कुर्यात् ॥ (१९।१)

मन्त्रवर्जं हि शूद्राणां द्वादशे ऽह्नि ॥ (२०।१)

संवत्सराभ्यन्तरे यद्यधिमासो भवेत् तदा मासिकार्थे दिनम् एकं वर्धयेत् ॥ (२१।१)

सपिण्डीकरणं स्त्रीणां कार्यम् एवं तथा भवेत् । (२२।१)

यावज्जीवं तथा कुर्याच्छ्राद्धं तु प्रतिवत्सरम् ॥ (२२।२)

अर्वाक् सपिण्डीकरणं यस्य संवत्सरात् कृतं । (२३।१)

तस्याप्यन्नं सोदकुम्भं दद्याद् वर्षं द्विजन्मने ॥ (२३।२)