wहेन् तो स्तुद्य्श्रावण्यां प्रौष्ठपद्यां वा छन्दांस्य् उपाकृत्यार्धपञ्चमान् मासान् अधीयीत ॥ (१।१)

ततस् तेषाम् उत्सर्गं बहिः कुर्यात् ॥ (२।१)

उत्सर्जनोपाकर्मणोर् मध्ये वेदाङ्गाध्ययनं कुर्यात् ॥ (३।१)

नाधीयीताहोरात्रं चतुर्दश्यष्टमीषु च ॥ (४।१)

नर्त्वन्तरग्रहसूतके ॥ (५।१)

नेन्द्रप्रयाणे ॥ (६।१)

न वाति चण्डपवने ॥ (७।१)

नाकालवर्षविद्युत्स्तनितेषु ॥ (८।१)

न भूकम्पोल्कापातदिग्दाहेषु ॥ (९।१)

नान्तःशवे ग्रामे ॥ (१०।१)

न शास्त्रसंपाते ॥ (११।१)

न श्वसृगालगर्दभनिर्ह्रादेषु ॥ (१२।१)

न वादित्रशब्दे ॥ (१३।१)

न शूद्रपतितयोः समीपे ॥ (१४।१)

न देवतायतनश्मशानचतुष्पथरथ्यासु ॥ (१५।१)

नोदकान्तः ॥ (१६।१)

न पीठोपहितपादः ॥ (१७।१)

न हस्त्यश्वोष्ट्रनौगोयानेषु ॥ (१८।१)

न वान्तः ॥ (१९।१)

न विरिक्तः ॥ (२०।१)

नाजीर्णी ॥ (२१।१)

न पञ्चनखान्तरागमने ॥ (२२।१)

न राजश्रोत्रियगोब्राह्मणव्यसने ॥ (२३।१)

नोपाकर्मणि ॥ (२४।१)

नोत्सर्गे ॥ (२५।१)

न सामध्वनाव् ऋग्यजुषी ॥ (२६।१)

नापररात्रम् अधीत्य शयीत ॥ (२७।१)

अभियुक्तो ऽप्यनध्यायेष्वध्ययनं परिहरेत् ॥ (२८।१)

यस्माद् अनध्यायाधीतं नेहामुत्र फलप्रदम् ॥ (२९।१)

तदध्ययनेनायुषः क्षयो गुरुशिष्ययोश्च ॥ (३०।१)

तस्माद् अनध्यायवर्जं गुरुणा ब्रह्मलोककामेन विद्या सत्शिष्यक्षेत्रेषु वप्तव्या ॥ (३१।१)

शिष्येण ब्रह्मारम्भावसानयोर् गुरोः पादोपसंग्रहणं कार्यम् ॥ (३२।१)

अध्ययन ॥ पितृतर्पणप्रणवश् च व्याहर्तव्यः ॥ (३३।१)

तत्र च यद् ऋचो ऽधीते तेनास्याज्येन पितॄणां तृप्तिर् भवति ॥ (३४।१)

यद् यजूंषि तेन मधुना ॥ (३५।१)

यत् सामानि तेन पयसा ॥ (३६।१)

यद् आथर्वणं तेन मांसेन ॥ (३७।१)

यत् पुराणेतिहासवेदाङ्गधर्मशास्त्राण्य् अधीते तेनास्यान्नेन ॥ (३८।१)

यश् च विद्याम् आसाद्यास्मिन् लोके तया जीवेत् न सा तस्य परलोके फलप्रदा भवेत् ॥ (३९।१)

यश् च विद्यया यशः परेषां हन्ति ॥ (४०।१)

अननुज्ञातश्चान्यस्माद् अधीयानान्न विद्याम् आदद्यात् ॥ (४१।१)

तदादानम् अस्य ब्रह्मस्तेयं नरकाय भवति ॥ (४२।१)

गुरु = ड़थेर्लौकिकं वैदिकं वापि तथाध्यात्मिकम् एव वा । (४३।१)

आददीत यतो ज्ञानं न तं द्रुह्येत् कदाचन ॥ (४३।२)

उत्पादकब्रह्मदात्रोर् गरीयान् ब्रह्मदः पिता । (४४।१)

ब्रह्मजन्म हि विप्रस्य प्रेत्य चेह च शाश्वतम् ॥ (४४।२)

कामान् माता पिता चैनं यद् उत्पादयतो मिथः । (४५।१)

संभूतिं तस्य तां विद्याद् यद् योनाविह जायते ॥ (४५।२)

आचार्यस् त्वस्य यां जातिं विधिवद् वेदपारगः । (४६।१)

उत्पादयति सावित्र्या सा सत्या साजरामरा ॥ (४६।२)

य आवृणोत्यवितथेन कर्णावदुःखं कुर्वन्न् अमृतं सम्प्रयच्छन् । (४७।१)

तं मन्येत पितरं मातरं च तस्मै न द्रुह्येत् कृतम् अस्य जानन् ॥ (४७।२)