राजर्त्विक्श्रोत्रियाधर्मप्रतिषेध्युपाध्यायपितृव्यमातामहमातुलश्वशुरज्येष्ठभ्रातृसंबन्धिनश् चाचार्यवत् ॥ (१।१)

पत्न्य एतेषां सवर्णाः ॥ (२।१)

मातृष्वसा पितृष्वसा ज्येष्ठा स्वसा च ॥ (३।१)

श्वशुरपितृव्यमातुलर्त्विजां कनीयसां प्रत्युत्थानम् एवाभिवादनम् ॥ (४।१)

हीनवर्णानां गुरुपत्नीनां दूराद् अभिवादनं न पादोपस्पर्शनम् ॥ (५।१)

गुरुपत्नीनां गोत्रोत्सादनाञ्जनकेशसंयमनपादप्रक्षालनादीनि न कुर्यात् ॥ (६।१)

असंस्तुतापि परपत्नी भगिनीति वाच्या पुत्रीति मातेति वा ॥ (७।१)

न च गुरूणां त्वम् इति ब्रूयात् ॥ (८।१)

तदतिक्रमे निराहारो दिवसान्ते तं प्रसाद्याश्नीयात् ॥ (९।१)

न च गुरुणा सह विगृह्य कथाः कुर्यात् ॥ (१०।१)

न चैवास्य परीवादम् ॥ (११।१)

न चानभिप्रेतम् ॥ (१२।१)

गुरुपत्नी तु युवतिर् नाभिवाद्येह पादयोः । (१३।१)

पूर्णविंशतिवर्षेण गुणदोषौ विजानता ॥ (१३।२)

कामं तु गुरुपत्नीनां युवतीनां युवा भुवि । (१४।१)

विधिवद् वन्दनं कुर्याद् असावहम् इति ब्रुवन् ॥ (१४।२)

विप्रोष्य पादग्रहणम् अन्वहं चाभिवादनम् । (१५।१)

गुरुदारेषु कुर्वीत सतां धर्मम् अनुस्मरन् ॥ (१५।२)

वित्तं बन्धुर् वयः कर्म विद्या भवति पञ्चमी । (१६।१)

एतानि मानस्थानानि गरीयो यद् यद् उत्तरम् ॥ (१६।२)

ब्राह्मणं दशवर्षं च शतवर्षं च भूमिपम् । (१७।१)

पितापुत्रौ विजानीयाद् ब्राह्मणस् तु तयोः पिता ॥ (१७।२)

विप्राणां ज्ञानतो ज्यैष्ठ्यं क्षत्रियाणां तु वीर्यतः । (१८।१)

वैश्यानां धान्यधनतः शूद्राणाम् एव जन्मतः ॥ (१८।२)