वने पर्णकुटीं कृत्वा वसेत् ॥ (१।१)

त्रिषवणं स्नायात् ॥ (२।१)

स्वकर्म चाचक्षाणो ग्रामे ग्रामे भैक्ष्यम् आचरेत् ॥ (३।१)

तृणशायी च स्यात् ॥ (४।१)

एतन्महाव्रतम् ॥ (५।१)

ब्राह्मणं हत्वा द्वादशसंवत्सरं कुर्यात् ॥ (६।१)

यागस्थं क्षत्रियं वैश्यं वा ॥ (७।१)

गुर्विणीं रजस्वलां वा ॥ (८।१)

अत्रिगोत्रां वा नारीम् ॥ (९।१)

मित्रं वा ॥ (१०।१)

नृपतिवधे महाव्रतम् एव द्विगुणं कुर्यात् ॥ (११।१)

पादोनं क्षत्रियवधे ॥ (१२।१)

अर्धं वैश्यवधे ॥ (१३।१)

तदर्धं शूद्रवधे ॥ (१४।१)

सर्वेषु शवशिरोध्वजी स्यात् ॥ (१५।१)

गोव्रतमासम् एकं कृतवापनो गवाम् अनुगमनं कुर्यात् ॥ (१६।१)

तास्व् आसीनास्व् आसीत ॥ (१७।१)

स्थितासु स्थितश् च स्यात् ॥ (१८।१)

सन्नां चोद्धरेत् ॥ (१९।१)

भयेभ्यश् च रक्षेत् ॥ (२०।१)

तासां शीतादित्राणम् अकृत्वा नात्मनः कुर्यात् ॥ (२१।१)

गोमूत्रेण स्नायात् ॥ (२२।१)

गोरसैश् च वर्तेत ॥ (२३।१)

एतद् गोव्रतं गोवधे कुर्यात् ॥ (२४।१)

पेनन्चे ड़ोर् किल्लिन्ग् दिड़्ड़्। अनिमल्स्गजं हत्वा पञ्च नीलवृषभान् दद्यात् ॥ (२५।१)

तुरगं वासः ॥ (२६।१)

एकहायनम् अनड्वाहं खरवधे ॥ (२७।१)

मेषाजवधे च ॥ (२८।१)

सुवर्णकृष्णलम् उष्ट्रवधे ॥ (२९।१)

श्वानं हत्वा त्रिरात्रम् उपवसेत् ॥ (३०।१)

हत्वा मूषकमार्जारनकुलमण्डूकडुण्डुभाजगराणाम् अन्यतमम् उपोषितः कृसरं ब्राह्मणं भोजयित्वा लोहदण्डं दक्षिणां दद्यात् ॥ (३१।१)

गोधोलूककाकझषवधे त्रिरात्रम् उपवसेत् ॥ (३२।१)

हंसबकबलाकामद्गुवानरश्येनभासचक्रवाकानाम् अन्यतमं हत्वा ब्राह्मणाय गां दद्यात् ॥ (३३।१)

सर्पं हत्वाभ्रीं कार्ष्णायसीं दद्यात् ॥ (३४।१)

षण्ढं हत्वा पलालभारकम् ॥ (३५।१)

वराहं हत्वा घृतकुम्भम् ॥ (३६।१)

तित्तिरिं तिलद्रोणम् ॥ (३७।१)

शुकं द्विहायनवत्सम् ॥ (३८।१)

क्रौञ्चं त्रिहायनम् ॥ (३९।१)

क्रव्यादमृगवधे पयस्विनीं गां दद्यात् ॥ (४०।१)

अक्रव्यादमृगवधे वत्सतरीम् ॥ (४१।१)

अनुक्तमृगवधे त्रिरात्रं पयसा वर्तेत ॥ (४२।१)

पक्षिवधे नक्ताशी स्यात् ॥ (४३।१)

रूप्यमाषं वा दद्यात् ॥ (४४।१)

हत्वा जलचरम् उपवसेत् ॥ (४५।१)

अस्थन्वतां तु सत्त्वानां सहस्रस्य प्रमापणे । (४६।१)

पूर्णे चानस्य् अनस्थ्नां तु शूद्रहत्याव्रतं चरेत् ॥ (४६।२)

किंचिद् एव तु विप्राय दद्याद् अस्थिमतां वधे । (४७।१)

अनस्थ्नां चैव हिंसायां प्राणायामेन शुध्यति ॥ (४७।२)

फलदानां तु वृक्षाणां छेदने जप्यम् ऋक्शतम् । (४८।१)

गुल्मवल्लीलतानां च पुष्पितानां च वीरुधाम् ॥ (४८।२)

अन्नाद्यजानां सत्त्वानां रसजानां च सर्वशः । (४९।१)

फलपुष्पोद्भवानां च घृतप्राशो विशोधनम् ॥ (४९।२)

कृष्टजानाम् ओषधीनां जातानां च स्वयं वने । (५०।१)

वृथालम्भे ऽनुगच्छेद् गां दिनम् एकम् पयोव्रतः ॥ (५०।२)