यः पापात्मा येन सह संयुज्यते स तस्यैव प्रायश्चित्तं कुर्यात् ॥ (१।१)

मृतपञ्चनखात् कूपाद् अत्यन्तोपहताच्चोदकं पीत्वा ब्राह्मणस् त्रिरात्रम् उपवसेत् ॥ (२।१)

द्व्यहं राजन्यः ॥ (३।१)

एकाहं वैश्यः ॥ (४।१)

शूद्रो नक्तम् ॥ (५।१)

सर्वे चान्ते व्रतस्य पञ्चगव्यं पिबेयुः ॥ (६।१)

पञ्चगव्यं पिबेच्छूद्रो ब्राह्मणस् तु सुरां पिबेत् । (७।१)

उभौ तौ नरकं यातो महारौरवसंज्ञितम् ॥ (७।२)

पर्वानारोग्यवर्जम् ऋताव् अवगच्छन् पत्नीं त्रिरात्रम् उपवसेत् ॥ (८।१)

कूटसाक्षी ब्रह्महत्याव्रतं चरेत् ॥ (९।१)

अनुदकमूत्रपुरीषकरणे सचैलं स्नानं महाव्याहृतिहोमश्च ॥ (१०।१)

सूर्याभ्युदितनिर्मुक्तः सचैलस्नातः सावित्र्यष्टशतम् आवर्तयेत् ॥ (११।१)

श्वसृगालविड्वराहखरवानरवायसपुंश्चलीभिर् दष्टः स्रवन्तीम् आसाद्य षोडश प्राणायामान् कुर्यात् ॥ (१२।१)

वेदाग्न्युत्सादी त्रिषवणस्नाय्यधःशायी संवत्सरं सकृद्भैक्ष्येण वर्तेत ॥ (१३।१)

समुत्कर्षानृते गुरोश्चालीकनिर्बन्धे तदाक्षेपणे च मासं पयसा वर्तेत ॥ (१४।१)

नास्तिको नास्तिकवृत्तिः कृतघ्नः कूटव्यवहारी ब्राह्मणवृत्तिघ्नश्चैते संवत्सरं भैक्ष्येण वर्तेरन् ॥ (१५।१)

परिवित्तिः परिवेत्ता च यया च परिविद्यते दाता याजकश्च चान्द्रायणं कुर्यात् ॥ (१६।१)

प्राणिभूपुण्यसोमविक्रयी तप्तकृच्छ्रम् ॥ (१७।१)

आर्द्रौषधिगन्धपुष्पफलमूलचर्मवेत्रविदलतुषकपालकेशभस्मास्थिगोरसपिण्याकतिलतैलविक्रयी प्राजापत्यम् ॥ (१८।१)

श्लेष्मजतुमधूच्छिष्टशङ्खशुक्तित्रपुसीसकृष्णलोहौदुम्बरखड्गपात्रविक्रयी चान्द्रायणं कुर्यात् ॥ (१९।१)

रक्तवस्त्ररङ्गरत्नगन्धगुडमधुरसोर्णाविक्रयी त्रिरात्रम् उपवसेत् ॥ (२०।१)

मांसलवणलाक्षाक्षीरविक्रयी चान्द्रायणं कुर्यात् ॥ (२१।१)

तं च भूयश्चोपनयेत् ॥ (२२।१)

उष्ट्रेण खरेण वा गत्वा नग्नः स्नात्वा सुप्त्वा भुक्त्वा प्राणायामत्रयम् कुर्यात् ॥ (२३।१)

जपित्वा त्रीणि सावित्र्याः सहस्राणि समाहितः । (२४।१)

मासं गोष्ठे पयः पीत्वा मुच्यते ऽसत्प्रतिग्रहात् ॥ (२४।२)

अयाज्ययाजनं कृत्वा परेषाम् अन्त्यकर्म च । (२५।१)

अभिचारम् अहीनं च त्रिभिः कृच्छ्रैर् व्यपोहति ॥ (२५।२)

येषां द्विजानां सावित्री नानूच्येत यथाविधि । (२६।१)

तांश्चारयित्वा त्रीन् कृच्छ्रान् यथाविध्युपनाययेत् ॥ (२६।२)

प्रायश्चित्तं चिकीर्षन्ति विकर्मस्थास् तु ये द्विजाः । (२७।१)

ब्राह्मण्याच्च परित्यक्तास् तेषाम् अप्येतद् आदिशेत् ॥ (२७।२)

यद् गर्हितेनार्जयन्ति कर्मणा ब्राह्मणा धनम् । (२८।१)

तस्योत्सर्गेण शुध्यन्ति जप्येन तपसा तथा ॥ (२८।२)

वेदोदितानां नित्यानां कर्मणां समतिक्रमे । (२९।१)

स्नातकव्रतलोपे च प्रायश्चित्तम् अभोजनम् ॥ (२९।२)

अवगूर्य चरेत् कृच्छ्रम् अतिकृच्छ्रं निपातने । (३०।१)

कृच्छ्रातिकृच्छ्रं कुर्वीत विप्रस्योत्पाद्य शोणितम् ॥ (३०।२)

एनस्विभिर् निर्णिक्तैर् नार्थं किंचित् समाचरेत् । (३१।१)

कृतनिर्णेजनांश्चैतान् न जुगुप्सेत धर्मवित् ॥ (३१।२)

बालघ्नांश्च कृतघ्नांश्च विशुद्धान् अपि धर्मतः । (३२।१)

शरणागतहन्तॄंश्च स्त्रीहन्तॄंश्च न संवसेत् ॥ (३२।२)

अशीतिर् यस्य वर्षाणि बालो वाप्य् ऊनषोडशः । (३३।१)

प्रायश्चित्तार्धम् अर्हन्ति स्त्रियो रोगिण एव च ॥ (३३।२)

अनुक्तनिष्कृतीनां तु पापानाम् अपनुत्तये । (३४।१)

शक्तिं चावेक्ष्य पापं च प्रायश्चित्तं प्रकल्पयेत् ॥ (३४।२)