ब्राह्मणस्य सपिण्डानां जननमरणयोर् दशाहम् आशौचम् ॥ (१।१)

द्वादशाहं राजन्यस्य ॥ (२।१)

पञ्चदशाहं वैश्यस्य ॥ (३।१)

मासं शूद्रस्य ॥ (४।१)

सपिण्डता च पुरुषे सप्तमे विनिवर्तते ॥ (५।१)

आशौचे होमदानप्रतिग्रहस्वाध्याया निवर्तन्ते ॥ (६।१)

नाशौचे कस्यचिद् अन्नम् अश्नीयात् ॥ (७।१)

ब्राह्मणादीनाम् अशौचे यः सकृद् एवान्नम् अत्ति तस्य तावद् आशौचं यावत् तेषाम् ॥ (८।१)

आशौचापगमे प्रायश्चित्तं कुर्यात् ॥ (९।१)

सवर्णस्याशौचे द्विजो भुक्त्वा स्रवन्तीम् आसाद्य तन्निमग्नस् त्रिरघमर्षणं जप्त्वोत्तीर्य गायत्र्यष्टसहस्रं जपेत् ॥ (१०।१)

क्षत्रियाशौचे ब्राह्मणस् त्वेतद् एवोपोषितः कृत्वा शुध्यति ॥ (११।१)

वैश्याशौचे राजन्यश्च ॥ (१२।१)

वैश्याशौचे ब्राह्मणस् त्रिरात्रोपोषितश् च ॥ (१३।१)

ब्राह्मणाशौचे राजन्यः क्षत्रियाशौचे वैश्यश्च स्रवन्तीम् आसाद्य गायत्रीशतपञ्चकं जपेत् ॥ (१४।१)

वैश्यश् च ब्राह्मणाशौचे गायत्र्यष्टशतं जपेत् ॥ (१५।१)

शूद्राशौचे द्विजो भुक्त्वा प्राजापत्यं चरेत् ॥ (१६।१)

शूद्रश् च द्विजाशौचे स्नानम् आचरेत् ॥ (१७।१)

शूद्रः शूद्राशौचे स्नातः पञ्चगव्यं पिबेत् ॥ (१८।१)

पत्नीनां दासानाम् आनुलोम्येन स्वामिनस् तुल्यम् आशौचम् ॥ (१९।१)

मृते स्वामिन्यात्मीयम् ॥ (२०।१)

हीनवर्णानाम् अधिकवर्णेषु सपिण्डेषु तदशौचव्यपगमे शुद्धिः ॥ (२१।१)

ब्राह्मणस्य क्षत्रिविट्शूद्रेषु सपिण्डेषु षड्रात्रत्रिरात्रैकरात्रैः ॥ (२२।१)

क्षत्रियस्य विट्शूद्रयोः षड्रात्रत्रिरात्राभ्याम् ॥ (२३।१)

वैश्यस्य शूद्रेषु षड्रात्रेण ॥ (२४।१)

मासतुल्यैर् अहोरात्रैर् गर्भस्रावे ॥ (२५।१)

जातमृते मृतजाते वा कुलस्य सद्यः शौचम् ॥ (२६।१)

अदन्तजाते बाले प्रेते सद्य एव ॥ (२७।१)

नास्याग्निसंस्कारो नोदकक्रिया ॥ (२८।१)

दन्तजाते त्वकृतचूडे त्वहोरात्रेण ॥ (२९।१)

कृतचूडे त्व् असंस्कृते त्रिरात्रेण ॥ (३०।१)

ततः परं यथोक्तकालेन ॥ (३१।१)

स्त्रीणां विवाहः संस्कारः ॥ (३२।१)

संस्कृतासु स्त्रीषु नाशौचं पितृपक्षे ॥ (३३।१)

तत्प्रसवमरणे चेत् पितृगृहे स्यातां तदा एकरात्रं त्रिरात्रं च ॥ (३४।१)

जननाशौचमध्ये यद्य् अपरं जननाशौचं स्यात् तदा पूर्वाशौचव्यपगमे शुद्धिः ॥ (३५।१)

रात्रिशेषे दिनद्वयेन ॥ (३६।१)

प्रभाते दिनत्रयेण ॥ (३७।१)

मरणाशौचमध्ये ज्ञातिमरणे ऽप्येवम् ॥ (३८।१)

श्रुत्वा देशान्तरस्थो जननमरणे आशौचशेषेण शुध्येत् ॥ (३९।१)

व्यतीते ऽशौचे संवत्सरान्तस् त्वेकरात्रेण ॥ (४०।१)

ततः परं स्नानेन ॥ (४१।१)

आचार्ये मातामहे च व्यतीते त्रिरात्रेण ॥ (४२।१)

अनौरसेषु पुत्रेषु जातेषु च मृतेषु च । (४३।१)

परपूर्वासु भार्यासु प्रसूतासु मृतासु च ॥ (४३।२)

आचार्यपत्नीपुत्रोपाध्यायमातुलश्वशुरश्वशुर्यसहाध्यायिशिष्येष्वतीतेष्व् एकरात्रेण ॥ (४४।१)

स्वदेशराजनि च ॥ (४५।१)

असपिण्डे स्ववेश्मनि मृते च ॥ (४६।१)

भृग्वग्न्यनाशकाम्बुसंग्रामविद्युन्नृपहतानां नाशौचम् ॥ (४७।१)

न राज्ञां राजकर्मणि ॥ (४८।१)

न व्रतिनां व्रते ॥ (४९।१)

न सत्त्रिणां सत्रे ॥ (५०।१)

न कारूणां कारुकर्मणि ॥ (५१।१)

न राजाज्ञाकारिणां तदिच्छया ॥ (५२।१)

न देवप्रतिष्ठाविवाहयोः पूर्वसंभृतयोः ॥ (५३।१)

न देशविभ्रमे ॥ (५४।१)

आपद्यपि च कष्टायाम् ॥ (५५।१)

आत्मत्यागिनः पतिताश् च नाशौचोदकभाजः ॥ (५६।१)

पतितस्य दासी मृते ऽह्नि पदा अपां घटम् अपवर्जयेत् ॥ (५७।१)

उद्बन्धनमृतस्य यः पाशं छिन्द्यात् स तप्तकृच्छ्रेण शुध्यति ॥ (५८।१)

आत्मत्यागिनां संस्कर्ता च ॥ (५९।१)

तदश्रुपातकारी च ॥ (६०।१)

सर्वस्यैव प्रेतस्य बान्धवैः सहाश्रुपातं कृत्वा स्नानेन ॥ (६१।१)

अकृते ऽस्थिसंचये सचैलस्नानेन ॥ (६२।१)

द्विजः शूद्रप्रेतानुगमनं कृत्वा स्रवन्तीम् आसाद्य तन्निमग्नः त्रिरघमर्षणं जप्त्वोत्तीर्य गायत्र्यष्टसहस्रं जपेत् ॥ (६३।१)

द्विजप्रेतस्याष्टशतम् ॥ (६४।१)

शूद्रः प्रेतानुगमनं कृत्वा स्नानम् आचरेत् ॥ (६५।१)

चिताधूमसेवने सर्वे वर्णाः स्नानम् आचरेयुः ॥ (६६।१)

मैथुने दुःस्वप्ने रुधिरोपगतकण्ठे वमनविरेकयोश् च ॥ (६७।१)

श्मश्रुकर्मणि कृते च ॥ (६८।१)

शवस्पृशं च स्पृष्ट्वा रजस्वलाचण्डालयूपांश् च ॥ (६९।१)

भक्ष्यवर्जं पञ्चनखशवं तदस्थिस्नेहं च ॥ (७०।१)

सर्वेष्व् एतेषु स्नानेषु वस्त्रं नाप्रक्षालितं बिभृयात् ॥ (७१।१)

रजस्वला चतुर्थे ऽह्नि स्नानाच्छुध्यति ॥ (७२।१)

रजस्वला हीनवर्णां रजस्वलां स्पृष्ट्वा न तावद् अश्नीयात् यावन् न शुद्धा ॥ (७३।१)

सवर्णाम् अधिकवर्णां वा स्पृष्ट्वा सद्यः स्नात्वा शुध्यति ॥ (७४।१)

क्षुत्वा सुप्त्वा भुक्त्वा भोजनाध्ययनेप्सुः पीत्वा स्नात्वा निष्ठीव्य वासः परिधाय रथ्याम् आक्रम्य मूत्रपुरीषं कृत्वा पञ्चनखास्थ्यस्नेहं स्पृष्ट्वा चाचमेत् ॥ (७५।१)

चण्डालम्लेच्छसंभाषणे च ॥ (७६।१)

नाभेर् अधस्तात् प्रबाहुषु च कायिकैर् मलैः सुराभिर् मद्यैश् चोपहतो मृत्तोयैस् तदङ्गं प्रक्षाल्य शुध्येत् ॥ (७७।१)

अन्यत्रोपहतो मृत्तोयैस् तदङ्गं प्रक्षाल्य स्नानेन ॥ (७८।१)

वक्त्रोपहतस् तूपोष्य स्नात्वा पञ्चगव्येन ॥ (७९।१)

दशनच्छदोपहतश् च ॥ (८०।१)

वसा शुक्रम् असृङ् मज्जा मूत्रं विट् कर्णविण्नखाः । (८१।१)

श्लेष्माश्रु दूषिका स्वेदो द्वादशैते नृणां मलाः ॥ (८१।२)

गौडी माध्वी च पैष्टी च विज्ञेया त्रिविधा सुरा । (८२।१)

यथैवैका तथा सर्वा न पातव्या द्विजातिभिः ॥ (८२।२)

माधूकम् ऐक्षवं टाङ्कं कौलं खार्जूरपानसे । (८३।१)

मृद्वीकारसमाध्वीके मैरेयं नारिकेलजम् ॥ (८३।२)

अमेध्यानि दशैतानि मद्यानि ब्राह्मणस्य च । (८४।१)

राजन्यश् चैव वैश्यश् च स्पृष्ट्वैतानि न दुष्यतः ॥ (८४।२)

गुरोः प्रेतस्य शिष्यस् तु पितृमेधं समाचरन् । (८५।१)

प्रेताहारैः समं तत्र दशरात्रेण शुध्यति ॥ (८५।२)

आचार्यं स्वम् उपाध्यायं पितरं मातरं गुरुम् । (८६।१)

निर्हृत्य तु व्रती प्रेतान् न व्रतेन वियुज्यते ॥ (८६।२)

आदिष्टी नोदकं कुर्याद् आ व्रतस्य समापनात् । (८७।१)

समाप्ते तूदकं कृत्वा त्रिरात्रेणैव शुध्यति ॥ (८७।२)

ज्ञानं तपो ऽग्निर् आहारो मृन्मनो वार्युपाञ्जनम् । (८८।१)

वायुः कर्मार्ककालौ च शुद्धिकर्तॄणि देहिनाम् ॥ (८८।२)

सर्वेषाम् एव शौचानाम् अन्नशौचं परं स्मृतम् । (८९।१)

यो ऽन्ने शुचिः स हि शुचिर् न मृद्वारिशुचिः शुचिः ॥ (८९।२)

क्षान्त्या शुध्यन्ति विद्वांसो दानेनाकार्यकारिणः । (९०।१)

प्रच्छन्नपापा जप्येन तपसा वेदवित्तमाः ॥ (९०।२)

मृत्तोयैः शुध्यते शोध्यं नदी वेगेन शुध्यति । (९१।१)

रजसा स्त्री मनोदुष्टा संन्यासेन द्विजोत्तमाः ॥ (९१।२)

अद्भिर् गात्राणि शुध्यन्ति मनः सत्येन शुध्यति । (९२।१)

विद्यातपोभ्यां भूतात्मा बुद्धिर् ज्ञानेन शुध्यति ॥ (९२।२)

एष शौचस्य ते प्रोक्तः शारीरस्य विनिर्णयः । (९३।१)

नानाविधानां द्रव्याणां शुद्धेः शृणु विनिर्णयम् ॥ (९३।२)