अथ नरकाः ॥ (१।१)

तामिस्रम् ॥ (२।१)

अन्धतामिस्रम् ॥ (३।१)

रौरवम् ॥ (४।१)

महारौरवम् ॥ (५।१)

कालसूत्रम् ॥ (६।१)

महानरकम् ॥ (७।१)

संजीवनम् ॥ (८।१)

अवीचि ॥ (९।१)

तपनम् ॥ (१०।१)

संप्रतापनम् ॥ (११।१)

संघातकम् ॥ (१२।१)

काकोलम् ॥ (१३।१)

कुड्मलम् ॥ (१४।१)

पूतिमृत्तिकम् ॥ (१५।१)

लोहशङ्कुः ॥ (१६।१)

ऋबीसम् ॥ (१७।१)

विषमपन्थाः ॥ (१८।१)

कण्टकशाल्मलिः ॥ (१९।१)

दीपनदी ॥ (२०।१)

असिपत्रवनम् ॥ (२१।१)

लोहचारकम् इति ॥ (२२।१)

एतेष्व् अकृतप्रायश्चित्ता अतिपातकिनः पर्यायेण कल्पं पच्यन्ते ॥ (२३।१)

महापातकिनो मन्वन्तरम् ॥ (२४।१)

अनुपातकिनश् च ॥ (२५।१)

उपपातकिनश् चतुर्युगम् ॥ (२६।१)

कृतसंकरीकरणाश् च संवत्सरसहस्रम् ॥ (२७।१)

कृतजातिभ्रंशकरणाश् च ॥ (२८।१)

कृतापात्रीकरणाश् च ॥ (२९।१)

कृतमलिनीकरणाश् च ॥ (३०।१)

प्रकीर्णपातकिनश् च बहून् वर्षपूगान् ॥ (३१।१)

कृतपातकिनः पापाः प्राणत्यागाद् अनन्तरम् । (३२।१)

याम्यं पन्थानम् आसाद्य दुःखम् अश्नन्ति दारुणम् ॥ (३२।२)

यमस्य पुरुषैर् घोरैः कृष्यमाणा यतस् ततः । (३३।१)

सकृच्छ्रेणानुकारेण नीयमानाश् च ते यथा ॥ (३३।२)

श्वभिः शृगालैः क्रव्यादैः काककङ्कबकादिभिः । (३४।१)

अग्नितुण्डैर् भक्ष्यमाणा भुजङ्गैर् वृश्चिकैस् तथा ॥ (३४।२)

अग्निना दह्यमानाश् च तुद्यमानाश् च कण्टकैः । (३५।१)

क्रकचैः पाट्यमानाश् च पीड्यमानाश् च तृष्णया ॥ (३५।२)

क्षुधया व्यथमानाश् च घोरैर् व्याघ्रगणैस् तथा । (३६।१)

पूयशोणितगन्धेन मूर्छमानाः पदे पदे ॥ (३६।२)

परान्नपानं लिप्सन्तस् ताड्यमानाश् च किंकरैः । (३७।१)

काककङ्कबकादीनां भीमानां सदृशाननैः ॥ (३७।२)

क्वचित् तैलेन क्वाथ्यन्ते ताड्यन्ते मुसलैः क्वचित् । (३८।१)

आयसीषु च वट्यन्ते शिलासु च तथा क्वचित् ॥ (३८।२)

क्वचिद् वान्तम् अथाश्नन्ति क्वचित् पूयम् असृक् क्वचित् । (३९।१)

क्वचिद् विष्ठां क्वचिन् मांसं पूयगन्धि सुदारुणम् ॥ (३९।२)

अन्धकारेषु तिष्ठन्ति दारुणेषु तथा क्वचित् । (४०।१)

क्रिमिभिर् भक्ष्यमाणाश् च वह्नितुण्डैः सुदारुणैः ॥ (४०।२)

क्वचिच्छीतेन बाध्यन्ते क्वचित् चामेध्यमध्यगाः । (४१।१)

परस्परम् अथाश्नन्ति क्वचित् प्रेताः सुदारुणाः ॥ (४१।२)

क्वचिद् भूतेन ताड्यन्ते लम्बमानास् तथा क्वचित् । (४२।१)

क्वचित् क्षिप्यन्ति बाणौघैर् उत्कृत्यन्ते तथा क्वचित् ॥ (४२।२)

कण्टेषु दत्तपादाश् च भुजङ्गाभोगवेष्टिताः । (४३।१)

पीड्यमानास् तथा यन्त्रैः कृष्यमाणाश् च जानुभिः ॥ (४३।२)

भग्नपृष्ठशिरोग्रीवाः सूचीकण्ठाः सुदारुणाः । (४४।१)

कूटागारप्रमाणैश् च शरीरैर् यातनाक्षमैः ॥ (४४।२)

एवं पातकिनः पापम् अनुभूय सुदुःखिताः । (४५।१)

तिर्यग्योनौ प्रपद्यन्ते दुःखानि विविधानि च ॥ (४५।२)