सुवर्णस्तेयकृद् राज्ञे कर्माचक्षाणो मुसलम् अर्पयेत् ॥ (१।१)

वधात् त्यागाद् वा प्रयतो भवति ॥ (२।१)

महाव्रतं द्वादशाब्दानि वा कुर्यात् ॥ (३।१)

निक्षेपापहारी च ॥ (४।१)

धान्यधनापहारी च कृच्छ्रम् अब्दम् ॥ (५।१)

मनुष्यस्त्रीकूपक्षेत्रवापीनाम् अपहारे चान्द्रायणम् ॥ (६।१)

द्रव्याणाम् अल्पसाराणां सांतपनम् ॥ (७।१)

भक्ष्यभोज्ययानशय्यासनपुष्पमूलफलानां पञ्चगव्यपानम् ॥ (८।१)

तृणकाष्ठद्रुमशुष्कान्नगुडवस्त्रचर्मामिषाणां त्रिरात्रम् उपवसेत् ॥ (९।१)

मणिमुक्ताप्रवालताम्ररजतायःकांस्यानां द्वादशाहं कणान् अश्नीयात् ॥ (१०।१)

कार्पासकीटजोर्णाद्यपहरणे त्रिरात्रं पयसा वर्तेत ॥ (११।१)

द्विशफैकशफापहरणे द्विरात्रम् उपवसेत् ॥ (१२।१)

पक्षिगन्धौषधिरज्जुवैदलानाम् अपहरणे दिनम् उपवसेत् ॥ (१३।१)

दत्त्वैवापहृतं द्रव्यं धनिकस्याप्य् उपायतः । (१४।१)

प्रायश्चित्तं ततः कुर्यात् कल्मषस्यापनुत्तये ॥ (१४।२)

यद् यत् परेभ्यस् त्व् आदद्यात् पुरुषस् तु निरङ्कुशः । (१५।१)

तेन तेन विहीनः स्याद् यत्र यत्राभिजायते ॥ (१५।२)

जीवितं धर्मकामौ च धने यस्मात् प्रतिष्ठितौ । (१६।१)

तस्मात् सर्वप्रयत्नेन धनहिंसां विवर्जयेत् ॥ (१६।२)

प्राणिहिंसापरो यस् तु धनहिंसापरस् तथा । (१७।१)

महद् दुःखम् अवाप्नोति धनहिंसापरस् तयोः ॥ (१७।२)