ब्राह्मणः क्षत्रियो वैश्यः शूद्रश् चेति वर्णाश् चत्वारः ॥ (१।१)

तेषाम् आद्या द्विजातयस् त्रयः ॥ (२।१)

तेषां निषेकाद्यः श्मशानान्तो मन्त्रवत् क्रियासमूहः ॥ (३।१)

तेषां च धर्माः ॥ (४।१)

ब्राह्मणस्याध्यापनम् ॥ (५।१)

क्षत्रियस्य शस्त्रनित्यता ॥ (६।१)

वैश्यस्य पशुपालनम् ॥ (७।१)

शूद्रस्य द्विजातिशुश्रूषा ॥ (८।१)

द्विजानां यजनाध्ययने ॥ (९।१)

अथैतेषां वृत्तयः ॥ (१०।१)

ब्राह्मणस्य याजनप्रतिग्रहौ ॥ (११।१)

क्षत्रियस्य क्षितित्राणम् ॥ (१२।१)

कृषिगोरक्षवाणिज्यकुसीदयोनिपोषणानि वैश्यस्य ॥ (१३।१)

शूद्रस्य सर्वशिल्पानि ॥ (१४।१)

आपद्य् अनन्तरा वृत्तिः ॥ (१५।१)

क्षमा सत्यम् दमः शौचं दानम् इन्द्रियसंयमः । (१६।१)

अहिंसा गुरुशुश्रूषा तीर्थानुसरणं दया ॥ (१६।२)

आर्जवं लोभशून्यत्वं देवब्राह्मणपूजनम् । (१७।१)

अनभ्यसूया च तथा धर्मः सामान्य उच्यते ॥ (१७।२)