अथ स्त्रीणां धर्माः ॥ (१।१)

भर्तुः समानव्रतचारित्वम् ॥ (२।१)

श्वश्रूश्वशुरगुरुदेवतातिथिपूजनम् ॥ (३।१)

सुसंस्कृतोपस्करता ॥ (४।१)

अमुक्तहस्तता ॥ (५।१)

सुगुप्तभाण्डता ॥ (६।१)

मूलक्रियास्वनभिरतिः ॥ (७।१)

मङ्गलाचारतत्परता ॥ (८।१)

भर्तरि प्रवसिते ऽप्रतिकर्मक्रिया ॥ (९।१)

परगृहेष्वनभिगमनम् ॥ (१०।१)

द्वारदेशगवाक्षेष्वनवस्थानम् ॥ (११।१)

सर्वकर्मस्वस्वतन्त्रता ॥ (१२।१)

बाल्ययौवनवार्द्धकेष्वपि पितृभर्तृपुत्राधीनता ॥ (१३।१)

मृते भर्तरि ब्रह्मचर्यं तदन्वारोहणं वा ॥ (१४।१)

नास्ति स्त्रीणां पृथग्यज्ञो न व्रतं नाप्युपोषितम् । (१५।१)

पतिं शुश्रूषते यत् तु तेन स्वर्गे महीयते ॥ (१५।२)

पत्यौ जीवति या योषिद् उपवासव्रतं चरेत् । (१६।१)

आयुः सा हरते भर्तुर् नरकं चैव गच्छति ॥ (१६।२)

मृते भर्तरि साध्वी स्त्री ब्रह्मचर्ये व्यवस्थिता । (१७।१)

स्वर्गं गच्छत्यपुत्रापि यथा ते ब्रह्मचारिणः ॥ (१७।२)