आदित्यसंक्रमणम् ॥ (१।१)

विषुवद्द्वयम् ॥ (२।१)

विशेषेणायनद्वयम् ॥ (३।१)

व्यतीपातः ॥ (४।१)

जन्मर्क्षम् ॥ (५।१)

अभ्युदयश्च ॥ (६।१)

एतांस् तु श्राद्धकालान् वै काम्यान् आह प्रजापतिः । (७।१)

श्राद्धम् एतेषु यद् दत्तं तद् आनन्त्याय कल्पते ॥ (७।२)

संध्यारात्र्योर् न कर्तव्यं श्राद्धं खलु विचक्षणैः । (८।१)

तयोर् अपि च कर्तव्यं यदि स्याद् राहुदर्शनम् ॥ (८।२)

राहुदर्शनदत्तं हि श्राद्धम् आचन्द्रतारकम् । (९।१)

गुणवत् सर्वकामीयं पितॄणाम् उपतिष्ठते ॥ (९।२)