अथातः सुस्नातः सुप्रक्षालितपाणिपादः स्वाचान्तो देवतार्चायां स्थले वा भगवन्तम् अनादिनिधनं वासुदेवम् अभ्यर्चयेत् ॥ (१।१)

अश्विनोः प्राणस् तौ त इति जीवादानं दत्त्वा युञ्जते मन इत्यनुवाकेनावाहनं कृत्वा जानुभ्यां पाणिभ्यां शिरसा च नमस्कारं कुर्यात् ॥ (२।१)

आपो हि ष्ठेति तिसृभिर् अर्घ्यं निवेदयेत् ॥ (३।१)

हिरण्यवर्णा इति चतसृभिः पाद्यम् ॥ (४।१)

शं न आपो धन्वन्या इत्याचमनीयम् ॥ (५।१)

इदम् आपः प्रवहतेति स्नानीयम् ॥ (६।१)

रथे अक्षेषु वृषभस्य वाजे इत्यनुलेपनालंकारौ ॥ (७।१)

युवा सुवासा इति वासः ॥ (८।१)

पुष्पावतीर् इति पुष्पम् ॥ (९।१)

धूर् असि धूर्वेति धूपम् ॥ (१०।१)

तेजो ऽसि शुक्रम् इति दीपम् ॥ (११।१)

दधिक्राव्ण इति मधुपर्कम् ॥ (१२।१)

हिरण्यगर्भ इत्यष्टाभिर् नैवेद्यम् ॥ (१३।१)

चामरं व्यजनं मात्रां छत्रं यानासने तथा । (१४।१)

सावित्रेणैव तत् सर्वं देवाय विनिवेदयेत् ॥ (१४।२)

एवम् अभ्यर्च्य तु जपेत् सूक्तं वै पौरुषं ततः । (१५।१)

तेनैव चाज्यं जुहुयाद् यदीच्छेच्छाश्वतं पदम् ॥ (१५।२)