अथ द्विजातीनां कनीनिकामूले प्राजापत्यं नाम तीर्थम् ॥ (१।१)

अङ्गुष्ठमूले ब्राह्मम् ॥ (२।१)

अङ्गुल्यग्रे दैवम् ॥ (३।१)

तर्जनीमूले पित्र्यम् ॥ (४।१)

अनग्न्युष्णाभिर् अफेनिलाभिः अशूद्रैककरावर्जिताभिर् अक्षाराभिर् अद्भिः शुचौ देशे स्वासीनो ऽन्तर्जानु प्राङ्मुखश्चोदङ्मुखो वा तन्मनाः सुमनाश्चाचामेत् ॥ (५।१)

ब्राह्मेण तीर्थेन त्रिर् आचामेत् ॥ (६।१)

द्विः प्रमृज्यात् ॥ (७।१)

खान्यद्भिर् मूर्धानं हृदयं स्पृशेत् ॥ (८।१)

हृत्कण्ठतालुगाभिश्च यथासंख्यं द्विजातयः । (९।१)

शुध्येरन् स्त्री च शूद्रश्च सकृत् स्पृष्टाभिर् अन्ततः ॥ (९।२)