गृही वलीपलितदर्शने वनाश्रयो भवेत् ॥ (१।१)

अपत्यस्य चापत्यदर्शने वा ॥ (२।१)

पुत्रेषु भार्यां निक्षिप्य तयानुगम्यमानो वा ॥ (३।१)

तत्राप्यग्नीन् उपचरेत् ॥ (४।१)

अफालकृष्टेन पञ्च यज्ञान् न हापयेत् ॥ (५।१)

स्वाध्यायं च न जह्यात् ॥ (६।१)

ब्रह्मचर्यं पालयेत् ॥ (७।१)

चर्मचीरवासाः स्यात् ॥ (८।१)

जटाश्मश्रुलोमनखांश्च बिभृयात् ॥ (९।१)

त्रिषवणस्नायी स्यात् ॥ (१०।१)

कपोतवृत्तिर् मासनिचयः संवत्सरनिचयो वा ॥ (११।१)

संवत्सरनिचयी पूर्वनिचितम् आश्वयुज्यां जह्यात् ॥ (१२।१)

ग्रामाद् आहृत्य वाश्नीयाद् अष्टौ ग्रासान् वने वसन् । (१३।१)

पुटेनैव पलाशेन पाणिना शकलेन वा ॥ (१३।२)