नरकाभिभूतदुःखानां तिर्यक्त्वम् उत्तीर्णानां मानुष्येषु लक्षणानि भवन्ति ॥ (१।१)

कुष्ठ्य् अतिपातकी ॥ (२।१)

ब्रह्महा यक्ष्मी ॥ (३।१)

सुरापः श्यावदन्तकः ॥ (४।१)

सुवर्णहारी कुनखी ॥ (५।१)

गुरुतल्पगो दुश्चर्मा ॥ (६।१)

पूतिनासः पिशुनः ॥ (७।१)

पूतिवक्त्रः सूचकः ॥ (८।१)

धान्यचोरो ऽङ्गहीनः ॥ (९।१)

मिश्रचोरो ऽतिरिक्ताङ्गः ॥ (१०।१)

अन्नापहारकस् त्वामयावी ॥ (११।१)

वागपहारको मूकः ॥ (१२।१)

वस्त्रापहारकः श्वित्री ॥ (१३।१)

अश्वापहारकः पङ्गुः ॥ (१४।१)

देवब्राह्मणाक्रोशको मूकः ॥ (१५।१)

लोलजिह्वो गरदः ॥ (१६।१)

उन्मत्तो ऽग्निदः ॥ (१७।१)

गुरोः प्रतिकूलो ऽपस्मारी ॥ (१८।१)

गोघ्नस् त्वन्धः ॥ (१९।१)

दीपापहारकश् च ॥ (२०।१)

काणश् च दीपनिर्वापकः ॥ (२१।१)

त्रपुचामरसीसकविक्रयी रजकः ॥ (२२।१)

एकशफविक्रयी मृगव्याधः ॥ (२३।१)

कुण्डाशी भगास्यः ॥ (२४।१)

घाण्टिकः स्तेनः ॥ (२५।१)

वार्द्धुषिको भ्रामरी ॥ (२६।१)

मृष्टाश्य् एकाकी वातगुल्मी ॥ (२७।१)

समयभेत्ता खल्वाटः ॥ (२८।१)

श्लीपद्य् अवकीर्णी ॥ (२९।१)

परवृत्तिघ्नो दरिद्रः ॥ (३०।१)

परपीडाकरो दीर्घरोगी ॥ (३१।१)

एवं कर्मविशेषेण जायन्ते लक्षणान्विताः । (३२।१)

रोगान्वितास् तथान्धाश् च कुब्जखञ्जैकलोचनाः ॥ (३२।२)

वामना बधिरा मूका दुर्बलाश् च तथापरे । (३३।१)

तस्मात् सर्वप्रयत्नेन प्रायश्चित्तं समाचरेत् ॥ (३३।२)