अथाधिदैवतम् । (१।१)

य एवासौ तपति तम् उद्गीथम् उपासीत । (१।२)

उद्यन् वा एष प्रजाभ्य उद्गायति । (१।३)

उद्यंस् तमो भयम् अपहन्ति । (१।४)

अपहन्ता ह वै भयस्य तमसो भवति य एवं वेद ॥ (१।५)

समान उ एवायं चासौ च । (२।१)

उष्णो ऽयम् उष्णो ऽसौ । (२।२)

स्वर इतीमम् आचक्षते स्वर इति प्रत्यास्वर इत्य् अमुम् । (२।३)

तस्माद् वा एतम् इमम् अमुं च उद्गीथम् उपासीत ॥ (२।४)

अथ खलु व्यानम् एवोद्गीथम् उपासीत । (३।१)

यद् वै प्राणिति स प्राणः । (३।२)

यद् अपानिति सो ऽपानः । (३।३)

अथ यः प्राणापानयोः संधिः स व्यानः । (३।४)

यो व्यानः सा वाक् । (३।५)

तस्माद् अप्राणन्न् अनपानन् वाचम् अभिव्याहरति ॥ (३।६)

या वाक् सर्क् । (४।१)

तस्माद् अप्राणन्न् अनपानन्न् ऋचम् अभिव्याहरति । (४।२)

यर्क् तत् साम । (४।३)

तस्माद् अप्राणन्न् अनपानन् साम गायति । (४।४)

यत् साम स उद्गीथः । (४।५)

तस्माद् अप्राणन्न् अनपानन्न् उद्गायति ॥ (४।६)

अतो यान्य् अन्यानि वीर्यवन्ति कर्माणि यथाग्नेर् मन्थनम् आजेः सरणं दृढस्य धनुष आयमनम् अप्राणन्न् अनपानंस् तानि करोति । (५।१)

एतस्य हेतोर् व्यानम् एवोद्गीथम् उपासीत ॥ (५।२)

अथ खलूद्गीथाक्षराण्य् उपासीत उद्गीथ इति । (६।१)

प्राण एवोत् । (६।२)

प्राणेन ह्य् उत्तिष्ठति । (६।३)

वाग् गीः । (६।४)

वाचो ह गिर इत्य् आचक्षते । (६।५)

अन्नं थम् । (६।६)

अन्ने हीदं सर्वं स्थितम् ॥ (६।७)

द्यौर् एवोत् । (७।१)

अन्तरिक्षं गीः । (७।२)

पृथिवी थम् । (७।३)

आदित्य एवोत् । (७।४)

वायुर् गीः । (७।५)

अग्निस् थम् । (७।६)

सामवेद एवोत् । (७।७)

यजुर्वेदो गीः । (७।८)

ऋग्वेदस् थम् । (७।९)

दुग्धे ऽस्मै वाग् दोहं यो वाचो दोहः । (७।१०)

अन्नवान् अन्नादो भवति । (७।११)

य एतान्य् एवं विद्वान् उद्गीथाक्षराण्य् उपास्त उद्गीथ इति ॥ (७।१२)

अथ खल्व् आशीः समृद्धिः । (८।१)

उपसरणानीत्य् उपासीत । (८।२)

येन साम्ना स्तोष्यन् स्यात् तत् सामोपधावेत् ॥ (८।३)

यस्याम् ऋचि ताम् ऋचं यद् आर्षेयं तम् ऋषिं यां देवताम् अभिष्टोष्यन् स्यात् तां देवताम् उपधावेत् ॥ (९।१)

येन छन्दसा स्तोष्यन् स्यात् तच् छन्द उपधावेत् । (१०।१)

येन स्तोमेन स्तोष्यमाणः स्यात् तं स्तोमम् उपधावेत् ॥ (१०।२)

यां दिशम् अभिष्टोष्यन् स्यात् तां दिशम् उपधावेत् ॥ (११।१)

आत्मानम् अन्तत उपसृत्य स्तुवीत कामं ध्यायन्न् अप्रमत्तः । (१२।१)

अभ्याशो ह यद् अस्मै स कामः स्मृध्येत यत्कामः स्तुवीतेति यत्कामः स्तुवीतेति ॥ (१२।२)