त्रयो धर्मस्कन्धाः । (१।१)

यज्ञो ऽध्ययनं दानम् इति प्रथमः । (१।२)

तप एव द्वितीयः । (१।३)

ब्रह्मचार्याचार्यकुलवासी तृतीयो ऽत्यन्तम् आत्मानम् आचार्यकुले ऽवसादयन् । (१।४)

सर्व एते पुण्यलोका भवन्ति । (१।५)

ब्रह्मसंस्थो ऽमृतत्वम् एति ॥ (१।६)

प्रजापतिर् लोकान् अभ्यतपत् । (२।१)

तेभ्यो ऽभितप्तेभ्यस् त्रयी विद्या सम्प्रास्रवत् । (२।२)

ताम् अभ्यतपत् । (२।३)

तस्या अभितप्ताया एतान्य् अक्षराणि संप्रस्र्वन्त भूर् भुवः स्वर् इति ॥ (२।४)

तान्य् अभ्यतपत् । (३।१)

तेभ्यो ऽभितप्तेभ्य ॐकारः सम्प्रास्रवत् । (३।२)

तद् यथा शङ्कुना सर्वाणि पर्णानि संतृण्णान्य् एवम् ॐकारेण सर्वा वाक् संतृण्णा । (३।३)

ॐकार एवेदं सर्वम् ॐकार एव इदं सर्वम् ॥ (३।४)