अथ यद् इदम् अस्मिन् ब्रह्मपुरे दहरं पुण्डरीकं वेश्म दहरो ऽस्मिन्न् अन्तराकाशः । (१।१)

तस्मिन् यद् अन्तस् तद् अन्वेष्टव्यं तद् वाव विजिज्ञासितव्यम् इति ॥ (१।२)

तं चेद् ब्रूयुर् यद् इदम् अस्मिन् ब्रह्मपुरे दहरं पुण्डरीकं वेश्म दहरो ऽस्मिन्न् अन्तराकाशः किं तद् अत्र विद्यते यद् अन्वेष्टव्यं यद् वाव विजिज्ञासितव्यम् इति । (२।१)

स ब्रूयात् ॥ (२।२)

यावान् वा अयम् आकाशस् तावान् एषो ऽन्तर्हृदय आकाशः । (३।१)

उभे ऽस्मिन् द्यावापृथिवी अन्तर् एव समाहिते । (३।२)

उभाव् अग्निश् च वायुश् च सूर्याचन्द्रमसाव् उभौ विद्युन् नक्षत्राणि । (३।३)

यच् चास्येहास्ति यच् च नास्ति सर्वं तद् अस्मिन् समाहितम् इति ॥ (३।४)

तं चेद् ब्रूयुर् अस्मिंश् चेदं ब्रह्मपुरे सर्वं समाहितं सर्वाणि च भूतानि सर्वे च कामा यद् एनज् जरा वाप्नोति प्रध्वंसते वा किं ततो ऽतिशिष्यत इति ॥ (४।१)

स ब्रूयात् । (५।१)

नास्य जरयैतज् जीर्यति न वधेनास्य हन्यते । (५।२)

एतत् सत्यं ब्रह्मपुरम् अस्मिन् कामाः समाहिताः । (५।३)

एष आत्मापहतपाप्मा विजरो विमृत्युर् विशोको विजिघत्सो ऽपिपासः सत्यकामः सत्यसंकल्पः । (५।४)

यथा ह्य् एवेह प्रजा अन्वाविशन्ति यथानुशासनम् । (५।५)

यं यम् अन्तम् अभिकामा भवन्ति यं जनपदं यं क्षेत्रभागं तं तम् एवोपजीवन्ति ॥ (५।६)

तद् यथेह कर्मजितो लोकः क्षीयत एवम् एवामुत्र पुण्यजितो लोकः क्षीयते । (६।१)

तद् य इहात्मानम् अननुविद्य व्रजन्त्य् एतांश् च सत्यान् कामांस् तेषां सर्वेषु लोकेष्व् अकामचारो भवति । (६।२)

अथ य इहात्मानम् अनिवुद्य व्रजन्त्य् एतंश् च सत्यान् कामांस् तेषां सर्वेषु लोकेषु कामचारो भवति ॥ (६।३)