अन्नम् अशितं त्रेधा विधीयते । (१।१)

तस्य यः स्थविष्ठो धातुस् तत् पुरीषं भवति । (१।२)

यो मध्यमस् तन् मांसम् । (१।३)

यो ऽणिष्ठस् तन् मनः ॥ (१।४)

आपः पीतास् त्रेधा विधीयन्ते । (२।१)

तासां यः स्थविष्ठो धातुस् तन् मूत्रं भवति । (२।२)

यो मध्यमस् तल् लोहितम् । (२।३)

यो ऽणिष्ठः स प्राणः ॥ (२।४)

तेजो ऽशितं त्रेधा विधीयते । (३।१)

तस्य यः स्थविष्ठो धातुस् तद् अस्थि भवति । (३।२)

यो मध्यमः स मज्जा । (३।३)

यो ऽणिष्ठः सा वाक् ॥ (३।४)

अन्नमयं हि सोम्य मनः । (४।१)

आपोमयः प्राणः । (४।२)

तेजोमयी वाग् इति । (४।३)

भूय एव मा भगवान् विज्ञापयत्व् इति । (४।४)

तथा सोम्येति होवाच ॥ (४।५)