प्राणो वाव आशाया भूयान् । (१।१)

यथा वा अरा नाभौ समर्पिता एवम् अस्मिन् प्राणे सर्वं समर्पितम् । (१।२)

प्राणः प्राणेन याति । (१।३)

प्राणः प्राणं ददाति । (१।४)

प्राणाय ददाति । (१।५)

प्राणो ह पिता । (१।६)

प्राणो माता । (१।७)

प्राणो भ्राता । (१।८)

प्राणः स्वसा । (१।९)

प्राण आचार्यः । (१।१०)

प्राणो ब्राह्मणः ॥ (१।११)

स यदि पितरं वा मातरं वा भ्रातरं वा स्वसारं वाचार्यं वा ब्राह्मणं वा किंचिद् भृशम् इव प्रत्याह । (२।१)

धिक् त्वास्त्व् इत्य् एवैनम् आहुः । (२।२)

पितृहा वै त्वम् असि मातृहा वै त्वम् असि भ्रातृहा वै त्वम् असि स्वसृहा वै त्वम् अस्य् आचार्यहा वै त्वम् असि ब्राह्मणहा वै त्वम् असीति ॥ (२।३)

अथ यद्य् अप्य् एनान् उत्क्रान्तप्राणाञ्छूलेन समासं व्यतिसंदहेत् । (३।१)

नैवैनं ब्रूयुः पितृहासीति न मातृहासीति न भ्रातृहासीति न स्वसृहासीति नाचार्यहासीति न ब्राह्मणहासीति ॥ (३।२)

प्राणो ह्य् एवैतानि सर्वाणि भवति । (४।१)

स वा एष एवं पश्यन्न् एवं मन्वान एवं विजानन्न् अतिवादी भवति । (४।२)

तं चेद् ब्रूयुर् अतिवाद्य् असीति । (४।३)

अतिवाद्य् अस्मीति ब्रूयात् । (४।४)

नापह्नुवीत ॥ (४।५)