विनर्दि साम्नो वृणे पशव्यम् इत्य् अग्नेर् उद्गीथः । (१।१)

अनिरुक्तः प्रजापतेः । (१।२)

निरुक्तः सोमस्य । (१।३)

मृदु श्लक्ष्णं वायोः । (१।४)

श्लक्ष्णं बलवद् इन्द्रस्य । (१।५)

क्रौञ्चं बृहस्पतेः । (१।६)

अपध्वान्तं वरुणस्य । (१।७)

तान् सर्वान् एवोपसेवेत । (१।८)

वारुणं त्व् एव वर्जयेत् ॥ (१।९)

अमृतत्वं देवेभ्य आगायानीत्यागायेत् । (२।१)

स्वधां पितृभ्य आशां मनुष्येभ्यस् तृणोदकं पशुभ्यः स्वर्गं लोकं यजमानायान्नम् आत्मन आगायानीत्य् एतानि मनसा ध्यायन्न् अप्रमत्तः स्तुवीत ॥ (२।२)

सर्वे स्वरा इन्द्रस्यात्मानः । (३।१)

सर्व ऊष्माणः प्रजापतेर् आत्मानः । (३।२)

सर्वे स्पर्शा मृत्योर् आत्मानः । (३।३)

तं यदि स्वरेषूपालभेत । (३।४)

इन्द्रं शरणं प्रपन्नो ऽभूवं स त्वा प्रतिवक्ष्यतीत्य् एनं ब्रूयात् ॥ (३।५)

अथ यद्य् एनम् ऊष्मसूपालभेत । (४।१)

प्रजापतिं शरणं प्रपन्नो ऽभूवं स त्वा प्रतिपेक्ष्यतीत्येनं ब्रूयात् । (४।२)

अथ यद्य् एनं स्पर्शेषूपालभेत । (४।३)

मृत्युं शरणं प्रपन्नो ऽभूवं स त्वा प्रतिधक्ष्यतीत्येनं ब्रूयात् ॥ (४।४)

सर्वे स्वरा घोषवन्तो बलवन्तो वक्तव्या इन्द्रे बलं ददानीति । (५।१)

सर्व ऊष्माणो ऽग्रस्ता अनिरस्ता विवृता वक्तव्याः प्रजापतेर् आत्मानं परिददानीति । (५।२)

सर्वे स्पर्शा लेशेनानभिनिहिता वक्तव्या मृत्योर् आत्मानं परिहराणीति ॥ (५।३)