प्रजापतिर् लोकान् अभ्यतपत् । (१।१)

तेषां तप्यमानानां रसान् प्रावृहत् । (१।२)

अग्निं पृथिव्याः । (१।३)

वायुम् अन्तरिक्षात् । (१।४)

आदित्यं दिवः ॥ (१।५)

स एतास् तिस्रो देवता अभ्यतपत् । (२।१)

तासां तप्यमानानां रसान् प्रावृहत् । (२।२)

अग्नेर् ऋचः । (२।३)

वायोर् यजूंषि । (२।४)

सामान्य् आदित्यात् ॥ (२।५)

स एतां त्रयीं विद्याम् अभ्यतपत् । (३।१)

तस्यास् तप्यमानाया रसान् प्रावृहत् । (३।२)

भूर् इत्य् ऋग्भ्यः । (३।३)

भुवर् इति यजुर्भ्यः । (३।४)

स्वर् इति सामभ्यः ॥ (३।५)

तद् यद्य् ऋक्तो रिष्येद् भूः स्वाहेति गार्हपत्ये जुहुयात् । (४।१)

ऋचाम् एव तद्रसेनर्चां वीर्येणर्चां यज्ञस्य विरिष्टं संदधाति ॥ (४।२)

अथ यदि यजुष्टो रिष्येद् भुवः स्वाहेति दक्षिणाग्नौ जुहुयात् । (५।१)

यजुषाम् एव तद्रसेन यजुषां वीर्येण यजुषां यज्ञस्य विरिष्टं संदधाति ॥ (५।२)

अथ यदि सामतो रिष्येत् स्वः स्वाहेत्य् आहवनीये जुहुयात् । (६।१)

साम्नाम् एव तद्रसेन साम्नां वीर्येण साम्नां यज्ञस्य विरिष्टं संदधाति ॥ (६।२)

तद् यथा लवणेन सुवर्णं संदध्यात् । (७।१)

सुवर्णेन रजतं रजतेन त्रपु त्रपुणा सीसं सीसेन लोहं लोहेन दारु दारु चर्मणा ॥ (७।२)

एवम् एषां लोकानाम् आसां देवतानाम् अस्यास् त्रय्या विद्याया वीर्येण यज्ञस्य विरिष्टं संदधाति । (८।१)

भेषजकृतो ह वा एष यज्ञो यत्रैवंविद् ब्रह्मा भवति ॥ (८।२)

एष ह वा उदक्प्रवणो यज्ञो यत्रैवंविद् ब्रह्मा भवति । (९।१)

एवंविदं ह वा एषा ब्रह्माणम् अनु गाथा । (९।२)

यतो यत आवर्तते तत् तद् गच्छति ॥ (९।३)

मानवः । (१०।१)

ब्रह्मैवैक ऋत्विक् कुरून् अश्वाभिरक्षति । (१०।२)

एवंविद्ध वै ब्रह्मा यज्ञं यजमानं सर्वांश् चर्त्विजो ऽभिरक्षति । (१०।३)

तस्माद् एवंविदम् एव ब्रह्माणं कुर्वीत नानेवंविदं नानेवंविदम् ॥ (१०।४)