वायुर् वाव संवर्गः । (१।१)

यदा वा अग्निर् उद्वायति वायुम् एवाप्येति । (१।२)

यदा सूर्यो ऽस्तम् एति वायुम् एवाप्येति । (१।३)

यदा चन्द्रो ऽस्तम् एति वायुम् एवाप्येति ॥ (१।४)

यदाप उच्छुष्यन्ति वायुम् एवापियन्ति । (२।१)

वायुर् ह्य् एवैतान् सर्वान् संवृङ्क्ते । (२।२)

इत्य् अधिदैवतम् ॥ (२।३)

अथाध्यात्मम् । (३।१)

प्राणो वाव संवर्गः । (३।२)

स यदा स्वपिति प्राणम् एव वाग् अप्येति । (३।३)

प्राणं चक्षुः । (३।४)

प्राणं श्रोत्रम् । (३।५)

प्राणं मनः । (३।६)

प्राणो ह्य् एवैतान् सर्वान् संवृङ्क्त इति ॥ (३।७)

तौ वा एतौ द्वौ संवर्गौ । (४।१)

वायुर् एव देवेषु प्राणः प्राणेषु ॥ (४।२)

अथ ह शौनकं च कापेयम् अभिप्रतारिणं च काक्षसेनिं परिविष्यमाणौ ब्रह्मचारी बिभिक्षे । (५।१)

तस्मा उ ह न ददतुः ॥ (५।२)

स होवाच । (६।१)

महात्मनश् चतुरो देव एकः कः स जगार भुवनस्य गोपाः । (६।२)

तं कापेय नाभिपश्यन्ति मर्त्या अभिप्रतारिन् बहुधा वसन्तम् । (६।३)

यस्मै वा एतद् अन्नं तस्मा एतन् न दत्तम् इति ॥ (६।४)

तद् उ ह शौनकः कापेयः प्रतिमन्वानः प्रत्येयाय । (७।१)

आत्मा देवानां जनिता प्रजानां हिरण्यदंष्ट्रो बभसो ऽनसूरिः । (७।२)

महान्तम् अस्य महिमानम् आहुर् अनद्यमानो यद् अनन्नम् अत्ति । (७।३)

इति वै वयम् ब्रह्मचारिन् नेदम् उपास्महे दत्तास्मै भिक्षाम् इति ॥ (७।४)

तस्मै उ ह ददुः । (८।१)

ते वा एते पञ्चान्ये पञ्चान्ये दश सन्तस् तत् कृतम् । (८।२)

तस्मात् सर्वासु दिक्ष्व् अन्नम् एव दश कृतम् । (८।३)

सैषा विराड् अन्नादी । (८।४)

तयेदं सर्वं दृष्टम् । (८।५)

सर्वम् अस्य इदं दृष्टं भवत्य् अन्नादो भवति य एवं वेद य एवं वेद ॥ (८।६)