Devatā देवता

1-3: Agni Vaiśvānara; 4-6: Agni, Maruts; 7, 8: Agni Or Ātmastuti Or Parabrahma; 9: Viśvāmitra Himself And The Preceptor

Ṛṣi ऋषि

Viśvāmitra Gāthina

Chandas छन्दस्

Jagatī, Triṣṭubh

1. Ṛk 1

   वै॒श्वा॒न॒रं मन॑सा॒ग्निं नि॒चाय्या॑ ह॒विष्मं॑तो अनुष॒त्यं स्व॒र्विदं॑ ।
   सु॒दानुं॑ दे॒वं र॑थि॒रं व॑सू॒यवो॑ गी॒र्भी र॒ण्वं कु॑शि॒कासो॑ हवामहे ॥

   वैश्वानरम् मनसाग्निं निचाय्या हविष्मन्तो अनुषत्यं स्वर्विदम् |
   सुदानुं देवं रथिरं वसूयवो गीर्भी रण्वं कुशिकासो हवामहे ||

   vaiśvānarám mánasāgním nicā́yyā havíṣmanto anuṣatyám svarvídam ǀ
   sudā́num devám rathirám vasūyávo gīrbhī́ raṇvám kuśikā́so havāmahe ǁ

   vaiśvānaram manasāgniṃ nicāyyā haviṣmanto anuṣatyaṃ svarvidam |
   sudānuṃ devaṃ rathiraṃ vasūyavo gīrbhī raṇvaṃ kuśikāso havāmahe ||

   वै॒श्वा॒न॒रम् । मन॑सा । अ॒ग्निम् । नि॒ऽचाय्य॑ । ह॒विष्म॑न्तः । अ॒नु॒ऽस॒त्यम् । स्वः॒ऽविद॑म् ।
   सु॒ऽदानु॑म् । दे॒वम् । र॒थि॒रम् । व॒सु॒ऽयवः॑ । गीः॒ऽभिः । र॒ण्वम् । कु॒शि॒कासः॑ । ह॒वा॒म॒हे॒ ॥

   वैश्वानरम् । मनसा । अग्निम् । निऽचाय्य । हविष्मन्तः । अनुऽसत्यम् । स्वःऽविदम् ।
   सुऽदानुम् । देवम् । रथिरम् । वसुऽयवः । गीःऽभिः । रण्वम् । कुशिकासः । हवामहे ॥

   vaiśvānarám ǀ mánasā ǀ agním ǀ ni-cā́yya ǀ havíṣmantaḥ ǀ anu-satyám ǀ svaḥ-vídam ǀ
   su-dā́num ǀ devám ǀ rathirám ǀ vasu-yávaḥ ǀ gīḥ-bhíḥ ǀ raṇvám ǀ kuśikā́saḥ ǀ havāmahe ǁ

   vaiśvānaram ǀ manasā ǀ agnim ǀ ni-cāyya ǀ haviṣmantaḥ ǀ anu-satyam ǀ svaḥ-vidam ǀ
   su-dānum ǀ devam ǀ rathiram ǀ vasu-yavaḥ ǀ gīḥ-bhiḥ ǀ raṇvam ǀ kuśikāsaḥ ǀ havāmahe ǁ

   3.26.1 Aṣṭaka 3.1.26.1Anuvāka 3.2.73Interpretations

2. Ṛk 2

   तं शु॒भ्रम॒ग्निमव॑से हवामहे वैश्वान॒रं मा॑त॒रिश्वा॑नमु॒क्थ्यं॑ ।
   बृह॒स्पतिं॒ मनु॑षो दे॒वता॑तये॒ विप्रं॒ श्रोता॑र॒मति॑थिं रघु॒ष्यदं॑ ॥

   तं शुभ्रम् अग्निम् अवसे हवामहे वैश्वानरम् मातरिश्वानम् उक्थ्यम् |
   बृहस्पतिम् मनुषो देवतातये विप्रं श्रोतारम् अतिथिं रघुष्यदम् ||

   tám śubhrámagnímávase havāmahe vaiśvānarám mātaríśvānamukthyám ǀ
   bṛ́haspátim mánuṣo devátātaye vípram śrótāramátithim raghuṣyádam ǁ

   taṃ śubhram agnim avase havāmahe vaiśvānaram mātariśvānam ukthyam |
   bṛhaspatim manuṣo devatātaye vipraṃ śrotāram atithiṃ raghuṣyadam ||

   तम् । शु॒भ्रम् । अ॒ग्निम् । अव॑से । ह॒वा॒म॒हे॒ । वै॒श्वा॒न॒रम् । मा॒त॒रिश्वा॑नम् । उ॒क्थ्य॑म् ।
   बृह॒स्पति॑म् । मनु॑षः । दे॒वऽता॑तये । विप्र॑म् । श्रोता॑रम् । अति॑थिम् । र॒घु॒ऽस्यद॑म् ॥

   तम् । शुभ्रम् । अग्निम् । अवसे । हवामहे । वैश्वानरम् । मातरिश्वानम् । उक्थ्यम् ।
   बृहस्पतिम् । मनुषः । देवऽतातये । विप्रम् । श्रोतारम् । अतिथिम् । रघुऽस्यदम् ॥

   tám ǀ śubhrám ǀ agním ǀ ávase ǀ havāmahe ǀ vaiśvānarám ǀ mātaríśvānam ǀ ukthyám ǀ
   bṛ́haspátim ǀ mánuṣaḥ ǀ devá-tātaye ǀ vípram ǀ śrótāram ǀ átithim ǀ raghu-syádam ǁ

   tam ǀ śubhram ǀ agnim ǀ avase ǀ havāmahe ǀ vaiśvānaram ǀ mātariśvānam ǀ ukthyam ǀ
   bṛhaspatim ǀ manuṣaḥ ǀ deva-tātaye ǀ vipram ǀ śrotāram ǀ atithim ǀ raghu-syadam ǁ

   3.26.2 Aṣṭaka 3.1.26.2Anuvāka 3.2.74Interpretations

3. Ṛk 3

   अश्वो॒ न क्रंदं॒जनि॑भिः॒ समि॑ध्यते वैश्वान॒रः कु॑शि॒केभि॑र्यु॒गेयु॑गे ।
   स नो॑ अ॒ग्निः सु॒वीर्यं॒ स्वश्व्यं॒ दधा॑तु॒ रत्न॑म॒मृते॑षु॒ जागृ॑विः ॥

   अश्वो न क्रन्दञ् जनिभिः सम् इध्यते वैश्वानरः कुशिकेभिर् युगे-युगे |
   स नो अग्निः सुवीर्यं स्वश्व्यं दधातु रत्नम् अमृतेषु जागृविः ||

   áśvo ná krándañjánibhiḥ sámidhyate vaiśvānaráḥ kuśikébhiryugéyuge ǀ
   sá no agníḥ suvī́ryam sváśvyam dádhātu rátnamamṛ́teṣu jā́gṛviḥ ǁ

   aśvo na krandañ janibhiḥ sam idhyate vaiśvānaraḥ kuśikebhir yuge-yuge |
   sa no agniḥ suvīryaṃ svaśvyaṃ dadhātu ratnam amṛteṣu jāgṛviḥ ||

   अश्वः॑ । न । क्रन्द॑न् । जनि॑ऽभिः । सम् । इ॒ध्य॒ते॒ । वै॒श्वा॒न॒रः । कु॒शि॒केभिः॑ । यु॒गेऽयु॑गे ।
   सः । नः॒ । अ॒ग्निः । सु॒ऽवीर्य॑म् । सु॒ऽअश्व्य॑म् । दधा॑तु । रत्न॑म् । अ॒मृते॑षु । जागृ॑विः ॥

   अश्वः । न । क्रन्दन् । जनिऽभिः । सम् । इध्यते । वैश्वानरः । कुशिकेभिः । युगेऽयुगे ।
   सः । नः । अग्निः । सुऽवीर्यम् । सुऽअश्व्यम् । दधातु । रत्नम् । अमृतेषु । जागृविः ॥

   áśvaḥ ǀ ná ǀ krándan ǀ jáni-bhiḥ ǀ sám ǀ idhyate ǀ vaiśvānaráḥ ǀ kuśikébhiḥ ǀ yugé-yuge ǀ
   sáḥ ǀ naḥ ǀ agníḥ ǀ su-vī́ryam ǀ su-áśvyam ǀ dádhātu ǀ rátnam ǀ amṛ́teṣu ǀ jā́gṛviḥ ǁ

   aśvaḥ ǀ na ǀ krandan ǀ jani-bhiḥ ǀ sam ǀ idhyate ǀ vaiśvānaraḥ ǀ kuśikebhiḥ ǀ yuge-yuge ǀ
   saḥ ǀ naḥ ǀ agniḥ ǀ su-vīryam ǀ su-aśvyam ǀ dadhātu ǀ ratnam ǀ amṛteṣu ǀ jāgṛviḥ ǁ

   3.26.3 Aṣṭaka 3.1.26.3Anuvāka 3.2.75Interpretations

4. Ṛk 4

   प्र यं॑तु॒ वाजा॒स्तवि॑षीभिर॒ग्नयः॑ शु॒भे सम्मि॑श्लाः॒ पृष॑तीरयुक्षत ।
   बृ॒ह॒दुक्षो॑ म॒रुतो॑ वि॒श्ववे॑दसः॒ प्र वे॑पयंति॒ पर्व॑ताँ॒ अदा॑भ्याः ॥

   प्र यन्तु वाजास् तविषीभिर् अग्नयः शुभे सम्मिश्लाः पृषतीर् अयुक्षत |
   बृहदुक्षो मरुतो विश्ववेदसः प्र वेपयन्ति पर्वतां अदाभ्याः ||

   prá yantu vā́jāstáviṣībhiragnáyaḥ śubhé sámmiślāḥ pṛ́ṣatīrayukṣata ǀ
   bṛhadúkṣo marúto viśvávedasaḥ prá vepayanti párvatām̐ ádābhyāḥ ǁ

   pra yantu vājās taviṣībhir agnayaḥ śubhe sammiślāḥ pṛṣatīr ayukṣata |
   bṛhadukṣo maruto viśvavedasaḥ pra vepayanti parvatāṃ adābhyāḥ ||

   प्र । य॒न्तु॒ । वाजाः॑ । तवि॑षीभिः । अ॒ग्नयः॑ । शु॒भे । सम्ऽमि॑श्लाः । पृष॑तीः । अ॒यु॒क्ष॒त॒ ।
   बृ॒ह॒त्ऽउक्षः॑ । म॒रुतः॑ । वि॒श्वऽवे॑दसः । प्र । वे॒प॒य॒न्ति॒ । पर्व॑तान् । अदा॑भ्याः ॥

   प्र । यन्तु । वाजाः । तविषीभिः । अग्नयः । शुभे । सम्ऽमिश्लाः । पृषतीः । अयुक्षत ।
   बृहत्ऽउक्षः । मरुतः । विश्वऽवेदसः । प्र । वेपयन्ति । पर्वतान् । अदाभ्याः ॥

   prá ǀ yantu ǀ vā́jāḥ ǀ táviṣībhiḥ ǀ agnáyaḥ ǀ śubhé ǀ sám-miślāḥ ǀ pṛ́ṣatīḥ ǀ ayukṣata ǀ
   bṛhat-úkṣaḥ ǀ marútaḥ ǀ viśvá-vedasaḥ ǀ prá ǀ vepayanti ǀ párvatān ǀ ádābhyāḥ ǁ

   pra ǀ yantu ǀ vājāḥ ǀ taviṣībhiḥ ǀ agnayaḥ ǀ śubhe ǀ sam-miślāḥ ǀ pṛṣatīḥ ǀ ayukṣata ǀ
   bṛhat-ukṣaḥ ǀ marutaḥ ǀ viśva-vedasaḥ ǀ pra ǀ vepayanti ǀ parvatān ǀ adābhyāḥ ǁ

   3.26.4 Aṣṭaka 3.1.26.4Anuvāka 3.2.76Interpretations

5. Ṛk 5

   अ॒ग्नि॒श्रियो॑ म॒रुतो॑ वि॒श्वकृ॑ष्टय॒ आ त्वे॒षमु॒ग्रमव॑ ईमहे व॒यं ।
   ते स्वा॒निनो॑ रु॒द्रिया॑ व॒र्षनि॑र्णिजः सिं॒हा न हे॒षक्र॑तवः सु॒दान॑वः ॥

   अग्निश्रियो मरुतो विश्वकृष्टय आ त्वेषम् उग्रम् अव ईमहे वयम् |
   ते स्वानिनो रुद्रिया वर्षनिर्णिजः सिंहा न हेषक्रतवः सुदानवः ||

   agniśríyo marúto viśvákṛṣṭaya ā́ tveṣámugrámáva īmahe vayám ǀ
   té svāníno rudríyā varṣánirṇijaḥ siṃhā́ ná heṣákratavaḥ sudā́navaḥ ǁ

   agniśriyo maruto viśvakṛṣṭaya ā tveṣam ugram ava īmahe vayam |
   te svānino rudriyā varṣanirṇijaḥ siṃhā na heṣakratavaḥ sudānavaḥ ||

   अ॒ग्नि॒ऽश्रियः॑ । म॒रुतः॑ । वि॒श्वऽकृ॑ष्टयः । आ । त्वे॒षम् । उ॒ग्रम् । अवः॑ । ई॒म॒हे॒ । व॒यम् ।
   ते । स्वा॒निनः॑ । रु॒द्रियाः॑ । व॒र्षऽनि॑र्निजः । सिं॒हाः । न । हे॒षऽक्र॑तवः । सु॒ऽदान॑वः ॥

   अग्निऽश्रियः । मरुतः । विश्वऽकृष्टयः । आ । त्वेषम् । उग्रम् । अवः । ईमहे । वयम् ।
   ते । स्वानिनः । रुद्रियाः । वर्षऽनिर्निजः । सिंहाः । न । हेषऽक्रतवः । सुऽदानवः ॥

   agni-śríyaḥ ǀ marútaḥ ǀ viśvá-kṛṣṭayaḥ ǀ ā́ ǀ tveṣám ǀ ugrám ǀ ávaḥ ǀ īmahe ǀ vayám ǀ
   té ǀ svānínaḥ ǀ rudríyāḥ ǀ varṣá-nirnijaḥ ǀ siṃhā́ḥ ǀ ná ǀ heṣá-kratavaḥ ǀ su-dā́navaḥ ǁ

   agni-śriyaḥ ǀ marutaḥ ǀ viśva-kṛṣṭayaḥ ǀ ā ǀ tveṣam ǀ ugram ǀ avaḥ ǀ īmahe ǀ vayam ǀ
   te ǀ svāninaḥ ǀ rudriyāḥ ǀ varṣa-nirnijaḥ ǀ siṃhāḥ ǀ na ǀ heṣa-kratavaḥ ǀ su-dānavaḥ ǁ

   3.26.5 Aṣṭaka 3.1.26.5Anuvāka 3.2.77Interpretations

6. Ṛk 6

   व्रातं॑व्रातं ग॒णंग॑णं सुश॒स्तिभि॑र॒ग्नेर्भामं॑ म॒रुता॒मोज॑ ईमहे ।
   पृष॑दश्वासो अनव॒भ्ररा॑धसो॒ गंता॑रो य॒ज्ञं वि॒दथे॑षु॒ धीराः॑ ॥

   व्रातं-व्रातं गणं-गणं सुशस्तिभिर् अग्नेर् भामम् मरुताम् ओज ईमहे |
   पृषदश्वासो अनवभ्रराधसो गन्तारो यज्ञं विदथेषु धीराः ||

   vrā́taṃvrātam gaṇáṃgaṇam suśastíbhiragnérbhā́mam marútāmója īmahe ǀ
   pṛ́ṣadaśvāso anavabhrárādhaso gántāro yajñám vidátheṣu dhī́rāḥ ǁ

   vrātaṃ-vrātaṃ gaṇaṃ-gaṇaṃ suśastibhir agner bhāmam marutām oja īmahe |
   pṛṣadaśvāso anavabhrarādhaso gantāro yajñaṃ vidatheṣu dhīrāḥ ||

   व्रात॑म्ऽव्रातम् । ग॒णम्ऽग॑णम् । सु॒श॒स्तिऽभिः॑ । अ॒ग्नेः । भाम॑म् । म॒रुता॑म् । ओजः॑ । ई॒म॒हे॒ ।
   पृष॑त्ऽअश्वासः । अ॒न॒व॒भ्रऽरा॑धसः । गन्ता॑रः । य॒ज्ञम् । वि॒दथे॑षु । धीराः॑ ॥

   व्रातम्ऽव्रातम् । गणम्ऽगणम् । सुशस्तिऽभिः । अग्नेः । भामम् । मरुताम् । ओजः । ईमहे ।
   पृषत्ऽअश्वासः । अनवभ्रऽराधसः । गन्तारः । यज्ञम् । विदथेषु । धीराः ॥

   vrā́tam-vrātam ǀ gaṇám-gaṇam ǀ suśastí-bhiḥ ǀ agnéḥ ǀ bhā́mam ǀ marútām ǀ ójaḥ ǀ īmahe ǀ
   pṛ́ṣat-aśvāsaḥ ǀ anavabhrá-rādhasaḥ ǀ gántāraḥ ǀ yajñám ǀ vidátheṣu ǀ dhī́rāḥ ǁ

   vrātam-vrātam ǀ gaṇam-gaṇam ǀ suśasti-bhiḥ ǀ agneḥ ǀ bhāmam ǀ marutām ǀ ojaḥ ǀ īmahe ǀ
   pṛṣat-aśvāsaḥ ǀ anavabhra-rādhasaḥ ǀ gantāraḥ ǀ yajñam ǀ vidatheṣu ǀ dhīrāḥ ǁ

   3.26.6 Aṣṭaka 3.1.27.1Anuvāka 3.2.78Interpretations

7. Ṛk 7

   अ॒ग्निर॑स्मि॒ जन्म॑ना जा॒तवे॑दा घृ॒तं मे॒ चक्षु॑र॒मृतं॑ म आ॒सन् ।
   अ॒र्कस्त्रि॒धातू॒ रज॑सो वि॒मानोऽज॑स्रो घ॒र्मो ह॒विर॑स्मि॒ नाम॑ ॥

   अग्निर् अस्मि जन्मना जातवेदा घृतम् मे चक्षुर् अमृतम् म आसन् |
   अर्कस् त्रिधातू रजसो विमानो ऽजस्रो घर्मो हविर् अस्मि नाम ||

   agnírasmi jánmanā jātávedā ghṛtám me cákṣuramṛ́tam ma āsán ǀ
   arkástridhā́tū rájaso vimā́nó’jasro gharmó havírasmi nā́ma ǁ

   agnir asmi janmanā jātavedā ghṛtam me cakṣur amṛtam ma āsan |
   arkas tridhātū rajaso vimāno 'jasro gharmo havir asmi nāma ||

   अ॒ग्निः । अ॒स्मि॒ । जन्म॑ना । जा॒तऽवे॑दाः । घृ॒तम् । मे॒ । चक्षुः॑ । अ॒मृत॑म् । मे॒ । आ॒सन् ।
   अ॒र्कः । त्रि॒ऽधातुः॑ । रज॑सः । वि॒ऽमानः॑ । अज॑स्रः । घ॒र्मः । ह॒विः । अ॒स्मि॒ । नाम॑ ॥

   अग्निः । अस्मि । जन्मना । जातऽवेदाः । घृतम् । मे । चक्षुः । अमृतम् । मे । आसन् ।
   अर्कः । त्रिऽधातुः । रजसः । विऽमानः । अजस्रः । घर्मः । हविः । अस्मि । नाम ॥

   agníḥ ǀ asmi ǀ jánmanā ǀ jātá-vedāḥ ǀ ghṛtám ǀ me ǀ cákṣuḥ ǀ amṛ́tam ǀ me ǀ āsán ǀ
   arkáḥ ǀ tri-dhā́tuḥ ǀ rájasaḥ ǀ vi-mā́naḥ ǀ ájasraḥ ǀ gharmáḥ ǀ havíḥ ǀ asmi ǀ nā́ma ǁ

   agniḥ ǀ asmi ǀ janmanā ǀ jāta-vedāḥ ǀ ghṛtam ǀ me ǀ cakṣuḥ ǀ amṛtam ǀ me ǀ āsan ǀ
   arkaḥ ǀ tri-dhātuḥ ǀ rajasaḥ ǀ vi-mānaḥ ǀ ajasraḥ ǀ gharmaḥ ǀ haviḥ ǀ asmi ǀ nāma ǁ

   3.26.7 Aṣṭaka 3.1.27.2Anuvāka 3.2.79Interpretations

8. Ṛk 8

   त्रि॒भिः प॒वित्रै॒रपु॑पो॒द्ध्य१॒॑र्कं हृ॒दा म॒तिं ज्योति॒रनु॑ प्रजा॒नन् ।
   वर्षि॑ष्ठं॒ रत्न॑मकृत स्व॒धाभि॒रादिद्द्यावा॑पृथि॒वी पर्य॑पश्यत् ॥

   त्रिभिः पवित्रैर् अपुपोद् ध्य् अर्कं हृदा मतिं ज्योतिर् अनु प्रजानन् |
   वर्षिष्ठं रत्नम् अकृत स्वधाभिर् आद् इद् द्यावापृथिवी पर्य् अपश्यत् ||

   tribhíḥ pavítrairápupoddhyárkám hṛdā́ matím jyótiránu prajānán ǀ
   várṣiṣṭham rátnamakṛta svadhā́bhirā́díddyā́vāpṛthivī́ páryapaśyat ǁ

   tribhiḥ pavitrair apupod dhy arkaṃ hṛdā matiṃ jyotir anu prajānan |
   varṣiṣṭhaṃ ratnam akṛta svadhābhir ād id dyāvāpṛthivī pary apaśyat ||

   त्रि॒ऽभिः । प॒वित्रैः॑ । अपु॑पोत् । हि । अ॒र्कम् । हृ॒दा । म॒तिम् । ज्योतिः॑ । अनु॑ । प्र॒ऽजा॒नन् ।
   वर्षि॑ष्ठम् । रत्न॑म् । अ॒कृ॒त॒ । स्व॒धाभिः॑ । आत् । इत् । द्यावा॑पृथि॒वी इति॑ । परि॑ । अ॒प॒श्य॒त् ॥

   त्रिऽभिः । पवित्रैः । अपुपोत् । हि । अर्कम् । हृदा । मतिम् । ज्योतिः । अनु । प्रऽजानन् ।
   वर्षिष्ठम् । रत्नम् । अकृत । स्वधाभिः । आत् । इत् । द्यावापृथिवी इति । परि । अपश्यत् ॥

   tri-bhíḥ ǀ pavítraiḥ ǀ ápupot ǀ hí ǀ arkám ǀ hṛdā́ ǀ matím ǀ jyótiḥ ǀ ánu ǀ pra-jānán ǀ
   várṣiṣṭham ǀ rátnam ǀ akṛta ǀ svadhā́bhiḥ ǀ ā́t ǀ ít ǀ dyā́vāpṛthivī́ íti ǀ pári ǀ apaśyat ǁ

   tri-bhiḥ ǀ pavitraiḥ ǀ apupot ǀ hi ǀ arkam ǀ hṛdā ǀ matim ǀ jyotiḥ ǀ anu ǀ pra-jānan ǀ
   varṣiṣṭham ǀ ratnam ǀ akṛta ǀ svadhābhiḥ ǀ āt ǀ it ǀ dyāvāpṛthivī iti ǀ pari ǀ apaśyat ǁ

   3.26.8 Aṣṭaka 3.1.27.3Anuvāka 3.2.80Interpretations

9. Ṛk 9

   श॒तधा॑र॒मुत्स॒मक्षी॑यमाणं विप॒श्चितं॑ पि॒तरं॒ वक्त्वा॑नां ।
   मे॒ळिं मदं॑तं पि॒त्रोरु॒पस्थे॒ तं रो॑दसी पिपृतं सत्य॒वाचं॑ ॥

   शतधारम् उत्सम् अक्षीयमाणं विपश्चितम् पितरं वक्त्वानाम् |
   मेऌइम् मदन्तम् पित्रोर् उपस्थे तं रोदसी पिपृतं सत्यवाचम् ||

   śatádhāramútsamákṣīyamāṇam vipaścítam pitáram váktvānām ǀ
   meḷím mádantam pitrórupásthe tám rodasī pipṛtam satyavā́cam ǁ

   śatadhāram utsam akṣīyamāṇaṃ vipaścitam pitaraṃ vaktvānām |
   meḷim madantam pitror upasthe taṃ rodasī pipṛtaṃ satyavācam ||

   श॒तऽधा॑रम् । उत्स॑म् । अक्षी॑यमाणम् । वि॒पः॒ऽचित॑म् । पि॒तर॑म् । वक्त्वा॑नाम् ।
   मे॒ळिम् । मद॑न्तम् । पि॒त्रोः । उ॒पऽस्थे॑ । तम् । रो॒द॒सी॒ इति॑ । पि॒पृ॒त॒म् । स॒त्य॒ऽवाच॑म् ॥

   शतऽधारम् । उत्सम् । अक्षीयमाणम् । विपःऽचितम् । पितरम् । वक्त्वानाम् ।
   मेळिम् । मदन्तम् । पित्रोः । उपऽस्थे । तम् । रोदसी इति । पिपृतम् । सत्यऽवाचम् ॥

   śatá-dhāram ǀ útsam ǀ ákṣīyamāṇam ǀ vipaḥ-cítam ǀ pitáram ǀ váktvānām ǀ
   meḷím ǀ mádantam ǀ pitróḥ ǀ upá-sthe ǀ tám ǀ rodasī íti ǀ pipṛtam ǀ satya-vā́cam ǁ

   śata-dhāram ǀ utsam ǀ akṣīyamāṇam ǀ vipaḥ-citam ǀ pitaram ǀ vaktvānām ǀ
   meḷim ǀ madantam ǀ pitroḥ ǀ upa-sthe ǀ tam ǀ rodasī iti ǀ pipṛtam ǀ satya-vācam ǁ

   3.26.9 Aṣṭaka 3.1.27.4Anuvāka 3.2.81Interpretations

Text, recitation and interpretations from the Ṛgveda database of theveda.org.in.