Devatā देवता

1: Viśvedevas, Uṣās; 2-10: Viśvedevas, Agni; 11: Viśvedevas, Ahorātrī; 12-14: Viśvedevas, Rodasī; 15: Viśvedevas, Rodasī Or Dyuniśa; 16: Viśvedevas, Diśaḥ; 17-22: Viśvedevas, Indra, Parjanyātmā, Tvaṣṭṛ

Ṛṣi ऋषि

Prajāpati Vācya Or Prajāpati Vaiśvāmitra

Chandas छन्दस्

Triṣṭubh

1. Ṛk 1

   उ॒षसः॒ पूर्वा॒ अध॒ यद्व्यू॒षुर्म॒हद्वि ज॑ज्ञे अ॒क्षरं॑ प॒दे गोः ।
   व्र॒ता दे॒वाना॒मुप॒ नु प्र॒भूष॑न्म॒हद्दे॒वाना॑मसुर॒त्वमेकं॑ ॥

   उषसः पूर्वा अध यद् व्यूषुर् महद् वि जज्ञे अक्षरम् पदे गोः |
   व्रता देवानाम् उप नु प्रभूषन् महद् देवानाम् असुरत्वम् एकम् ||

   uṣásaḥ pū́rvā ádha yádvyūṣúrmahádví jajñe akṣáram padé góḥ ǀ
   vratā́ devā́nāmúpa nú prabhū́ṣanmaháddevā́nāmasuratvámékam ǁ

   uṣasaḥ pūrvā adha yad vyūṣur mahad vi jajñe akṣaram pade goḥ |
   vratā devānām upa nu prabhūṣan mahad devānām asuratvam ekam ||

   उ॒षसः॑ । पूर्वाः॑ । अध॑ । यत् । वि॒ऽऊ॒षुः । म॒हत् । वि । ज॒ज्ञे॒ । अ॒क्षर॑म् । प॒दे । गोः ।
   व्र॒ता । दे॒वाना॑म् । उप॑ । नु । प्र॒ऽभूष॑न् । म॒हत् । दे॒वाना॑म् । अ॒सु॒र॒ऽत्वम् । एक॑म् ॥

   उषसः । पूर्वाः । अध । यत् । विऽऊषुः । महत् । वि । जज्ञे । अक्षरम् । पदे । गोः ।
   व्रता । देवानाम् । उप । नु । प्रऽभूषन् । महत् । देवानाम् । असुरऽत्वम् । एकम् ॥

   uṣásaḥ ǀ pū́rvāḥ ǀ ádha ǀ yát ǀ vi-ūṣúḥ ǀ mahát ǀ ví ǀ jajñe ǀ akṣáram ǀ padé ǀ góḥ ǀ
   vratā́ ǀ devā́nām ǀ úpa ǀ nú ǀ pra-bhū́ṣan ǀ mahát ǀ devā́nām ǀ asura-tvám ǀ ékam ǁ

   uṣasaḥ ǀ pūrvāḥ ǀ adha ǀ yat ǀ vi-ūṣuḥ ǀ mahat ǀ vi ǀ jajñe ǀ akṣaram ǀ pade ǀ goḥ ǀ
   vratā ǀ devānām ǀ upa ǀ nu ǀ pra-bhūṣan ǀ mahat ǀ devānām ǀ asura-tvam ǀ ekam ǁ

   3.55.1 Aṣṭaka 3.3.28.1Anuvāka 3.5.23Interpretations

2. Ṛk 2

   मो षू णो॒ अत्र॑ जुहुरंत दे॒वा मा पूर्वे॑ अग्ने पि॒तरः॑ पद॒ज्ञाः ।
   पु॒रा॒ण्योः सद्म॑नोः के॒तुरं॒तर्म॒हद्दे॒वाना॑मसुर॒त्वमेकं॑ ॥

   मो षू णो अत्र जुहुरन्त देवा मा पूर्वे अग्ने पितरः पदज्ञाः |
   पुराण्योः सद्मनोः केतुर् अन्तर् महद् देवानाम् असुरत्वम् एकम् ||

   mó ṣū́ ṇo átra juhuranta devā́ mā́ pū́rve agne pitáraḥ padajñā́ḥ ǀ
   purāṇyóḥ sádmanoḥ ketúrantármaháddevā́nāmasuratvámékam ǁ

   mo ṣū ṇo atra juhuranta devā mā pūrve agne pitaraḥ padajñāḥ |
   purāṇyoḥ sadmanoḥ ketur antar mahad devānām asuratvam ekam ||

   मो इति॑ । सु । नः॒ । अत्र॑ । जु॒हु॒र॒न्त॒ । दे॒वाः । मा । पूर्वे॑ । अ॒ग्ने॒ । पि॒तरः॑ । प॒द॒ऽज्ञाः ।
   पु॒रा॒ण्योः । सद्म॑नोः । के॒तुः । अ॒न्तः । म॒हत् । दे॒वाना॑म् । अ॒सु॒र॒ऽत्वम् । एक॑म् ॥

   मो इति । सु । नः । अत्र । जुहुरन्त । देवाः । मा । पूर्वे । अग्ने । पितरः । पदऽज्ञाः ।
   पुराण्योः । सद्मनोः । केतुः । अन्तः । महत् । देवानाम् । असुरऽत्वम् । एकम् ॥

   mó íti ǀ sú ǀ naḥ ǀ átra ǀ juhuranta ǀ devā́ḥ ǀ mā́ ǀ pū́rve ǀ agne ǀ pitáraḥ ǀ pada-jñā́ḥ ǀ
   purāṇyóḥ ǀ sádmanoḥ ǀ ketúḥ ǀ antáḥ ǀ mahát ǀ devā́nām ǀ asura-tvám ǀ ékam ǁ

   mo iti ǀ su ǀ naḥ ǀ atra ǀ juhuranta ǀ devāḥ ǀ mā ǀ pūrve ǀ agne ǀ pitaraḥ ǀ pada-jñāḥ ǀ
   purāṇyoḥ ǀ sadmanoḥ ǀ ketuḥ ǀ antaḥ ǀ mahat ǀ devānām ǀ asura-tvam ǀ ekam ǁ

   3.55.2 Aṣṭaka 3.3.28.2Anuvāka 3.5.24Interpretations

3. Ṛk 3

   वि मे॑ पुरु॒त्रा प॑तयंति॒ कामाः॒ शम्यच्छा॑ दीद्ये पू॒र्व्याणि॑ ।
   समि॑द्धे अ॒ग्नावृ॒तमिद्व॑देम म॒हद्दे॒वाना॑मसुर॒त्वमेकं॑ ॥

   वि मे पुरुत्रा पतयन्ति कामाः शम्य् अच्छा दीद्ये पूर्व्याणि |
   समिद्धे अग्नाव् ऋतम् इद् वदेम महद् देवानाम् असुरत्वम् एकम् ||

   ví me purutrā́ patayanti kā́māḥ śámyácchā dīdye pūrvyā́ṇi ǀ
   sámiddhe agnā́vṛtámídvadema maháddevā́nāmasuratvámékam ǁ

   vi me purutrā patayanti kāmāḥ śamy acchā dīdye pūrvyāṇi |
   samiddhe agnāv ṛtam id vadema mahad devānām asuratvam ekam ||

   वि । मे॒ । पु॒रु॒ऽत्रा । प॒त॒य॒न्ति॒ । कामाः॑ । शमि॑ । अच्छ॑ । दी॒द्ये॒ । पू॒र्व्याणि॑ ।
   सम्ऽइ॑द्धे । अ॒ग्नौ । ऋ॒तम् । इत् । व॒दे॒म॒ । म॒हत् । दे॒वाना॑म् । अ॒सु॒र॒ऽत्वम् । एक॑म् ॥

   वि । मे । पुरुऽत्रा । पतयन्ति । कामाः । शमि । अच्छ । दीद्ये । पूर्व्याणि ।
   सम्ऽइद्धे । अग्नौ । ऋतम् । इत् । वदेम । महत् । देवानाम् । असुरऽत्वम् । एकम् ॥

   ví ǀ me ǀ puru-trā́ ǀ patayanti ǀ kā́māḥ ǀ śámi ǀ áccha ǀ dīdye ǀ pūrvyā́ṇi ǀ
   sám-iddhe ǀ agnáu ǀ ṛtám ǀ ít ǀ vadema ǀ mahát ǀ devā́nām ǀ asura-tvám ǀ ékam ǁ

   vi ǀ me ǀ puru-trā ǀ patayanti ǀ kāmāḥ ǀ śami ǀ accha ǀ dīdye ǀ pūrvyāṇi ǀ
   sam-iddhe ǀ agnau ǀ ṛtam ǀ it ǀ vadema ǀ mahat ǀ devānām ǀ asura-tvam ǀ ekam ǁ

   3.55.3 Aṣṭaka 3.3.28.3Anuvāka 3.5.25Interpretations

4. Ṛk 4

   स॒मा॒नो राजा॒ विभृ॑तः पुरु॒त्रा शये॑ श॒यासु॒ प्रयु॑तो॒ वनानु॑ ।
   अ॒न्या व॒त्सं भर॑ति॒ क्षेति॑ मा॒ता म॒हद्दे॒वाना॑मसुर॒त्वमेकं॑ ॥

   समानो राजा विभृतः पुरुत्रा शये शयासु प्रयुतो वनानु |
   अन्या वत्सम् भरति क्षेति माता महद् देवानाम् असुरत्वम् एकम् ||

   samānó rā́jā víbhṛtaḥ purutrā́ śáye śayā́su práyuto vánā́nu ǀ
   anyā́ vatsám bhárati kṣéti mātā́ maháddevā́nāmasuratvámékam ǁ

   samāno rājā vibhṛtaḥ purutrā śaye śayāsu prayuto vanānu |
   anyā vatsam bharati kṣeti mātā mahad devānām asuratvam ekam ||

   स॒मा॒नः । राजा॑ । विऽभृ॑तः । पु॒रु॒ऽत्रा । शये॑ । श॒यासु॑ । प्रऽयु॑तः । वना॑ । अनु॑ ।
   अ॒न्या । व॒त्सम् । भर॑ति । क्षेति॑ । मा॒ता । म॒हत् । दे॒वाना॑म् । अ॒सु॒र॒ऽत्वम् । एक॑म् ॥

   समानः । राजा । विऽभृतः । पुरुऽत्रा । शये । शयासु । प्रऽयुतः । वना । अनु ।
   अन्या । वत्सम् । भरति । क्षेति । माता । महत् । देवानाम् । असुरऽत्वम् । एकम् ॥

   samānáḥ ǀ rā́jā ǀ ví-bhṛtaḥ ǀ puru-trā́ ǀ śáye ǀ śayā́su ǀ prá-yutaḥ ǀ vánā ǀ ánu ǀ
   anyā́ ǀ vatsám ǀ bhárati ǀ kṣéti ǀ mātā́ ǀ mahát ǀ devā́nām ǀ asura-tvám ǀ ékam ǁ

   samānaḥ ǀ rājā ǀ vi-bhṛtaḥ ǀ puru-trā ǀ śaye ǀ śayāsu ǀ pra-yutaḥ ǀ vanā ǀ anu ǀ
   anyā ǀ vatsam ǀ bharati ǀ kṣeti ǀ mātā ǀ mahat ǀ devānām ǀ asura-tvam ǀ ekam ǁ

   3.55.4 Aṣṭaka 3.3.28.4Anuvāka 3.5.26Interpretations

5. Ṛk 5

   आ॒क्षित्पूर्वा॒स्वप॑रा अनू॒रुत्स॒द्यो जा॒तासु॒ तरु॑णीष्वं॒तः ।
   अं॒तर्व॑तीः सुवते॒ अप्र॑वीता म॒हद्दे॒वाना॑मसुर॒त्वमेकं॑ ॥

   आक्षित् पूर्वास्व् अपरा अनूरुत् सद्यो जातासु तरुणीष्व् अन्तः |
   अन्तर्वतीः सुवते अप्रवीता महद् देवानाम् असुरत्वम् एकम् ||

   ākṣítpū́rvāsváparā anūrútsadyó jātā́su táruṇīṣvantáḥ ǀ
   antárvatīḥ suvate ápravītā maháddevā́nāmasuratvámekam ǁ

   ākṣit pūrvāsv aparā anūrut sadyo jātāsu taruṇīṣv antaḥ |
   antarvatīḥ suvate apravītā mahad devānām asuratvam ekam ||

   आ॒ऽक्षित् । पूर्वा॑सु । अप॑राः । अ॒नू॒रुत् । स॒द्यः । जा॒तासु॑ । तरु॑णीषु । अ॒न्तरिति॑ ।
   अ॒न्तःऽव॑तीः । सु॒व॒ते॒ । अप्र॑ऽवीताः । म॒हत् । दे॒वाना॑म् । अ॒सु॒र॒ऽत्वम् । एक॑म् ॥

   आऽक्षित् । पूर्वासु । अपराः । अनूरुत् । सद्यः । जातासु । तरुणीषु । अन्तरिति ।
   अन्तःऽवतीः । सुवते । अप्रऽवीताः । महत् । देवानाम् । असुरऽत्वम् । एकम् ॥

   ā-kṣít ǀ pū́rvāsu ǀ áparāḥ ǀ anūrút ǀ sadyáḥ ǀ jātā́su ǀ táruṇīṣu ǀ antáríti ǀ
   antáḥ-vatīḥ ǀ suvate ǀ ápra-vītāḥ ǀ mahát ǀ devā́nām ǀ asura-tvám ǀ ékam ǁ

   ā-kṣit ǀ pūrvāsu ǀ aparāḥ ǀ anūrut ǀ sadyaḥ ǀ jātāsu ǀ taruṇīṣu ǀ antariti ǀ
   antaḥ-vatīḥ ǀ suvate ǀ apra-vītāḥ ǀ mahat ǀ devānām ǀ asura-tvam ǀ ekam ǁ

   3.55.5 Aṣṭaka 3.3.28.5Anuvāka 3.5.27Interpretations

6. Ṛk 6

   श॒युः प॒रस्ता॒दध॒ नु द्वि॑मा॒ताबं॑ध॒नश्च॑रति व॒त्स एकः॑ ।
   मि॒त्रस्य॒ ता वरु॑णस्य व्र॒तानि॑ म॒हद्दे॒वाना॑मसुर॒त्वमेकं॑ ॥

   शयुः परस्ताद् अध नु द्विमाताबन्धनश् चरति वत्स एकः |
   मित्रस्य ता वरुणस्य व्रतानि महद् देवानाम् असुरत्वम् एकम् ||

   śayúḥ parástādádha nú dvimātā́bandhanáścarati vatsá ékaḥ ǀ
   mitrásya tā́ váruṇasya vratā́ni maháddevā́nāmasuratvámékam ǁ

   śayuḥ parastād adha nu dvimātābandhanaś carati vatsa ekaḥ |
   mitrasya tā varuṇasya vratāni mahad devānām asuratvam ekam ||

   श॒युः । प॒रस्ता॑त् । अध॑ । नु । द्वि॒ऽमा॒ता । अ॒ब॒न्ध॒नः । च॒र॒ति॒ । व॒त्सः । एकः॑ ।
   मि॒त्रस्य॑ । ता । वरु॑णस्य । व्र॒तानि॑ । म॒हत् । दे॒वाना॑म् । अ॒सु॒र॒ऽत्वम् । एक॑म् ॥

   शयुः । परस्तात् । अध । नु । द्विऽमाता । अबन्धनः । चरति । वत्सः । एकः ।
   मित्रस्य । ता । वरुणस्य । व्रतानि । महत् । देवानाम् । असुरऽत्वम् । एकम् ॥

   śayúḥ ǀ parástāt ǀ ádha ǀ nú ǀ dvi-mātā́ ǀ abandhanáḥ ǀ carati ǀ vatsáḥ ǀ ékaḥ ǀ
   mitrásya ǀ tā́ ǀ váruṇasya ǀ vratā́ni ǀ mahát ǀ devā́nām ǀ asura-tvám ǀ ékam ǁ

   śayuḥ ǀ parastāt ǀ adha ǀ nu ǀ dvi-mātā ǀ abandhanaḥ ǀ carati ǀ vatsaḥ ǀ ekaḥ ǀ
   mitrasya ǀ tā ǀ varuṇasya ǀ vratāni ǀ mahat ǀ devānām ǀ asura-tvam ǀ ekam ǁ

   3.55.6 Aṣṭaka 3.3.29.1Anuvāka 3.5.28Interpretations

7. Ṛk 7

   द्वि॒मा॒ता होता॑ वि॒दथे॑षु स॒म्राळन्वग्रं॒ चर॑ति॒ क्षेति॑ बु॒ध्नः ।
   प्र रण्या॑नि रण्य॒वाचो॑ भरंते म॒हद्दे॒वाना॑मसुर॒त्वमेकं॑ ॥

   द्विमाता होता विदथेषु सम्राऌ अन्व् अग्रं चरति क्षेति बुध्नः |
   प्र रण्यानि रण्यवाचो भरन्ते महद् देवानाम् असुरत्वम् एकम् ||

   dvimātā́ hótā vidátheṣu samrā́ḷánvágram cárati kṣéti budhnáḥ ǀ
   prá ráṇyāni raṇyavā́co bharante maháddevā́nāmasuratvámékam ǁ

   dvimātā hotā vidatheṣu samrāḷ anv agraṃ carati kṣeti budhnaḥ |
   pra raṇyāni raṇyavāco bharante mahad devānām asuratvam ekam ||

   द्वि॒ऽमा॒ता । होता॑ । वि॒दथे॑षु । स॒म्ऽराट् । अनु॑ । अग्र॑म् । चर॑ति । क्षेति॑ । बु॒ध्नः ।
   प्र । रण्या॑नि । र॒ण्य॒ऽवाचः॑ । भ॒र॒न्ते॒ । म॒हत् । दे॒वाना॑म् । अ॒सु॒र॒ऽत्वम् । एक॑म् ॥

   द्विऽमाता । होता । विदथेषु । सम्ऽराट् । अनु । अग्रम् । चरति । क्षेति । बुध्नः ।
   प्र । रण्यानि । रण्यऽवाचः । भरन्ते । महत् । देवानाम् । असुरऽत्वम् । एकम् ॥

   dvi-mātā́ ǀ hótā ǀ vidátheṣu ǀ sam-rā́ṭ ǀ ánu ǀ ágram ǀ cárati ǀ kṣéti ǀ budhnáḥ ǀ
   prá ǀ ráṇyāni ǀ raṇya-vā́caḥ ǀ bharante ǀ mahát ǀ devā́nām ǀ asura-tvám ǀ ékam ǁ

   dvi-mātā ǀ hotā ǀ vidatheṣu ǀ sam-rāṭ ǀ anu ǀ agram ǀ carati ǀ kṣeti ǀ budhnaḥ ǀ
   pra ǀ raṇyāni ǀ raṇya-vācaḥ ǀ bharante ǀ mahat ǀ devānām ǀ asura-tvam ǀ ekam ǁ

   3.55.7 Aṣṭaka 3.3.29.2Anuvāka 3.5.29Interpretations

8. Ṛk 8

   शूर॑स्येव॒ युध्य॑तो अंत॒मस्य॑ प्रती॒चीनं॑ ददृशे॒ विश्व॑मा॒यत् ।
   अं॒तर्म॒तिश्च॑रति नि॒ष्षिधं॒ गोर्म॒हद्दे॒वाना॑मसुर॒त्वमेकं॑ ॥

   शूरस्येव युध्यतो अन्तमस्य प्रतीचीनं ददृशे विश्वम् आयत् |
   अन्तर् मतिश् चरति निष्षिधं गोर् महद् देवानाम् असुरत्वम् एकम् ||

   śū́rasyeva yúdhyato antamásya pratīcī́nam dadṛśe víśvamāyát ǀ
   antármatíścarati niṣṣídham górmaháddevā́nāmasuratvámekam ǁ

   śūrasyeva yudhyato antamasya pratīcīnaṃ dadṛśe viśvam āyat |
   antar matiś carati niṣṣidhaṃ gor mahad devānām asuratvam ekam ||

   शूर॑स्यऽइव । युध्य॑तः । अ॒न्त॒मस्य॑ । प्र॒ती॒चीन॑म् । द॒दृ॒शे॒ । विश्व॑म् । आ॒ऽयत् ।
   अ॒न्तः । म॒तिः । च॒र॒ति॒ । निः॒ऽसिध॑म् । गोः । म॒हत् । दे॒वाना॑म् । अ॒सु॒र॒ऽत्वम् । एक॑म् ॥

   शूरस्यऽइव । युध्यतः । अन्तमस्य । प्रतीचीनम् । ददृशे । विश्वम् । आऽयत् ।
   अन्तः । मतिः । चरति । निःऽसिधम् । गोः । महत् । देवानाम् । असुरऽत्वम् । एकम् ॥

   śū́rasya-iva ǀ yúdhyataḥ ǀ antamásya ǀ pratīcī́nam ǀ dadṛśe ǀ víśvam ǀ ā-yát ǀ
   antáḥ ǀ matíḥ ǀ carati ǀ niḥ-sídham ǀ góḥ ǀ mahát ǀ devā́nām ǀ asura-tvám ǀ ékam ǁ

   śūrasya-iva ǀ yudhyataḥ ǀ antamasya ǀ pratīcīnam ǀ dadṛśe ǀ viśvam ǀ ā-yat ǀ
   antaḥ ǀ matiḥ ǀ carati ǀ niḥ-sidham ǀ goḥ ǀ mahat ǀ devānām ǀ asura-tvam ǀ ekam ǁ

   3.55.8 Aṣṭaka 3.3.29.3Anuvāka 3.5.30Interpretations

9. Ṛk 9

   नि वे॑वेति पलि॒तो दू॒त आ॑स्वं॒तर्म॒हांश्च॑रति रोच॒नेन॑ ।
   वपूं॑षि॒ बिभ्र॑द॒भि नो॒ वि च॑ष्टे म॒हद्दे॒वाना॑मसुर॒त्वमेकं॑ ॥

   नि वेवेति पलितो दूत आस्व् अन्तर् महांश् चरति रोचनेन |
   वपूंषि बिभ्रद् अभि नो वि चष्टे महद् देवानाम् असुरत्वम् एकम् ||

   ní veveti palitó dūtá āsvantármahā́ṃścarati rocanéna ǀ
   vápūṃṣi bíbhradabhí no ví caṣṭe maháddevā́nāmasuratvámekam ǁ

   ni veveti palito dūta āsv antar mahāṃś carati rocanena |
   vapūṃṣi bibhrad abhi no vi caṣṭe mahad devānām asuratvam ekam ||

   नि । वे॒वे॒ति॒ । प॒लि॒तः । दू॒तः । आ॒सु॒ । अ॒न्तः । म॒हान् । च॒र॒ति॒ । रो॒च॒नेन॑ ।
   वपूं॑षि । बिभ्र॑त् । अ॒भि । नः॒ । वि । च॒ष्टे॒ । म॒हत् । दे॒वाना॑म् । अ॒सु॒र॒ऽत्वम् । एक॑म् ॥

   नि । वेवेति । पलितः । दूतः । आसु । अन्तः । महान् । चरति । रोचनेन ।
   वपूंषि । बिभ्रत् । अभि । नः । वि । चष्टे । महत् । देवानाम् । असुरऽत्वम् । एकम् ॥

   ní ǀ veveti ǀ palitáḥ ǀ dūtáḥ ǀ āsu ǀ antáḥ ǀ mahā́n ǀ carati ǀ rocanéna ǀ
   vápūṃṣi ǀ bíbhrat ǀ abhí ǀ naḥ ǀ ví ǀ caṣṭe ǀ mahát ǀ devā́nām ǀ asura-tvám ǀ ékam ǁ

   ni ǀ veveti ǀ palitaḥ ǀ dūtaḥ ǀ āsu ǀ antaḥ ǀ mahān ǀ carati ǀ rocanena ǀ
   vapūṃṣi ǀ bibhrat ǀ abhi ǀ naḥ ǀ vi ǀ caṣṭe ǀ mahat ǀ devānām ǀ asura-tvam ǀ ekam ǁ

   3.55.9 Aṣṭaka 3.3.29.4Anuvāka 3.5.31Interpretations

10. Ṛk 10

    विष्णु॑र्गो॒पाः प॑र॒मं पा॑ति॒ पाथः॑ प्रि॒या धामा॑न्य॒मृता॒ दधा॑नः ।
    अ॒ग्निष्टा विश्वा॒ भुव॑नानि वेद म॒हद्दे॒वाना॑मसुर॒त्वमेकं॑ ॥

    विष्णुर् गोपाः परमम् पाति पाथः प्रिया धामान्य् अमृता दधानः |
    अग्निष् टा विश्वा भुवनानि वेद महद् देवानाम् असुरत्वम् एकम् ||

    víṣṇurgopā́ḥ paramám pāti pā́thaḥ priyā́ dhā́mānyamṛ́tā dádhānaḥ ǀ
    agníṣṭā́ víśvā bhúvanāni veda maháddevā́nāmasuratvámekam ǁ

    viṣṇur gopāḥ paramam pāti pāthaḥ priyā dhāmāny amṛtā dadhānaḥ |
    agniṣ ṭā viśvā bhuvanāni veda mahad devānām asuratvam ekam ||

    विष्णुः॑ । गो॒पाः । प॒र॒मम् । पा॒ति॒ । पाथः॑ । प्रि॒या । धामा॑नि । अ॒मृता॑ । दधा॑नः ।
    अ॒ग्निः । ता । विश्वा॑ । भुव॑नानि । वे॒द॒ । म॒हत् । दे॒वाना॑म् । अ॒सु॒र॒ऽत्वम् । एक॑म् ॥

    विष्णुः । गोपाः । परमम् । पाति । पाथः । प्रिया । धामानि । अमृता । दधानः ।
    अग्निः । ता । विश्वा । भुवनानि । वेद । महत् । देवानाम् । असुरऽत्वम् । एकम् ॥

    víṣṇuḥ ǀ gopā́ḥ ǀ paramám ǀ pāti ǀ pā́thaḥ ǀ priyā́ ǀ dhā́māni ǀ amṛ́tā ǀ dádhānaḥ ǀ
    agníḥ ǀ tā́ ǀ víśvā ǀ bhúvanāni ǀ veda ǀ mahát ǀ devā́nām ǀ asura-tvám ǀ ékam ǁ

    viṣṇuḥ ǀ gopāḥ ǀ paramam ǀ pāti ǀ pāthaḥ ǀ priyā ǀ dhāmāni ǀ amṛtā ǀ dadhānaḥ ǀ
    agniḥ ǀ tā ǀ viśvā ǀ bhuvanāni ǀ veda ǀ mahat ǀ devānām ǀ asura-tvam ǀ ekam ǁ

    3.55.10 Aṣṭaka 3.3.29.5Anuvāka 3.5.32Interpretations

11. Ṛk 11

    नाना॑ चक्राते य॒म्या॒३॒॑ वपूं॑षि॒ तयो॑र॒न्यद्रोच॑ते कृ॒ष्णम॒न्यत् ।
    श्यावी॑ च॒ यदरु॑षी च॒ स्वसा॑रौ म॒हद्दे॒वाना॑मसुर॒त्वमेकं॑ ॥

    नाना चक्राते यम्या वपूंषि तयोर् अन्यद् रोचते कृष्णम् अन्यत् |
    श्यावी च यद् अरुषी च स्वसारौ महद् देवानाम् असुरत्वम् एकम् ||

    nā́nā cakrāte yamyā́ vápūṃṣi táyoranyádrócate kṛṣṇámanyát ǀ
    śyā́vī ca yádáruṣī ca svásārau maháddevā́nāmasuratvámékam ǁ

    nānā cakrāte yamyā vapūṃṣi tayor anyad rocate kṛṣṇam anyat |
    śyāvī ca yad aruṣī ca svasārau mahad devānām asuratvam ekam ||

    नाना॑ । च॒क्रा॒ते॒ इति॑ । य॒म्या॑ । वपूं॑षि । तयोः॑ । अ॒न्यत् । रोच॑ते । कृ॒ष्णम् । अ॒न्यत् ।
    श्यावी॑ । च॒ । यत् । अरु॑षी । च॒ । स्वसा॑रौ । म॒हत् । दे॒वाना॑म् । अ॒सु॒र॒ऽत्वम् । एक॑म् ॥

    नाना । चक्राते इति । यम्या । वपूंषि । तयोः । अन्यत् । रोचते । कृष्णम् । अन्यत् ।
    श्यावी । च । यत् । अरुषी । च । स्वसारौ । महत् । देवानाम् । असुरऽत्वम् । एकम् ॥

    nā́nā ǀ cakrāte íti ǀ yamyā́ ǀ vápūṃṣi ǀ táyoḥ ǀ anyát ǀ rócate ǀ kṛṣṇám ǀ anyát ǀ
    śyā́vī ǀ ca ǀ yát ǀ áruṣī ǀ ca ǀ svásārau ǀ mahát ǀ devā́nām ǀ asura-tvám ǀ ékam ǁ

    nānā ǀ cakrāte iti ǀ yamyā ǀ vapūṃṣi ǀ tayoḥ ǀ anyat ǀ rocate ǀ kṛṣṇam ǀ anyat ǀ
    śyāvī ǀ ca ǀ yat ǀ aruṣī ǀ ca ǀ svasārau ǀ mahat ǀ devānām ǀ asura-tvam ǀ ekam ǁ

    3.55.11 Aṣṭaka 3.3.30.1Anuvāka 3.5.33Interpretations

12. Ṛk 12

    मा॒ता च॒ यत्र॑ दुहि॒ता च॑ धे॒नू स॑ब॒र्दुघे॑ धा॒पये॑ते समी॒ची ।
    ऋ॒तस्य॒ ते सद॑सीळे अं॒तर्म॒हद्दे॒वाना॑मसुर॒त्वमेकं॑ ॥

    माता च यत्र दुहिता च धेनू सबर्दुघे धापयेते समीची |
    ऋतस्य ते सदसीळे अन्तर् महद् देवानाम् असुरत्वम् एकम् ||

    mātā́ ca yátra duhitā́ ca dhenū́ sabardúghe dhāpáyete samīcī́ ǀ
    ṛtásya té sádasīḷe antármaháddevā́nāmasuratvámékam ǁ

    mātā ca yatra duhitā ca dhenū sabardughe dhāpayete samīcī |
    ṛtasya te sadasīḷe antar mahad devānām asuratvam ekam ||

    मा॒ता । च॒ । यत्र॑ । दु॒हि॒ता । च॒ । धे॒नू इति॑ । स॒ब॒र्दुघे॒ इति॑ स॒बः॒ऽदुघे॑ । धा॒पये॑ते॒ इति॑ । स॒मी॒ची इति॑ स॒म्ऽई॒ची ।
    ऋ॒तस्य॑ । ते इति॑ । सद॑सि । ई॒ळे॒ । अ॒न्तः । म॒हत् । दे॒वाना॑म् । अ॒सु॒र॒ऽत्वम् । एक॑म् ॥

    माता । च । यत्र । दुहिता । च । धेनू इति । सबर्दुघे इति सबःऽदुघे । धापयेते इति । समीची इति सम्ऽईची ।
    ऋतस्य । ते इति । सदसि । ईळे । अन्तः । महत् । देवानाम् । असुरऽत्वम् । एकम् ॥

    mātā́ ǀ ca ǀ yátra ǀ duhitā́ ǀ ca ǀ dhenū́ íti ǀ sabardúghe íti sabaḥ-dúghe ǀ dhāpáyete íti ǀ samīcī́ íti sam-īcī́ ǀ
    ṛtásya ǀ té íti ǀ sádasi ǀ īḷe ǀ antáḥ ǀ mahát ǀ devā́nām ǀ asura-tvám ǀ ékam ǁ

    mātā ǀ ca ǀ yatra ǀ duhitā ǀ ca ǀ dhenū iti ǀ sabardughe iti sabaḥ-dughe ǀ dhāpayete iti ǀ samīcī iti sam-īcī ǀ
    ṛtasya ǀ te iti ǀ sadasi ǀ īḷe ǀ antaḥ ǀ mahat ǀ devānām ǀ asura-tvam ǀ ekam ǁ

    3.55.12 Aṣṭaka 3.3.30.2Anuvāka 3.5.34Interpretations

13. Ṛk 13

    अ॒न्यस्या॑ व॒त्सं रि॑ह॒ती मि॑माय॒ कया॑ भु॒वा नि द॑धे धे॒नुरूधः॑ ।
    ऋ॒तस्य॒ सा पय॑सापिन्व॒तेळा॑ म॒हद्दे॒वाना॑मसुर॒त्वमेकं॑ ॥

    अन्यस्या वत्सं रिहती मिमाय कया भुवा नि दधे धेनुर् ऊधः |
    ऋतस्य सा पयसापिन्वतेऌआ महद् देवानाम् असुरत्वम् एकम् ||

    anyásyā vatsám rihatī́ mimāya káyā bhuvā́ ní dadhe dhenúrū́dhaḥ ǀ
    ṛtásya sā́ páyasāpinvatéḷā maháddevā́nāmasuratvámékam ǁ

    anyasyā vatsaṃ rihatī mimāya kayā bhuvā ni dadhe dhenur ūdhaḥ |
    ṛtasya sā payasāpinvateḷā mahad devānām asuratvam ekam ||

    अ॒न्यस्याः॑ । व॒त्सम् । रि॒ह॒ती । मि॒मा॒य॒ । कया॑ । भु॒वा । नि । द॒धे॒ । धे॒नुः । ऊधः॑ ।
    ऋ॒तस्य॑ । सा । पय॑सा । अ॒पि॒न्व॒त॒ । इळा॑ । म॒हत् । दे॒वाना॑म् । अ॒सु॒र॒ऽत्वम् । एक॑म् ॥

    अन्यस्याः । वत्सम् । रिहती । मिमाय । कया । भुवा । नि । दधे । धेनुः । ऊधः ।
    ऋतस्य । सा । पयसा । अपिन्वत । इळा । महत् । देवानाम् । असुरऽत्वम् । एकम् ॥

    anyásyāḥ ǀ vatsám ǀ rihatī́ ǀ mimāya ǀ káyā ǀ bhuvā́ ǀ ní ǀ dadhe ǀ dhenúḥ ǀ ū́dhaḥ ǀ
    ṛtásya ǀ sā́ ǀ páyasā ǀ apinvata ǀ íḷā ǀ mahát ǀ devā́nām ǀ asura-tvám ǀ ékam ǁ

    anyasyāḥ ǀ vatsam ǀ rihatī ǀ mimāya ǀ kayā ǀ bhuvā ǀ ni ǀ dadhe ǀ dhenuḥ ǀ ūdhaḥ ǀ
    ṛtasya ǀ sā ǀ payasā ǀ apinvata ǀ iḷā ǀ mahat ǀ devānām ǀ asura-tvam ǀ ekam ǁ

    3.55.13 Aṣṭaka 3.3.30.3Anuvāka 3.5.35Interpretations

14. Ṛk 14

    पद्या॑ वस्ते पुरु॒रूपा॒ वपूं॑ष्यू॒र्ध्वा त॑स्थौ॒ त्र्यविं॒ रेरि॑हाणा ।
    ऋ॒तस्य॒ सद्म॒ वि च॑रामि वि॒द्वान्म॒हद्दे॒वाना॑मसुर॒त्वमेकं॑ ॥

    पद्या वस्ते पुरुरूपा वपूंष्य् ऊर्ध्वा तस्थौ त्र्यविं रेरिहाणा |
    ऋतस्य सद्म वि चरामि विद्वान् महद् देवानाम् असुरत्वम् एकम् ||

    pádyā vaste pururū́pā vápūṃṣyūrdhvā́ tasthau tryávim rérihāṇā ǀ
    ṛtásya sádma ví carāmi vidvā́nmaháddevā́nāmasuratvámékam ǁ

    padyā vaste pururūpā vapūṃṣy ūrdhvā tasthau tryaviṃ rerihāṇā |
    ṛtasya sadma vi carāmi vidvān mahad devānām asuratvam ekam ||

    पद्या॑ । व॒स्ते॒ । पु॒रु॒ऽरूपा॑ । वपूं॑षि । ऊ॒र्ध्वा । त॒स्थौ॒ । त्रि॒ऽअवि॑म् । रेरि॑हाणा ।
    ऋ॒तस्य॑ । सद्म॑ । वि । च॒रा॒मि॒ । वि॒द्वान् । म॒हत् । दे॒वाना॑म् । अ॒सु॒र॒ऽत्वम् । एक॑म् ॥

    पद्या । वस्ते । पुरुऽरूपा । वपूंषि । ऊर्ध्वा । तस्थौ । त्रिऽअविम् । रेरिहाणा ।
    ऋतस्य । सद्म । वि । चरामि । विद्वान् । महत् । देवानाम् । असुरऽत्वम् । एकम् ॥

    pádyā ǀ vaste ǀ puru-rū́pā ǀ vápūṃṣi ǀ ūrdhvā́ ǀ tasthau ǀ tri-ávim ǀ rérihāṇā ǀ
    ṛtásya ǀ sádma ǀ ví ǀ carāmi ǀ vidvā́n ǀ mahát ǀ devā́nām ǀ asura-tvám ǀ ékam ǁ

    padyā ǀ vaste ǀ puru-rūpā ǀ vapūṃṣi ǀ ūrdhvā ǀ tasthau ǀ tri-avim ǀ rerihāṇā ǀ
    ṛtasya ǀ sadma ǀ vi ǀ carāmi ǀ vidvān ǀ mahat ǀ devānām ǀ asura-tvam ǀ ekam ǁ

    3.55.14 Aṣṭaka 3.3.30.4Anuvāka 3.5.36Interpretations

15. Ṛk 15

    प॒दे इ॑व॒ निहि॑ते द॒स्मे अं॒तस्तयो॑र॒न्यद्गुह्य॑मा॒विर॒न्यत् ।
    स॒ध्री॒ची॒ना प॒थ्या॒३॒॑ सा विषू॑ची म॒हद्दे॒वाना॑मसुर॒त्वमेकं॑ ॥

    पदे इव निहिते दस्मे अन्तस् तयोर् अन्यद् गुह्यम् आविर् अन्यत् |
    सध्रीचीना पथ्या सा विषूची महद् देवानाम् असुरत्वम् एकम् ||

    padé iva níhite dasmé antástáyoranyádgúhyamāvíranyát ǀ
    sadhrīcīnā́ pathyā́ sā́ víṣūcī maháddevā́nāmasuratvámékam ǁ

    pade iva nihite dasme antas tayor anyad guhyam āvir anyat |
    sadhrīcīnā pathyā sā viṣūcī mahad devānām asuratvam ekam ||

    प॒दे इ॒वेति॑ प॒देऽइ॑व । निहि॑ते॒ इति॒ निऽहि॑ते । द॒स्मे । अ॒न्तरिति॑ । तयोः॑ । अ॒न्यत् । गुह्य॑म् । आ॒विः । अ॒न्यत् ।
    स॒ध्री॒ची॒ना । प॒थ्या॑ । सा । विषू॑ची । म॒हत् । दे॒वाना॑म् । अ॒सु॒र॒ऽत्वम् । एक॑म् ॥

    पदे इवेति पदेऽइव । निहिते इति निऽहिते । दस्मे । अन्तरिति । तयोः । अन्यत् । गुह्यम् । आविः । अन्यत् ।
    सध्रीचीना । पथ्या । सा । विषूची । महत् । देवानाम् । असुरऽत्वम् । एकम् ॥

    padé ivéti padé-iva ǀ níhite íti ní-hite ǀ dasmé ǀ antáríti ǀ táyoḥ ǀ anyát ǀ gúhyam ǀ āvíḥ ǀ anyát ǀ
    sadhrīcīnā́ ǀ pathyā́ ǀ sā́ ǀ víṣūcī ǀ mahát ǀ devā́nām ǀ asura-tvám ǀ ékam ǁ

    pade iveti pade-iva ǀ nihite iti ni-hite ǀ dasme ǀ antariti ǀ tayoḥ ǀ anyat ǀ guhyam ǀ āviḥ ǀ anyat ǀ
    sadhrīcīnā ǀ pathyā ǀ sā ǀ viṣūcī ǀ mahat ǀ devānām ǀ asura-tvam ǀ ekam ǁ

    3.55.15 Aṣṭaka 3.3.30.5Anuvāka 3.5.37Interpretations

16. Ṛk 16

    आ धे॒नवो॑ धुनयंता॒मशि॑श्वीः सब॒र्दुघाः॑ शश॒या अप्र॑दुग्धाः ।
    नव्या॑नव्या युव॒तयो॒ भवं॑तीर्म॒हद्दे॒वाना॑मसुर॒त्वमेकं॑ ॥

    आ धेनवो धुनयन्ताम् अशिश्वीः सबर्दुघाः शशया अप्रदुग्धाः |
    नव्या-नव्या युवतयो भवन्तीर् महद् देवानाम् असुरत्वम् एकम् ||

    ā́ dhenávo dhunayantāmáśiśvīḥ sabardúghāḥ śaśayā́ ápradugdhāḥ ǀ
    návyānavyā yuvatáyo bhávantīrmaháddevā́nāmasuratvámékam ǁ

    ā dhenavo dhunayantām aśiśvīḥ sabardughāḥ śaśayā apradugdhāḥ |
    navyā-navyā yuvatayo bhavantīr mahad devānām asuratvam ekam ||

    आ । धे॒नवः॑ । धु॒न॒य॒न्ता॒म् । अशि॑श्वीः । स॒बः॒ऽदुघाः॑ । श॒श॒याः । अप्र॑ऽदुग्धाः ।
    नव्याः॑ऽनव्याः । यु॒व॒तयः॑ । भव॑न्तीः । म॒हत् । दे॒वाना॑म् । अ॒सु॒र॒ऽत्वम् । एक॑म् ॥

    आ । धेनवः । धुनयन्ताम् । अशिश्वीः । सबःऽदुघाः । शशयाः । अप्रऽदुग्धाः ।
    नव्याःऽनव्याः । युवतयः । भवन्तीः । महत् । देवानाम् । असुरऽत्वम् । एकम् ॥

    ā́ ǀ dhenávaḥ ǀ dhunayantām ǀ áśiśvīḥ ǀ sabaḥ-dúghāḥ ǀ śaśayā́ḥ ǀ ápra-dugdhāḥ ǀ
    návyāḥ-navyāḥ ǀ yuvatáyaḥ ǀ bhávantīḥ ǀ mahát ǀ devā́nām ǀ asura-tvám ǀ ékam ǁ

    ā ǀ dhenavaḥ ǀ dhunayantām ǀ aśiśvīḥ ǀ sabaḥ-dughāḥ ǀ śaśayāḥ ǀ apra-dugdhāḥ ǀ
    navyāḥ-navyāḥ ǀ yuvatayaḥ ǀ bhavantīḥ ǀ mahat ǀ devānām ǀ asura-tvam ǀ ekam ǁ

    3.55.16 Aṣṭaka 3.3.31.1Anuvāka 3.5.38Interpretations

17. Ṛk 17

    यद॒न्यासु॑ वृष॒भो रोर॑वीति॒ सो अ॒न्यस्मि॑न्यू॒थे नि द॑धाति॒ रेतः॑ ।
    स हि क्षपा॑वा॒न्त्स भगः॒ स राजा॑ म॒हद्दे॒वाना॑मसुर॒त्वमेकं॑ ॥

    यद् अन्यासु वृषभो रोरवीति सो अन्यस्मिन् यूथे नि दधाति रेतः |
    स हि क्षपावान् स भगः स राजा महद् देवानाम् असुरत्वम् एकम् ||

    yádanyā́su vṛṣabhó róravīti só anyásminyūthé ní dadhāti rétaḥ ǀ
    sá hí kṣápāvāntsá bhágaḥ sá rā́jā maháddevā́nāmasuratvámékam ǁ

    yad anyāsu vṛṣabho roravīti so anyasmin yūthe ni dadhāti retaḥ |
    sa hi kṣapāvān sa bhagaḥ sa rājā mahad devānām asuratvam ekam ||

    यत् । अ॒न्यासु॑ । वृ॒ष॒भः । रोर॑वीति । सः । अ॒न्यस्मि॑न् । यू॒थे । नि । द॒धा॒ति॒ । रेतः॑ ।
    सः । हि । क्षपा॑ऽवान् । सः । भगः॑ । सः । राजा॑ । म॒हत् । दे॒वाना॑म् । अ॒सु॒र॒ऽत्वम् । एक॑म् ॥

    यत् । अन्यासु । वृषभः । रोरवीति । सः । अन्यस्मिन् । यूथे । नि । दधाति । रेतः ।
    सः । हि । क्षपाऽवान् । सः । भगः । सः । राजा । महत् । देवानाम् । असुरऽत्वम् । एकम् ॥

    yát ǀ anyā́su ǀ vṛṣabháḥ ǀ róravīti ǀ sáḥ ǀ anyásmin ǀ yūthé ǀ ní ǀ dadhāti ǀ rétaḥ ǀ
    sáḥ ǀ hí ǀ kṣápā-vān ǀ sáḥ ǀ bhágaḥ ǀ sáḥ ǀ rā́jā ǀ mahát ǀ devā́nām ǀ asura-tvám ǀ ékam ǁ

    yat ǀ anyāsu ǀ vṛṣabhaḥ ǀ roravīti ǀ saḥ ǀ anyasmin ǀ yūthe ǀ ni ǀ dadhāti ǀ retaḥ ǀ
    saḥ ǀ hi ǀ kṣapā-vān ǀ saḥ ǀ bhagaḥ ǀ saḥ ǀ rājā ǀ mahat ǀ devānām ǀ asura-tvam ǀ ekam ǁ

    3.55.17 Aṣṭaka 3.3.31.2Anuvāka 3.5.39Interpretations

18. Ṛk 18

    वी॒रस्य॒ नु स्वश्व्यं॑ जनासः॒ प्र नु वो॑चाम वि॒दुर॑स्य दे॒वाः ।
    षो॒ळ्हा यु॒क्ताः पंच॑पं॒चा व॑हंति म॒हद्दे॒वाना॑मसुर॒त्वमेकं॑ ॥

    वीरस्य नु स्वश्व्यं जनासः प्र नु वोचाम विदुर् अस्य देवाः |
    षोऌहा युक्ताः पञ्च-पञ्चा वहन्ति महद् देवानाम् असुरत्वम् एकम् ||

    vīrásya nú sváśvyam janāsaḥ prá nú vocāma vidúrasya devā́ḥ ǀ
    ṣoḷhā́ yuktā́ḥ páñcapañcā́ vahanti maháddevā́nāmasuratvámékam ǁ

    vīrasya nu svaśvyaṃ janāsaḥ pra nu vocāma vidur asya devāḥ |
    ṣoḷhā yuktāḥ pañca-pañcā vahanti mahad devānām asuratvam ekam ||

    वी॒रस्य॑ । नु । सु॒ऽअश्व्य॑म् । ज॒ना॒सः॒ । प्र । नु । वो॒चा॒म॒ । वि॒दुः । अ॒स्य॒ । दे॒वाः ।
    षो॒ळ्हा । यु॒क्ताः । पञ्च॑ऽपञ्च । आ । व॒ह॒न्ति॒ । म॒हत् । दे॒वाना॑म् । अ॒सु॒र॒ऽत्वम् । एक॑म् ॥

    वीरस्य । नु । सुऽअश्व्यम् । जनासः । प्र । नु । वोचाम । विदुः । अस्य । देवाः ।
    षोळ्हा । युक्ताः । पञ्चऽपञ्च । आ । वहन्ति । महत् । देवानाम् । असुरऽत्वम् । एकम् ॥

    vīrásya ǀ nú ǀ su-áśvyam ǀ janāsaḥ ǀ prá ǀ nú ǀ vocāma ǀ vidúḥ ǀ asya ǀ devā́ḥ ǀ
    ṣoḷhā́ ǀ yuktā́ḥ ǀ páñca-pañca ǀ ā́ ǀ vahanti ǀ mahát ǀ devā́nām ǀ asura-tvám ǀ ékam ǁ

    vīrasya ǀ nu ǀ su-aśvyam ǀ janāsaḥ ǀ pra ǀ nu ǀ vocāma ǀ viduḥ ǀ asya ǀ devāḥ ǀ
    ṣoḷhā ǀ yuktāḥ ǀ pañca-pañca ǀ ā ǀ vahanti ǀ mahat ǀ devānām ǀ asura-tvam ǀ ekam ǁ

    3.55.18 Aṣṭaka 3.3.31.3Anuvāka 3.5.40Interpretations

19. Ṛk 19

    दे॒वस्त्वष्टा॑ सवि॒ता वि॒श्वरू॑पः पु॒पोष॑ प्र॒जाः पु॑रु॒धा ज॑जान ।
    इ॒मा च॒ विश्वा॒ भुव॑नान्यस्य म॒हद्दे॒वाना॑मसुर॒त्वमेकं॑ ॥

    देवस् त्वष्टा सविता विश्वरूपः पुपोष प्रजाः पुरुधा जजान |
    इमा च विश्वा भुवनान्य् अस्य महद् देवानाम् असुरत्वम् एकम् ||

    devástváṣṭā savitā́ viśvárūpaḥ pupóṣa prajā́ḥ purudhā́ jajāna ǀ
    imā́ ca víśvā bhúvanānyasya maháddevā́nāmasuratvámékam ǁ

    devas tvaṣṭā savitā viśvarūpaḥ pupoṣa prajāḥ purudhā jajāna |
    imā ca viśvā bhuvanāny asya mahad devānām asuratvam ekam ||

    दे॒वः । त्वष्टा॑ । स॒वि॒ता । वि॒श्वऽरू॑पः । पु॒पोष॑ । प्र॒ऽजाः । पु॒रु॒धा । ज॒जा॒न॒ ।
    इ॒मा । च॒ । विश्वा॑ । भुव॑नानि । अ॒स्य॒ । म॒हत् । दे॒वाना॑म् । अ॒सु॒र॒ऽत्वम् । एक॑म् ॥

    देवः । त्वष्टा । सविता । विश्वऽरूपः । पुपोष । प्रऽजाः । पुरुधा । जजान ।
    इमा । च । विश्वा । भुवनानि । अस्य । महत् । देवानाम् । असुरऽत्वम् । एकम् ॥

    deváḥ ǀ tváṣṭā ǀ savitā́ ǀ viśvá-rūpaḥ ǀ pupóṣa ǀ pra-jā́ḥ ǀ purudhā́ ǀ jajāna ǀ
    imā́ ǀ ca ǀ víśvā ǀ bhúvanāni ǀ asya ǀ mahát ǀ devā́nām ǀ asura-tvám ǀ ékam ǁ

    devaḥ ǀ tvaṣṭā ǀ savitā ǀ viśva-rūpaḥ ǀ pupoṣa ǀ pra-jāḥ ǀ purudhā ǀ jajāna ǀ
    imā ǀ ca ǀ viśvā ǀ bhuvanāni ǀ asya ǀ mahat ǀ devānām ǀ asura-tvam ǀ ekam ǁ

    3.55.19 Aṣṭaka 3.3.31.4Anuvāka 3.5.41Interpretations

20. Ṛk 20

    म॒ही समै॑रच्च॒म्वा॑ समी॒ची उ॒भे ते अ॑स्य॒ वसु॑ना॒ न्यृ॑ष्टे ।
    शृ॒ण्वे वी॒रो विं॒दमा॑नो॒ वसू॑नि म॒हद्दे॒वाना॑मसुर॒त्वमेकं॑ ॥

    मही सम् ऐरच् चम्वा समीची उभे ते अस्य वसुना न्यृष्टे |
    शृण्वे वीरो विन्दमानो वसूनि महद् देवानाम् असुरत्वम् एकम् ||

    mahī́ sámairaccamvā́ samīcī́ ubhé té asya vásunā nyṛ́ṣṭe ǀ
    śṛṇvé vīró vindámāno vásūni maháddevā́nāmasuratvámékam ǁ

    mahī sam airac camvā samīcī ubhe te asya vasunā nyṛṣṭe |
    śṛṇve vīro vindamāno vasūni mahad devānām asuratvam ekam ||

    म॒ही इति॑ । सम् । ऐ॒र॒त् । च॒म्वा॑ । स॒मी॒ची इति॑ स॒म्ऽई॒ची । उ॒भे इति॑ । ते इति॑ । अ॒स्य॒ । वसु॑ना । न्यृ॑ष्टे॒ इति॒ निऽऋ॑ष्टे ।
    शृ॒ण्वे । वी॒रः । वि॒न्दमा॑नः । वसू॑नि । म॒हत् । दे॒वाना॑म् । अ॒सु॒र॒ऽत्वम् । एक॑म् ॥

    मही इति । सम् । ऐरत् । चम्वा । समीची इति सम्ऽईची । उभे इति । ते इति । अस्य । वसुना । न्यृष्टे इति निऽऋष्टे ।
    शृण्वे । वीरः । विन्दमानः । वसूनि । महत् । देवानाम् । असुरऽत्वम् । एकम् ॥

    mahī́ íti ǀ sám ǀ airat ǀ camvā́ ǀ samīcī́ íti sam-īcī́ ǀ ubhé íti ǀ té íti ǀ asya ǀ vásunā ǀ nyṛ́ṣṭe íti ní-ṛṣṭe ǀ
    śṛṇvé ǀ vīráḥ ǀ vindámānaḥ ǀ vásūni ǀ mahát ǀ devā́nām ǀ asura-tvám ǀ ékam ǁ

    mahī iti ǀ sam ǀ airat ǀ camvā ǀ samīcī iti sam-īcī ǀ ubhe iti ǀ te iti ǀ asya ǀ vasunā ǀ nyṛṣṭe iti ni-ṛṣṭe ǀ
    śṛṇve ǀ vīraḥ ǀ vindamānaḥ ǀ vasūni ǀ mahat ǀ devānām ǀ asura-tvam ǀ ekam ǁ

    3.55.20 Aṣṭaka 3.3.31.5Anuvāka 3.5.42Interpretations

21. Ṛk 21

    इ॒मां च॑ नः पृथि॒वीं वि॒श्वधा॑या॒ उप॑ क्षेति हि॒तमि॑त्रो॒ न राजा॑ ।
    पु॒रः॒सदः॑ शर्म॒सदो॒ न वी॒रा म॒हद्दे॒वाना॑मसुर॒त्वमेकं॑ ॥

    इमां च नः पृथिवीं विश्वधाया उप क्षेति हितमित्रो न राजा |
    पुरःसदः शर्मसदो न वीरा महद् देवानाम् असुरत्वम् एकम् ||

    imā́m ca naḥ pṛthivī́m viśvádhāyā úpa kṣeti hitámitro ná rā́jā ǀ
    puraḥsádaḥ śarmasádo ná vīrā́ maháddevā́nāmasuratvámékam ǁ

    imāṃ ca naḥ pṛthivīṃ viśvadhāyā upa kṣeti hitamitro na rājā |
    puraḥsadaḥ śarmasado na vīrā mahad devānām asuratvam ekam ||

    इ॒माम् । च॒ । नः॒ । पृ॒थि॒वीम् । वि॒श्वऽधा॑याः । उप॑ । क्षे॒ति॒ । हि॒तऽमि॑त्रः । न । राजा॑ ।
    पु॒रः॒ऽसदः॑ । श॒र्म॒ऽसदः॑ । न । वी॒राः । म॒हत् । दे॒वाना॑म् । अ॒सु॒र॒ऽत्वम् । एक॑म् ॥

    इमाम् । च । नः । पृथिवीम् । विश्वऽधायाः । उप । क्षेति । हितऽमित्रः । न । राजा ।
    पुरःऽसदः । शर्मऽसदः । न । वीराः । महत् । देवानाम् । असुरऽत्वम् । एकम् ॥

    imā́m ǀ ca ǀ naḥ ǀ pṛthivī́m ǀ viśvá-dhāyāḥ ǀ úpa ǀ kṣeti ǀ hitá-mitraḥ ǀ ná ǀ rā́jā ǀ
    puraḥ-sádaḥ ǀ śarma-sádaḥ ǀ ná ǀ vīrā́ḥ ǀ mahát ǀ devā́nām ǀ asura-tvám ǀ ékam ǁ

    imām ǀ ca ǀ naḥ ǀ pṛthivīm ǀ viśva-dhāyāḥ ǀ upa ǀ kṣeti ǀ hita-mitraḥ ǀ na ǀ rājā ǀ
    puraḥ-sadaḥ ǀ śarma-sadaḥ ǀ na ǀ vīrāḥ ǀ mahat ǀ devānām ǀ asura-tvam ǀ ekam ǁ

    3.55.21 Aṣṭaka 3.3.31.6Anuvāka 3.5.43Interpretations

22. Ṛk 22

    नि॒ष्षिध्व॑रीस्त॒ ओष॑धीरु॒तापो॑ र॒यिं त॑ इंद्र पृथि॒वी बि॑भर्ति ।
    सखा॑यस्ते वाम॒भाजः॑ स्याम म॒हद्दे॒वाना॑मसुर॒त्वमेकं॑ ॥

    निष्षिध्वरीस् त ओषधीर् उतापो रयिं त इन्द्र पृथिवी बिभर्ति |
    सखायस् ते वामभाजः स्याम महद् देवानाम् असुरत्वम् एकम् ||

    niṣṣídhvarīsta óṣadhīrutā́po rayím ta indra pṛthivī́ bibharti ǀ
    sákhāyaste vāmabhā́jaḥ syāma maháddevā́nāmasuratvámékam ǁ

    niṣṣidhvarīs ta oṣadhīr utāpo rayiṃ ta indra pṛthivī bibharti |
    sakhāyas te vāmabhājaḥ syāma mahad devānām asuratvam ekam ||

    निः॒ऽसिध्व॑रीः । ते॒ । ओष॑धीः । उ॒त । आपः॑ । र॒यिम् । ते॒ । इ॒न्द्र॒ । पृ॒थि॒वी । बि॒भ॒र्ति॒ ।
    सखा॑यः । ते॒ । वा॒म॒ऽभाजः॑ । स्या॒म॒ । म॒हत् । दे॒वाना॑म् । अ॒सु॒र॒ऽत्वम् । एक॑म् ॥

    निःऽसिध्वरीः । ते । ओषधीः । उत । आपः । रयिम् । ते । इन्द्र । पृथिवी । बिभर्ति ।
    सखायः । ते । वामऽभाजः । स्याम । महत् । देवानाम् । असुरऽत्वम् । एकम् ॥

    niḥ-sídhvarīḥ ǀ te ǀ óṣadhīḥ ǀ utá ǀ ā́paḥ ǀ rayím ǀ te ǀ indra ǀ pṛthivī́ ǀ bibharti ǀ
    sákhāyaḥ ǀ te ǀ vāma-bhā́jaḥ ǀ syāma ǀ mahát ǀ devā́nām ǀ asura-tvám ǀ ékam ǁ

    niḥ-sidhvarīḥ ǀ te ǀ oṣadhīḥ ǀ uta ǀ āpaḥ ǀ rayim ǀ te ǀ indra ǀ pṛthivī ǀ bibharti ǀ
    sakhāyaḥ ǀ te ǀ vāma-bhājaḥ ǀ syāma ǀ mahat ǀ devānām ǀ asura-tvam ǀ ekam ǁ

    3.55.22 Aṣṭaka 3.3.31.7Anuvāka 3.5.44Interpretations

Text, recitation and interpretations from the Ṛgveda database of theveda.org.in.