Devatā देवता

Agni Vaiśvānara

Ṛṣi ऋषि

Viśvāmitra Gāthina

Chandas छन्दस्

Jagatī

1. Ṛk 1

   वै॒श्वा॒न॒राय॑ पृथु॒पाज॑से॒ विपो॒ रत्ना॑ विधंत ध॒रुणे॑षु॒ गात॑वे ।
   अ॒ग्निर्हि दे॒वाँ अ॒मृतो॑ दुव॒स्यत्यथा॒ धर्मा॑णि स॒नता॒ न दू॑दुषत् ॥

   वैश्वानराय पृथुपाजसे विपो रत्ना विधन्त धरुणेषु गातवे |
   अग्निर् हि देवां अमृतो दुवस्यत्य् अथा धर्माणि सनता न दूदुषत् ||

   vaiśvānarā́ya pṛthupā́jase vípo rátnā vidhanta dharúṇeṣu gā́tave ǀ
   agnírhí devā́m̐ amṛ́to duvasyátyáthā dhármāṇi sanátā ná dūduṣat ǁ

   vaiśvānarāya pṛthupājase vipo ratnā vidhanta dharuṇeṣu gātave |
   agnir hi devāṃ amṛto duvasyaty athā dharmāṇi sanatā na dūduṣat ||

   वै॒श्वा॒न॒राय॑ । पृ॒थु॒ऽपाज॑से । विपः॑ । रत्ना॑ । वि॒ध॒न्त॒ । ध॒रुणे॑षु । गात॑वे ।
   अ॒ग्निः । हि । दे॒वान् । अ॒मृतः॑ । दु॒व॒स्यति॑ । अथ॑ । धर्मा॑णि । स॒नता॑ । न । दू॒दु॒ष॒त् ॥

   वैश्वानराय । पृथुऽपाजसे । विपः । रत्ना । विधन्त । धरुणेषु । गातवे ।
   अग्निः । हि । देवान् । अमृतः । दुवस्यति । अथ । धर्माणि । सनता । न । दूदुषत् ॥

   vaiśvānarā́ya ǀ pṛthu-pā́jase ǀ vípaḥ ǀ rátnā ǀ vidhanta ǀ dharúṇeṣu ǀ gā́tave ǀ
   agníḥ ǀ hí ǀ devā́n ǀ amṛ́taḥ ǀ duvasyáti ǀ átha ǀ dhármāṇi ǀ sanátā ǀ ná ǀ dūduṣat ǁ

   vaiśvānarāya ǀ pṛthu-pājase ǀ vipaḥ ǀ ratnā ǀ vidhanta ǀ dharuṇeṣu ǀ gātave ǀ
   agniḥ ǀ hi ǀ devān ǀ amṛtaḥ ǀ duvasyati ǀ atha ǀ dharmāṇi ǀ sanatā ǀ na ǀ dūduṣat ǁ

   3.3.1 Aṣṭaka 2.8.20.1Anuvāka 3.1.39Interpretations

2. Ṛk 2

   अं॒तर्दू॒तो रोद॑सी द॒स्म ई॑यते॒ होता॒ निष॑त्तो॒ मनु॑षः पु॒रोहि॑तः ।
   क्षयं॑ बृ॒हंतं॒ परि॑ भूषति॒ द्युभि॑र्दे॒वेभि॑र॒ग्निरि॑षि॒तो धि॒याव॑सुः ॥

   अन्तर् दूतो रोदसी दस्म ईयते होता निषत्तो मनुषः पुरोहितः |
   क्षयम् बृहन्तम् परि भूषति द्युभिर् देवेभिर् अग्निर् इषितो धियावसुः ||

   antárdūtó ródasī dasmá īyate hótā níṣatto mánuṣaḥ puróhitaḥ ǀ
   kṣáyam bṛhántam pári bhūṣati dyúbhirdevébhiragníriṣitó dhiyā́vasuḥ ǁ

   antar dūto rodasī dasma īyate hotā niṣatto manuṣaḥ purohitaḥ |
   kṣayam bṛhantam pari bhūṣati dyubhir devebhir agnir iṣito dhiyāvasuḥ ||

   अ॒न्तः । दू॒तः । रोद॑सी॒ इति॑ । द॒स्मः । ई॒य॒ते॒ । होता॑ । निऽस॑त्तः । मनु॑षः । पु॒रःऽहि॑तः ।
   क्षय॑म् । बृ॒हन्त॑म् । परि॑ । भू॒ष॒ति॒ । द्युऽभिः॑ । दे॒वेभिः॑ । अ॒ग्निः । इ॒षि॒तः । धि॒याऽव॑सुः ॥

   अन्तः । दूतः । रोदसी इति । दस्मः । ईयते । होता । निऽसत्तः । मनुषः । पुरःऽहितः ।
   क्षयम् । बृहन्तम् । परि । भूषति । द्युऽभिः । देवेभिः । अग्निः । इषितः । धियाऽवसुः ॥

   antáḥ ǀ dūtáḥ ǀ ródasī íti ǀ dasmáḥ ǀ īyate ǀ hótā ǀ ní-sattaḥ ǀ mánuṣaḥ ǀ puráḥ-hitaḥ ǀ
   kṣáyam ǀ bṛhántam ǀ pári ǀ bhūṣati ǀ dyú-bhiḥ ǀ devébhiḥ ǀ agníḥ ǀ iṣitáḥ ǀ dhiyā́-vasuḥ ǁ

   antaḥ ǀ dūtaḥ ǀ rodasī iti ǀ dasmaḥ ǀ īyate ǀ hotā ǀ ni-sattaḥ ǀ manuṣaḥ ǀ puraḥ-hitaḥ ǀ
   kṣayam ǀ bṛhantam ǀ pari ǀ bhūṣati ǀ dyu-bhiḥ ǀ devebhiḥ ǀ agniḥ ǀ iṣitaḥ ǀ dhiyā-vasuḥ ǁ

   3.3.2 Aṣṭaka 2.8.20.2Anuvāka 3.1.40Interpretations

3. Ṛk 3

   के॒तुं य॒ज्ञानां॑ वि॒दथ॑स्य॒ साध॑नं॒ विप्रा॑सो अ॒ग्निं म॑हयंत॒ चित्ति॑भिः ।
   अपां॑सि॒ यस्मि॒न्नधि॑ संद॒धुर्गिर॒स्तस्मि॑न्त्सु॒म्नानि॒ यज॑मान॒ आ च॑के ॥

   केतुं यज्ञानां विदथस्य साधनं विप्रासो अग्निम् महयन्त चित्तिभिः |
   अपांसि यस्मिन्न् अधि संदधुर् गिरस् तस्मिन् सुम्नानि यजमान आ चके ||

   ketúm yajñā́nām vidáthasya sā́dhanam víprāso agním mahayanta cíttibhiḥ ǀ
   ápāṃsi yásminnádhi saṃdadhúrgírastásmintsumnā́ni yájamāna ā́ cake ǁ

   ketuṃ yajñānāṃ vidathasya sādhanaṃ viprāso agnim mahayanta cittibhiḥ |
   apāṃsi yasminn adhi saṃdadhur giras tasmin sumnāni yajamāna ā cake ||

   के॒तुम् । य॒ज्ञाना॑म् । वि॒दथ॑स्य । साध॑नम् । विप्रा॑सः । अ॒ग्निम् । म॒ह॒य॒न्त॒ । चित्ति॑ऽभिः ।
   अपां॑सि । यस्मि॑न् । अधि॑ । स॒म्ऽद॒धुः । गिरः॑ । तस्मि॑न् । सु॒म्नानि॑ । यज॑मानः । आ । च॒के॒ ॥

   केतुम् । यज्ञानाम् । विदथस्य । साधनम् । विप्रासः । अग्निम् । महयन्त । चित्तिऽभिः ।
   अपांसि । यस्मिन् । अधि । सम्ऽदधुः । गिरः । तस्मिन् । सुम्नानि । यजमानः । आ । चके ॥

   ketúm ǀ yajñā́nām ǀ vidáthasya ǀ sā́dhanam ǀ víprāsaḥ ǀ agním ǀ mahayanta ǀ cítti-bhiḥ ǀ
   ápāṃsi ǀ yásmin ǀ ádhi ǀ sam-dadhúḥ ǀ gíraḥ ǀ tásmin ǀ sumnā́ni ǀ yájamānaḥ ǀ ā́ ǀ cake ǁ

   ketum ǀ yajñānām ǀ vidathasya ǀ sādhanam ǀ viprāsaḥ ǀ agnim ǀ mahayanta ǀ citti-bhiḥ ǀ
   apāṃsi ǀ yasmin ǀ adhi ǀ sam-dadhuḥ ǀ giraḥ ǀ tasmin ǀ sumnāni ǀ yajamānaḥ ǀ ā ǀ cake ǁ

   3.3.3 Aṣṭaka 2.8.20.3Anuvāka 3.1.41Interpretations

4. Ṛk 4

   पि॒ता य॒ज्ञाना॒मसु॑रो विप॒श्चितां॑ वि॒मान॑म॒ग्निर्व॒युनं॑ च वा॒घतां॑ ।
   आ वि॑वेश॒ रोद॑सी॒ भूरि॑वर्पसा पुरुप्रि॒यो भं॑दते॒ धाम॑भिः क॒विः ॥

   पिता यज्ञानाम् असुरो विपश्चितां विमानम् अग्निर् वयुनं च वाघताम् |
   आ विवेश रोदसी भूरिवर्पसा पुरुप्रियो भन्दते धामभिः कविः ||

   pitā́ yajñā́nāmásuro vipaścítām vimā́namagnírvayúnam ca vāghátām ǀ
   ā́ viveśa ródasī bhū́rivarpasā purupriyó bhandate dhā́mabhiḥ kavíḥ ǁ

   pitā yajñānām asuro vipaścitāṃ vimānam agnir vayunaṃ ca vāghatām |
   ā viveśa rodasī bhūrivarpasā purupriyo bhandate dhāmabhiḥ kaviḥ ||

   पि॒ता । य॒ज्ञाना॑म् । असु॑रः । वि॒पः॒ऽचिता॑म् । वि॒ऽमान॑म् । अ॒ग्निः । व॒युन॑म् । च॒ । वा॒घता॑म् ।
   आ । वि॒वे॒श॒ । रोद॑सी॒ इति॑ । भूरि॑ऽवर्पसा । पु॒रु॒ऽप्रि॒यः । भ॒न्द॒ते॒ । धाम॑ऽभिः । क॒विः ॥

   पिता । यज्ञानाम् । असुरः । विपःऽचिताम् । विऽमानम् । अग्निः । वयुनम् । च । वाघताम् ।
   आ । विवेश । रोदसी इति । भूरिऽवर्पसा । पुरुऽप्रियः । भन्दते । धामऽभिः । कविः ॥

   pitā́ ǀ yajñā́nām ǀ ásuraḥ ǀ vipaḥ-cítām ǀ vi-mā́nam ǀ agníḥ ǀ vayúnam ǀ ca ǀ vāghátām ǀ
   ā́ ǀ viveśa ǀ ródasī íti ǀ bhū́ri-varpasā ǀ puru-priyáḥ ǀ bhandate ǀ dhā́ma-bhiḥ ǀ kavíḥ ǁ

   pitā ǀ yajñānām ǀ asuraḥ ǀ vipaḥ-citām ǀ vi-mānam ǀ agniḥ ǀ vayunam ǀ ca ǀ vāghatām ǀ
   ā ǀ viveśa ǀ rodasī iti ǀ bhūri-varpasā ǀ puru-priyaḥ ǀ bhandate ǀ dhāma-bhiḥ ǀ kaviḥ ǁ

   3.3.4 Aṣṭaka 2.8.20.4Anuvāka 3.1.42Interpretations

5. Ṛk 5

   चं॒द्रम॒ग्निं चं॒द्रर॑थं॒ हरि॑व्रतं वैश्वान॒रम॑प्सु॒षदं॑ स्व॒र्विदं॑ ।
   वि॒गा॒हं तूर्णिं॒ तवि॑षीभि॒रावृ॑तं॒ भूर्णिं॑ दे॒वास॑ इ॒ह सु॒श्रियं॑ दधुः ॥

   चन्द्रम् अग्निं चन्द्ररथं हरिव्रतं वैश्वानरम् अप्सुषदं स्वर्विदम् |
   विगाहं तूर्णिं तविषीभिर् आवृतम् भूर्णिं देवास इह सुश्रियं दधुः ||

   candrámagním candráratham hárivratam vaiśvānarámapsuṣádam svarvídam ǀ
   vigāhám tū́rṇim táviṣībhirā́vṛtam bhū́rṇim devā́sa ihá suśríyam dadhuḥ ǁ

   candram agniṃ candrarathaṃ harivrataṃ vaiśvānaram apsuṣadaṃ svarvidam |
   vigāhaṃ tūrṇiṃ taviṣībhir āvṛtam bhūrṇiṃ devāsa iha suśriyaṃ dadhuḥ ||

   च॒न्द्रम् । अ॒ग्निम् । च॒न्द्रऽर॑थम् । हरि॑ऽव्रतम् । वै॒श्वा॒न॒रम् । अ॒प्सु॒ऽसद॑म् । स्वः॒ऽविद॑म् ।
   वि॒ऽगा॒हम् । तूर्णि॑म् । तवि॑षीभिः । आऽवृ॑तम् । भूर्णि॑म् । दे॒वासः॑ । इ॒ह । सु॒ऽश्रिय॑म् । द॒धुः॒ ॥

   चन्द्रम् । अग्निम् । चन्द्रऽरथम् । हरिऽव्रतम् । वैश्वानरम् । अप्सुऽसदम् । स्वःऽविदम् ।
   विऽगाहम् । तूर्णिम् । तविषीभिः । आऽवृतम् । भूर्णिम् । देवासः । इह । सुऽश्रियम् । दधुः ॥

   candrám ǀ agním ǀ candrá-ratham ǀ hári-vratam ǀ vaiśvānarám ǀ apsu-sádam ǀ svaḥ-vídam ǀ
   vi-gāhám ǀ tū́rṇim ǀ táviṣībhiḥ ǀ ā́-vṛtam ǀ bhū́rṇim ǀ devā́saḥ ǀ ihá ǀ su-śríyam ǀ dadhuḥ ǁ

   candram ǀ agnim ǀ candra-ratham ǀ hari-vratam ǀ vaiśvānaram ǀ apsu-sadam ǀ svaḥ-vidam ǀ
   vi-gāham ǀ tūrṇim ǀ taviṣībhiḥ ǀ ā-vṛtam ǀ bhūrṇim ǀ devāsaḥ ǀ iha ǀ su-śriyam ǀ dadhuḥ ǁ

   3.3.5 Aṣṭaka 2.8.20.5Anuvāka 3.1.43Interpretations

6. Ṛk 6

   अ॒ग्निर्दे॒वेभि॒र्मनु॑षश्च जं॒तुभि॑स्तन्वा॒नो य॒ज्ञं पु॑रु॒पेश॑सं धि॒या ।
   र॒थीरं॒तरी॑यते॒ साध॑दिष्टिभिर्जी॒रो दमू॑ना अभिशस्ति॒चात॑नः ॥

   अग्निर् देवेभिर् मनुषश् च जन्तुभिस् तन्वानो यज्ञम् पुरुपेशसं धिया |
   रथीर् अन्तर् ईयते साधदिष्टिभिर् जीरो दमूना अभिशस्तिचातनः ||

   agnírdevébhirmánuṣaśca jantúbhistanvānó yajñám purupéśasam dhiyā́ ǀ
   rathī́rantárīyate sā́dhadiṣṭibhirjīró dámūnā abhiśasticā́tanaḥ ǁ

   agnir devebhir manuṣaś ca jantubhis tanvāno yajñam purupeśasaṃ dhiyā |
   rathīr antar īyate sādhadiṣṭibhir jīro damūnā abhiśasticātanaḥ ||

   अ॒ग्निः । दे॒वेभिः॑ । मनु॑षः । च॒ । ज॒न्तुऽभिः॑ । त॒न्वा॒नः । य॒ज्ञम् । पु॒रु॒ऽपेश॑सम् । धि॒या ।
   र॒थीः । अ॒न्तः । ई॒य॒ते॒ । साध॑दिष्टिऽभिः । जी॒रः । दमू॑नाः । अ॒भि॒श॒स्ति॒ऽचात॑नः ॥

   अग्निः । देवेभिः । मनुषः । च । जन्तुऽभिः । तन्वानः । यज्ञम् । पुरुऽपेशसम् । धिया ।
   रथीः । अन्तः । ईयते । साधदिष्टिऽभिः । जीरः । दमूनाः । अभिशस्तिऽचातनः ॥

   agníḥ ǀ devébhiḥ ǀ mánuṣaḥ ǀ ca ǀ jantú-bhiḥ ǀ tanvānáḥ ǀ yajñám ǀ puru-péśasam ǀ dhiyā́ ǀ
   rathī́ḥ ǀ antáḥ ǀ īyate ǀ sā́dhadiṣṭi-bhiḥ ǀ jīráḥ ǀ dámūnāḥ ǀ abhiśasti-cā́tanaḥ ǁ

   agniḥ ǀ devebhiḥ ǀ manuṣaḥ ǀ ca ǀ jantu-bhiḥ ǀ tanvānaḥ ǀ yajñam ǀ puru-peśasam ǀ dhiyā ǀ
   rathīḥ ǀ antaḥ ǀ īyate ǀ sādhadiṣṭi-bhiḥ ǀ jīraḥ ǀ damūnāḥ ǀ abhiśasti-cātanaḥ ǁ

   3.3.6 Aṣṭaka 2.8.21.1Anuvāka 3.1.44Interpretations

7. Ṛk 7

   अग्ने॒ जर॑स्व स्वप॒त्य आयु॑न्यू॒र्जा पि॑न्वस्व॒ समिषो॑ दिदीहि नः ।
   वयां॑सि जिन्व बृह॒तश्च॑ जागृव उ॒शिग्दे॒वाना॒मसि॑ सु॒क्रतु॑र्वि॒पां ॥

   अग्ने जरस्व स्वपत्य आयुन्य् ऊर्जा पिन्वस्व सम् इषो दिदीहि नः |
   वयांसि जिन्व बृहतश् च जागृव उशिग् देवानाम् असि सुक्रतुर् विपाम् ||

   ágne járasva svapatyá ā́yunyūrjā́ pinvasva sámíṣo didīhi naḥ ǀ
   váyāṃsi jinva bṛhatáśca jāgṛva uśígdevā́nāmási sukráturvipā́m ǁ

   agne jarasva svapatya āyuny ūrjā pinvasva sam iṣo didīhi naḥ |
   vayāṃsi jinva bṛhataś ca jāgṛva uśig devānām asi sukratur vipām ||

   अग्ने॑ । जर॑स्व । सु॒ऽअ॒प॒त्ये । आयु॑नि । ऊ॒र्जा । पि॒न्व॒स्व॒ । सम् । इषः॑ । दि॒दी॒हि॒ । नः॒ ।
   वयां॑सि । जि॒न्व॒ । बृ॒ह॒तः । च॒ । जा॒गृ॒वे॒ । उ॒शिक् । दे॒वाना॑म् । असि॑ । सु॒ऽक्रतुः॑ । वि॒पाम् ॥

   अग्ने । जरस्व । सुऽअपत्ये । आयुनि । ऊर्जा । पिन्वस्व । सम् । इषः । दिदीहि । नः ।
   वयांसि । जिन्व । बृहतः । च । जागृवे । उशिक् । देवानाम् । असि । सुऽक्रतुः । विपाम् ॥

   ágne ǀ járasva ǀ su-apatyé ǀ ā́yuni ǀ ūrjā́ ǀ pinvasva ǀ sám ǀ íṣaḥ ǀ didīhi ǀ naḥ ǀ
   váyāṃsi ǀ jinva ǀ bṛhatáḥ ǀ ca ǀ jāgṛve ǀ uśík ǀ devā́nām ǀ ási ǀ su-krátuḥ ǀ vipā́m ǁ

   agne ǀ jarasva ǀ su-apatye ǀ āyuni ǀ ūrjā ǀ pinvasva ǀ sam ǀ iṣaḥ ǀ didīhi ǀ naḥ ǀ
   vayāṃsi ǀ jinva ǀ bṛhataḥ ǀ ca ǀ jāgṛve ǀ uśik ǀ devānām ǀ asi ǀ su-kratuḥ ǀ vipām ǁ

   3.3.7 Aṣṭaka 2.8.21.2Anuvāka 3.1.45Interpretations

8. Ṛk 8

   वि॒श्पतिं॑ य॒ह्वमति॑थिं॒ नरः॒ सदा॑ यं॒तारं॑ धी॒नामु॒शिजं॑ च वा॒घतां॑ ।
   अ॒ध्व॒राणां॒ चेत॑नं जा॒तवे॑दसं॒ प्र शं॑संति॒ नम॑सा जू॒तिभि॑र्वृ॒धे ॥

   विश्पतिं यह्वम् अतिथिं नरः सदा यन्तारं धीनाम् उशिजं च वाघताम् |
   अध्वराणां चेतनं जातवेदसम् प्र शंसन्ति नमसा जूतिभिर् वृधे ||

   viśpátim yahvámátithim náraḥ sádā yantā́ram dhīnā́muśíjam ca vāghátām ǀ
   adhvarā́ṇām cétanam jātávedasam prá śaṃsanti námasā jūtíbhirvṛdhé ǁ

   viśpatiṃ yahvam atithiṃ naraḥ sadā yantāraṃ dhīnām uśijaṃ ca vāghatām |
   adhvarāṇāṃ cetanaṃ jātavedasam pra śaṃsanti namasā jūtibhir vṛdhe ||

   वि॒श्पति॑म् । य॒ह्वम् । अति॑थिम् । नरः॑ । सदा॑ । य॒न्तार॑म् । धी॒नाम् । उ॒शिज॑म् । च॒ । वा॒घता॑म् ।
   अ॒ध्व॒राणा॑म् । चेत॑नम् । जा॒तऽवे॑दसम् । प्र । शं॒स॒न्ति॒ । नम॑सा । जू॒तिऽभिः॑ । वृ॒धे ॥

   विश्पतिम् । यह्वम् । अतिथिम् । नरः । सदा । यन्तारम् । धीनाम् । उशिजम् । च । वाघताम् ।
   अध्वराणाम् । चेतनम् । जातऽवेदसम् । प्र । शंसन्ति । नमसा । जूतिऽभिः । वृधे ॥

   viśpátim ǀ yahvám ǀ átithim ǀ náraḥ ǀ sádā ǀ yantā́ram ǀ dhīnā́m ǀ uśíjam ǀ ca ǀ vāghátām ǀ
   adhvarā́ṇām ǀ cétanam ǀ jātá-vedasam ǀ prá ǀ śaṃsanti ǀ námasā ǀ jūtí-bhiḥ ǀ vṛdhé ǁ

   viśpatim ǀ yahvam ǀ atithim ǀ naraḥ ǀ sadā ǀ yantāram ǀ dhīnām ǀ uśijam ǀ ca ǀ vāghatām ǀ
   adhvarāṇām ǀ cetanam ǀ jāta-vedasam ǀ pra ǀ śaṃsanti ǀ namasā ǀ jūti-bhiḥ ǀ vṛdhe ǁ

   3.3.8 Aṣṭaka 2.8.21.3Anuvāka 3.1.46Interpretations

9. Ṛk 9

   वि॒भावा॑ दे॒वः सु॒रणः॒ परि॑ क्षि॒तीर॒ग्निर्ब॑भूव॒ शव॑सा सु॒मद्र॑थः ।
   तस्य॑ व्र॒तानि॑ भूरिपो॒षिणो॑ व॒यमुप॑ भूषेम॒ दम॒ आ सु॑वृ॒क्तिभिः॑ ॥

   विभावा देवः सुरणः परि क्षितीर् अग्निर् बभूव शवसा सुमद्रथः |
   तस्य व्रतानि भूरिपोषिणो वयम् उप भूषेम दम आ सुवृक्तिभिः ||

   vibhā́vā deváḥ suráṇaḥ pári kṣitī́ragnírbabhūva śávasā sumádrathaḥ ǀ
   tásya vratā́ni bhūripoṣíṇo vayámúpa bhūṣema dáma ā́ suvṛktíbhiḥ ǁ

   vibhāvā devaḥ suraṇaḥ pari kṣitīr agnir babhūva śavasā sumadrathaḥ |
   tasya vratāni bhūripoṣiṇo vayam upa bhūṣema dama ā suvṛktibhiḥ ||

   वि॒भाऽवा॑ । दे॒वः । सु॒ऽरणः॑ । परि॑ । क्षि॒तीः । अ॒ग्निः । ब॒भू॒व॒ । शव॑सा । सु॒मत्ऽर॑थः ।
   तस्य॑ । व्र॒तानि॑ । भू॒रि॒ऽपो॒षिणः॑ । व॒यम् । उप॑ । भू॒षे॒म॒ । दमे॑ । आ । सु॒वृ॒क्तिऽभिः॑ ॥

   विभाऽवा । देवः । सुऽरणः । परि । क्षितीः । अग्निः । बभूव । शवसा । सुमत्ऽरथः ।
   तस्य । व्रतानि । भूरिऽपोषिणः । वयम् । उप । भूषेम । दमे । आ । सुवृक्तिऽभिः ॥

   vibhā́-vā ǀ deváḥ ǀ su-ráṇaḥ ǀ pári ǀ kṣitī́ḥ ǀ agníḥ ǀ babhūva ǀ śávasā ǀ sumát-rathaḥ ǀ
   tásya ǀ vratā́ni ǀ bhūri-poṣíṇaḥ ǀ vayám ǀ úpa ǀ bhūṣema ǀ dáme ǀ ā́ ǀ suvṛktí-bhiḥ ǁ

   vibhā-vā ǀ devaḥ ǀ su-raṇaḥ ǀ pari ǀ kṣitīḥ ǀ agniḥ ǀ babhūva ǀ śavasā ǀ sumat-rathaḥ ǀ
   tasya ǀ vratāni ǀ bhūri-poṣiṇaḥ ǀ vayam ǀ upa ǀ bhūṣema ǀ dame ǀ ā ǀ suvṛkti-bhiḥ ǁ

   3.3.9 Aṣṭaka 2.8.21.4Anuvāka 3.1.47Interpretations

10. Ṛk 10

    वैश्वा॑नर॒ तव॒ धामा॒न्या च॑के॒ येभिः॑ स्व॒र्विदभ॑वो विचक्षण ।
    जा॒त आपृ॑णो॒ भुव॑नानि॒ रोद॑सी॒ अग्ने॒ ता विश्वा॑ परि॒भूर॑सि॒ त्मना॑ ॥

    वैश्वानर तव धामान्य् आ चके येभिः स्वर्विद् अभवो विचक्षण |
    जात आपृणो भुवनानि रोदसी अग्ने ता विश्वा परिभूर् असि त्मना ||

    váiśvānara táva dhā́mānyā́ cake yébhiḥ svarvídábhavo vicakṣaṇa ǀ
    jātá ā́pṛṇo bhúvanāni ródasī ágne tā́ víśvā paribhū́rasi tmánā ǁ

    vaiśvānara tava dhāmāny ā cake yebhiḥ svarvid abhavo vicakṣaṇa |
    jāta āpṛṇo bhuvanāni rodasī agne tā viśvā paribhūr asi tmanā ||

    वैश्वा॑नर । तव॑ । धामा॑नि । आ । च॒क्रे॒ । येभिः॑ । स्वः॒ऽवित् । अभ॑वः । वि॒ऽच॒क्ष॒ण॒ ।
    जा॒तः । आ । अ॒पृ॒णः॒ । भुव॑नानि । रोद॑सी॒ इति॑ । अग्ने॑ । ता । विश्वा॑ । प॒रि॒ऽभूः । अ॒सि॒ । त्मना॑ ॥

    वैश्वानर । तव । धामानि । आ । चक्रे । येभिः । स्वःऽवित् । अभवः । विऽचक्षण ।
    जातः । आ । अपृणः । भुवनानि । रोदसी इति । अग्ने । ता । विश्वा । परिऽभूः । असि । त्मना ॥

    váiśvānara ǀ táva ǀ dhā́māni ǀ ā́ ǀ cakre ǀ yébhiḥ ǀ svaḥ-vít ǀ ábhavaḥ ǀ vi-cakṣaṇa ǀ
    jātáḥ ǀ ā́ ǀ apṛṇaḥ ǀ bhúvanāni ǀ ródasī íti ǀ ágne ǀ tā́ ǀ víśvā ǀ pari-bhū́ḥ ǀ asi ǀ tmánā ǁ

    vaiśvānara ǀ tava ǀ dhāmāni ǀ ā ǀ cakre ǀ yebhiḥ ǀ svaḥ-vit ǀ abhavaḥ ǀ vi-cakṣaṇa ǀ
    jātaḥ ǀ ā ǀ apṛṇaḥ ǀ bhuvanāni ǀ rodasī iti ǀ agne ǀ tā ǀ viśvā ǀ pari-bhūḥ ǀ asi ǀ tmanā ǁ

    3.3.10 Aṣṭaka 2.8.21.5Anuvāka 3.1.48Interpretations

11. Ṛk 11

    वै॒श्वा॒न॒रस्य॑ दं॒सना॑भ्यो बृ॒हदरि॑णा॒देकः॑ स्वप॒स्यया॑ क॒विः ।
    उ॒भा पि॒तरा॑ म॒हय॑न्नजायता॒ग्निर्द्यावा॑पृथि॒वी भूरि॑रेतसा ॥

    वैश्वानरस्य दंसनाभ्यो बृहद् अरिणाद् एकः स्वपस्यया कविः |
    उभा पितरा महयन्न् अजायताग्निर् द्यावापृथिवी भूरिरेतसा ||

    vaiśvānarásya daṃsánābhyo bṛhádáriṇādékaḥ svapasyáyā kavíḥ ǀ
    ubhā́ pitárā maháyannajāyatāgnírdyā́vāpṛthivī́ bhū́riretasā ǁ

    vaiśvānarasya daṃsanābhyo bṛhad ariṇād ekaḥ svapasyayā kaviḥ |
    ubhā pitarā mahayann ajāyatāgnir dyāvāpṛthivī bhūriretasā ||

    वै॒श्वा॒न॒रस्य॑ । दं॒सना॑भ्यः । बृ॒हत् । अरि॑णात् । एकः॑ । सु॒ऽअ॒प॒स्यया॑ । क॒विः ।
    उ॒भा । पि॒तरा॑ । म॒हय॑न् । अ॒जा॒य॒त॒ । अ॒ग्निः । द्यावा॑पृथि॒वी इति॑ । भूरि॑ऽरेतसा ॥

    वैश्वानरस्य । दंसनाभ्यः । बृहत् । अरिणात् । एकः । सुऽअपस्यया । कविः ।
    उभा । पितरा । महयन् । अजायत । अग्निः । द्यावापृथिवी इति । भूरिऽरेतसा ॥

    vaiśvānarásya ǀ daṃsánābhyaḥ ǀ bṛhát ǀ áriṇāt ǀ ékaḥ ǀ su-apasyáyā ǀ kavíḥ ǀ
    ubhā́ ǀ pitárā ǀ maháyan ǀ ajāyata ǀ agníḥ ǀ dyā́vāpṛthivī́ íti ǀ bhū́ri-retasā ǁ

    vaiśvānarasya ǀ daṃsanābhyaḥ ǀ bṛhat ǀ ariṇāt ǀ ekaḥ ǀ su-apasyayā ǀ kaviḥ ǀ
    ubhā ǀ pitarā ǀ mahayan ǀ ajāyata ǀ agniḥ ǀ dyāvāpṛthivī iti ǀ bhūri-retasā ǁ

    3.3.11 Aṣṭaka 2.8.21.6Anuvāka 3.1.49Interpretations

Text, recitation and interpretations from the Ṛgveda database of theveda.org.in.