Devatā देवता

Indra

Ṛṣi ऋषि

Viśvāmitra Gāthina

Chandas छन्दस्

Triṣṭubh

1. Ṛk 1

   तिष्ठा॒ हरी॒ रथ॒ आ यु॒ज्यमा॑ना या॒हि वा॒युर्न नि॒युतो॑ नो॒ अच्छ॑ ।
   पिबा॒स्यंधो॑ अ॒भिसृ॑ष्टो अ॒स्मे इंद्र॒ स्वाहा॑ ररि॒मा ते॒ मदा॑य ॥

   तिष्ठा हरी रथ आ युज्यमाना याहि वायुर् न नियुतो नो अच्छ |
   पिबास्य् अन्धो अभिसृष्टो अस्मे इन्द्र स्वाहा ररिमा ते मदाय ||

   tíṣṭhā hárī rátha ā́ yujyámānā yāhí vāyúrná niyúto no áccha ǀ
   píbāsyándho abhísṛṣṭo asmé índra svā́hā rarimā́ te mádāya ǁ

   tiṣṭhā harī ratha ā yujyamānā yāhi vāyur na niyuto no accha |
   pibāsy andho abhisṛṣṭo asme indra svāhā rarimā te madāya ||

   तिष्ठ॑ । हरी॒ इति॑ । रथे॑ । आ । यु॒ज्यमा॑ना । या॒हि । वा॒युः । न । नि॒ऽयुतः॑ । नः॒ । अच्छ॑ ।
   पिबा॑सि । अन्धः॑ । अ॒भिऽसृ॑ष्टः । अ॒स्मे इति॑ । इन्द्र॑ । स्वाहा॑ । र॒रि॒म । ते॒ । मदा॑य ॥

   तिष्ठ । हरी इति । रथे । आ । युज्यमाना । याहि । वायुः । न । निऽयुतः । नः । अच्छ ।
   पिबासि । अन्धः । अभिऽसृष्टः । अस्मे इति । इन्द्र । स्वाहा । ररिम । ते । मदाय ॥

   tíṣṭha ǀ hárī íti ǀ ráthe ǀ ā́ ǀ yujyámānā ǀ yāhí ǀ vāyúḥ ǀ ná ǀ ni-yútaḥ ǀ naḥ ǀ áccha ǀ
   píbāsi ǀ ándhaḥ ǀ abhí-sṛṣṭaḥ ǀ asmé íti ǀ índra ǀ svā́hā ǀ rarimá ǀ te ǀ mádāya ǁ

   tiṣṭha ǀ harī iti ǀ rathe ǀ ā ǀ yujyamānā ǀ yāhi ǀ vāyuḥ ǀ na ǀ ni-yutaḥ ǀ naḥ ǀ accha ǀ
   pibāsi ǀ andhaḥ ǀ abhi-sṛṣṭaḥ ǀ asme iti ǀ indra ǀ svāhā ǀ rarima ǀ te ǀ madāya ǁ

   3.35.1 Aṣṭaka 3.2.17.1Anuvāka 3.3.86Interpretations

2. Ṛk 2

   उपा॑जि॒रा पु॑रुहू॒ताय॒ सप्ती॒ हरी॒ रथ॑स्य धू॒र्ष्वा यु॑नज्मि ।
   द्र॒वद्यथा॒ संभृ॑तं वि॒श्वत॑श्चि॒दुपे॒मं य॒ज्ञमा व॑हात॒ इंद्रं॑ ॥

   उपाजिरा पुरुहूताय सप्ती हरी रथस्य धूर्ष्व् आ युनज्मि |
   द्रवद् यथा सम्भृतं विश्वतश् चिद् उपेमं यज्ञम् आ वहात इन्द्रम् ||

   úpājirā́ puruhūtā́ya sáptī hárī ráthasya dhūrṣvā́ yunajmi ǀ
   dravádyáthā sámbhṛtam viśvátaścidúpemám yajñámā́ vahāta índram ǁ

   upājirā puruhūtāya saptī harī rathasya dhūrṣv ā yunajmi |
   dravad yathā sambhṛtaṃ viśvataś cid upemaṃ yajñam ā vahāta indram ||

   उप॑ । अ॒जि॒रा । पु॒रु॒ऽहू॒ताय॑ । सप्ती॒ इति॑ । हरी॒ इति॑ । रथ॑स्य । धूः॒ऽसु । आ । यु॒न॒ज्मि॒ ।
   द्र॒वत् । यथा॑ । सम्ऽभृ॑तम् । वि॒श्वतः॑ । चि॒त् । उप॑ । इ॒मम् । य॒ज्ञम् । आ । व॒हा॒तः॒ । इन्द्र॑म् ॥

   उप । अजिरा । पुरुऽहूताय । सप्ती इति । हरी इति । रथस्य । धूःऽसु । आ । युनज्मि ।
   द्रवत् । यथा । सम्ऽभृतम् । विश्वतः । चित् । उप । इमम् । यज्ञम् । आ । वहातः । इन्द्रम् ॥

   úpa ǀ ajirā́ ǀ puru-hūtā́ya ǀ sáptī íti ǀ hárī íti ǀ ráthasya ǀ dhūḥ-sú ǀ ā́ ǀ yunajmi ǀ
   dravát ǀ yáthā ǀ sám-bhṛtam ǀ viśvátaḥ ǀ cit ǀ úpa ǀ imám ǀ yajñám ǀ ā́ ǀ vahātaḥ ǀ índram ǁ

   upa ǀ ajirā ǀ puru-hūtāya ǀ saptī iti ǀ harī iti ǀ rathasya ǀ dhūḥ-su ǀ ā ǀ yunajmi ǀ
   dravat ǀ yathā ǀ sam-bhṛtam ǀ viśvataḥ ǀ cit ǀ upa ǀ imam ǀ yajñam ǀ ā ǀ vahātaḥ ǀ indram ǁ

   3.35.2 Aṣṭaka 3.2.17.2Anuvāka 3.3.87Interpretations

3. Ṛk 3

   उपो॑ नयस्व॒ वृष॑णा तपु॒ष्पोतेम॑व॒ त्वं वृ॑षभ स्वधावः ।
   ग्रसे॑ता॒मश्वा॒ वि मु॑चे॒ह शोणा॑ दि॒वेदि॑वे स॒दृशी॑रद्धि धा॒नाः ॥

   उपो नयस्व वृषणा तपुष्पोतेम् अव त्वं वृषभ स्वधावः |
   ग्रसेताम् अश्वा वि मुचेह शोणा दिवे-दिवे सदृशीर् अद्धि धानाः ||

   úpo nayasva vṛ́ṣaṇā tapuṣpótémava tvám vṛṣabha svadhāvaḥ ǀ
   grásetāmáśvā ví mucehá śóṇā divédive sadṛ́śīraddhi dhānā́ḥ ǁ

   upo nayasva vṛṣaṇā tapuṣpotem ava tvaṃ vṛṣabha svadhāvaḥ |
   grasetām aśvā vi muceha śoṇā dive-dive sadṛśīr addhi dhānāḥ ||

   उपो॒ इति॑ । न॒य॒स्व॒ । वृष॑णा । त॒पुः॒ऽपा । उ॒त । ई॒म् । अ॒व॒ । त्वम् । वृ॒ष॒भ॒ । स्व॒धा॒ऽवः॒ ।
   ग्रसे॑ताम् । अश्वा॑ । वि । मु॒च॒ । इ॒ह । शोणा॑ । दि॒वेऽदि॑वे । स॒ऽदृशीः॑ । अ॒द्धि॒ । धा॒नाः ॥

   उपो इति । नयस्व । वृषणा । तपुःऽपा । उत । ईम् । अव । त्वम् । वृषभ । स्वधाऽवः ।
   ग्रसेताम् । अश्वा । वि । मुच । इह । शोणा । दिवेऽदिवे । सऽदृशीः । अद्धि । धानाः ॥

   úpo íti ǀ nayasva ǀ vṛ́ṣaṇā ǀ tapuḥ-pā́ ǀ utá ǀ īm ǀ ava ǀ tvám ǀ vṛṣabha ǀ svadhā-vaḥ ǀ
   grásetām ǀ áśvā ǀ ví ǀ muca ǀ ihá ǀ śóṇā ǀ divé-dive ǀ sa-dṛ́śīḥ ǀ addhi ǀ dhānā́ḥ ǁ

   upo iti ǀ nayasva ǀ vṛṣaṇā ǀ tapuḥ-pā ǀ uta ǀ īm ǀ ava ǀ tvam ǀ vṛṣabha ǀ svadhā-vaḥ ǀ
   grasetām ǀ aśvā ǀ vi ǀ muca ǀ iha ǀ śoṇā ǀ dive-dive ǀ sa-dṛśīḥ ǀ addhi ǀ dhānāḥ ǁ

   3.35.3 Aṣṭaka 3.2.17.3Anuvāka 3.3.88Interpretations

4. Ṛk 4

   ब्रह्म॑णा ते ब्रह्म॒युजा॑ युनज्मि॒ हरी॒ सखा॑या सध॒माद॑ आ॒शू ।
   स्थि॒रं रथं॑ सु॒खमिं॑द्राधि॒तिष्ठ॑न्प्रजा॒नन्वि॒द्वाँ उप॑ याहि॒ सोमं॑ ॥

   ब्रह्मणा ते ब्रह्मयुजा युनज्मि हरी सखाया सधमाद आशू |
   स्थिरं रथं सुखम् इन्द्राधितिष्ठन् प्रजानन् विद्वां उप याहि सोमम् ||

   bráhmaṇā te brahmayújā yunajmi hárī sákhāyā sadhamā́da āśū́ ǀ
   sthirám rátham sukhámindrādhitíṣṭhanprajānánvidvā́m̐ úpa yāhi sómam ǁ

   brahmaṇā te brahmayujā yunajmi harī sakhāyā sadhamāda āśū |
   sthiraṃ rathaṃ sukham indrādhitiṣṭhan prajānan vidvāṃ upa yāhi somam ||

   ब्रह्म॑णा । ते॒ । ब्र॒ह्म॒ऽयुजा॑ । यु॒न॒ज्मि॒ । हरी॒ इति॑ । सखा॑या । स॒ध॒ऽमादे॑ । आ॒शू इति॑ ।
   स्थि॒रम् । रथ॑म् । सु॒ऽखम् । इ॒न्द्र॒ । अ॒धि॒ऽतिष्ठ॑न् । प्र॒ऽजा॒नन् । वि॒द्वान् । उप॑ । या॒हि॒ । सोम॑म् ॥

   ब्रह्मणा । ते । ब्रह्मऽयुजा । युनज्मि । हरी इति । सखाया । सधऽमादे । आशू इति ।
   स्थिरम् । रथम् । सुऽखम् । इन्द्र । अधिऽतिष्ठन् । प्रऽजानन् । विद्वान् । उप । याहि । सोमम् ॥

   bráhmaṇā ǀ te ǀ brahma-yújā ǀ yunajmi ǀ hárī íti ǀ sákhāyā ǀ sadha-mā́de ǀ āśū́ íti ǀ
   sthirám ǀ rátham ǀ su-khám ǀ indra ǀ adhi-tíṣṭhan ǀ pra-jānán ǀ vidvā́n ǀ úpa ǀ yāhi ǀ sómam ǁ

   brahmaṇā ǀ te ǀ brahma-yujā ǀ yunajmi ǀ harī iti ǀ sakhāyā ǀ sadha-māde ǀ āśū iti ǀ
   sthiram ǀ ratham ǀ su-kham ǀ indra ǀ adhi-tiṣṭhan ǀ pra-jānan ǀ vidvān ǀ upa ǀ yāhi ǀ somam ǁ

   3.35.4 Aṣṭaka 3.2.17.4Anuvāka 3.3.89Interpretations

5. Ṛk 5

   मा ते॒ हरी॒ वृष॑णा वी॒तपृ॑ष्ठा॒ नि री॑रम॒न्यज॑मानासो अ॒न्ये ।
   अ॒त्याया॑हि॒ शश्व॑तो व॒यं तेऽरं॑ सु॒तेभिः॑ कृणवाम॒ सोमैः॑ ॥

   मा ते हरी वृषणा वीतपृष्ठा नि रीरमन् यजमानासो अन्ये |
   अत्यायाहि शश्वतो वयं ते ऽरं सुतेभिः कृणवाम सोमैः ||

   mā́ te hárī vṛ́ṣaṇā vītápṛṣṭhā ní rīramanyájamānāso anyé ǀ
   atyā́yāhi śáśvato vayám té’ram sutébhiḥ kṛṇavāma sómaiḥ ǁ

   mā te harī vṛṣaṇā vītapṛṣṭhā ni rīraman yajamānāso anye |
   atyāyāhi śaśvato vayaṃ te 'raṃ sutebhiḥ kṛṇavāma somaiḥ ||

   मा । ते॒ । हरी॒ इति॑ । वृष॑णा । वी॒तऽपृ॑ष्ठा । नि । री॒र॒म॒न् । यज॑मानासः । अ॒न्ये ।
   अ॒ति॒ऽआया॑हि । शश्व॑तः । व॒यम् । ते॒ । अर॑म् । सु॒तेभिः॑ । कृ॒ण॒वा॒म॒ । सोमैः॑ ॥

   मा । ते । हरी इति । वृषणा । वीतऽपृष्ठा । नि । रीरमन् । यजमानासः । अन्ये ।
   अतिऽआयाहि । शश्वतः । वयम् । ते । अरम् । सुतेभिः । कृणवाम । सोमैः ॥

   mā́ ǀ te ǀ hárī íti ǀ vṛ́ṣaṇā ǀ vītá-pṛṣṭhā ǀ ní ǀ rīraman ǀ yájamānāsaḥ ǀ anyé ǀ
   ati-ā́yāhi ǀ śáśvataḥ ǀ vayám ǀ te ǀ áram ǀ sutébhiḥ ǀ kṛṇavāma ǀ sómaiḥ ǁ

   mā ǀ te ǀ harī iti ǀ vṛṣaṇā ǀ vīta-pṛṣṭhā ǀ ni ǀ rīraman ǀ yajamānāsaḥ ǀ anye ǀ
   ati-āyāhi ǀ śaśvataḥ ǀ vayam ǀ te ǀ aram ǀ sutebhiḥ ǀ kṛṇavāma ǀ somaiḥ ǁ

   3.35.5 Aṣṭaka 3.2.17.5Anuvāka 3.3.90Interpretations

6. Ṛk 6

   तवा॒यं सोम॒स्त्वमेह्य॒र्वाङ् श॑श्वत्त॒मं सु॒मना॑ अ॒स्य पा॑हि ।
   अ॒स्मिन्य॒ज्ञे ब॒र्हिष्या नि॒षद्या॑ दधि॒ष्वेमं ज॒ठर॒ इंदु॑मिंद्र ॥

   तवायं सोमस् त्वम् एह्य् अर्वाङ् छश्वत्तमं सुमना अस्य पाहि |
   अस्मिन् यज्ञे बर्हिष्य् आ निषद्या दधिष्वेमं जठर इन्दुम् इन्द्र ||

   távāyám sómastváméhyarvā́ṅ śaśvattamám sumánā asyá pāhi ǀ
   asmínyajñé barhíṣyā́ niṣádyā dadhiṣvémám jaṭhára índumindra ǁ

   tavāyaṃ somas tvam ehy arvāṅ chaśvattamaṃ sumanā asya pāhi |
   asmin yajñe barhiṣy ā niṣadyā dadhiṣvemaṃ jaṭhara indum indra ||

   तव॑ । अ॒यम् । सोमः॑ । त्वम् । आ । इ॒हि॒ । अ॒र्वाङ् । श॒श्व॒त्ऽत॒मम् । सु॒ऽमनाः॑ । अ॒स्य । पा॒हि॒ ।
   अ॒स्मिन् । य॒ज्ञे । ब॒र्हिषि॑ । आ । नि॒ऽसद्य॑ । द॒धि॒ष्व । इ॒मम् । ज॒ठरे॑ । इन्दु॑म् । इ॒न्द्र॒ ॥

   तव । अयम् । सोमः । त्वम् । आ । इहि । अर्वाङ् । शश्वत्ऽतमम् । सुऽमनाः । अस्य । पाहि ।
   अस्मिन् । यज्ञे । बर्हिषि । आ । निऽसद्य । दधिष्व । इमम् । जठरे । इन्दुम् । इन्द्र ॥

   táva ǀ ayám ǀ sómaḥ ǀ tvám ǀ ā́ ǀ ihi ǀ arvā́ṅ ǀ śaśvat-tamám ǀ su-mánāḥ ǀ asyá ǀ pāhi ǀ
   asmín ǀ yajñé ǀ barhíṣi ǀ ā́ ǀ ni-sádya ǀ dadhiṣvá ǀ imám ǀ jaṭháre ǀ índum ǀ indra ǁ

   tava ǀ ayam ǀ somaḥ ǀ tvam ǀ ā ǀ ihi ǀ arvāṅ ǀ śaśvat-tamam ǀ su-manāḥ ǀ asya ǀ pāhi ǀ
   asmin ǀ yajñe ǀ barhiṣi ǀ ā ǀ ni-sadya ǀ dadhiṣva ǀ imam ǀ jaṭhare ǀ indum ǀ indra ǁ

   3.35.6 Aṣṭaka 3.2.18.1Anuvāka 3.3.91Interpretations

7. Ṛk 7

   स्ती॒र्णं ते॑ ब॒र्हिः सु॒त इं॑द्र॒ सोमः॑ कृ॒ता धा॒ना अत्त॑वे ते॒ हरि॑भ्यां ।
   तदो॑कसे पुरु॒शाका॑य॒ वृष्णे॑ म॒रुत्व॑ते॒ तुभ्यं॑ रा॒ता ह॒वींषि॑ ॥

   स्तीर्णं ते बर्हिः सुत इन्द्र सोमः कृता धाना अत्तवे ते हरिभ्याम् |
   तदोकसे पुरुशाकाय वृष्णे मरुत्वते तुभ्यं राता हवींषि ||

   stīrṇám te barhíḥ sutá indra sómaḥ kṛtā́ dhānā́ áttave te háribhyām ǀ
   tádokase puruśā́kāya vṛ́ṣṇe marútvate túbhyam rātā́ havī́ṃṣi ǁ

   stīrṇaṃ te barhiḥ suta indra somaḥ kṛtā dhānā attave te haribhyām |
   tadokase puruśākāya vṛṣṇe marutvate tubhyaṃ rātā havīṃṣi ||

   स्ती॒र्णम् । ते॒ । ब॒र्हिः । सु॒तः । इ॒न्द्र॒ । सोमः॑ । कृ॒ताः । धा॒नाः । अत्त॑वे । ते॒ । हरि॑ऽभ्याम् ।
   तत्ऽओ॑कसे । पु॒रु॒ऽशाका॑य । वृष्णे॑ । म॒रुत्व॑ते । तुभ्य॑म् । रा॒ता । ह॒वींषि॑ ॥

   स्तीर्णम् । ते । बर्हिः । सुतः । इन्द्र । सोमः । कृताः । धानाः । अत्तवे । ते । हरिऽभ्याम् ।
   तत्ऽओकसे । पुरुऽशाकाय । वृष्णे । मरुत्वते । तुभ्यम् । राता । हवींषि ॥

   stīrṇám ǀ te ǀ barhíḥ ǀ sutáḥ ǀ indra ǀ sómaḥ ǀ kṛtā́ḥ ǀ dhānā́ḥ ǀ áttave ǀ te ǀ hári-bhyām ǀ
   tát-okase ǀ puru-śā́kāya ǀ vṛ́ṣṇe ǀ marútvate ǀ túbhyam ǀ rātā́ ǀ havī́ṃṣi ǁ

   stīrṇam ǀ te ǀ barhiḥ ǀ sutaḥ ǀ indra ǀ somaḥ ǀ kṛtāḥ ǀ dhānāḥ ǀ attave ǀ te ǀ hari-bhyām ǀ
   tat-okase ǀ puru-śākāya ǀ vṛṣṇe ǀ marutvate ǀ tubhyam ǀ rātā ǀ havīṃṣi ǁ

   3.35.7 Aṣṭaka 3.2.18.2Anuvāka 3.3.92Interpretations

8. Ṛk 8

   इ॒मं नरः॒ पर्व॑ता॒स्तुभ्य॒मापः॒ समिं॑द्र॒ गोभि॒र्मधु॑मंतमक्रन् ।
   तस्या॒गत्या॑ सु॒मना॑ ऋष्व पाहि प्रजा॒नन्वि॒द्वान्प॒थ्या॒३॒॑ अनु॒ स्वाः ॥

   इमं नरः पर्वतास् तुभ्यम् आपः सम् इन्द्र गोभिर् मधुमन्तम् अक्रन् |
   तस्यागत्या सुमना ऋष्व पाहि प्रजानन् विद्वान् पथ्या अनु स्वाः ||

   imám náraḥ párvatāstúbhyamā́paḥ sámindra góbhirmádhumantamakran ǀ
   tásyāgátyā sumánā ṛṣva pāhi prajānánvidvā́npathyā́ ánu svā́ḥ ǁ

   imaṃ naraḥ parvatās tubhyam āpaḥ sam indra gobhir madhumantam akran |
   tasyāgatyā sumanā ṛṣva pāhi prajānan vidvān pathyā anu svāḥ ||

   इ॒मम् । नरः॑ । पर्व॑ताः । तुभ्य॑म् । आपः॑ । सम् । इ॒न्द्र॒ । गोभिः॑ । मधु॑ऽमन्तम् । अ॒क्र॒न् ।
   तस्य॑ । आ॒ऽगत्य॑ । सु॒ऽमनाः॑ । ऋ॒ष्व॒ । पा॒हि॒ । प्र॒ऽजा॒नन् । वि॒द्वान् । प॒थ्याः॑ । अनु॑ । स्वाः ॥

   इमम् । नरः । पर्वताः । तुभ्यम् । आपः । सम् । इन्द्र । गोभिः । मधुऽमन्तम् । अक्रन् ।
   तस्य । आऽगत्य । सुऽमनाः । ऋष्व । पाहि । प्रऽजानन् । विद्वान् । पथ्याः । अनु । स्वाः ॥

   imám ǀ náraḥ ǀ párvatāḥ ǀ túbhyam ǀ ā́paḥ ǀ sám ǀ indra ǀ góbhiḥ ǀ mádhu-mantam ǀ akran ǀ
   tásya ǀ ā-gátya ǀ su-mánāḥ ǀ ṛṣva ǀ pāhi ǀ pra-jānán ǀ vidvā́n ǀ pathyā́ḥ ǀ ánu ǀ svā́ḥ ǁ

   imam ǀ naraḥ ǀ parvatāḥ ǀ tubhyam ǀ āpaḥ ǀ sam ǀ indra ǀ gobhiḥ ǀ madhu-mantam ǀ akran ǀ
   tasya ǀ ā-gatya ǀ su-manāḥ ǀ ṛṣva ǀ pāhi ǀ pra-jānan ǀ vidvān ǀ pathyāḥ ǀ anu ǀ svāḥ ǁ

   3.35.8 Aṣṭaka 3.2.18.3Anuvāka 3.3.93Interpretations

9. Ṛk 9

   याँ आभ॑जो म॒रुत॑ इंद्र॒ सोमे॒ ये त्वामव॑र्ध॒न्नभ॑वन्ग॒णस्ते॑ ।
   तेभि॑रे॒तं स॒जोषा॑ वावशा॒नो॒३॒॑ऽग्नेः पि॑ब जि॒ह्वया॒ सोम॑मिंद्र ॥

   यां आभजो मरुत इन्द्र सोमे ये त्वाम् अवर्धन्न् अभवन् गणस् ते |
   तेभिर् एतं सजोषा वावशानो ऽग्नेः पिब जिह्वया सोमम् इन्द्र ||

   yā́m̐ ā́bhajo marúta indra sóme yé tvā́mávardhannábhavangaṇáste ǀ
   tébhiretám sajóṣā vāvaśāno’gnéḥ piba jihváyā sómamindra ǁ

   yāṃ ābhajo maruta indra some ye tvām avardhann abhavan gaṇas te |
   tebhir etaṃ sajoṣā vāvaśāno 'gneḥ piba jihvayā somam indra ||

   यान् । आ । अभ॑जः । म॒रुतः॑ । इ॒न्द्र॒ । सोमे॑ । ये । त्वाम् । अव॑र्धन् । अभ॑वन् । ग॒णः । ते॒ ।
   तेभिः॑ । ए॒तम् । स॒ऽजोषाः॑ । वा॒व॒शा॒नः । अ॒ग्नेः । पि॒ब॒ । जि॒ह्वया॑ । सोम॑म् । इ॒न्द्र॒ ॥

   यान् । आ । अभजः । मरुतः । इन्द्र । सोमे । ये । त्वाम् । अवर्धन् । अभवन् । गणः । ते ।
   तेभिः । एतम् । सऽजोषाः । वावशानः । अग्नेः । पिब । जिह्वया । सोमम् । इन्द्र ॥

   yā́n ǀ ā́ ǀ ábhajaḥ ǀ marútaḥ ǀ indra ǀ sóme ǀ yé ǀ tvā́m ǀ ávardhan ǀ ábhavan ǀ gaṇáḥ ǀ te ǀ
   tébhiḥ ǀ etám ǀ sa-jóṣāḥ ǀ vāvaśānáḥ ǀ agnéḥ ǀ piba ǀ jihváyā ǀ sómam ǀ indra ǁ

   yān ǀ ā ǀ abhajaḥ ǀ marutaḥ ǀ indra ǀ some ǀ ye ǀ tvām ǀ avardhan ǀ abhavan ǀ gaṇaḥ ǀ te ǀ
   tebhiḥ ǀ etam ǀ sa-joṣāḥ ǀ vāvaśānaḥ ǀ agneḥ ǀ piba ǀ jihvayā ǀ somam ǀ indra ǁ

   3.35.9 Aṣṭaka 3.2.18.4Anuvāka 3.3.94Interpretations

10. Ṛk 10

    इंद्र॒ पिब॑ स्व॒धया॑ चित्सु॒तस्या॒ग्नेर्वा॑ पाहि जि॒ह्वया॑ यजत्र ।
    अ॒ध्व॒र्योर्वा॒ प्रय॑तं शक्र॒ हस्ता॒द्धोतु॑र्वा य॒ज्ञं ह॒विषो॑ जुषस्व ॥

    इन्द्र पिब स्वधया चित् सुतस्याग्नेर् वा पाहि जिह्वया यजत्र |
    अध्वर्योर् वा प्रयतं शक्र हस्ताद् धोतुर् वा यज्ञं हविषो जुषस्व ||

    índra píba svadháyā citsutásyāgnérvā pāhi jihváyā yajatra ǀ
    adhvaryórvā práyatam śakra hástāddhóturvā yajñám havíṣo juṣasva ǁ

    indra piba svadhayā cit sutasyāgner vā pāhi jihvayā yajatra |
    adhvaryor vā prayataṃ śakra hastād dhotur vā yajñaṃ haviṣo juṣasva ||

    इन्द्र॑ । पिब॑ । स्व॒धया॑ । चि॒त् । सु॒तस्य॑ । अ॒ग्नेः । वा॒ । पा॒हि॒ । जि॒ह्वया॑ । य॒ज॒त्र॒ ।
    अ॒ध्व॒र्योः । वा॒ । प्रऽय॑तम् । श॒क्र॒ । हस्ता॑त् । होतुः॑ । वा॒ । य॒ज्ञम् । ह॒विषः॑ । जु॒ष॒स्व॒ ॥

    इन्द्र । पिब । स्वधया । चित् । सुतस्य । अग्नेः । वा । पाहि । जिह्वया । यजत्र ।
    अध्वर्योः । वा । प्रऽयतम् । शक्र । हस्तात् । होतुः । वा । यज्ञम् । हविषः । जुषस्व ॥

    índra ǀ píba ǀ svadháyā ǀ cit ǀ sutásya ǀ agnéḥ ǀ vā ǀ pāhi ǀ jihváyā ǀ yajatra ǀ
    adhvaryóḥ ǀ vā ǀ prá-yatam ǀ śakra ǀ hástāt ǀ hótuḥ ǀ vā ǀ yajñám ǀ havíṣaḥ ǀ juṣasva ǁ

    indra ǀ piba ǀ svadhayā ǀ cit ǀ sutasya ǀ agneḥ ǀ vā ǀ pāhi ǀ jihvayā ǀ yajatra ǀ
    adhvaryoḥ ǀ vā ǀ pra-yatam ǀ śakra ǀ hastāt ǀ hotuḥ ǀ vā ǀ yajñam ǀ haviṣaḥ ǀ juṣasva ǁ

    3.35.10 Aṣṭaka 3.2.18.5Anuvāka 3.3.95Interpretations

11. Ṛk 11

    शु॒नं हु॑वेम म॒घवा॑न॒मिंद्र॑म॒स्मिन्भरे॒ नृत॑मं॒ वाज॑सातौ ।
    शृ॒ण्वंत॑मु॒ग्रमू॒तये॑ स॒मत्सु॒ घ्नंतं॑ वृ॒त्राणि॑ सं॒जितं॒ धना॑नां ॥

    शुनं हुवेम मघवानम् इन्द्रम् अस्मिन् भरे नृतमं वाजसातौ |
    शृण्वन्तम् उग्रम् ऊतये समत्सु घ्नन्तं वृत्राणि संजितं धनानाम् ||

    śunám huvema maghávānamíndramasmínbháre nṛ́tamam vā́jasātau ǀ
    śṛṇvántamugrámūtáye samátsu ghnántam vṛtrā́ṇi saṃjítam dhánānām ǁ

    śunaṃ huvema maghavānam indram asmin bhare nṛtamaṃ vājasātau |
    śṛṇvantam ugram ūtaye samatsu ghnantaṃ vṛtrāṇi saṃjitaṃ dhanānām ||

    शु॒नम् । हु॒वे॒म॒ । म॒घऽवा॑नम् । इन्द्र॑म् । अ॒स्मिन् । भरे॑ । नृऽत॑मम् । वाज॑ऽसातौ ।
    शृ॒ण्वन्त॑म् । उ॒ग्रम् । ऊ॒तये॑ । स॒मत्ऽसु॑ । घ्नन्त॑म् । वृ॒त्राणि॑ । स॒म्ऽजित॑म् । धना॑नाम् ॥

    शुनम् । हुवेम । मघऽवानम् । इन्द्रम् । अस्मिन् । भरे । नृऽतमम् । वाजऽसातौ ।
    शृण्वन्तम् । उग्रम् । ऊतये । समत्ऽसु । घ्नन्तम् । वृत्राणि । सम्ऽजितम् । धनानाम् ॥

    śunám ǀ huvema ǀ maghá-vānam ǀ índram ǀ asmín ǀ bháre ǀ nṛ́-tamam ǀ vā́ja-sātau ǀ
    śṛṇvántam ǀ ugrám ǀ ūtáye ǀ samát-su ǀ ghnántam ǀ vṛtrā́ṇi ǀ sam-jítam ǀ dhánānām ǁ

    śunam ǀ huvema ǀ magha-vānam ǀ indram ǀ asmin ǀ bhare ǀ nṛ-tamam ǀ vāja-sātau ǀ
    śṛṇvantam ǀ ugram ǀ ūtaye ǀ samat-su ǀ ghnantam ǀ vṛtrāṇi ǀ sam-jitam ǀ dhanānām ǁ

    3.35.11 Aṣṭaka 3.2.18.6Anuvāka 3.3.96Interpretations

Text, recitation and interpretations from the Ṛgveda database of theveda.org.in.