Devatā देवता

Indra

Ṛṣi ऋषि

Bharadvāja Bārhaspatya

Chandas छन्दस्

Triṣṭubh

1. Ṛk 1

   इंद्र॒ पिब॒ तुभ्यं॑ सु॒तो मदा॒याव॑ स्य॒ हरी॒ वि मु॑चा॒ सखा॑या ।
   उ॒त प्र गा॑य ग॒ण आ नि॒षद्याथा॑ य॒ज्ञाय॑ गृण॒ते वयो॑ धाः ॥

   इन्द्र पिब तुभ्यं सुतो मदायाव स्य हरी वि मुचा सखाया |
   उत प्र गाय गण आ निषद्याथा यज्ञाय गृणते वयो धाः ||

   índra píba túbhyam sutó mádāyā́va sya hárī ví mucā sákhāyā ǀ
   utá prá gāya gaṇá ā́ niṣádyā́thā yajñā́ya gṛṇaté váyo dhāḥ ǁ

   indra piba tubhyaṃ suto madāyāva sya harī vi mucā sakhāyā |
   uta pra gāya gaṇa ā niṣadyāthā yajñāya gṛṇate vayo dhāḥ ||

   इन्द्र॑ । पिब॑ । तुभ्य॑म् । सु॒तः । मदा॑य । अव॑ । स्य॒ । हरी॒ इति॑ । वि । मु॒च॒ । सखा॑या ।
   उ॒त । प्र । गा॒य॒ । ग॒णे । आ । नि॒ऽसद्य॑ । अथ॑ । य॒ज्ञाय॑ । गृ॒ण॒ते । वयः॑ । धाः॒ ॥

   इन्द्र । पिब । तुभ्यम् । सुतः । मदाय । अव । स्य । हरी इति । वि । मुच । सखाया ।
   उत । प्र । गाय । गणे । आ । निऽसद्य । अथ । यज्ञाय । गृणते । वयः । धाः ॥

   índra ǀ píba ǀ túbhyam ǀ sutáḥ ǀ mádāya ǀ áva ǀ sya ǀ hárī íti ǀ ví ǀ muca ǀ sákhāyā ǀ
   utá ǀ prá ǀ gāya ǀ gaṇé ǀ ā́ ǀ ni-sádya ǀ átha ǀ yajñā́ya ǀ gṛṇaté ǀ váyaḥ ǀ dhāḥ ǁ

   indra ǀ piba ǀ tubhyam ǀ sutaḥ ǀ madāya ǀ ava ǀ sya ǀ harī iti ǀ vi ǀ muca ǀ sakhāyā ǀ
   uta ǀ pra ǀ gāya ǀ gaṇe ǀ ā ǀ ni-sadya ǀ atha ǀ yajñāya ǀ gṛṇate ǀ vayaḥ ǀ dhāḥ ǁ

   6.40.1 Aṣṭaka 4.7.12.1Anuvāka 6.3.100Interpretations

2. Ṛk 2

   अस्य॑ पिब॒ यस्य॑ जज्ञा॒न इं॑द्र॒ मदा॑य॒ क्रत्वे॒ अपि॑बो विरप्शिन् ।
   तमु॑ ते॒ गावो॒ नर॒ आपो॒ अद्रि॒रिंदुं॒ सम॑ह्यन्पी॒तये॒ सम॑स्मै ॥

   अस्य पिब यस्य जज्ञान इन्द्र मदाय क्रत्वे अपिबो विरप्शिन् |
   तम् उ ते गावो नर आपो अद्रिर् इन्दुं सम् अह्यन् पीतये सम् अस्मै ||

   ásya piba yásya jajñāná indra mádāya krátve ápibo virapśin ǀ
   támu te gā́vo nára ā́po ádriríndum sámahyanpītáye sámasmai ǁ

   asya piba yasya jajñāna indra madāya kratve apibo virapśin |
   tam u te gāvo nara āpo adrir induṃ sam ahyan pītaye sam asmai ||

   अस्य॑ । पि॒ब॒ । यस्य॑ । ज॒ज्ञा॒नः । इ॒न्द्र॒ । मदा॑य । क्रत्वे॑ । अपि॑बः । वि॒ऽर॒प्शि॒न् ।
   तम् । ऊं॒ इति॑ । ते॒ । गावः॑ । नरः॑ । आपः॑ । अद्रिः॑ । इन्दु॑म् । सम् । अ॒ह्य॒न् । पी॒तये॑ । सम् । अ॒स्मै॒ ॥

   अस्य । पिब । यस्य । जज्ञानः । इन्द्र । मदाय । क्रत्वे । अपिबः । विऽरप्शिन् ।
   तम् । ऊं इति । ते । गावः । नरः । आपः । अद्रिः । इन्दुम् । सम् । अह्यन् । पीतये । सम् । अस्मै ॥

   ásya ǀ piba ǀ yásya ǀ jajñānáḥ ǀ indra ǀ mádāya ǀ krátve ǀ ápibaḥ ǀ vi-rapśin ǀ
   tám ǀ ūṃ íti ǀ te ǀ gā́vaḥ ǀ náraḥ ǀ ā́paḥ ǀ ádriḥ ǀ índum ǀ sám ǀ ahyan ǀ pītáye ǀ sám ǀ asmai ǁ

   asya ǀ piba ǀ yasya ǀ jajñānaḥ ǀ indra ǀ madāya ǀ kratve ǀ apibaḥ ǀ vi-rapśin ǀ
   tam ǀ ūṃ iti ǀ te ǀ gāvaḥ ǀ naraḥ ǀ āpaḥ ǀ adriḥ ǀ indum ǀ sam ǀ ahyan ǀ pītaye ǀ sam ǀ asmai ǁ

   6.40.2 Aṣṭaka 4.7.12.2Anuvāka 6.3.101Interpretations

3. Ṛk 3

   समि॑द्धे अ॒ग्नौ सु॒त इं॑द्र॒ सोम॒ आ त्वा॑ वहंतु॒ हर॑यो॒ वहि॑ष्ठाः ।
   त्वा॒य॒ता मन॑सा जोहवी॒मींद्रा या॑हि सुवि॒ताय॑ म॒हे नः॑ ॥

   समिद्धे अग्नौ सुत इन्द्र सोम आ त्वा वहन्तु हरयो वहिष्ठाः |
   त्वायता मनसा जोहवीमीन्द्रा याहि सुविताय महे नः ||

   sámiddhe agnáu sutá indra sóma ā́ tvā vahantu hárayo váhiṣṭhāḥ ǀ
   tvāyatā́ mánasā johavīmī́ndrā́ yāhi suvitā́ya mahé naḥ ǁ

   samiddhe agnau suta indra soma ā tvā vahantu harayo vahiṣṭhāḥ |
   tvāyatā manasā johavīmīndrā yāhi suvitāya mahe naḥ ||

   सम्ऽइ॑द्धे । अ॒ग्नौ । सु॒ते । इ॒न्द्र॒ । सोमे॑ । आ । त्वा॒ । व॒ह॒न्तु॒ । हर॑यः । वहि॑ष्ठाः ।
   त्वा॒ऽय॒ता । मन॑सा । जो॒ह॒वी॒मि॒ । इन्द्र॑ । आ । या॒हि॒ । सु॒वि॒ताय॑ । म॒हे । नः॒ ॥

   सम्ऽइद्धे । अग्नौ । सुते । इन्द्र । सोमे । आ । त्वा । वहन्तु । हरयः । वहिष्ठाः ।
   त्वाऽयता । मनसा । जोहवीमि । इन्द्र । आ । याहि । सुविताय । महे । नः ॥

   sám-iddhe ǀ agnáu ǀ suté ǀ indra ǀ sóme ǀ ā́ ǀ tvā ǀ vahantu ǀ hárayaḥ ǀ váhiṣṭhāḥ ǀ
   tvā-yatā́ ǀ mánasā ǀ johavīmi ǀ índra ǀ ā́ ǀ yāhi ǀ suvitā́ya ǀ mahé ǀ naḥ ǁ

   sam-iddhe ǀ agnau ǀ sute ǀ indra ǀ some ǀ ā ǀ tvā ǀ vahantu ǀ harayaḥ ǀ vahiṣṭhāḥ ǀ
   tvā-yatā ǀ manasā ǀ johavīmi ǀ indra ǀ ā ǀ yāhi ǀ suvitāya ǀ mahe ǀ naḥ ǁ

   6.40.3 Aṣṭaka 4.7.12.3Anuvāka 6.3.102Interpretations

4. Ṛk 4

   आ या॑हि॒ शश्व॑दुश॒ता य॑या॒थेंद्र॑ म॒हा मन॑सा सोम॒पेयं॑ ।
   उप॒ ब्रह्मा॑णि शृणव इ॒मा नोऽथा॑ ते य॒ज्ञस्त॒न्वे॒३॒॑ वयो॑ धात् ॥

   आ याहि शश्वद् उशता ययाथेन्द्र महा मनसा सोमपेयम् |
   उप ब्रह्माणि शृणव इमा नो ऽथा ते यज्ञस् तन्वे वयो धात् ||

   ā́ yāhi śáśvaduśatā́ yayāthéndra mahā́ mánasā somapéyam ǀ
   úpa bráhmāṇi śṛṇava imā́ nó’thā te yajñástanvé váyo dhāt ǁ

   ā yāhi śaśvad uśatā yayāthendra mahā manasā somapeyam |
   upa brahmāṇi śṛṇava imā no 'thā te yajñas tanve vayo dhāt ||

   आ । या॒हि॒ । शश्व॑त् । उ॒श॒ता । य॒या॒थ॒ । इन्द्र॑ । म॒हा । मन॑सा । सो॒म॒ऽपेय॑म् ।
   उप॑ । ब्रह्मा॑णि । शृ॒ण॒वः॒ । इ॒मा । नः॒ । अथ॑ । ते॒ । य॒ज्ञः । त॒न्वे॑ । वयः॑ । धा॒त् ॥

   आ । याहि । शश्वत् । उशता । ययाथ । इन्द्र । महा । मनसा । सोमऽपेयम् ।
   उप । ब्रह्माणि । शृणवः । इमा । नः । अथ । ते । यज्ञः । तन्वे । वयः । धात् ॥

   ā́ ǀ yāhi ǀ śáśvat ǀ uśatā́ ǀ yayātha ǀ índra ǀ mahā́ ǀ mánasā ǀ soma-péyam ǀ
   úpa ǀ bráhmāṇi ǀ śṛṇavaḥ ǀ imā́ ǀ naḥ ǀ átha ǀ te ǀ yajñáḥ ǀ tanvé ǀ váyaḥ ǀ dhāt ǁ

   ā ǀ yāhi ǀ śaśvat ǀ uśatā ǀ yayātha ǀ indra ǀ mahā ǀ manasā ǀ soma-peyam ǀ
   upa ǀ brahmāṇi ǀ śṛṇavaḥ ǀ imā ǀ naḥ ǀ atha ǀ te ǀ yajñaḥ ǀ tanve ǀ vayaḥ ǀ dhāt ǁ

   6.40.4 Aṣṭaka 4.7.12.4Anuvāka 6.3.103Interpretations

5. Ṛk 5

   यदिं॑द्र दि॒वि पार्ये॒ यदृध॒ग्यद्वा॒ स्वे सद॑ने॒ यत्र॒ वासि॑ ।
   अतो॑ नो य॒ज्ञमव॑से नि॒युत्वा॑न्त्स॒जोषाः॑ पाहि गिर्वणो म॒रुद्भिः॑ ॥

   यद् इन्द्र दिवि पार्ये यद् ऋधग् यद् वा स्वे सदने यत्र वासि |
   अतो नो यज्ञम् अवसे नियुत्वान् सजोषाः पाहि गिर्वणो मरुद्भिः ||

   yádindra diví pā́rye yádṛ́dhagyádvā své sádane yátra vā́si ǀ
   áto no yajñámávase niyútvāntsajóṣāḥ pāhi girvaṇo marúdbhiḥ ǁ

   yad indra divi pārye yad ṛdhag yad vā sve sadane yatra vāsi |
   ato no yajñam avase niyutvān sajoṣāḥ pāhi girvaṇo marudbhiḥ ||

   यत् । इ॒न्द्र॒ । दि॒वि । पार्ये॑ । यत् । ऋध॑क् । यत् । वा॒ । स्वे । सद॑ने । यत्र॑ । वा॒ । असि॑ ।
   अतः॑ । नः॒ । य॒ज्ञम् । अव॑से । नि॒युत्वा॑न् । स॒ऽजोषाः॑ । पा॒हि॒ । गि॒र्व॒णः॒ । म॒रुत्ऽभिः॑ ॥

   यत् । इन्द्र । दिवि । पार्ये । यत् । ऋधक् । यत् । वा । स्वे । सदने । यत्र । वा । असि ।
   अतः । नः । यज्ञम् । अवसे । नियुत्वान् । सऽजोषाः । पाहि । गिर्वणः । मरुत्ऽभिः ॥

   yát ǀ indra ǀ diví ǀ pā́rye ǀ yát ǀ ṛ́dhak ǀ yát ǀ vā ǀ své ǀ sádane ǀ yátra ǀ vā ǀ ási ǀ
   átaḥ ǀ naḥ ǀ yajñám ǀ ávase ǀ niyútvān ǀ sa-jóṣāḥ ǀ pāhi ǀ girvaṇaḥ ǀ marút-bhiḥ ǁ

   yat ǀ indra ǀ divi ǀ pārye ǀ yat ǀ ṛdhak ǀ yat ǀ vā ǀ sve ǀ sadane ǀ yatra ǀ vā ǀ asi ǀ
   ataḥ ǀ naḥ ǀ yajñam ǀ avase ǀ niyutvān ǀ sa-joṣāḥ ǀ pāhi ǀ girvaṇaḥ ǀ marut-bhiḥ ǁ

   6.40.5 Aṣṭaka 4.7.12.5Anuvāka 6.3.104Interpretations

Text, recitation and interpretations from the Ṛgveda database of theveda.org.in.