Devatā देवता

Uṣas

Ṛṣi ऋषि

Bharadvāja Bārhaspatya

Chandas छन्दस्

Triṣṭubh

1. Ṛk 1

   उदु॑ श्रि॒य उ॒षसो॒ रोच॑माना॒ अस्थु॑र॒पां नोर्मयो॒ रुशं॑तः ।
   कृ॒णोति॒ विश्वा॑ सु॒पथा॑ सु॒गान्यभू॑दु॒ वस्वी॒ दक्षि॑णा म॒घोनी॑ ॥

   उद् उ श्रिय उषसो रोचमाना अस्थुर् अपां नोर्मयो रुशन्तः |
   कृणोति विश्वा सुपथा सुगान्य् अभूद् उ वस्वी दक्षिणा मघोनी ||

   údu śriyá uṣáso rócamānā ásthurapā́m nórmáyo rúśantaḥ ǀ
   kṛṇóti víśvā supáthā sugā́nyábhūdu vásvī dákṣiṇā maghónī ǁ

   ud u śriya uṣaso rocamānā asthur apāṃ normayo ruśantaḥ |
   kṛṇoti viśvā supathā sugāny abhūd u vasvī dakṣiṇā maghonī ||

   उत् । ऊं॒ इति॑ । श्रि॒ये । उ॒षसः॑ । रोच॑मानाः । अस्थुः॑ । अ॒पाम् । न । ऊ॒र्मयः॑ । रुश॑न्तः ।
   कृ॒णोति॑ । विश्वा॑ । सु॒ऽपथा॑ । सु॒ऽगानि॑ । अभू॑त् । ऊं॒ इति॑ । वस्वी॑ । दक्षि॑णा । म॒घोनी॑ ॥

   उत् । ऊं इति । श्रिये । उषसः । रोचमानाः । अस्थुः । अपाम् । न । ऊर्मयः । रुशन्तः ।
   कृणोति । विश्वा । सुऽपथा । सुऽगानि । अभूत् । ऊं इति । वस्वी । दक्षिणा । मघोनी ॥

   út ǀ ūṃ íti ǀ śriyé ǀ uṣásaḥ ǀ rócamānāḥ ǀ ásthuḥ ǀ apā́m ǀ ná ǀ ūrmáyaḥ ǀ rúśantaḥ ǀ
   kṛṇóti ǀ víśvā ǀ su-páthā ǀ su-gā́ni ǀ ábhūt ǀ ūṃ íti ǀ vásvī ǀ dákṣiṇā ǀ maghónī ǁ

   ut ǀ ūṃ iti ǀ śriye ǀ uṣasaḥ ǀ rocamānāḥ ǀ asthuḥ ǀ apām ǀ na ǀ ūrmayaḥ ǀ ruśantaḥ ǀ
   kṛṇoti ǀ viśvā ǀ su-pathā ǀ su-gāni ǀ abhūt ǀ ūṃ iti ǀ vasvī ǀ dakṣiṇā ǀ maghonī ǁ

   6.64.1 Aṣṭaka 5.1.5.1Anuvāka 6.6.23Interpretations

2. Ṛk 2

   भ॒द्रा द॑दृक्ष उर्वि॒या वि भा॒स्युत्ते॑ शो॒चिर्भा॒नवो॒ द्याम॑पप्तन् ।
   आ॒विर्वक्षः॑ कृणुषे शुं॒भमा॒नोषो॑ देवि॒ रोच॑माना॒ महो॑भिः ॥

   भद्रा ददृक्ष उर्विया वि भास्य् उत् ते शोचिर् भानवो द्याम् अपप्तन् |
   आविर् वक्षः कृणुषे शुम्भमानोषो देवि रोचमाना महोभिः ||

   bhadrā́ dadṛkṣa urviyā́ ví bhāsyútte śocírbhānávo dyā́mapaptan ǀ
   āvírvákṣaḥ kṛṇuṣe śumbhámānóṣo devi rócamānā máhobhiḥ ǁ

   bhadrā dadṛkṣa urviyā vi bhāsy ut te śocir bhānavo dyām apaptan |
   āvir vakṣaḥ kṛṇuṣe śumbhamānoṣo devi rocamānā mahobhiḥ ||

   भ॒द्रा । द॒दृ॒क्षे॒ । उ॒र्वि॒या । वि । भा॒सि॒ । उत् । ते॒ । शो॒चिः । भा॒नवः॑ । द्याम् । अ॒प॒प्त॒न् ।
   आ॒विः । वक्षः॑ । कृ॒णु॒षे॒ । शु॒म्भमा॑ना । उषः॑ । दे॒वि॒ । रोच॑माना । महः॑ऽभिः ॥

   भद्रा । ददृक्षे । उर्विया । वि । भासि । उत् । ते । शोचिः । भानवः । द्याम् । अपप्तन् ।
   आविः । वक्षः । कृणुषे । शुम्भमाना । उषः । देवि । रोचमाना । महःऽभिः ॥

   bhadrā́ ǀ dadṛkṣe ǀ urviyā́ ǀ ví ǀ bhāsi ǀ út ǀ te ǀ śocíḥ ǀ bhānávaḥ ǀ dyā́m ǀ apaptan ǀ
   āvíḥ ǀ vákṣaḥ ǀ kṛṇuṣe ǀ śumbhámānā ǀ úṣaḥ ǀ devi ǀ rócamānā ǀ máhaḥ-bhiḥ ǁ

   bhadrā ǀ dadṛkṣe ǀ urviyā ǀ vi ǀ bhāsi ǀ ut ǀ te ǀ śociḥ ǀ bhānavaḥ ǀ dyām ǀ apaptan ǀ
   āviḥ ǀ vakṣaḥ ǀ kṛṇuṣe ǀ śumbhamānā ǀ uṣaḥ ǀ devi ǀ rocamānā ǀ mahaḥ-bhiḥ ǁ

   6.64.2 Aṣṭaka 5.1.5.2Anuvāka 6.6.24Interpretations

3. Ṛk 3

   वहं॑ति सीमरु॒णासो॒ रुशं॑तो॒ गावः॑ सु॒भगा॑मुर्वि॒या प्र॑था॒नां ।
   अपे॑जते॒ शूरो॒ अस्ते॑व॒ शत्रू॒न्बाध॑ते॒ तमो॑ अजि॒रो न वोळ्हा॑ ॥

   वहन्ति सीम् अरुणासो रुशन्तो गावः सुभगाम् उर्विया प्रथानाम् |
   अपेजते शूरो अस्तेव शत्रून् बाधते तमो अजिरो न वोऌहा ||

   váhanti sīmaruṇā́so rúśanto gā́vaḥ subhágāmurviyā́ prathānā́m ǀ
   ápejate śū́ro ásteva śátrūnbā́dhate támo ajiró ná vóḷhā ǁ

   vahanti sīm aruṇāso ruśanto gāvaḥ subhagām urviyā prathānām |
   apejate śūro asteva śatrūn bādhate tamo ajiro na voḷhā ||

   वह॑न्ति । सी॒म् । अ॒रु॒णासः॑ । रुश॑न्तः । गावः॑ । सु॒ऽभगा॑म् । उ॒र्वि॒या । प्र॒था॒नाम् ।
   अप॑ । ई॒ज॒ते॒ । शूरः॑ । अस्ता॑ऽइव । शत्रू॑न् । बाध॑ते । तमः॑ । अ॒जि॒रः । न । वोळ्हा॑ ॥

   वहन्ति । सीम् । अरुणासः । रुशन्तः । गावः । सुऽभगाम् । उर्विया । प्रथानाम् ।
   अप । ईजते । शूरः । अस्ताऽइव । शत्रून् । बाधते । तमः । अजिरः । न । वोळ्हा ॥

   váhanti ǀ sīm ǀ aruṇā́saḥ ǀ rúśantaḥ ǀ gā́vaḥ ǀ su-bhágām ǀ urviyā́ ǀ prathānā́m ǀ
   ápa ǀ ījate ǀ śū́raḥ ǀ ástā-iva ǀ śátrūn ǀ bā́dhate ǀ támaḥ ǀ ajiráḥ ǀ ná ǀ vóḷhā ǁ

   vahanti ǀ sīm ǀ aruṇāsaḥ ǀ ruśantaḥ ǀ gāvaḥ ǀ su-bhagām ǀ urviyā ǀ prathānām ǀ
   apa ǀ ījate ǀ śūraḥ ǀ astā-iva ǀ śatrūn ǀ bādhate ǀ tamaḥ ǀ ajiraḥ ǀ na ǀ voḷhā ǁ

   6.64.3 Aṣṭaka 5.1.5.3Anuvāka 6.6.25Interpretations

4. Ṛk 4

   सु॒गोत ते॑ सु॒पथा॒ पर्व॑तेष्ववा॒ते अ॒पस्त॑रसि स्वभानो ।
   सा न॒ आ व॑ह पृथुयामन्नृष्वे र॒यिं दि॑वो दुहितरिष॒यध्यै॑ ॥

   सुगोत ते सुपथा पर्वतेष्व् अवाते अपस् तरसि स्वभानो |
   सा न आ वह पृथुयामन्न् ऋष्वे रयिं दिवो दुहितर् इषयध्यै ||

   sugótá te supáthā párvateṣvavāté apástarasi svabhāno ǀ
   sā́ na ā́ vaha pṛthuyāmannṛṣve rayím divo duhitariṣayádhyai ǁ

   sugota te supathā parvateṣv avāte apas tarasi svabhāno |
   sā na ā vaha pṛthuyāmann ṛṣve rayiṃ divo duhitar iṣayadhyai ||

   सु॒ऽगा । उ॒त । ते॒ । सु॒ऽपथा॑ । पर्व॑तेषु । अ॒वा॒ते । अ॒पः । त॒र॒सि॒ । स्व॒भा॒नो॒ इति॑ स्वऽभानो ।
   सा । नः॒ । आ । व॒ह॒ । पृ॒थु॒ऽया॒म॒न् । ऋ॒ष्वे॒ । र॒यिम् । दि॒वः॒ । दु॒हि॒तः॒ । इ॒ष॒यध्यै॑ ॥

   सुऽगा । उत । ते । सुऽपथा । पर्वतेषु । अवाते । अपः । तरसि । स्वभानो इति स्वऽभानो ।
   सा । नः । आ । वह । पृथुऽयामन् । ऋष्वे । रयिम् । दिवः । दुहितः । इषयध्यै ॥

   su-gā́ ǀ utá ǀ te ǀ su-páthā ǀ párvateṣu ǀ avāté ǀ apáḥ ǀ tarasi ǀ svabhāno íti sva-bhāno ǀ
   sā́ ǀ naḥ ǀ ā́ ǀ vaha ǀ pṛthu-yāman ǀ ṛṣve ǀ rayím ǀ divaḥ ǀ duhitaḥ ǀ iṣayádhyai ǁ

   su-gā ǀ uta ǀ te ǀ su-pathā ǀ parvateṣu ǀ avāte ǀ apaḥ ǀ tarasi ǀ svabhāno iti sva-bhāno ǀ
   sā ǀ naḥ ǀ ā ǀ vaha ǀ pṛthu-yāman ǀ ṛṣve ǀ rayim ǀ divaḥ ǀ duhitaḥ ǀ iṣayadhyai ǁ

   6.64.4 Aṣṭaka 5.1.5.4Anuvāka 6.6.26Interpretations

5. Ṛk 5

   सा व॑ह॒ योक्षभि॒रवा॒तोषो॒ वरं॒ वह॑सि॒ जोष॒मनु॑ ।
   त्वं दि॑वो दुहित॒र्या ह॑ दे॒वी पू॒र्वहू॑तौ मं॒हना॑ दर्श॒ता भूः॑ ॥

   सा वह योक्षभिर् अवातोषो वरं वहसि जोषम् अनु |
   त्वं दिवो दुहितर् या ह देवी पूर्वहूतौ मंहना दर्शता भूः ||

   sā́ vaha yókṣábhirávātóṣo váram váhasi jóṣamánu ǀ
   tvám divo duhitaryā́ ha devī́ pūrváhūtau maṃhánā darśatā́ bhūḥ ǁ

   sā vaha yokṣabhir avātoṣo varaṃ vahasi joṣam anu |
   tvaṃ divo duhitar yā ha devī pūrvahūtau maṃhanā darśatā bhūḥ ||

   सा । आ । व॒ह॒ । या । उ॒क्षऽभिः॑ । अवा॑ता । उषः॑ । वर॑म् । वह॑सि । जोष॑म् । अनु॑ ।
   त्वम् । दि॒वः॒ । दु॒हि॒तः॒ । या । ह॒ । दे॒वी । पू॒र्वऽहू॑तौ । मं॒हना॑ । द॒र्श॒ता । भूः॒ ॥

   सा । आ । वह । या । उक्षऽभिः । अवाता । उषः । वरम् । वहसि । जोषम् । अनु ।
   त्वम् । दिवः । दुहितः । या । ह । देवी । पूर्वऽहूतौ । मंहना । दर्शता । भूः ॥

   sā́ ǀ ā́ ǀ vaha ǀ yā́ ǀ ukṣá-bhiḥ ǀ ávātā ǀ úṣaḥ ǀ váram ǀ váhasi ǀ jóṣam ǀ ánu ǀ
   tvám ǀ divaḥ ǀ duhitaḥ ǀ yā́ ǀ ha ǀ devī́ ǀ pūrvá-hūtau ǀ maṃhánā ǀ darśatā́ ǀ bhūḥ ǁ

   sā ǀ ā ǀ vaha ǀ yā ǀ ukṣa-bhiḥ ǀ avātā ǀ uṣaḥ ǀ varam ǀ vahasi ǀ joṣam ǀ anu ǀ
   tvam ǀ divaḥ ǀ duhitaḥ ǀ yā ǀ ha ǀ devī ǀ pūrva-hūtau ǀ maṃhanā ǀ darśatā ǀ bhūḥ ǁ

   6.64.5 Aṣṭaka 5.1.5.5Anuvāka 6.6.27Interpretations

6. Ṛk 6

   उत्ते॒ वय॑श्चिद्वस॒तेर॑पप्त॒न्नर॑श्च॒ ये पि॑तु॒भाजो॒ व्यु॑ष्टौ ।
   अ॒मा स॒ते व॑हसि॒ भूरि॑ वा॒ममुषो॑ देवि दा॒शुषे॒ मर्त्या॑य ॥

   उत् ते वयश् चिद् वसतेर् अपप्तन् नरश् च ये पितुभाजो व्युष्टौ |
   अमा सते वहसि भूरि वामम् उषो देवि दाशुषे मर्त्याय ||

   útte váyaścidvasatérapaptannáraśca yé pitubhā́jo vyúṣṭau ǀ
   amā́ saté vahasi bhū́ri vāmámúṣo devi dāśúṣe mártyāya ǁ

   ut te vayaś cid vasater apaptan naraś ca ye pitubhājo vyuṣṭau |
   amā sate vahasi bhūri vāmam uṣo devi dāśuṣe martyāya ||

   उत् । ते॒ । वयः॑ । चि॒त् । व॒स॒तेः । अ॒प॒प्त॒न् । नरः॑ । च॒ । ये । पि॒तु॒ऽभाजः॑ । विऽउ॑ष्टौ ।
   अ॒मा । स॒ते । व॒ह॒सि॒ । भूरि॑ । वा॒मम् । उषः॑ । दे॒वि॒ । दा॒शुषे॑ । मर्त्या॑य ॥

   उत् । ते । वयः । चित् । वसतेः । अपप्तन् । नरः । च । ये । पितुऽभाजः । विऽउष्टौ ।
   अमा । सते । वहसि । भूरि । वामम् । उषः । देवि । दाशुषे । मर्त्याय ॥

   út ǀ te ǀ váyaḥ ǀ cit ǀ vasatéḥ ǀ apaptan ǀ náraḥ ǀ ca ǀ yé ǀ pitu-bhā́jaḥ ǀ ví-uṣṭau ǀ
   amā́ ǀ saté ǀ vahasi ǀ bhū́ri ǀ vāmám ǀ úṣaḥ ǀ devi ǀ dāśúṣe ǀ mártyāya ǁ

   ut ǀ te ǀ vayaḥ ǀ cit ǀ vasateḥ ǀ apaptan ǀ naraḥ ǀ ca ǀ ye ǀ pitu-bhājaḥ ǀ vi-uṣṭau ǀ
   amā ǀ sate ǀ vahasi ǀ bhūri ǀ vāmam ǀ uṣaḥ ǀ devi ǀ dāśuṣe ǀ martyāya ǁ

   6.64.6 Aṣṭaka 5.1.5.6Anuvāka 6.6.28Interpretations

Text, recitation and interpretations from the Ṛgveda database of theveda.org.in.