Devatā देवता

Uṣas

Ṛṣi ऋषि

Bharadvāja Bārhaspatya

Chandas छन्दस्

Triṣṭubh

1. Ṛk 1

   ए॒षा स्या नो॑ दुहि॒ता दि॑वो॒जाः क्षि॒तीरु॒च्छंती॒ मानु॑षीरजीगः ।
   या भा॒नुना॒ रुश॑ता रा॒म्यास्वज्ञा॑यि ति॒रस्तम॑सश्चिद॒क्तून् ॥

   एषा स्या नो दुहिता दिवोजाः क्षितीर् उच्छन्ती मानुषीर् अजीगः |
   या भानुना रुशता राम्यास्व् अज्ञायि तिरस् तमसश् चिद् अक्तून् ||

   eṣā́ syā́ no duhitā́ divojā́ḥ kṣitī́rucchántī mā́nuṣīrajīgaḥ ǀ
   yā́ bhānúnā rúśatā rāmyā́svájñāyi tirástámasaścidaktū́n ǁ

   eṣā syā no duhitā divojāḥ kṣitīr ucchantī mānuṣīr ajīgaḥ |
   yā bhānunā ruśatā rāmyāsv ajñāyi tiras tamasaś cid aktūn ||

   ए॒षा । स्या । नः॒ । दु॒हि॒ता । दि॒वः॒ऽजाः । क्षि॒तीः । उ॒च्छन्ती॑ । मानु॑षीः । अ॒जी॒ग॒रिति॑ ।
   या । भा॒नुना॑ । रुश॑ता । रा॒म्यासु॑ । अज्ञा॑यि । ति॒रः । तम॑सः । चि॒त् । अ॒क्तून् ॥

   एषा । स्या । नः । दुहिता । दिवःऽजाः । क्षितीः । उच्छन्ती । मानुषीः । अजीगरिति ।
   या । भानुना । रुशता । राम्यासु । अज्ञायि । तिरः । तमसः । चित् । अक्तून् ॥

   eṣā́ ǀ syā́ ǀ naḥ ǀ duhitā́ ǀ divaḥ-jā́ḥ ǀ kṣitī́ḥ ǀ ucchántī ǀ mā́nuṣīḥ ǀ ajīgaríti ǀ
   yā́ ǀ bhānúnā ǀ rúśatā ǀ rāmyā́su ǀ ájñāyi ǀ tiráḥ ǀ támasaḥ ǀ cit ǀ aktū́n ǁ

   eṣā ǀ syā ǀ naḥ ǀ duhitā ǀ divaḥ-jāḥ ǀ kṣitīḥ ǀ ucchantī ǀ mānuṣīḥ ǀ ajīgariti ǀ
   yā ǀ bhānunā ǀ ruśatā ǀ rāmyāsu ǀ ajñāyi ǀ tiraḥ ǀ tamasaḥ ǀ cit ǀ aktūn ǁ

   6.65.1 Aṣṭaka 5.1.6.1Anuvāka 6.6.29Interpretations

2. Ṛk 2

   वि तद्य॑युररुण॒युग्भि॒रश्वै॑श्चि॒त्रं भां॑त्यु॒षस॑श्चं॒द्रर॑थाः ।
   अग्रं॑ य॒ज्ञस्य॑ बृह॒तो नयं॑ती॒र्वि ता बा॑धंते॒ तम॒ ऊर्म्या॑याः ॥

   वि तद् ययुर् अरुणयुग्भिर् अश्वैश् चित्रम् भान्त्य् उषसश् चन्द्ररथाः |
   अग्रं यज्ञस्य बृहतो नयन्तीर् वि ता बाधन्ते तम ऊर्म्यायाः ||

   ví tádyayuraruṇayúgbhiráśvaiścitrám bhāntyuṣásaścandrárathāḥ ǀ
   ágram yajñásya bṛható náyantīrví tā́ bādhante táma ū́rmyāyāḥ ǁ

   vi tad yayur aruṇayugbhir aśvaiś citram bhānty uṣasaś candrarathāḥ |
   agraṃ yajñasya bṛhato nayantīr vi tā bādhante tama ūrmyāyāḥ ||

   वि । तत् । य॒युः॒ । अ॒रु॒ण॒युक्ऽभिः॑ । अश्वैः॑ । चि॒त्रम् । भा॒न्ति॒ । उ॒षसः॑ । च॒न्द्रऽर॑थाः ।
   अग्र॑म् । य॒ज्ञस्य॑ । बृ॒ह॒तः । नय॑न्तीः । वि । ताः । बा॒ध॒न्ते॒ । तमः॑ । ऊर्म्या॑याः ॥

   वि । तत् । ययुः । अरुणयुक्ऽभिः । अश्वैः । चित्रम् । भान्ति । उषसः । चन्द्रऽरथाः ।
   अग्रम् । यज्ञस्य । बृहतः । नयन्तीः । वि । ताः । बाधन्ते । तमः । ऊर्म्यायाः ॥

   ví ǀ tát ǀ yayuḥ ǀ aruṇayúk-bhiḥ ǀ áśvaiḥ ǀ citrám ǀ bhānti ǀ uṣásaḥ ǀ candrá-rathāḥ ǀ
   ágram ǀ yajñásya ǀ bṛhatáḥ ǀ náyantīḥ ǀ ví ǀ tā́ḥ ǀ bādhante ǀ támaḥ ǀ ū́rmyāyāḥ ǁ

   vi ǀ tat ǀ yayuḥ ǀ aruṇayuk-bhiḥ ǀ aśvaiḥ ǀ citram ǀ bhānti ǀ uṣasaḥ ǀ candra-rathāḥ ǀ
   agram ǀ yajñasya ǀ bṛhataḥ ǀ nayantīḥ ǀ vi ǀ tāḥ ǀ bādhante ǀ tamaḥ ǀ ūrmyāyāḥ ǁ

   6.65.2 Aṣṭaka 5.1.6.2Anuvāka 6.6.30Interpretations

3. Ṛk 3

   श्रवो॒ वाज॒मिष॒मूर्जं॒ वहं॑ती॒र्नि दा॒शुष॑ उषसो॒ मर्त्या॑य ।
   म॒घोनी॑र्वी॒रव॒त्पत्य॑माना॒ अवो॑ धात विध॒ते रत्न॑म॒द्य ॥

   श्रवो वाजम् इषम् ऊर्जं वहन्तीर् नि दाशुष उषसो मर्त्याय |
   मघोनीर् वीरवत् पत्यमाना अवो धात विधते रत्नम् अद्य ||

   śrávo vā́jamíṣamū́rjam váhantīrní dāśúṣa uṣaso mártyāya ǀ
   maghónīrvīrávatpátyamānā ávo dhāta vidhaté rátnamadyá ǁ

   śravo vājam iṣam ūrjaṃ vahantīr ni dāśuṣa uṣaso martyāya |
   maghonīr vīravat patyamānā avo dhāta vidhate ratnam adya ||

   श्रवः॑ । वाज॑म् । इष॑म् । ऊर्ज॑म् । वह॑न्तीः । नि । दा॒शुषे॑ । उ॒ष॒सः॒ । मर्त्या॑य ।
   म॒घोनीः॑ । वी॒रऽव॑त् । पत्य॑मानाः । अवः॑ । धा॒त॒ । वि॒ध॒ते । रत्न॑म् । अ॒द्य ॥

   श्रवः । वाजम् । इषम् । ऊर्जम् । वहन्तीः । नि । दाशुषे । उषसः । मर्त्याय ।
   मघोनीः । वीरऽवत् । पत्यमानाः । अवः । धात । विधते । रत्नम् । अद्य ॥

   śrávaḥ ǀ vā́jam ǀ íṣam ǀ ū́rjam ǀ váhantīḥ ǀ ní ǀ dāśúṣe ǀ uṣasaḥ ǀ mártyāya ǀ
   maghónīḥ ǀ vīrá-vat ǀ pátyamānāḥ ǀ ávaḥ ǀ dhāta ǀ vidhaté ǀ rátnam ǀ adyá ǁ

   śravaḥ ǀ vājam ǀ iṣam ǀ ūrjam ǀ vahantīḥ ǀ ni ǀ dāśuṣe ǀ uṣasaḥ ǀ martyāya ǀ
   maghonīḥ ǀ vīra-vat ǀ patyamānāḥ ǀ avaḥ ǀ dhāta ǀ vidhate ǀ ratnam ǀ adya ǁ

   6.65.3 Aṣṭaka 5.1.6.3Anuvāka 6.6.31Interpretations

4. Ṛk 4

   इ॒दा हि वो॑ विध॒ते रत्न॒मस्ती॒दा वी॒राय॑ दा॒शुष॑ उषासः ।
   इ॒दा विप्रा॑य॒ जर॑ते॒ यदु॒क्था नि ष्म॒ माव॑ते वहथा पु॒रा चि॑त् ॥

   इदा हि वो विधते रत्नम् अस्तीदा वीराय दाशुष उषासः |
   इदा विप्राय जरते यद् उक्था नि ष्म मावते वहथा पुरा चित् ||

   idā́ hí vo vidhaté rátnamástīdā́ vīrā́ya dāśúṣa uṣāsaḥ ǀ
   idā́ víprāya járate yádukthā́ ní ṣma mā́vate vahathā purā́ cit ǁ

   idā hi vo vidhate ratnam astīdā vīrāya dāśuṣa uṣāsaḥ |
   idā viprāya jarate yad ukthā ni ṣma māvate vahathā purā cit ||

   इ॒दा । हि । वः॒ । वि॒ध॒ते । रत्न॑म् । अस्ति॑ । इ॒दा । वी॒राय॑ । दा॒शुषे॑ । उ॒ष॒सः॒ ।
   इ॒दा । विप्रा॑य । जर॑ते । यत् । उ॒क्था । नि । स्म॒ । माऽव॑ते । व॒ह॒थ॒ । पु॒रा । चि॒त् ॥

   इदा । हि । वः । विधते । रत्नम् । अस्ति । इदा । वीराय । दाशुषे । उषसः ।
   इदा । विप्राय । जरते । यत् । उक्था । नि । स्म । माऽवते । वहथ । पुरा । चित् ॥

   idā́ ǀ hí ǀ vaḥ ǀ vidhaté ǀ rátnam ǀ ásti ǀ idā́ ǀ vīrā́ya ǀ dāśúṣe ǀ uṣasaḥ ǀ
   idā́ ǀ víprāya ǀ járate ǀ yát ǀ ukthā́ ǀ ní ǀ sma ǀ mā́-vate ǀ vahatha ǀ purā́ ǀ cit ǁ

   idā ǀ hi ǀ vaḥ ǀ vidhate ǀ ratnam ǀ asti ǀ idā ǀ vīrāya ǀ dāśuṣe ǀ uṣasaḥ ǀ
   idā ǀ viprāya ǀ jarate ǀ yat ǀ ukthā ǀ ni ǀ sma ǀ mā-vate ǀ vahatha ǀ purā ǀ cit ǁ

   6.65.4 Aṣṭaka 5.1.6.4Anuvāka 6.6.32Interpretations

5. Ṛk 5

   इ॒दा हि त॑ उषो अद्रिसानो गो॒त्रा गवा॒मंगि॑रसो गृ॒णंति॑ ।
   व्य१॒॑र्केण॑ बिभिदु॒र्ब्रह्म॑णा च स॒त्या नृ॒णाम॑भवद्दे॒वहू॑तिः ॥

   इदा हि त उषो अद्रिसानो गोत्रा गवाम् अङ्गिरसो गृणन्ति |
   व्य् अर्केण बिभिदुर् ब्रह्मणा च सत्या नृणाम् अभवद् देवहूतिः ||

   idā́ hí ta uṣo adrisāno gotrā́ gávāmáṅgiraso gṛṇánti ǀ
   vyárkéṇa bibhidurbráhmaṇā ca satyā́ nṛṇā́mabhavaddeváhūtiḥ ǁ

   idā hi ta uṣo adrisāno gotrā gavām aṅgiraso gṛṇanti |
   vy arkeṇa bibhidur brahmaṇā ca satyā nṛṇām abhavad devahūtiḥ ||

   इ॒दा । हि । ते॒ । उ॒षः॒ । अ॒द्रि॒सा॒नो॒ इत्य॑द्रिऽसानो । गो॒त्रा । गवा॑म् । अङ्गि॑रसः । गृ॒णन्ति॑ ।
   वि । अ॒र्केण॑ । बि॒भि॒दुः॒ । ब्रह्म॑णा । च॒ । स॒त्या । नृ॒णाम् । अ॒भ॒व॒त् । दे॒वऽहू॑तिः ॥

   इदा । हि । ते । उषः । अद्रिसानो इत्यद्रिऽसानो । गोत्रा । गवाम् । अङ्गिरसः । गृणन्ति ।
   वि । अर्केण । बिभिदुः । ब्रह्मणा । च । सत्या । नृणाम् । अभवत् । देवऽहूतिः ॥

   idā́ ǀ hí ǀ te ǀ uṣaḥ ǀ adrisāno ítyadri-sāno ǀ gotrā́ ǀ gávām ǀ áṅgirasaḥ ǀ gṛṇánti ǀ
   ví ǀ arkéṇa ǀ bibhiduḥ ǀ bráhmaṇā ǀ ca ǀ satyā́ ǀ nṛṇā́m ǀ abhavat ǀ devá-hūtiḥ ǁ

   idā ǀ hi ǀ te ǀ uṣaḥ ǀ adrisāno ityadri-sāno ǀ gotrā ǀ gavām ǀ aṅgirasaḥ ǀ gṛṇanti ǀ
   vi ǀ arkeṇa ǀ bibhiduḥ ǀ brahmaṇā ǀ ca ǀ satyā ǀ nṛṇām ǀ abhavat ǀ deva-hūtiḥ ǁ

   6.65.5 Aṣṭaka 5.1.6.5Anuvāka 6.6.33Interpretations

6. Ṛk 6

   उ॒च्छा दि॑वो दुहितः प्रत्न॒वन्नो॑ भरद्वाज॒वद्वि॑ध॒ते म॑घोनि ।
   सु॒वीरं॑ र॒यिं गृ॑ण॒ते रि॑रीह्युरुगा॒यमधि॑ धेहि॒ श्रवो॑ नः ॥

   उच्छा दिवो दुहितः प्रत्नवन् नो भरद्वाजवद् विधते मघोनि |
   सुवीरं रयिं गृणते रिरीह्य् उरुगायम् अधि धेहि श्रवो नः ||

   ucchā́ divo duhitaḥ pratnavánno bharadvājavádvidhaté maghoni ǀ
   suvī́ram rayím gṛṇaté rirīhyurugāyámádhi dhehi śrávo naḥ ǁ

   ucchā divo duhitaḥ pratnavan no bharadvājavad vidhate maghoni |
   suvīraṃ rayiṃ gṛṇate rirīhy urugāyam adhi dhehi śravo naḥ ||

   उ॒च्छ । दि॒वः॒ । दु॒हि॒त॒रिति॑ । प्र॒त्न॒ऽवत् । नः॒ । भ॒र॒द्वा॒ज॒ऽवत् । वि॒ध॒ते । म॒घो॒नि॒ ।
   सु॒ऽवीर॑म् । र॒यिम् । गृ॒ण॒ते । रि॒री॒हि॒ । उ॒रु॒ऽगा॒यम् । अधि॑ । धे॒हि॒ । श्रवः॑ । नः॒ ॥

   उच्छ । दिवः । दुहितरिति । प्रत्नऽवत् । नः । भरद्वाजऽवत् । विधते । मघोनि ।
   सुऽवीरम् । रयिम् । गृणते । रिरीहि । उरुऽगायम् । अधि । धेहि । श्रवः । नः ॥

   ucchá ǀ divaḥ ǀ duhitaríti ǀ pratna-vát ǀ naḥ ǀ bharadvāja-vát ǀ vidhaté ǀ maghoni ǀ
   su-vī́ram ǀ rayím ǀ gṛṇaté ǀ rirīhi ǀ uru-gāyám ǀ ádhi ǀ dhehi ǀ śrávaḥ ǀ naḥ ǁ

   uccha ǀ divaḥ ǀ duhitariti ǀ pratna-vat ǀ naḥ ǀ bharadvāja-vat ǀ vidhate ǀ maghoni ǀ
   su-vīram ǀ rayim ǀ gṛṇate ǀ rirīhi ǀ uru-gāyam ǀ adhi ǀ dhehi ǀ śravaḥ ǀ naḥ ǁ

   6.65.6 Aṣṭaka 5.1.6.6Anuvāka 6.6.34Interpretations

Text, recitation and interpretations from the Ṛgveda database of theveda.org.in.