Devatā देवता

Indra

Ṛṣi ऋषि

Bharadvāja Bārhaspatya

Chandas छन्दस्

Triṣṭubh

1. Ṛk 1

   सु॒त इत्त्वं निमि॑श्ल इंद्र॒ सोमे॒ स्तोमे॒ ब्रह्म॑णि श॒स्यमा॑न उ॒क्थे ।
   यद्वा॑ यु॒क्ताभ्यां॑ मघव॒न्हरि॑भ्यां॒ बिभ्र॒द्वज्रं॑ बा॒ह्वोरिं॑द्र॒ यासि॑ ॥

   सुत इत् त्वं निमिश्ल इन्द्र सोमे स्तोमे ब्रह्मणि शस्यमान उक्थे |
   यद् वा युक्ताभ्याम् मघवन् हरिभ्याम् बिभ्रद् वज्रम् बाह्वोर् इन्द्र यासि ||

   sutá íttvám nímiśla indra sóme stóme bráhmaṇi śasyámāna ukthé ǀ
   yádvā yuktā́bhyām maghavanháribhyām bíbhradvájram bāhvórindra yā́si ǁ

   suta it tvaṃ nimiśla indra some stome brahmaṇi śasyamāna ukthe |
   yad vā yuktābhyām maghavan haribhyām bibhrad vajram bāhvor indra yāsi ||

   सु॒ते । इत् । त्वम् । निऽमि॑श्लः । इ॒न्द्र॒ । सोमे॑ । स्तोमे॑ । ब्रह्म॑णि । श॒स्यमा॑ने । उ॒क्थे ।
   यत् । वा॒ । यु॒क्ताभ्या॑म् । म॒घ॒ऽव॒न् । हरि॑ऽभ्याम् । बिभ्र॑त् । वज्र॑म् । बा॒ह्वोः । इ॒न्द्र॒ । यासि॑ ॥

   सुते । इत् । त्वम् । निऽमिश्लः । इन्द्र । सोमे । स्तोमे । ब्रह्मणि । शस्यमाने । उक्थे ।
   यत् । वा । युक्ताभ्याम् । मघऽवन् । हरिऽभ्याम् । बिभ्रत् । वज्रम् । बाह्वोः । इन्द्र । यासि ॥

   suté ǀ ít ǀ tvám ǀ ní-miślaḥ ǀ indra ǀ sóme ǀ stóme ǀ bráhmaṇi ǀ śasyámāne ǀ ukthé ǀ
   yát ǀ vā ǀ yuktā́bhyām ǀ magha-van ǀ hári-bhyām ǀ bíbhrat ǀ vájram ǀ bāhvóḥ ǀ indra ǀ yā́si ǁ

   sute ǀ it ǀ tvam ǀ ni-miślaḥ ǀ indra ǀ some ǀ stome ǀ brahmaṇi ǀ śasyamāne ǀ ukthe ǀ
   yat ǀ vā ǀ yuktābhyām ǀ magha-van ǀ hari-bhyām ǀ bibhrat ǀ vajram ǀ bāhvoḥ ǀ indra ǀ yāsi ǁ

   6.23.1 Aṣṭaka 4.6.15.1Anuvāka 6.2.128Interpretations

2. Ṛk 2

   यद्वा॑ दि॒वि पार्ये॒ सुष्वि॑मिंद्र वृत्र॒हत्येऽव॑सि॒ शूर॑सातौ ।
   यद्वा॒ दक्ष॑स्य बि॒भ्युषो॒ अबि॑भ्य॒दरं॑धयः॒ शर्ध॑त इंद्र॒ दस्यू॑न् ॥

   यद् वा दिवि पार्ये सुष्विम् इन्द्र वृत्रहत्ये ऽवसि शूरसातौ |
   यद् वा दक्षस्य बिभ्युषो अबिभ्यद् अरन्धयः शर्धत इन्द्र दस्यून् ||

   yádvā diví pā́rye súṣvimindra vṛtrahátyé’vasi śū́rasātau ǀ
   yádvā dákṣasya bibhyúṣo ábibhyadárandhayaḥ śárdhata indra dásyūn ǁ

   yad vā divi pārye suṣvim indra vṛtrahatye 'vasi śūrasātau |
   yad vā dakṣasya bibhyuṣo abibhyad arandhayaḥ śardhata indra dasyūn ||

   यत् । वा॒ । दि॒वि । पार्ये॑ । सुस्वि॑म् । इ॒न्द्र॒ । वृ॒त्र॒ऽहत्ये॑ । अव॑सि । शूर॑ऽसातौ ।
   यत् । वा॒ । दक्ष॑स्य । बि॒भ्युषः॑ । अबि॑भ्यत् । अर॑न्धयः । शर्ध॑तः । इ॒न्द्र॒ । दस्यू॑न् ॥

   यत् । वा । दिवि । पार्ये । सुस्विम् । इन्द्र । वृत्रऽहत्ये । अवसि । शूरऽसातौ ।
   यत् । वा । दक्षस्य । बिभ्युषः । अबिभ्यत् । अरन्धयः । शर्धतः । इन्द्र । दस्यून् ॥

   yát ǀ vā ǀ diví ǀ pā́rye ǀ súsvim ǀ indra ǀ vṛtra-hátye ǀ ávasi ǀ śū́ra-sātau ǀ
   yát ǀ vā ǀ dákṣasya ǀ bibhyúṣaḥ ǀ ábibhyat ǀ árandhayaḥ ǀ śárdhataḥ ǀ indra ǀ dásyūn ǁ

   yat ǀ vā ǀ divi ǀ pārye ǀ susvim ǀ indra ǀ vṛtra-hatye ǀ avasi ǀ śūra-sātau ǀ
   yat ǀ vā ǀ dakṣasya ǀ bibhyuṣaḥ ǀ abibhyat ǀ arandhayaḥ ǀ śardhataḥ ǀ indra ǀ dasyūn ǁ

   6.23.2 Aṣṭaka 4.6.15.2Anuvāka 6.2.129Interpretations

3. Ṛk 3

   पाता॑ सु॒तमिंद्रो॑ अस्तु॒ सोमं॑ प्रणे॒नीरु॒ग्रो ज॑रि॒तार॑मू॒ती ।
   कर्ता॑ वी॒राय॒ सुष्व॑य उ लो॒कं दाता॒ वसु॑ स्तुव॒ते की॒रये॑ चित् ॥

   पाता सुतम् इन्द्रो अस्तु सोमम् प्रणेनीर् उग्रो जरितारम् ऊती |
   कर्ता वीराय सुष्वय उ लोकं दाता वसु स्तुवते कीरये चित् ||

   pā́tā sutámíndro astu sómam praṇenī́rugró jaritā́ramūtī́ ǀ
   kártā vīrā́ya súṣvaya u lokám dā́tā vásu stuvaté kīráye cit ǁ

   pātā sutam indro astu somam praṇenīr ugro jaritāram ūtī |
   kartā vīrāya suṣvaya u lokaṃ dātā vasu stuvate kīraye cit ||

   पाता॑ । सु॒तम् । इन्द्रः॑ । अ॒स्तु॒ । सोम॑म् । प्र॒ऽने॒नीः । उ॒ग्रः । ज॒रि॒तार॑म् । ऊ॒ती ।
   कर्ता॑ । वी॒राय॑ । सुस्व॑ये । ऊं॒ इति॑ । लो॒कम् । दाता॑ । वसु॑ । स्तु॒व॒ते । की॒रये॑ । चि॒त् ॥

   पाता । सुतम् । इन्द्रः । अस्तु । सोमम् । प्रऽनेनीः । उग्रः । जरितारम् । ऊती ।
   कर्ता । वीराय । सुस्वये । ऊं इति । लोकम् । दाता । वसु । स्तुवते । कीरये । चित् ॥

   pā́tā ǀ sutám ǀ índraḥ ǀ astu ǀ sómam ǀ pra-nenī́ḥ ǀ ugráḥ ǀ jaritā́ram ǀ ūtī́ ǀ
   kártā ǀ vīrā́ya ǀ súsvaye ǀ ūṃ íti ǀ lokám ǀ dā́tā ǀ vásu ǀ stuvaté ǀ kīráye ǀ cit ǁ

   pātā ǀ sutam ǀ indraḥ ǀ astu ǀ somam ǀ pra-nenīḥ ǀ ugraḥ ǀ jaritāram ǀ ūtī ǀ
   kartā ǀ vīrāya ǀ susvaye ǀ ūṃ iti ǀ lokam ǀ dātā ǀ vasu ǀ stuvate ǀ kīraye ǀ cit ǁ

   6.23.3 Aṣṭaka 4.6.15.3Anuvāka 6.2.130Interpretations

4. Ṛk 4

   गंतेयां॑ति॒ सव॑ना॒ हरि॑भ्यां ब॒भ्रिर्वज्रं॑ प॒पिः सोमं॑ द॒दिर्गाः ।
   कर्ता॑ वी॒रं नर्यं॒ सर्व॑वीरं॒ श्रोता॒ हवं॑ गृण॒तः स्तोम॑वाहाः ॥

   गन्तेयान्ति सवना हरिभ्याम् बभ्रिर् वज्रम् पपिः सोमं ददिर् गाः |
   कर्ता वीरं नर्यं सर्ववीरं श्रोता हवं गृणत स्तोमवाहाः ||

   gántéyānti sávanā háribhyām babhrírvájram papíḥ sómam dadírgā́ḥ ǀ
   kártā vīrám náryam sárvavīram śrótā hávam gṛṇatáḥ stómavāhāḥ ǁ

   ganteyānti savanā haribhyām babhrir vajram papiḥ somaṃ dadir gāḥ |
   kartā vīraṃ naryaṃ sarvavīraṃ śrotā havaṃ gṛṇata stomavāhāḥ ||

   गन्ता॑ । इय॑न्ति । सव॑ना । हरि॑ऽभ्याम् । ब॒भ्रिः । वज्र॑म् । प॒पिः । सोम॑म् । द॒दिः । गाः ।
   कर्ता॑ । वी॒रम् । नर्य॑म् । सर्व॑ऽवीरम् । श्रोता॑ । हव॑म् । गृ॒ण॒तः । स्तोम॑ऽवाहाः ॥

   गन्ता । इयन्ति । सवना । हरिऽभ्याम् । बभ्रिः । वज्रम् । पपिः । सोमम् । ददिः । गाः ।
   कर्ता । वीरम् । नर्यम् । सर्वऽवीरम् । श्रोता । हवम् । गृणतः । स्तोमऽवाहाः ॥

   gántā ǀ íyanti ǀ sávanā ǀ hári-bhyām ǀ babhríḥ ǀ vájram ǀ papíḥ ǀ sómam ǀ dadíḥ ǀ gā́ḥ ǀ
   kártā ǀ vīrám ǀ náryam ǀ sárva-vīram ǀ śrótā ǀ hávam ǀ gṛṇatáḥ ǀ stóma-vāhāḥ ǁ

   gantā ǀ iyanti ǀ savanā ǀ hari-bhyām ǀ babhriḥ ǀ vajram ǀ papiḥ ǀ somam ǀ dadiḥ ǀ gāḥ ǀ
   kartā ǀ vīram ǀ naryam ǀ sarva-vīram ǀ śrotā ǀ havam ǀ gṛṇataḥ ǀ stoma-vāhāḥ ǁ

   6.23.4 Aṣṭaka 4.6.15.4Anuvāka 6.2.131Interpretations

5. Ṛk 5

   अस्मै॑ व॒यं यद्वा॒वान॒ तद्वि॑विष्म॒ इंद्रा॑य॒ यो नः॑ प्र॒दिवो॒ अप॒स्कः ।
   सु॒ते सोमे॑ स्तु॒मसि॒ शंस॑दु॒क्थेंद्रा॑य॒ ब्रह्म॒ वर्ध॑नं॒ यथास॑त् ॥

   अस्मै वयं यद् वावान तद् विविष्म इन्द्राय यो नः प्रदिवो अपस् कः |
   सुते सोमे स्तुमसि शंसद् उक्थेन्द्राय ब्रह्म वर्धनं यथासत् ||

   ásmai vayám yádvāvā́na tádviviṣma índrāya yó naḥ pradívo ápaskáḥ ǀ
   suté sóme stumási śáṃsadukthéndrāya bráhma várdhanam yáthā́sat ǁ

   asmai vayaṃ yad vāvāna tad viviṣma indrāya yo naḥ pradivo apas kaḥ |
   sute some stumasi śaṃsad ukthendrāya brahma vardhanaṃ yathāsat ||

   अस्मै॑ । व॒यम् । यत् । व॒वान॑ । तत् । वि॒वि॒ष्मः॒ । इन्द्रा॑य । यः । नः॒ । प्र॒ऽदिवः॑ । अपः॑ । करिति॒ कः ।
   सु॒ते । सोमे॑ । स्तु॒मसि॑ । शंस॑त् । उ॒क्था । इन्द्रा॑य । ब्रह्म॑ । वर्ध॑नम् । यथा॑ । अस॑त् ॥

   अस्मै । वयम् । यत् । ववान । तत् । विविष्मः । इन्द्राय । यः । नः । प्रऽदिवः । अपः । करिति कः ।
   सुते । सोमे । स्तुमसि । शंसत् । उक्था । इन्द्राय । ब्रह्म । वर्धनम् । यथा । असत् ॥

   ásmai ǀ vayám ǀ yát ǀ vavā́na ǀ tát ǀ viviṣmaḥ ǀ índrāya ǀ yáḥ ǀ naḥ ǀ pra-dívaḥ ǀ ápaḥ ǀ káríti káḥ ǀ
   suté ǀ sóme ǀ stumási ǀ śáṃsat ǀ ukthā́ ǀ índrāya ǀ bráhma ǀ várdhanam ǀ yáthā ǀ ásat ǁ

   asmai ǀ vayam ǀ yat ǀ vavāna ǀ tat ǀ viviṣmaḥ ǀ indrāya ǀ yaḥ ǀ naḥ ǀ pra-divaḥ ǀ apaḥ ǀ kariti kaḥ ǀ
   sute ǀ some ǀ stumasi ǀ śaṃsat ǀ ukthā ǀ indrāya ǀ brahma ǀ vardhanam ǀ yathā ǀ asat ǁ

   6.23.5 Aṣṭaka 4.6.15.5Anuvāka 6.2.132Interpretations

6. Ṛk 6

   ब्रह्मा॑णि॒ हि च॑कृ॒षे वर्ध॑नानि॒ ताव॑त्त इंद्र म॒तिभि॑र्विविष्मः ।
   सु॒ते सोमे॑ सुतपाः॒ शंत॑मानि॒ रांद्र्या॑ क्रियास्म॒ वक्ष॑णानि य॒ज्ञैः ॥

   ब्रह्माणि हि चकृषे वर्धनानि तावत् त इन्द्र मतिभिर् विविष्मः |
   सुते सोमे सुतपाः शन्तमानि राण्ड्या क्रियास्म वक्षणानि यज्ञैः ||

   bráhmāṇi hí cakṛṣé várdhanāni tā́vatta indra matíbhirviviṣmaḥ ǀ
   suté sóme sutapāḥ śáṃtamāni rā́ndryā kriyāsma vákṣaṇāni yajñáiḥ ǁ

   brahmāṇi hi cakṛṣe vardhanāni tāvat ta indra matibhir viviṣmaḥ |
   sute some sutapāḥ śantamāni rāṇḍyā kriyāsma vakṣaṇāni yajñaiḥ ||

   ब्रह्मा॑णि । हि । च॒कृ॒षे । वर्ध॑नानि । ताव॑त् । ते॒ । इ॒न्द्र॒ । म॒तिऽभिः॑ । वि॒वि॒ष्मः॒ ।
   सु॒ते । सोमे॑ । सु॒त॒ऽपाः॒ । शम्ऽत॑मानि । रान्द्र्या॑ । क्रि॒या॒स्म॒ । वक्ष॑णानि । य॒ज्ञैः ॥

   ब्रह्माणि । हि । चकृषे । वर्धनानि । तावत् । ते । इन्द्र । मतिऽभिः । विविष्मः ।
   सुते । सोमे । सुतऽपाः । शम्ऽतमानि । रान्द्र्या । क्रियास्म । वक्षणानि । यज्ञैः ॥

   bráhmāṇi ǀ hí ǀ cakṛṣé ǀ várdhanāni ǀ tā́vat ǀ te ǀ indra ǀ matí-bhiḥ ǀ viviṣmaḥ ǀ
   suté ǀ sóme ǀ suta-pāḥ ǀ śám-tamāni ǀ rā́ndryā ǀ kriyāsma ǀ vákṣaṇāni ǀ yajñáiḥ ǁ

   brahmāṇi ǀ hi ǀ cakṛṣe ǀ vardhanāni ǀ tāvat ǀ te ǀ indra ǀ mati-bhiḥ ǀ viviṣmaḥ ǀ
   sute ǀ some ǀ suta-pāḥ ǀ śam-tamāni ǀ rāndryā ǀ kriyāsma ǀ vakṣaṇāni ǀ yajñaiḥ ǁ

   6.23.6 Aṣṭaka 4.6.16.1Anuvāka 6.2.133Interpretations

7. Ṛk 7

   स नो॑ बोधि पुरो॒ळाशं॒ ररा॑णः॒ पिबा॒ तु सोमं॒ गोऋ॑जीकमिंद्र ।
   एदं ब॒र्हिर्यज॑मानस्य सीदो॒रुं कृ॑धि त्वाय॒त उ॑ लो॒कं ॥

   स नो बोधि पुरोऌआशं रराणः पिबा तु सोमं गोऋजीकम् इन्द्र |
   एदम् बर्हिर् यजमानस्य सीदोरुं कृधि त्वायत उ लोकम् ||

   sá no bodhi puroḷā́śam rárāṇaḥ píbā tú sómam góṛjīkamindra ǀ
   édám barhíryájamānasya sīdorúm kṛdhi tvāyatá u lokám ǁ

   sa no bodhi puroḷāśaṃ rarāṇaḥ pibā tu somaṃ goṛjīkam indra |
   edam barhir yajamānasya sīdoruṃ kṛdhi tvāyata u lokam ||

   सः । नः॒ । बो॒धि॒ । पु॒रो॒ळाश॑म् । ररा॑णः । पिब॑ । तु । सोम॑म् । गोऽऋ॑जीकम् । इ॒न्द्र॒ ।
   आ । इ॒दम् । ब॒र्हिः । यज॑मानस्य । सी॒द॒ । उ॒रुम् । कृ॒धि॒ । त्वा॒ऽय॒तः । ऊं॒ इति॑ । लो॒कम् ॥

   सः । नः । बोधि । पुरोळाशम् । रराणः । पिब । तु । सोमम् । गोऽऋजीकम् । इन्द्र ।
   आ । इदम् । बर्हिः । यजमानस्य । सीद । उरुम् । कृधि । त्वाऽयतः । ऊं इति । लोकम् ॥

   sáḥ ǀ naḥ ǀ bodhi ǀ puroḷā́śam ǀ rárāṇaḥ ǀ píba ǀ tú ǀ sómam ǀ gó-ṛjīkam ǀ indra ǀ
   ā́ ǀ idám ǀ barhíḥ ǀ yájamānasya ǀ sīda ǀ urúm ǀ kṛdhi ǀ tvā-yatáḥ ǀ ūṃ íti ǀ lokám ǁ

   saḥ ǀ naḥ ǀ bodhi ǀ puroḷāśam ǀ rarāṇaḥ ǀ piba ǀ tu ǀ somam ǀ go-ṛjīkam ǀ indra ǀ
   ā ǀ idam ǀ barhiḥ ǀ yajamānasya ǀ sīda ǀ urum ǀ kṛdhi ǀ tvā-yataḥ ǀ ūṃ iti ǀ lokam ǁ

   6.23.7 Aṣṭaka 4.6.16.2Anuvāka 6.2.134Interpretations

8. Ṛk 8

   स मं॑दस्वा॒ ह्यनु॒ जोष॑मुग्र॒ प्र त्वा॑ य॒ज्ञास॑ इ॒मे अ॑श्नुवंतु ।
   प्रेमे हवा॑सः पुरुहू॒तम॒स्मे आ त्वे॒यं धीरव॑स इंद्र यम्याः ॥

   स मन्दस्वा ह्य् अनु जोषम् उग्र प्र त्वा यज्ञास इमे अश्नुवन्तु |
   प्रेमे हवासः पुरुहूतम् अस्मे आ त्वेयं धीर् अवस इन्द्र यम्याः ||

   sá mandasvā hyánu jóṣamugra prá tvā yajñā́sa imé aśnuvantu ǀ
   prémé hávāsaḥ puruhūtámasmé ā́ tveyám dhī́rávasa indra yamyāḥ ǁ

   sa mandasvā hy anu joṣam ugra pra tvā yajñāsa ime aśnuvantu |
   preme havāsaḥ puruhūtam asme ā tveyaṃ dhīr avasa indra yamyāḥ ||

   सः । म॒न्द॒स्व॒ । हि । अनु॑ । जोष॑म् । उ॒ग्र॒ । प्र । त्वा॒ । य॒ज्ञासः॑ । इ॒मे । अ॒श्नु॒व॒न्तु॒ ।
   प्र । इ॒मे । हवा॑सः । पु॒रु॒ऽहू॒तम् । अ॒स्मे इति॑ । आ । त्वा॒ । इ॒यम् । धीः । अव॑से । इ॒न्द्र॒ । य॒म्याः॒ ॥

   सः । मन्दस्व । हि । अनु । जोषम् । उग्र । प्र । त्वा । यज्ञासः । इमे । अश्नुवन्तु ।
   प्र । इमे । हवासः । पुरुऽहूतम् । अस्मे इति । आ । त्वा । इयम् । धीः । अवसे । इन्द्र । यम्याः ॥

   sáḥ ǀ mandasva ǀ hí ǀ ánu ǀ jóṣam ǀ ugra ǀ prá ǀ tvā ǀ yajñā́saḥ ǀ imé ǀ aśnuvantu ǀ
   prá ǀ imé ǀ hávāsaḥ ǀ puru-hūtám ǀ asmé íti ǀ ā́ ǀ tvā ǀ iyám ǀ dhī́ḥ ǀ ávase ǀ indra ǀ yamyāḥ ǁ

   saḥ ǀ mandasva ǀ hi ǀ anu ǀ joṣam ǀ ugra ǀ pra ǀ tvā ǀ yajñāsaḥ ǀ ime ǀ aśnuvantu ǀ
   pra ǀ ime ǀ havāsaḥ ǀ puru-hūtam ǀ asme iti ǀ ā ǀ tvā ǀ iyam ǀ dhīḥ ǀ avase ǀ indra ǀ yamyāḥ ǁ

   6.23.8 Aṣṭaka 4.6.16.3Anuvāka 6.2.135Interpretations

9. Ṛk 9

   तं वः॑ सखायः॒ सं यथा॑ सु॒तेषु॒ सोमे॑भिरीं पृणता भो॒जमिंद्रं॑ ।
   कु॒वित्तस्मा॒ अस॑ति नो॒ भरा॑य॒ न सुष्वि॒मिंद्रोऽव॑से मृधाति ॥

   तं वः सखायः सं यथा सुतेषु सोमेभिर् ईम् पृणता भोजम् इन्द्रम् |
   कुवित् तस्मा असति नो भराय न सुष्विम् इन्द्रो ऽवसे मृधाति ||

   tám vaḥ sakhāyaḥ sám yáthā sutéṣu sómebhirīm pṛṇatā bhojámíndram ǀ
   kuvíttásmā ásati no bhárāya ná súṣvimíndró’vase mṛdhāti ǁ

   taṃ vaḥ sakhāyaḥ saṃ yathā suteṣu somebhir īm pṛṇatā bhojam indram |
   kuvit tasmā asati no bharāya na suṣvim indro 'vase mṛdhāti ||

   तम् । वः॒ । स॒खा॒यः॒ । सम् । यथा॑ । सु॒तेषु॑ । सोमे॑भिः । ई॒म् । पृ॒ण॒त॒ । भो॒जम् । इन्द्र॑म् ।
   कु॒वित् । तस्मै॑ । अस॑ति । नः॒ । भरा॑य । न । सुस्वि॑म् । इन्द्रः॑ । अव॑से । मृ॒धा॒ति॒ ॥

   तम् । वः । सखायः । सम् । यथा । सुतेषु । सोमेभिः । ईम् । पृणत । भोजम् । इन्द्रम् ।
   कुवित् । तस्मै । असति । नः । भराय । न । सुस्विम् । इन्द्रः । अवसे । मृधाति ॥

   tám ǀ vaḥ ǀ sakhāyaḥ ǀ sám ǀ yáthā ǀ sutéṣu ǀ sómebhiḥ ǀ īm ǀ pṛṇata ǀ bhojám ǀ índram ǀ
   kuvít ǀ tásmai ǀ ásati ǀ naḥ ǀ bhárāya ǀ ná ǀ súsvim ǀ índraḥ ǀ ávase ǀ mṛdhāti ǁ

   tam ǀ vaḥ ǀ sakhāyaḥ ǀ sam ǀ yathā ǀ suteṣu ǀ somebhiḥ ǀ īm ǀ pṛṇata ǀ bhojam ǀ indram ǀ
   kuvit ǀ tasmai ǀ asati ǀ naḥ ǀ bharāya ǀ na ǀ susvim ǀ indraḥ ǀ avase ǀ mṛdhāti ǁ

   6.23.9 Aṣṭaka 4.6.16.4Anuvāka 6.2.136Interpretations

10. Ṛk 10

    ए॒वेदिंद्रः॑ सु॒ते अ॑स्तावि॒ सोमे॑ भ॒रद्वा॑जेषु॒ क्षय॒दिन्म॒घोनः॑ ।
    अस॒द्यथा॑ जरि॒त्र उ॒त सू॒रिरिंद्रो॑ रा॒यो वि॒श्ववा॑रस्य दा॒ता ॥

    एवेद् इन्द्रः सुते अस्तावि सोमे भरद्वाजेषु क्षयद् इन् मघोनः |
    असद् यथा जरित्र उत सूरिर् इन्द्रो रायो विश्ववारस्य दाता ||

    evédíndraḥ suté astāvi sóme bharádvājeṣu kṣáyadínmaghónaḥ ǀ
    ásadyáthā jaritrá utá sūríríndro rāyó viśvávārasya dātā́ ǁ

    eved indraḥ sute astāvi some bharadvājeṣu kṣayad in maghonaḥ |
    asad yathā jaritra uta sūrir indro rāyo viśvavārasya dātā ||

    ए॒व । इत् । इन्द्रः॑ । सु॒ते । अ॒स्ता॒वि॒ । सोमे॑ । भ॒रत्ऽवा॑जेषु । क्षय॑त् । इत् । म॒घोनः॑ ।
    अस॑त् । यथा॑ । ज॒रि॒त्रे । उ॒त । सू॒रिः । इन्द्रः॑ । रा॒यः । वि॒श्वऽवा॑रस्य । दा॒ता ॥

    एव । इत् । इन्द्रः । सुते । अस्तावि । सोमे । भरत्ऽवाजेषु । क्षयत् । इत् । मघोनः ।
    असत् । यथा । जरित्रे । उत । सूरिः । इन्द्रः । रायः । विश्वऽवारस्य । दाता ॥

    evá ǀ ít ǀ índraḥ ǀ suté ǀ astāvi ǀ sóme ǀ bharát-vājeṣu ǀ kṣáyat ǀ ít ǀ maghónaḥ ǀ
    ásat ǀ yáthā ǀ jaritré ǀ utá ǀ sūríḥ ǀ índraḥ ǀ rāyáḥ ǀ viśvá-vārasya ǀ dātā́ ǁ

    eva ǀ it ǀ indraḥ ǀ sute ǀ astāvi ǀ some ǀ bharat-vājeṣu ǀ kṣayat ǀ it ǀ maghonaḥ ǀ
    asat ǀ yathā ǀ jaritre ǀ uta ǀ sūriḥ ǀ indraḥ ǀ rāyaḥ ǀ viśva-vārasya ǀ dātā ǁ

    6.23.10 Aṣṭaka 4.6.16.5Anuvāka 6.2.137Interpretations

Text, recitation and interpretations from the Ṛgveda database of theveda.org.in.