Devatā देवता

1: Varman; 2: Dhanu; 3: Jyā; 4: Ārtnī; 5: Iṣudhi; 6: Sārathi, Raṣmaya; 7: Aṣvās; 8: Ratha; 9: Rathopāḥ; 10: Liṅgoktadevatās; 11, 12, 15, 16: Iṣavaḥ; 13, 14: Pratodaḥ; 17-19: Liṅgoktadevatās Who Help In Battle

Ṛṣi ऋषि

Pāyu Bhāradvāja

Chandas छन्दस्

Triṣṭubh, Anuṣṭubh, Jagatī

1. Ṛk 1

   जी॒मूत॑स्येव भवति॒ प्रती॑कं॒ यद्व॒र्मी याति॑ स॒मदा॑मु॒पस्थे॑ ।
   अना॑विद्धया त॒न्वा॑ जय॒ त्वं स त्वा॒ वर्म॑णो महि॒मा पि॑पर्तु ॥

   जीमूतस्येव भवति प्रतीकं यद् वर्मी याति समदाम् उपस्थे |
   अनाविद्धया तन्वा जय त्वं स त्वा वर्मणो महिमा पिपर्तु ||

   jīmū́tasyeva bhavati prátīkam yádvarmī́ yā́ti samádāmupásthe ǀ
   ánāviddhayā tanvā́ jaya tvám sá tvā vármaṇo mahimā́ pipartu ǁ

   jīmūtasyeva bhavati pratīkaṃ yad varmī yāti samadām upasthe |
   anāviddhayā tanvā jaya tvaṃ sa tvā varmaṇo mahimā pipartu ||

   जी॒मूत॑स्यऽइव । भ॒व॒ति॒ । प्रती॑कम् । यत् । व॒र्मी । याति॑ । स॒ऽमदा॑म् । उ॒पऽस्थे॑ ।
   अना॑विद्धया । त॒न्वा॑ । ज॒य॒ । त्वम् । सः । त्वा॒ । वर्म॑णः । म॒हि॒मा । पि॒प॒र्तु॒ ॥

   जीमूतस्यऽइव । भवति । प्रतीकम् । यत् । वर्मी । याति । सऽमदाम् । उपऽस्थे ।
   अनाविद्धया । तन्वा । जय । त्वम् । सः । त्वा । वर्मणः । महिमा । पिपर्तु ॥

   jīmū́tasya-iva ǀ bhavati ǀ prátīkam ǀ yát ǀ varmī́ ǀ yā́ti ǀ sa-mádām ǀ upá-sthe ǀ
   ánāviddhayā ǀ tanvā́ ǀ jaya ǀ tvám ǀ sáḥ ǀ tvā ǀ vármaṇaḥ ǀ mahimā́ ǀ pipartu ǁ

   jīmūtasya-iva ǀ bhavati ǀ pratīkam ǀ yat ǀ varmī ǀ yāti ǀ sa-madām ǀ upa-sthe ǀ
   anāviddhayā ǀ tanvā ǀ jaya ǀ tvam ǀ saḥ ǀ tvā ǀ varmaṇaḥ ǀ mahimā ǀ pipartu ǁ

   6.75.1 Aṣṭaka 5.1.19.1Anuvāka 6.6.100Interpretations

2. Ṛk 2

   धन्व॑ना॒ गा धन्व॑ना॒जिं ज॑येम॒ धन्व॑ना ती॒व्राः स॒मदो॑ जयेम ।
   धनुः॒ शत्रो॑रपका॒मं कृ॑णोति॒ धन्व॑ना॒ सर्वाः॑ प्र॒दिशो॑ जयेम ॥

   धन्वना गा धन्वनाजिं जयेम धन्वना तीव्राः समदो जयेम |
   धनुः शत्रोर् अपकामं कृणोति धन्वना सर्वाः प्रदिशो जयेम ||

   dhánvanā gā́ dhánvanājím jayema dhánvanā tīvrā́ḥ samádo jayema ǀ
   dhánuḥ śátrorapakāmám kṛṇoti dhánvanā sárvāḥ pradíśo jayema ǁ

   dhanvanā gā dhanvanājiṃ jayema dhanvanā tīvrāḥ samado jayema |
   dhanuḥ śatror apakāmaṃ kṛṇoti dhanvanā sarvāḥ pradiśo jayema ||

   धन्व॑ना । गाः । धन्व॑ना । आ॒जिम् । ज॒ये॒म॒ । धन्व॑ना । ती॒व्राः । स॒ऽमदः॑ । ज॒ये॒म॒ ।
   धनुः॑ । शत्रोः॑ । अ॒प॒ऽका॒मम् । कृ॒णो॒ति॒ । धन्व॑ना । सर्वाः॑ । प्र॒ऽदिशः॑ । ज॒ये॒म॒ ॥

   धन्वना । गाः । धन्वना । आजिम् । जयेम । धन्वना । तीव्राः । सऽमदः । जयेम ।
   धनुः । शत्रोः । अपऽकामम् । कृणोति । धन्वना । सर्वाः । प्रऽदिशः । जयेम ॥

   dhánvanā ǀ gā́ḥ ǀ dhánvanā ǀ ājím ǀ jayema ǀ dhánvanā ǀ tīvrā́ḥ ǀ sa-mádaḥ ǀ jayema ǀ
   dhánuḥ ǀ śátroḥ ǀ apa-kāmám ǀ kṛṇoti ǀ dhánvanā ǀ sárvāḥ ǀ pra-díśaḥ ǀ jayema ǁ

   dhanvanā ǀ gāḥ ǀ dhanvanā ǀ ājim ǀ jayema ǀ dhanvanā ǀ tīvrāḥ ǀ sa-madaḥ ǀ jayema ǀ
   dhanuḥ ǀ śatroḥ ǀ apa-kāmam ǀ kṛṇoti ǀ dhanvanā ǀ sarvāḥ ǀ pra-diśaḥ ǀ jayema ǁ

   6.75.2 Aṣṭaka 5.1.19.2Anuvāka 6.6.101Interpretations

3. Ṛk 3

   व॒क्ष्यंती॒वेदा ग॑नीगंति॒ कर्णं॑ प्रि॒यं सखा॑यं परिषस्वजा॒ना ।
   योषे॑व शिंक्ते॒ वित॒ताधि॒ धन्व॒ञ्ज्या इ॒यं सम॑ने पा॒रयं॑ती ॥

   वक्ष्यन्तीवेद् आ गनीगन्ति कर्णम् प्रियं सखायम् परिषस्वजाना |
   योषेव शिङ्क्ते वितताधि धन्वञ् ज्या इयं समने पारयन्ती ||

   vakṣyántīvédā́ ganīganti kárṇam priyám sákhāyam pariṣasvajānā́ ǀ
   yóṣeva śiṅkte vítatā́dhi dhánvañjyā́ iyám sámane pāráyantī ǁ

   vakṣyantīved ā ganīganti karṇam priyaṃ sakhāyam pariṣasvajānā |
   yoṣeva śiṅkte vitatādhi dhanvañ jyā iyaṃ samane pārayantī ||

   व॒क्ष्यन्ती॑ऽइव । इत् । आ । ग॒नी॒ग॒न्ति॒ । कर्ण॑म् । प्रि॒यम् । सखा॑यम् । प॒रि॒ऽस॒स्व॒जा॒ना ।
   योषा॑ऽइव । शि॒ङ्क्ते॒ । विऽत॑ता । अधि॑ । धन्व॑न् । ज्या । इ॒यम् । सम॑ने । पा॒रय॑न्ती ॥

   वक्ष्यन्तीऽइव । इत् । आ । गनीगन्ति । कर्णम् । प्रियम् । सखायम् । परिऽसस्वजाना ।
   योषाऽइव । शिङ्क्ते । विऽतता । अधि । धन्वन् । ज्या । इयम् । समने । पारयन्ती ॥

   vakṣyántī-iva ǀ ít ǀ ā́ ǀ ganīganti ǀ kárṇam ǀ priyám ǀ sákhāyam ǀ pari-sasvajānā́ ǀ
   yóṣā-iva ǀ śiṅkte ǀ ví-tatā ǀ ádhi ǀ dhánvan ǀ jyā́ ǀ iyám ǀ sámane ǀ pāráyantī ǁ

   vakṣyantī-iva ǀ it ǀ ā ǀ ganīganti ǀ karṇam ǀ priyam ǀ sakhāyam ǀ pari-sasvajānā ǀ
   yoṣā-iva ǀ śiṅkte ǀ vi-tatā ǀ adhi ǀ dhanvan ǀ jyā ǀ iyam ǀ samane ǀ pārayantī ǁ

   6.75.3 Aṣṭaka 5.1.19.3Anuvāka 6.6.102Interpretations

4. Ṛk 4

   ते आ॒चरं॑ती॒ सम॑नेव॒ योषा॑ मा॒तेव॑ पु॒त्रं बि॑भृतामु॒पस्थे॑ ।
   अप॒ शत्रू॑न्विध्यतां संविदा॒ने आर्त्नी॑ इ॒मे वि॑ष्फु॒रंती॑ अ॒मित्रा॑न् ॥

   ते आचरन्ती समनेव योषा मातेव पुत्रम् बिभृताम् उपस्थे |
   अप शत्रून् विध्यतां संविदाने आर्त्नी इमे विष्फुरन्ती अमित्रान् ||

   té ācárantī sámaneva yóṣā mātéva putrám bibhṛtāmupásthe ǀ
   ápa śátrūnvidhyatām saṃvidāné ā́rtnī imé viṣphurántī amítrān ǁ

   te ācarantī samaneva yoṣā māteva putram bibhṛtām upasthe |
   apa śatrūn vidhyatāṃ saṃvidāne ārtnī ime viṣphurantī amitrān ||

   ते इति॑ । आ॒चर॑न्ती॒ इत्या॒ऽचर॑न्ती । सम॑नाऽइव । योषा॑ । मा॒ताऽइ॑व । पु॒त्रम् । बि॒भृ॒ता॒म् । उ॒पऽस्थे॑ ।
   अप॑ । शत्रू॑न् । वि॒ध्य॒ता॒म् । सं॒वि॒दा॒ने इति॑ स॒म्ऽवि॒दा॒ने । आ॒र्त्नी इति॑ । इ॒मे इति॑ । वि॒स्फु॒रन्ती॒ इति॑ वि॒ऽस्फु॒रन्ती॑ । अ॒मित्रा॑न् ॥

   ते इति । आचरन्ती इत्याऽचरन्ती । समनाऽइव । योषा । माताऽइव । पुत्रम् । बिभृताम् । उपऽस्थे ।
   अप । शत्रून् । विध्यताम् । संविदाने इति सम्ऽविदाने । आर्त्नी इति । इमे इति । विस्फुरन्ती इति विऽस्फुरन्ती । अमित्रान् ॥

   té íti ǀ ācárantī ítyā-cárantī ǀ sámanā-iva ǀ yóṣā ǀ mātā́-iva ǀ putrám ǀ bibhṛtām ǀ upá-sthe ǀ
   ápa ǀ śátrūn ǀ vidhyatām ǀ saṃvidāné íti sam-vidāné ǀ ārtnī́ íti ǀ imé íti ǀ visphurántī íti vi-sphurántī ǀ amítrān ǁ

   te iti ǀ ācarantī ityā-carantī ǀ samanā-iva ǀ yoṣā ǀ mātā-iva ǀ putram ǀ bibhṛtām ǀ upa-sthe ǀ
   apa ǀ śatrūn ǀ vidhyatām ǀ saṃvidāne iti sam-vidāne ǀ ārtnī iti ǀ ime iti ǀ visphurantī iti vi-sphurantī ǀ amitrān ǁ

   6.75.4 Aṣṭaka 5.1.19.4Anuvāka 6.6.103Interpretations

5. Ṛk 5

   ब॒ह्वी॒नां पि॒ता ब॒हुर॑स्य पु॒त्रश्चि॒श्चा कृ॑णोति॒ सम॑नाव॒गत्य॑ ।
   इ॒षु॒धिः संकाः॒ पृत॑नाश्च॒ सर्वाः॑ पृ॒ष्ठे निन॑द्धो जयति॒ प्रसू॑तः ॥

   बह्वीनाम् पिता बहुर् अस्य पुत्रश् चिश्चा कृणोति समनावगत्य |
   इषुधिः सङ्काः पृतनाश् च सर्वाः पृष्ठे निनद्धो जयति प्रसूतः ||

   bahvīnā́m pitā́ bahúrasya putráściścā́ kṛṇoti sámanāvagátya ǀ
   iṣudhíḥ sáṅkāḥ pṛ́tanāśca sárvāḥ pṛṣṭhé nínaddho jayati prásūtaḥ ǁ

   bahvīnām pitā bahur asya putraś ciścā kṛṇoti samanāvagatya |
   iṣudhiḥ saṅkāḥ pṛtanāś ca sarvāḥ pṛṣṭhe ninaddho jayati prasūtaḥ ||

   ब॒ह्वी॒नाम् । पि॒ता । ब॒हुः । अ॒स्य । पु॒त्रः । चि॒श्चा । कृ॒णो॒ति॒ । सम॑ना । अ॒व॒ऽगत्य॑ ।
   इ॒षु॒ऽधिः । सङ्काः॑ । पृत॑नाः । च॒ । सर्वाः॑ । पृ॒ष्ठे । निऽन॑द्धः । ज॒य॒ति॒ । प्रऽसू॑तः ॥

   बह्वीनाम् । पिता । बहुः । अस्य । पुत्रः । चिश्चा । कृणोति । समना । अवऽगत्य ।
   इषुऽधिः । सङ्काः । पृतनाः । च । सर्वाः । पृष्ठे । निऽनद्धः । जयति । प्रऽसूतः ॥

   bahvīnā́m ǀ pitā́ ǀ bahúḥ ǀ asyá ǀ putráḥ ǀ ciścā́ ǀ kṛṇoti ǀ sámanā ǀ ava-gátya ǀ
   iṣu-dhíḥ ǀ sáṅkāḥ ǀ pṛ́tanāḥ ǀ ca ǀ sárvāḥ ǀ pṛṣṭhé ǀ ní-naddhaḥ ǀ jayati ǀ prá-sūtaḥ ǁ

   bahvīnām ǀ pitā ǀ bahuḥ ǀ asya ǀ putraḥ ǀ ciścā ǀ kṛṇoti ǀ samanā ǀ ava-gatya ǀ
   iṣu-dhiḥ ǀ saṅkāḥ ǀ pṛtanāḥ ǀ ca ǀ sarvāḥ ǀ pṛṣṭhe ǀ ni-naddhaḥ ǀ jayati ǀ pra-sūtaḥ ǁ

   6.75.5 Aṣṭaka 5.1.19.5Anuvāka 6.6.104Interpretations

6. Ṛk 6

   रथे॒ तिष्ठ॑न्नयति वा॒जिनः॑ पु॒रो यत्र॑यत्र का॒मय॑ते सुषार॒थिः ।
   अ॒भीशू॑नां महि॒मानं॑ पनायत॒ मनः॑ प॒श्चादनु॑ यच्छंति र॒श्मयः॑ ॥

   रथे तिष्ठन् नयति वाजिनः पुरो यत्र-यत्र कामयते सुषारथिः |
   अभीशूनाम् महिमानम् पनायत मनः पश्चाद् अनु यच्छन्ति रश्मयः ||

   ráthe tíṣṭhannayati vājínaḥ puró yátrayatra kāmáyate suṣārathíḥ ǀ
   abhī́śūnām mahimā́nam panāyata mánaḥ paścā́dánu yacchanti raśmáyaḥ ǁ

   rathe tiṣṭhan nayati vājinaḥ puro yatra-yatra kāmayate suṣārathiḥ |
   abhīśūnām mahimānam panāyata manaḥ paścād anu yacchanti raśmayaḥ ||

   रथे॑ । तिष्ठ॑न् । न॒य॒ति॒ । वा॒जिनः॑ । पु॒रः । यत्र॑ऽयत्र । का॒मय॑ते । सु॒ऽसा॒र॒थिः ।
   अ॒भीशू॑नाम् । म॒हि॒मान॑म् । प॒ना॒य॒त॒ । मनः॑ । प॒श्चात् । अनु॑ । य॒च्छ॒न्ति॒ । र॒श्मयः॑ ॥

   रथे । तिष्ठन् । नयति । वाजिनः । पुरः । यत्रऽयत्र । कामयते । सुऽसारथिः ।
   अभीशूनाम् । महिमानम् । पनायत । मनः । पश्चात् । अनु । यच्छन्ति । रश्मयः ॥

   ráthe ǀ tíṣṭhan ǀ nayati ǀ vājínaḥ ǀ puráḥ ǀ yátra-yatra ǀ kāmáyate ǀ su-sārathíḥ ǀ
   abhī́śūnām ǀ mahimā́nam ǀ panāyata ǀ mánaḥ ǀ paścā́t ǀ ánu ǀ yacchanti ǀ raśmáyaḥ ǁ

   rathe ǀ tiṣṭhan ǀ nayati ǀ vājinaḥ ǀ puraḥ ǀ yatra-yatra ǀ kāmayate ǀ su-sārathiḥ ǀ
   abhīśūnām ǀ mahimānam ǀ panāyata ǀ manaḥ ǀ paścāt ǀ anu ǀ yacchanti ǀ raśmayaḥ ǁ

   6.75.6 Aṣṭaka 5.1.20.1Anuvāka 6.6.105Interpretations

7. Ṛk 7

   ती॒व्रान्घोषा॑न्कृण्वते॒ वृष॑पाण॒योऽश्वा॒ रथे॑भिः स॒ह वा॒जयं॑तः ।
   अ॒व॒क्रामं॑तः॒ प्रप॑दैर॒मित्रा॑न् क्षि॒णंति॒ शत्रूँ॒रन॑पव्ययंतः ॥

   तीव्रान् घोषान् कृण्वते वृषपाणयो ऽश्वा रथेभिः सह वाजयन्तः |
   अवक्रामन्तः प्रपदैर् अमित्रान् क्षिणन्ति शत्रूंर् अनपव्ययन्तः ||

   tīvrā́nghóṣānkṛṇvate vṛ́ṣapāṇayó’śvā ráthebhiḥ sahá vājáyantaḥ ǀ
   avakrā́mantaḥ prápadairamítrān kṣiṇánti śátrūm̐ránapavyayantaḥ ǁ

   tīvrān ghoṣān kṛṇvate vṛṣapāṇayo 'śvā rathebhiḥ saha vājayantaḥ |
   avakrāmantaḥ prapadair amitrān kṣiṇanti śatrūṃr anapavyayantaḥ ||

   ती॒व्रान् । घोषा॑न् । कृ॒ण्व॒ते॒ । वृष॑ऽपाणयः । अश्वाः॑ । रथे॑भिः । स॒ह । वा॒जय॑न्तः ।
   अ॒व॒ऽक्राम॑न्तः । प्रऽप॑दैः । अ॒मित्रा॑न् । क्षि॒णन्ति॑ । शत्रू॑न् । अन॑पऽव्ययन्तः ॥

   तीव्रान् । घोषान् । कृण्वते । वृषऽपाणयः । अश्वाः । रथेभिः । सह । वाजयन्तः ।
   अवऽक्रामन्तः । प्रऽपदैः । अमित्रान् । क्षिणन्ति । शत्रून् । अनपऽव्ययन्तः ॥

   tīvrā́n ǀ ghóṣān ǀ kṛṇvate ǀ vṛ́ṣa-pāṇayaḥ ǀ áśvāḥ ǀ ráthebhiḥ ǀ sahá ǀ vājáyantaḥ ǀ
   ava-krā́mantaḥ ǀ prá-padaiḥ ǀ amítrān ǀ kṣiṇánti ǀ śátrūn ǀ ánapa-vyayantaḥ ǁ

   tīvrān ǀ ghoṣān ǀ kṛṇvate ǀ vṛṣa-pāṇayaḥ ǀ aśvāḥ ǀ rathebhiḥ ǀ saha ǀ vājayantaḥ ǀ
   ava-krāmantaḥ ǀ pra-padaiḥ ǀ amitrān ǀ kṣiṇanti ǀ śatrūn ǀ anapa-vyayantaḥ ǁ

   6.75.7 Aṣṭaka 5.1.20.2Anuvāka 6.6.106Interpretations

8. Ṛk 8

   र॒थ॒वाह॑नं ह॒विर॑स्य॒ नाम॒ यत्रायु॑धं॒ निहि॑तमस्य॒ वर्म॑ ।
   तत्रा॒ रथ॒मुप॑ श॒ग्मं स॑देम वि॒श्वाहा॑ व॒यं सु॑मन॒स्यमा॑नाः ॥

   रथवाहनं हविर् अस्य नाम यत्रायुधं निहितम् अस्य वर्म |
   तत्रा रथम् उप शग्मं सदेम विश्वाहा वयं सुमनस्यमानाः ||

   rathavā́hanam havírasya nā́ma yátrā́yudham níhitamasya várma ǀ
   tátrā ráthamúpa śagmám sadema viśvā́hā vayám sumanasyámānāḥ ǁ

   rathavāhanaṃ havir asya nāma yatrāyudhaṃ nihitam asya varma |
   tatrā ratham upa śagmaṃ sadema viśvāhā vayaṃ sumanasyamānāḥ ||

   र॒थ॒ऽवाह॑नम् । ह॒विः । अ॒स्य॒ । नाम॑ । यत्र॑ । आयु॑धम् । निऽहि॑तम् । अ॒स्य॒ । वर्म॑ ।
   तत्र॑ । रथ॑म् । उप॑ । श॒ग्मम् । स॒दे॒म॒ । वि॒श्वाहा॑ । व॒यम् । सु॒ऽम॒न॒स्यमा॑नाः ॥

   रथऽवाहनम् । हविः । अस्य । नाम । यत्र । आयुधम् । निऽहितम् । अस्य । वर्म ।
   तत्र । रथम् । उप । शग्मम् । सदेम । विश्वाहा । वयम् । सुऽमनस्यमानाः ॥

   ratha-vā́hanam ǀ havíḥ ǀ asya ǀ nā́ma ǀ yátra ǀ ā́yudham ǀ ní-hitam ǀ asya ǀ várma ǀ
   tátra ǀ rátham ǀ úpa ǀ śagmám ǀ sadema ǀ viśvā́hā ǀ vayám ǀ su-manasyámānāḥ ǁ

   ratha-vāhanam ǀ haviḥ ǀ asya ǀ nāma ǀ yatra ǀ āyudham ǀ ni-hitam ǀ asya ǀ varma ǀ
   tatra ǀ ratham ǀ upa ǀ śagmam ǀ sadema ǀ viśvāhā ǀ vayam ǀ su-manasyamānāḥ ǁ

   6.75.8 Aṣṭaka 5.1.20.3Anuvāka 6.6.107Interpretations

9. Ṛk 9

   स्वा॒दु॒षं॒सदः॑ पि॒तरो॑ वयो॒धाः कृ॑च्छ्रे॒श्रितः॒ शक्ती॑वंतो गभी॒राः ।
   चि॒त्रसे॑ना॒ इषु॑बला॒ अमृ॑ध्राः स॒तोवी॑रा उ॒रवो॑ व्रातसा॒हाः ॥

   स्वादुषंसदः पितरो वयोधाः कृच्छ्रेश्रितः शक्तीवन्तो गभीराः |
   चित्रसेना इषुबला अमृध्राः सतोवीरा उरवो व्रातसाहाः ||

   svāduṣaṃsádaḥ pitáro vayodhā́ḥ kṛcchreśrítaḥ śáktīvanto gabhīrā́ḥ ǀ
   citrásenā íṣubalā ámṛdhrāḥ satóvīrā urávo vrātasāhā́ḥ ǁ

   svāduṣaṃsadaḥ pitaro vayodhāḥ kṛcchreśritaḥ śaktīvanto gabhīrāḥ |
   citrasenā iṣubalā amṛdhrāḥ satovīrā uravo vrātasāhāḥ ||

   स्वा॒दु॒ऽसं॒सदः॑ । पि॒तरः॑ । व॒यः॒ऽधाः । कृ॒च्छ्रे॒ऽश्रितः॑ । शक्ति॑ऽवन्तः । ग॒भी॒राः ।
   चि॒त्रऽसे॑नाः । इषु॑ऽबलाः । अमृ॑ध्राः । स॒तःऽवी॑राः । उ॒रवः॑ । व्रा॒त॒ऽस॒हाः ॥

   स्वादुऽसंसदः । पितरः । वयःऽधाः । कृच्छ्रेऽश्रितः । शक्तिऽवन्तः । गभीराः ।
   चित्रऽसेनाः । इषुऽबलाः । अमृध्राः । सतःऽवीराः । उरवः । व्रातऽसहाः ॥

   svādu-saṃsádaḥ ǀ pitáraḥ ǀ vayaḥ-dhā́ḥ ǀ kṛcchre-śrítaḥ ǀ śákti-vantaḥ ǀ gabhīrā́ḥ ǀ
   citrá-senāḥ ǀ íṣu-balāḥ ǀ ámṛdhrāḥ ǀ satáḥ-vīrāḥ ǀ urávaḥ ǀ vrāta-sahā́ḥ ǁ

   svādu-saṃsadaḥ ǀ pitaraḥ ǀ vayaḥ-dhāḥ ǀ kṛcchre-śritaḥ ǀ śakti-vantaḥ ǀ gabhīrāḥ ǀ
   citra-senāḥ ǀ iṣu-balāḥ ǀ amṛdhrāḥ ǀ sataḥ-vīrāḥ ǀ uravaḥ ǀ vrāta-sahāḥ ǁ

   6.75.9 Aṣṭaka 5.1.20.4Anuvāka 6.6.108Interpretations

10. Ṛk 10

    ब्राह्म॑णासः॒ पित॑रः॒ सोम्या॑सः शि॒वे नो॒ द्यावा॑पृथि॒वी अ॑ने॒हसा॑ ।
    पू॒षा नः॑ पातु दुरि॒तादृ॑तावृधो॒ रक्षा॒ माकि॑र्नो अ॒घशं॑स ईशत ॥

    ब्राह्मणासः पितरः सोम्यासः शिवे नो द्यावापृथिवी अनेहसा |
    पूषा नः पातु दुरिताद् ऋतावृधो रक्षा माकिर् नो अघशंस ईशत ||

    brā́hmaṇāsaḥ pítaraḥ sómyāsaḥ śivé no dyā́vāpṛthivī́ anehásā ǀ
    pūṣā́ naḥ pātu duritā́dṛtāvṛdho rákṣā mā́kirno agháśaṃsa īśata ǁ

    brāhmaṇāsaḥ pitaraḥ somyāsaḥ śive no dyāvāpṛthivī anehasā |
    pūṣā naḥ pātu duritād ṛtāvṛdho rakṣā mākir no aghaśaṃsa īśata ||

    ब्राह्म॑णासः । पित॑रः । सोम्या॑सः । शि॒वे इति॑ । नः॒ । द्यावा॑पृथि॒वी इति॑ । अ॒ने॒हसा॑ ।
    पू॒षा । नः॒ । पा॒तु॒ । दुः॒ऽइ॒तात् । ऋ॒त॒ऽवृ॒धः॒ । रक्ष॑ । माकिः॑ । नः॒ । अ॒घऽशं॑सः । ई॒श॒त॒ ॥

    ब्राह्मणासः । पितरः । सोम्यासः । शिवे इति । नः । द्यावापृथिवी इति । अनेहसा ।
    पूषा । नः । पातु । दुःऽइतात् । ऋतऽवृधः । रक्ष । माकिः । नः । अघऽशंसः । ईशत ॥

    brā́hmaṇāsaḥ ǀ pítaraḥ ǀ sómyāsaḥ ǀ śivé íti ǀ naḥ ǀ dyā́vāpṛthivī́ íti ǀ anehásā ǀ
    pūṣā́ ǀ naḥ ǀ pātu ǀ duḥ-itā́t ǀ ṛta-vṛdhaḥ ǀ rákṣa ǀ mā́kiḥ ǀ naḥ ǀ aghá-śaṃsaḥ ǀ īśata ǁ

    brāhmaṇāsaḥ ǀ pitaraḥ ǀ somyāsaḥ ǀ śive iti ǀ naḥ ǀ dyāvāpṛthivī iti ǀ anehasā ǀ
    pūṣā ǀ naḥ ǀ pātu ǀ duḥ-itāt ǀ ṛta-vṛdhaḥ ǀ rakṣa ǀ mākiḥ ǀ naḥ ǀ agha-śaṃsaḥ ǀ īśata ǁ

    6.75.10 Aṣṭaka 5.1.20.5Anuvāka 6.6.109Interpretations

11. Ṛk 11

    सु॒प॒र्णं व॑स्ते मृ॒गो अ॑स्या॒ दंतो॒ गोभिः॒ संन॑द्धा पतति॒ प्रसू॑ता ।
    यत्रा॒ नरः॒ सं च॒ वि च॒ द्रवं॑ति॒ तत्रा॒स्मभ्य॒मिष॑वः॒ शर्म॑ यंसन् ॥

    सुपर्णं वस्ते मृगो अस्या दन्तो गोभिः संनद्धा पतति प्रसूता |
    यत्रा नरः सं च वि च द्रवन्ति तत्रास्मभ्यम् इषवः शर्म यंसन् ||

    suparṇám vaste mṛgó asyā dánto góbhiḥ sáṃnaddhā patati prásūtā ǀ
    yátrā náraḥ sám ca ví ca drávanti tátrāsmábhyamíṣavaḥ śárma yaṃsan ǁ

    suparṇaṃ vaste mṛgo asyā danto gobhiḥ saṃnaddhā patati prasūtā |
    yatrā naraḥ saṃ ca vi ca dravanti tatrāsmabhyam iṣavaḥ śarma yaṃsan ||

    सु॒ऽप॒र्णम् । व॒स्ते॒ । मृ॒गः । अ॒स्याः॒ । दन्तः॑ । गोभिः॑ । सम्ऽन॑द्धा । प॒त॒ति॒ । प्रऽसू॑ता ।
    यत्र॑ । नरः॑ । सम् । च॒ । वि । च॒ । द्रव॑न्ति । तत्र॑ । अ॒स्मभ्य॑म् । इष॑वः । शर्म॑ । यं॒स॒न् ॥

    सुऽपर्णम् । वस्ते । मृगः । अस्याः । दन्तः । गोभिः । सम्ऽनद्धा । पतति । प्रऽसूता ।
    यत्र । नरः । सम् । च । वि । च । द्रवन्ति । तत्र । अस्मभ्यम् । इषवः । शर्म । यंसन् ॥

    su-parṇám ǀ vaste ǀ mṛgáḥ ǀ asyāḥ ǀ dántaḥ ǀ góbhiḥ ǀ sám-naddhā ǀ patati ǀ prá-sūtā ǀ
    yátra ǀ náraḥ ǀ sám ǀ ca ǀ ví ǀ ca ǀ drávanti ǀ tátra ǀ asmábhyam ǀ íṣavaḥ ǀ śárma ǀ yaṃsan ǁ

    su-parṇam ǀ vaste ǀ mṛgaḥ ǀ asyāḥ ǀ dantaḥ ǀ gobhiḥ ǀ sam-naddhā ǀ patati ǀ pra-sūtā ǀ
    yatra ǀ naraḥ ǀ sam ǀ ca ǀ vi ǀ ca ǀ dravanti ǀ tatra ǀ asmabhyam ǀ iṣavaḥ ǀ śarma ǀ yaṃsan ǁ

    6.75.11 Aṣṭaka 5.1.21.1Anuvāka 6.6.110Interpretations

12. Ṛk 12

    ऋजी॑ते॒ परि॑ वृङ्धि॒ नोऽश्मा॑ भवतु नस्त॒नूः ।
    सोमो॒ अधि॑ ब्रवीतु॒ नोऽदि॑तिः॒ शर्म॑ यच्छतु ॥

    ऋजीते परि वृङ्धि नो ऽश्मा भवतु नस् तनूः |
    सोमो अधि ब्रवीतु नो ऽदितिः शर्म यच्छतु ||

    ṛ́jīte pári vṛṅdhi nó’śmā bhavatu nastanū́ḥ ǀ
    sómo ádhi bravītu nó’ditiḥ śárma yacchatu ǁ

    ṛjīte pari vṛṅdhi no 'śmā bhavatu nas tanūḥ |
    somo adhi bravītu no 'ditiḥ śarma yacchatu ||

    ऋजी॑ते । परि॑ । वृ॒ङ्धि॒ । नः॒ । अश्मा॑ । भ॒व॒तु॒ । नः॒ । त॒नूः ।
    सोमः॑ । अधि॑ । ब्र॒वी॒तु॒ । नः॒ । अदि॑तिः । शर्म॑ । य॒च्छ॒तु॒ ॥

    ऋजीते । परि । वृङ्धि । नः । अश्मा । भवतु । नः । तनूः ।
    सोमः । अधि । ब्रवीतु । नः । अदितिः । शर्म । यच्छतु ॥

    ṛ́jīte ǀ pári ǀ vṛṅdhi ǀ naḥ ǀ áśmā ǀ bhavatu ǀ naḥ ǀ tanū́ḥ ǀ
    sómaḥ ǀ ádhi ǀ bravītu ǀ naḥ ǀ áditiḥ ǀ śárma ǀ yacchatu ǁ

    ṛjīte ǀ pari ǀ vṛṅdhi ǀ naḥ ǀ aśmā ǀ bhavatu ǀ naḥ ǀ tanūḥ ǀ
    somaḥ ǀ adhi ǀ bravītu ǀ naḥ ǀ aditiḥ ǀ śarma ǀ yacchatu ǁ

    6.75.12 Aṣṭaka 5.1.21.2Anuvāka 6.6.111Interpretations

13. Ṛk 13

    आ जं॑घंति॒ सान्वे॑षां ज॒घनाँ॒ उप॑ जिघ्नते ।
    अश्वा॑जनि॒ प्रचे॑त॒सोऽश्वा॑न्त्स॒मत्सु॑ चोदय ॥

    आ जङ्घन्ति सान्व् एषां जघनां उप जिघ्नते |
    अश्वाजनि प्रचेतसो ऽश्वान् समत्सु चोदय ||

    ā́ jaṅghanti sā́nveṣām jaghánām̐ úpa jighnate ǀ
    áśvājani prácetasó’śvāntsamátsu codaya ǁ

    ā jaṅghanti sānv eṣāṃ jaghanāṃ upa jighnate |
    aśvājani pracetaso 'śvān samatsu codaya ||

    आ । ज॒ङ्घ॒न्ति॒ । सानु॑ । ए॒षा॒म् । ज॒घना॑न् । उप॑ । जि॒घ्न॒ते॒ ।
    अश्व॑ऽअजनि । प्रऽचे॑तसः । अश्वा॑न् । स॒मत्ऽसु॑ । चो॒द॒य॒ ॥

    आ । जङ्घन्ति । सानु । एषाम् । जघनान् । उप । जिघ्नते ।
    अश्वऽअजनि । प्रऽचेतसः । अश्वान् । समत्ऽसु । चोदय ॥

    ā́ ǀ jaṅghanti ǀ sā́nu ǀ eṣām ǀ jaghánān ǀ úpa ǀ jighnate ǀ
    áśva-ajani ǀ prá-cetasaḥ ǀ áśvān ǀ samát-su ǀ codaya ǁ

    ā ǀ jaṅghanti ǀ sānu ǀ eṣām ǀ jaghanān ǀ upa ǀ jighnate ǀ
    aśva-ajani ǀ pra-cetasaḥ ǀ aśvān ǀ samat-su ǀ codaya ǁ

    6.75.13 Aṣṭaka 5.1.21.3Anuvāka 6.6.112Interpretations

14. Ṛk 14

    अहि॑रिव भो॒गैः पर्ये॑ति बा॒हुं ज्याया॑ हे॒तिं प॑रि॒बाध॑मानः ।
    ह॒स्त॒घ्नो विश्वा॑ व॒युना॑नि वि॒द्वान्पुमा॒न्पुमां॑सं॒ परि॑ पातु वि॒श्वतः॑ ॥

    अहिर् इव भोगैः पर्य् एति बाहुं ज्याया हेतिम् परिबाधमानः |
    हस्तघ्नो विश्वा वयुनानि विद्वान् पुमान् पुमांसम् परि पातु विश्वतः ||

    áhiriva bhogáiḥ páryeti bāhúm jyā́yā hetím paribā́dhamānaḥ ǀ
    hastaghnó víśvā vayúnāni vidvā́npúmānpúmāṃsam pári pātu viśvátaḥ ǁ

    ahir iva bhogaiḥ pary eti bāhuṃ jyāyā hetim paribādhamānaḥ |
    hastaghno viśvā vayunāni vidvān pumān pumāṃsam pari pātu viśvataḥ ||

    अहिः॑ऽइव । भो॒गैः । परि॑ । ए॒ति॒ । बा॒हुम् । ज्यायाः॑ । हे॒तिम् । प॒रि॒ऽबाध॑मानः ।
    ह॒स्त॒ऽघ्नः । विश्वा॑ । व॒युना॑नि । वि॒द्वान् । पुमा॑न् । पुमां॑सम् । परि॑ । पा॒तु॒ । वि॒श्वतः॑ ॥

    अहिःऽइव । भोगैः । परि । एति । बाहुम् । ज्यायाः । हेतिम् । परिऽबाधमानः ।
    हस्तऽघ्नः । विश्वा । वयुनानि । विद्वान् । पुमान् । पुमांसम् । परि । पातु । विश्वतः ॥

    áhiḥ-iva ǀ bhogáiḥ ǀ pári ǀ eti ǀ bāhúm ǀ jyā́yāḥ ǀ hetím ǀ pari-bā́dhamānaḥ ǀ
    hasta-ghnáḥ ǀ víśvā ǀ vayúnāni ǀ vidvā́n ǀ púmān ǀ púmāṃsam ǀ pári ǀ pātu ǀ viśvátaḥ ǁ

    ahiḥ-iva ǀ bhogaiḥ ǀ pari ǀ eti ǀ bāhum ǀ jyāyāḥ ǀ hetim ǀ pari-bādhamānaḥ ǀ
    hasta-ghnaḥ ǀ viśvā ǀ vayunāni ǀ vidvān ǀ pumān ǀ pumāṃsam ǀ pari ǀ pātu ǀ viśvataḥ ǁ

    6.75.14 Aṣṭaka 5.1.21.4Anuvāka 6.6.113Interpretations

15. Ṛk 15

    आला॑क्ता॒ या रुरु॑शी॒र्ष्ण्यथो॒ यस्या॒ अयो॒ मुखं॑ ।
    इ॒दं प॒र्जन्य॑रेतस॒ इष्वै॑ दे॒व्यै बृ॒हन्नमः॑ ॥

    आलाक्ता या रुरुशीर्ष्ण्य् अथो यस्या अयो मुखम् |
    इदम् पर्जन्यरेतस इष्वै देव्यै बृहन् नमः ||

    ā́lāktā yā́ rúruśīrṣṇyátho yásyā áyo múkham ǀ
    idám parjányaretasa íṣvai devyái bṛhánnámaḥ ǁ

    ālāktā yā ruruśīrṣṇy atho yasyā ayo mukham |
    idam parjanyaretasa iṣvai devyai bṛhan namaḥ ||

    आल॑ऽअक्ता । या । रुरु॑ऽशीर्ष्णी । अथो॒ इति॑ । यस्याः॑ । अयः॑ । मुख॑म् ।
    इ॒दम् । प॒र्जन्य॑ऽरेतसे । इष्वै॑ । दे॒व्यै । बृ॒हत् । नमः॑ ॥

    आलऽअक्ता । या । रुरुऽशीर्ष्णी । अथो इति । यस्याः । अयः । मुखम् ।
    इदम् । पर्जन्यऽरेतसे । इष्वै । देव्यै । बृहत् । नमः ॥

    ā́la-aktā ǀ yā́ ǀ rúru-śīrṣṇī ǀ átho íti ǀ yásyāḥ ǀ áyaḥ ǀ múkham ǀ
    idám ǀ parjánya-retase ǀ íṣvai ǀ devyái ǀ bṛhát ǀ námaḥ ǁ

    āla-aktā ǀ yā ǀ ruru-śīrṣṇī ǀ atho iti ǀ yasyāḥ ǀ ayaḥ ǀ mukham ǀ
    idam ǀ parjanya-retase ǀ iṣvai ǀ devyai ǀ bṛhat ǀ namaḥ ǁ

    6.75.15 Aṣṭaka 5.1.21.5Anuvāka 6.6.114Interpretations

16. Ṛk 16

    अव॑सृष्टा॒ परा॑ पत॒ शर॑व्ये॒ ब्रह्म॑संशिते ।
    गच्छा॒मित्रा॒न्प्र प॑द्यस्व॒ मामीषां॒ कं च॒नोच्छि॑षः ॥

    अवसृष्टा परा पत शरव्ये ब्रह्मसंशिते |
    गच्छामित्रान् प्र पद्यस्व मामीषां कं चनोच् छिषः ||

    ávasṛṣṭā párā pata śáravye bráhmasaṃśite ǀ
    gácchāmítrānprá padyasva mā́mī́ṣām kám canócchiṣaḥ ǁ

    avasṛṣṭā parā pata śaravye brahmasaṃśite |
    gacchāmitrān pra padyasva māmīṣāṃ kaṃ canoc chiṣaḥ ||

    अव॑ऽसृष्टा । परा॑ । प॒त॒ । शर॑व्ये । ब्रह्म॑ऽसंशिते ।
    गच्छ॑ । अ॒मित्रा॑न् । प्र । प॒द्य॒स्व॒ । मा । अ॒मीषा॑म् । कम् । च॒न । उत् । शि॒षः॒ ॥

    अवऽसृष्टा । परा । पत । शरव्ये । ब्रह्मऽसंशिते ।
    गच्छ । अमित्रान् । प्र । पद्यस्व । मा । अमीषाम् । कम् । चन । उत् । शिषः ॥

    áva-sṛṣṭā ǀ párā ǀ pata ǀ śáravye ǀ bráhma-saṃśite ǀ
    gáccha ǀ amítrān ǀ prá ǀ padyasva ǀ mā́ ǀ amī́ṣām ǀ kám ǀ caná ǀ út ǀ śiṣaḥ ǁ

    ava-sṛṣṭā ǀ parā ǀ pata ǀ śaravye ǀ brahma-saṃśite ǀ
    gaccha ǀ amitrān ǀ pra ǀ padyasva ǀ mā ǀ amīṣām ǀ kam ǀ cana ǀ ut ǀ śiṣaḥ ǁ

    6.75.16 Aṣṭaka 5.1.22.1Anuvāka 6.6.115Interpretations

17. Ṛk 17

    यत्र॑ बा॒णाः सं॒पतं॑ति कुमा॒रा वि॑शि॒खा इ॑व ।
    तत्रा॑ नो॒ ब्रह्म॑ण॒स्पति॒रदि॑तिः॒ शर्म॑ यच्छतु वि॒श्वाहा॒ शर्म॑ यच्छतु ॥

    यत्र बाणाः सम्पतन्ति कुमारा विशिखा इव |
    तत्रा नो ब्रह्मणस् पतिर् अदितिः शर्म यच्छतु विश्वाहा शर्म यच्छतु ||

    yátra bāṇā́ḥ sampátanti kumārā́ viśikhā́ iva ǀ
    tátrā no bráhmaṇaspátiráditiḥ śárma yacchatu viśvā́hā śárma yacchatu ǁ

    yatra bāṇāḥ sampatanti kumārā viśikhā iva |
    tatrā no brahmaṇas patir aditiḥ śarma yacchatu viśvāhā śarma yacchatu ||

    यत्र॑ । बा॒णाः । स॒म्ऽपत॑न्ति । कु॒मा॒राः । वि॒शि॒खाःऽइ॑व ।
    तत्र॑ । नः॒ । ब्रह्म॑णः । पतिः॑ । अदि॑तिः । शर्म॑ । य॒च्छ॒तु॒ । वि॒श्वाहा॑ । शर्म॑ । य॒च्छ॒तु॒ ॥

    यत्र । बाणाः । सम्ऽपतन्ति । कुमाराः । विशिखाःऽइव ।
    तत्र । नः । ब्रह्मणः । पतिः । अदितिः । शर्म । यच्छतु । विश्वाहा । शर्म । यच्छतु ॥

    yátra ǀ bāṇā́ḥ ǀ sam-pátanti ǀ kumārā́ḥ ǀ viśikhā́ḥ-iva ǀ
    tátra ǀ naḥ ǀ bráhmaṇaḥ ǀ pátiḥ ǀ áditiḥ ǀ śárma ǀ yacchatu ǀ viśvā́hā ǀ śárma ǀ yacchatu ǁ

    yatra ǀ bāṇāḥ ǀ sam-patanti ǀ kumārāḥ ǀ viśikhāḥ-iva ǀ
    tatra ǀ naḥ ǀ brahmaṇaḥ ǀ patiḥ ǀ aditiḥ ǀ śarma ǀ yacchatu ǀ viśvāhā ǀ śarma ǀ yacchatu ǁ

    6.75.17 Aṣṭaka 5.1.22.2Anuvāka 6.6.116Interpretations

18. Ṛk 18

    मर्मा॑णि ते॒ वर्म॑णा छादयामि॒ सोम॑स्त्वा॒ राजा॒मृते॒नानु॑ वस्तां ।
    उ॒रोर्वरी॑यो॒ वरु॑णस्ते कृणोतु॒ जयं॑तं॒ त्वानु॑ दे॒वा म॑दंतु ॥

    मर्माणि ते वर्मणा छादयामि सोमस् त्वा राजामृतेनानु वस्ताम् |
    उरोर् वरीयो वरुणस् ते कृणोतु जयन्तं त्वानु देवा मदन्तु ||

    mármāṇi te vármaṇā chādayāmi sómastvā rā́jāmṛ́tenā́nu vastām ǀ
    urórvárīyo váruṇaste kṛṇotu jáyantam tvā́nu devā́ madantu ǁ

    marmāṇi te varmaṇā chādayāmi somas tvā rājāmṛtenānu vastām |
    uror varīyo varuṇas te kṛṇotu jayantaṃ tvānu devā madantu ||

    मर्मा॑णि । ते॒ । वर्म॑णा । छा॒द॒या॒मि॒ । सोमः॑ । त्वा॒ । राजा॑ । अ॒मृते॑न । अनु॑ । व॒स्ता॒म् ।
    उ॒रोः । वरी॑यः । वरु॑णः । ते॒ । कृ॒णो॒तु॒ । जय॑न्तम् । त्वा॒ । अनु॑ । दे॒वाः । म॒द॒न्तु॒ ॥

    मर्माणि । ते । वर्मणा । छादयामि । सोमः । त्वा । राजा । अमृतेन । अनु । वस्ताम् ।
    उरोः । वरीयः । वरुणः । ते । कृणोतु । जयन्तम् । त्वा । अनु । देवाः । मदन्तु ॥

    mármāṇi ǀ te ǀ vármaṇā ǀ chādayāmi ǀ sómaḥ ǀ tvā ǀ rā́jā ǀ amṛ́tena ǀ ánu ǀ vastām ǀ
    uróḥ ǀ várīyaḥ ǀ váruṇaḥ ǀ te ǀ kṛṇotu ǀ jáyantam ǀ tvā ǀ ánu ǀ devā́ḥ ǀ madantu ǁ

    marmāṇi ǀ te ǀ varmaṇā ǀ chādayāmi ǀ somaḥ ǀ tvā ǀ rājā ǀ amṛtena ǀ anu ǀ vastām ǀ
    uroḥ ǀ varīyaḥ ǀ varuṇaḥ ǀ te ǀ kṛṇotu ǀ jayantam ǀ tvā ǀ anu ǀ devāḥ ǀ madantu ǁ

    6.75.18 Aṣṭaka 5.1.22.3Anuvāka 6.6.117Interpretations

19. Ṛk 19

    यो नः॒ स्वो अर॑णो॒ यश्च॒ निष्ट्यो॒ जिघां॑सति ।
    दे॒वास्तं सर्वे॑ धूर्वंतु॒ ब्रह्म॒ वर्म॒ ममांत॑रं ॥

    यो नः स्वो अरणो यश् च निष्ट्यो जिघांसति |
    देवास् तं सर्वे धूर्वन्तु ब्रह्म वर्म ममान्तरम् ||

    yó naḥ svó áraṇo yáśca níṣṭyo jíghāṃsati ǀ
    devā́stám sárve dhūrvantu bráhma várma mámā́ntaram ǁ

    yo naḥ svo araṇo yaś ca niṣṭyo jighāṃsati |
    devās taṃ sarve dhūrvantu brahma varma mamāntaram ||

    यः । नः॒ । स्वः । अर॑णः । यः । च॒ । निष्ट्यः॑ । जिघां॑सति ।
    दे॒वाः । तम् । सर्वे॑ । धू॒र्व॒न्तु॒ । ब्रह्म॑ । वर्म॑ । मम॑ । अन्त॑रम् ॥

    यः । नः । स्वः । अरणः । यः । च । निष्ट्यः । जिघांसति ।
    देवाः । तम् । सर्वे । धूर्वन्तु । ब्रह्म । वर्म । मम । अन्तरम् ॥

    yáḥ ǀ naḥ ǀ sváḥ ǀ áraṇaḥ ǀ yáḥ ǀ ca ǀ níṣṭyaḥ ǀ jíghāṃsati ǀ
    devā́ḥ ǀ tám ǀ sárve ǀ dhūrvantu ǀ bráhma ǀ várma ǀ máma ǀ ántaram ǁ

    yaḥ ǀ naḥ ǀ svaḥ ǀ araṇaḥ ǀ yaḥ ǀ ca ǀ niṣṭyaḥ ǀ jighāṃsati ǀ
    devāḥ ǀ tam ǀ sarve ǀ dhūrvantu ǀ brahma ǀ varma ǀ mama ǀ antaram ǁ

    6.75.19 Aṣṭaka 5.1.22.4Anuvāka 6.6.118Interpretations

Text, recitation and interpretations from the Ṛgveda database of theveda.org.in.