Devatā देवता

1-5: Soma; 6-19, 21: Indra; 20: Devās (A); Pṛthivī (B); Bṛhaspati(C); Indra (D); 22-25: Prastoka Sārñjaya’s Dānastuti; 26-28: Ratha; 29, 30: Dundubha; 31: Dundubha (A); Indra (B)

Ṛṣi ऋषि

Garga Bhāradvāja

Chandas छन्दस्

Triṣṭubh, Bṛhatī, Anuṣṭubh, Gāyatrī, Dvipadā, Jagatī

1. Ṛk 1

   स्वा॒दुष्किला॒यं मधु॑माँ उ॒तायं ती॒व्रः किला॒यं रस॑वाँ उ॒तायं ।
   उ॒तो न्व१॒॑स्य प॑पि॒वांस॒मिंद्रं॒ न कश्च॒न स॑हत आह॒वेषु॑ ॥

   स्वादुष् किलायम् मधुमां उतायं तीव्रः किलायं रसवां उतायम् |
   उतो न्व् अस्य पपिवांसम् इन्द्रं न कश् चन सहत आहवेषु ||

   svādúṣkílāyám mádhumām̐ utā́yám tīvráḥ kílāyám rásavām̐ utā́yám ǀ
   utó nvásyá papivā́ṃsamíndram ná káścaná sahata āhavéṣu ǁ

   svāduṣ kilāyam madhumāṃ utāyaṃ tīvraḥ kilāyaṃ rasavāṃ utāyam |
   uto nv asya papivāṃsam indraṃ na kaś cana sahata āhaveṣu ||

   स्वा॒दुः । किल॑ । अ॒यम् । मधु॑ऽमान् । उ॒त । अ॒यम् । ती॒व्रः । किल॑ । अ॒यम् । रस॑ऽवान् । उ॒त । अ॒यम् ।
   उ॒तो इति॑ । नु । अ॒स्य । प॒पि॒ऽवांस॑म् । इन्द्र॑म् । न । कः । च॒न । स॒ह॒ते॒ । आ॒ऽह॒वेषु॑ ॥

   स्वादुः । किल । अयम् । मधुऽमान् । उत । अयम् । तीव्रः । किल । अयम् । रसऽवान् । उत । अयम् ।
   उतो इति । नु । अस्य । पपिऽवांसम् । इन्द्रम् । न । कः । चन । सहते । आऽहवेषु ॥

   svādúḥ ǀ kíla ǀ ayám ǀ mádhu-mān ǀ utá ǀ ayám ǀ tīvráḥ ǀ kíla ǀ ayám ǀ rása-vān ǀ utá ǀ ayám ǀ
   utó íti ǀ nú ǀ asyá ǀ papi-vā́ṃsam ǀ índram ǀ ná ǀ káḥ ǀ caná ǀ sahate ǀ ā-havéṣu ǁ

   svāduḥ ǀ kila ǀ ayam ǀ madhu-mān ǀ uta ǀ ayam ǀ tīvraḥ ǀ kila ǀ ayam ǀ rasa-vān ǀ uta ǀ ayam ǀ
   uto iti ǀ nu ǀ asya ǀ papi-vāṃsam ǀ indram ǀ na ǀ kaḥ ǀ cana ǀ sahate ǀ ā-haveṣu ǁ

   6.47.1 Aṣṭaka 4.7.30.1Anuvāka 6.4.72Interpretations

2. Ṛk 2

   अ॒यं स्वा॒दुरि॒ह मदि॑ष्ठ आस॒ यस्येंद्रो॑ वृत्र॒हत्ये॑ म॒माद॑ ।
   पु॒रूणि॒ यश्च्यौ॒त्ना शंब॑रस्य॒ वि न॑व॒तिं नव॑ च दे॒ह्यो॒३॒॑ हन् ॥

   अयं स्वादुर् इह मदिष्ठ आस यस्येन्द्रो वृत्रहत्ये ममाद |
   पुरूणि यश् च्यौत्ना शम्बरस्य वि नवतिं नव च देह्यो हन् ||

   ayám svādúrihá mádiṣṭha āsa yásyéndro vṛtrahátye mamā́da ǀ
   purū́ṇi yáścyautnā́ śámbarasya ví navatím náva ca dehyó hán ǁ

   ayaṃ svādur iha madiṣṭha āsa yasyendro vṛtrahatye mamāda |
   purūṇi yaś cyautnā śambarasya vi navatiṃ nava ca dehyo han ||

   अ॒यम् । स्वा॒दुः । इ॒ह । मदि॑ष्ठः । आ॒स॒ । यस्य॑ । इन्द्रः॑ । वृ॒त्र॒ऽहत्ये॑ । म॒माद॑ ।
   पु॒रूणि॑ । यः । च्यौ॒त्ना । शम्ब॑रस्य । वि । न॒व॒तिम् । नव॑ । च॒ । दे॒ह्यः॑ । हन् ॥

   अयम् । स्वादुः । इह । मदिष्ठः । आस । यस्य । इन्द्रः । वृत्रऽहत्ये । ममाद ।
   पुरूणि । यः । च्यौत्ना । शम्बरस्य । वि । नवतिम् । नव । च । देह्यः । हन् ॥

   ayám ǀ svādúḥ ǀ ihá ǀ mádiṣṭhaḥ ǀ āsa ǀ yásya ǀ índraḥ ǀ vṛtra-hátye ǀ mamā́da ǀ
   purū́ṇi ǀ yáḥ ǀ cyautnā́ ǀ śámbarasya ǀ ví ǀ navatím ǀ náva ǀ ca ǀ dehyáḥ ǀ hán ǁ

   ayam ǀ svāduḥ ǀ iha ǀ madiṣṭhaḥ ǀ āsa ǀ yasya ǀ indraḥ ǀ vṛtra-hatye ǀ mamāda ǀ
   purūṇi ǀ yaḥ ǀ cyautnā ǀ śambarasya ǀ vi ǀ navatim ǀ nava ǀ ca ǀ dehyaḥ ǀ han ǁ

   6.47.2 Aṣṭaka 4.7.30.2Anuvāka 6.4.73Interpretations

3. Ṛk 3

   अ॒यं मे॑ पी॒त उदि॑यर्ति॒ वाच॑म॒यं म॑नी॒षामु॑श॒तीम॑जीगः ।
   अ॒यं षळु॒र्वीर॑मिमीत॒ धीरो॒ न याभ्यो॒ भुव॑नं॒ कच्च॒नारे ॥

   अयम् मे पीत उद् इयर्ति वाचम् अयम् मनीषाम् उशतीम् अजीगः |
   अयं षऌ उर्वीर् अमिमीत धीरो न याभ्यो भुवनं कच् चनारे ||

   ayám me pītá údiyarti vā́camayám manīṣā́muśatī́majīgaḥ ǀ
   ayám ṣáḷurvī́ramimīta dhī́ro ná yā́bhyo bhúvanam káccanā́ré ǁ

   ayam me pīta ud iyarti vācam ayam manīṣām uśatīm ajīgaḥ |
   ayaṃ ṣaḷ urvīr amimīta dhīro na yābhyo bhuvanaṃ kac canāre ||

   अ॒यम् । मे॒ । पी॒तः । उत् । इ॒य॒र्ति॒ । वाच॑म् । अ॒यम् । म॒नी॒षाम् । उ॒श॒तीम् । अ॒जी॒ग॒रिति॑ ।
   अ॒यम् । षट् । उ॒र्वीः । अ॒मि॒मी॒त॒ । धीरः॑ । न । याभ्यः॑ । भुव॑नम् । कत् । च॒न । आ॒रे ॥

   अयम् । मे । पीतः । उत् । इयर्ति । वाचम् । अयम् । मनीषाम् । उशतीम् । अजीगरिति ।
   अयम् । षट् । उर्वीः । अमिमीत । धीरः । न । याभ्यः । भुवनम् । कत् । चन । आरे ॥

   ayám ǀ me ǀ pītáḥ ǀ út ǀ iyarti ǀ vā́cam ǀ ayám ǀ manīṣā́m ǀ uśatī́m ǀ ajīgaríti ǀ
   ayám ǀ ṣáṭ ǀ urvī́ḥ ǀ amimīta ǀ dhī́raḥ ǀ ná ǀ yā́bhyaḥ ǀ bhúvanam ǀ kát ǀ caná ǀ āré ǁ

   ayam ǀ me ǀ pītaḥ ǀ ut ǀ iyarti ǀ vācam ǀ ayam ǀ manīṣām ǀ uśatīm ǀ ajīgariti ǀ
   ayam ǀ ṣaṭ ǀ urvīḥ ǀ amimīta ǀ dhīraḥ ǀ na ǀ yābhyaḥ ǀ bhuvanam ǀ kat ǀ cana ǀ āre ǁ

   6.47.3 Aṣṭaka 4.7.30.3Anuvāka 6.4.74Interpretations

4. Ṛk 4

   अ॒यं स यो व॑रि॒माणं॑ पृथि॒व्या व॒र्ष्माणं॑ दि॒वो अकृ॑णोद॒यं सः ।
   अ॒यं पी॒यूषं॑ ति॒सृषु॑ प्र॒वत्सु॒ सोमो॑ दाधारो॒र्वं१॒॑तरि॑क्षं ॥

   अयं स यो वरिमाणम् पृथिव्या वर्ष्माणं दिवो अकृणोद् अयं सः |
   अयम् पीयूषं तिसृषु प्रवत्सु सोमो दाधारोर्व् अन्तरिक्षम् ||

   ayám sá yó varimā́ṇam pṛthivyā́ varṣmā́ṇam divó ákṛṇodayám sáḥ ǀ
   ayám pīyū́ṣam tisṛ́ṣu pravátsu sómo dādhārorvántárikṣam ǁ

   ayaṃ sa yo varimāṇam pṛthivyā varṣmāṇaṃ divo akṛṇod ayaṃ saḥ |
   ayam pīyūṣaṃ tisṛṣu pravatsu somo dādhārorv antarikṣam ||

   अ॒यम् । सः । यः । व॒रि॒माण॑म् । पृ॒थि॒व्याः । व॒र्ष्माण॑म् । दि॒वः । अकृ॑णोत् । अ॒यम् । सः ।
   अ॒यम् । पी॒यूष॑म् । ति॒सृषु॑ । प्र॒वत्ऽसु॑ । सोमः॑ । दा॒धा॒र॒ । उ॒रु । अ॒न्तरि॑क्षम् ॥

   अयम् । सः । यः । वरिमाणम् । पृथिव्याः । वर्ष्माणम् । दिवः । अकृणोत् । अयम् । सः ।
   अयम् । पीयूषम् । तिसृषु । प्रवत्ऽसु । सोमः । दाधार । उरु । अन्तरिक्षम् ॥

   ayám ǀ sáḥ ǀ yáḥ ǀ varimā́ṇam ǀ pṛthivyā́ḥ ǀ varṣmā́ṇam ǀ diváḥ ǀ ákṛṇot ǀ ayám ǀ sáḥ ǀ
   ayám ǀ pīyū́ṣam ǀ tisṛ́ṣu ǀ pravát-su ǀ sómaḥ ǀ dādhāra ǀ urú ǀ antárikṣam ǁ

   ayam ǀ saḥ ǀ yaḥ ǀ varimāṇam ǀ pṛthivyāḥ ǀ varṣmāṇam ǀ divaḥ ǀ akṛṇot ǀ ayam ǀ saḥ ǀ
   ayam ǀ pīyūṣam ǀ tisṛṣu ǀ pravat-su ǀ somaḥ ǀ dādhāra ǀ uru ǀ antarikṣam ǁ

   6.47.4 Aṣṭaka 4.7.30.4Anuvāka 6.4.75Interpretations

5. Ṛk 5

   अ॒यं वि॑दच्चित्र॒दृशी॑क॒मर्णः॑ शु॒क्रस॑द्मनामु॒षसा॒मनी॑के ।
   अ॒यं म॒हान्म॑ह॒ता स्कंभ॑ने॒नोद्द्याम॑स्तभ्नाद्वृष॒भो म॒रुत्वा॑न् ॥

   अयं विदच् चित्रदृशीकम् अर्णः शुक्रसद्मनाम् उषसाम् अनीके |
   अयम् महान् महता स्कम्भनेनोद् द्याम् अस्तभ्नाद् वृषभो मरुत्वान् ||

   ayám vidaccitradṛ́śīkamárṇaḥ śukrásadmanāmuṣásāmánīke ǀ
   ayám mahā́nmahatā́ skámbhanenóddyā́mastabhnādvṛṣabhó marútvān ǁ

   ayaṃ vidac citradṛśīkam arṇaḥ śukrasadmanām uṣasām anīke |
   ayam mahān mahatā skambhanenod dyām astabhnād vṛṣabho marutvān ||

   अ॒यम् । वि॒द॒त् । चि॒त्र॒ऽदृशी॑कम् । अर्णः॑ । शु॒क्रऽस॑द्मनाम् । उ॒षसा॑म् । अनी॑के ।
   अ॒यम् । म॒हान् । म॒ह॒ता । स्कम्भ॑नेन । उत् । द्याम् । अ॒स्त॒भ्ना॒त् । वृ॒ष॒भः । म॒रुत्वा॑न् ॥

   अयम् । विदत् । चित्रऽदृशीकम् । अर्णः । शुक्रऽसद्मनाम् । उषसाम् । अनीके ।
   अयम् । महान् । महता । स्कम्भनेन । उत् । द्याम् । अस्तभ्नात् । वृषभः । मरुत्वान् ॥

   ayám ǀ vidat ǀ citra-dṛ́śīkam ǀ árṇaḥ ǀ śukrá-sadmanām ǀ uṣásām ǀ ánīke ǀ
   ayám ǀ mahā́n ǀ mahatā́ ǀ skámbhanena ǀ út ǀ dyā́m ǀ astabhnāt ǀ vṛṣabháḥ ǀ marútvān ǁ

   ayam ǀ vidat ǀ citra-dṛśīkam ǀ arṇaḥ ǀ śukra-sadmanām ǀ uṣasām ǀ anīke ǀ
   ayam ǀ mahān ǀ mahatā ǀ skambhanena ǀ ut ǀ dyām ǀ astabhnāt ǀ vṛṣabhaḥ ǀ marutvān ǁ

   6.47.5 Aṣṭaka 4.7.30.5Anuvāka 6.4.76Interpretations

6. Ṛk 6

   धृ॒षत्पि॑ब क॒लशे॒ सोम॑मिंद्र वृत्र॒हा शू॑र सम॒रे वसू॑नां ।
   माध्यं॑दिने॒ सव॑न॒ आ वृ॑षस्व रयि॒स्थानो॑ र॒यिम॒स्मासु॑ धेहि ॥

   धृषत् पिब कलशे सोमम् इन्द्र वृत्रहा शूर समरे वसूनाम् |
   माध्यन्दिने सवन आ वृषस्व रयिस्थानो रयिम् अस्मासु धेहि ||

   dhṛṣátpiba kaláśe sómamindra vṛtrahā́ śūra samaré vásūnām ǀ
   mā́dhyaṃdine sávana ā́ vṛṣasva rayisthā́no rayímasmā́su dhehi ǁ

   dhṛṣat piba kalaśe somam indra vṛtrahā śūra samare vasūnām |
   mādhyandine savana ā vṛṣasva rayisthāno rayim asmāsu dhehi ||

   धृ॒षत् । पि॒ब॒ । क॒लशे॑ । सोम॑म् । इ॒न्द्र॒ । वृ॒त्र॒ऽहा । शू॒र॒ । स॒म्ऽअ॒रे । वसू॑नाम् ।
   माध्य॑न्दिने । सव॑ने । आ । वृ॒ष॒स्व॒ । र॒यि॒ऽस्थानः॑ । र॒यिम् । अ॒स्मासु॑ । धे॒हि॒ ॥

   धृषत् । पिब । कलशे । सोमम् । इन्द्र । वृत्रऽहा । शूर । सम्ऽअरे । वसूनाम् ।
   माध्यन्दिने । सवने । आ । वृषस्व । रयिऽस्थानः । रयिम् । अस्मासु । धेहि ॥

   dhṛṣát ǀ piba ǀ kaláśe ǀ sómam ǀ indra ǀ vṛtra-hā́ ǀ śūra ǀ sam-aré ǀ vásūnām ǀ
   mā́dhyandine ǀ sávane ǀ ā́ ǀ vṛṣasva ǀ rayi-sthā́naḥ ǀ rayím ǀ asmā́su ǀ dhehi ǁ

   dhṛṣat ǀ piba ǀ kalaśe ǀ somam ǀ indra ǀ vṛtra-hā ǀ śūra ǀ sam-are ǀ vasūnām ǀ
   mādhyandine ǀ savane ǀ ā ǀ vṛṣasva ǀ rayi-sthānaḥ ǀ rayim ǀ asmāsu ǀ dhehi ǁ

   6.47.6 Aṣṭaka 4.7.31.1Anuvāka 6.4.77Interpretations

7. Ṛk 7

   इंद्र॒ प्र णः॑ पुरए॒तेव॑ पश्य॒ प्र नो॑ नय प्रत॒रं वस्यो॒ अच्छ॑ ।
   भवा॑ सुपा॒रो अ॑तिपार॒यो नो॒ भवा॒ सुनी॑तिरु॒त वा॒मनी॑तिः ॥

   इन्द्र प्र णः पुरएतेव पश्य प्र नो नय प्रतरं वस्यो अच्छ |
   भवा सुपारो अतिपारयो नो भवा सुनीतिर् उत वामनीतिः ||

   índra prá ṇaḥ puraetéva paśya prá no naya pratarám vásyo áccha ǀ
   bhávā supāró atipārayó no bhávā súnītirutá vāmánītiḥ ǁ

   indra pra ṇaḥ puraeteva paśya pra no naya prataraṃ vasyo accha |
   bhavā supāro atipārayo no bhavā sunītir uta vāmanītiḥ ||

   इन्द्र॑ । प्र । नः॒ । पु॒र॒ए॒ताऽइ॑व । पश्य॑ । प्र । नः॒ । न॒य॒ । प्र॒ऽत॒रम् । वस्यः॑ । अच्छ॑ ।
   भव॑ । सु॒ऽपा॒रः । अ॒ति॒ऽपा॒र॒यः । नः॒ । भव॑ । सुऽनी॑तिः । उ॒त । वा॒मऽनी॑तिः ॥

   इन्द्र । प्र । नः । पुरएताऽइव । पश्य । प्र । नः । नय । प्रऽतरम् । वस्यः । अच्छ ।
   भव । सुऽपारः । अतिऽपारयः । नः । भव । सुऽनीतिः । उत । वामऽनीतिः ॥

   índra ǀ prá ǀ naḥ ǀ puraetā́-iva ǀ páśya ǀ prá ǀ naḥ ǀ naya ǀ pra-tarám ǀ vásyaḥ ǀ áccha ǀ
   bháva ǀ su-pāráḥ ǀ ati-pārayáḥ ǀ naḥ ǀ bháva ǀ sú-nītiḥ ǀ utá ǀ vāmá-nītiḥ ǁ

   indra ǀ pra ǀ naḥ ǀ puraetā-iva ǀ paśya ǀ pra ǀ naḥ ǀ naya ǀ pra-taram ǀ vasyaḥ ǀ accha ǀ
   bhava ǀ su-pāraḥ ǀ ati-pārayaḥ ǀ naḥ ǀ bhava ǀ su-nītiḥ ǀ uta ǀ vāma-nītiḥ ǁ

   6.47.7 Aṣṭaka 4.7.31.2Anuvāka 6.4.78Interpretations

8. Ṛk 8

   उ॒रुं नो॑ लो॒कमनु॑ नेषि वि॒द्वान्त्स्व॑र्व॒ज्ज्योति॒रभ॑यं स्व॒स्ति ।
   ऋ॒ष्वा त॑ इंद्र॒ स्थवि॑रस्य बा॒हू उप॑ स्थेयाम शर॒णा बृ॒हंता॑ ॥

   उरुं नो लोकम् अनु नेषि विद्वान् स्वर्वज् ज्योतिर् अभयं स्वस्ति |
   ऋष्वा त इन्द्र स्थविरस्य बाहू उप स्थेयाम शरणा बृहन्ता ||

   urúm no lokámánu neṣi vidvā́ntsvárvajjyótirábhayam svastí ǀ
   ṛṣvā́ ta indra sthávirasya bāhū́ úpa stheyāma śaraṇā́ bṛhántā ǁ

   uruṃ no lokam anu neṣi vidvān svarvaj jyotir abhayaṃ svasti |
   ṛṣvā ta indra sthavirasya bāhū upa stheyāma śaraṇā bṛhantā ||

   उ॒रुम् । नः॒ । लो॒कम् । अनु॑ । ने॒षि॒ । वि॒द्वान् । स्वः॑ऽवत् । ज्योतिः॑ । अभ॑यम् । स्व॒स्ति ।
   ऋ॒ष्वा । ते॒ । इ॒न्द्र॒ । स्थवि॑रस्य । बा॒हू इति॑ । उप॑ । स्थे॒या॒म॒ । श॒र॒णा । बृ॒हन्ता॑ ॥

   उरुम् । नः । लोकम् । अनु । नेषि । विद्वान् । स्वःऽवत् । ज्योतिः । अभयम् । स्वस्ति ।
   ऋष्वा । ते । इन्द्र । स्थविरस्य । बाहू इति । उप । स्थेयाम । शरणा । बृहन्ता ॥

   urúm ǀ naḥ ǀ lokám ǀ ánu ǀ neṣi ǀ vidvā́n ǀ sváḥ-vat ǀ jyótiḥ ǀ ábhayam ǀ svastí ǀ
   ṛṣvā́ ǀ te ǀ indra ǀ sthávirasya ǀ bāhū́ íti ǀ úpa ǀ stheyāma ǀ śaraṇā́ ǀ bṛhántā ǁ

   urum ǀ naḥ ǀ lokam ǀ anu ǀ neṣi ǀ vidvān ǀ svaḥ-vat ǀ jyotiḥ ǀ abhayam ǀ svasti ǀ
   ṛṣvā ǀ te ǀ indra ǀ sthavirasya ǀ bāhū iti ǀ upa ǀ stheyāma ǀ śaraṇā ǀ bṛhantā ǁ

   6.47.8 Aṣṭaka 4.7.31.3Anuvāka 6.4.79Interpretations

9. Ṛk 9

   वरि॑ष्ठे न इंद्र वं॒धुरे॑ धा॒ वहि॑ष्ठयोः शताव॒न्नश्व॑यो॒रा ।
   इष॒मा व॑क्षी॒षां वर्षि॑ष्ठां॒ मा न॑स्तारीन्मघव॒न्रायो॑ अ॒र्यः ॥

   वरिष्ठे न इन्द्र वन्धुरे धा वहिष्ठयोः शतावन्न् अश्वयोर् आ |
   इषम् आ वक्षीषां वर्षिष्ठाम् मा नस् तारीन् मघवन् रायो अर्यः ||

   váriṣṭhe na indra vandhúre dhā váhiṣṭhayoḥ śatāvannáśvayorā́ ǀ
   íṣamā́ vakṣīṣā́m várṣiṣṭhām mā́ nastārīnmaghavanrā́yo aryáḥ ǁ

   variṣṭhe na indra vandhure dhā vahiṣṭhayoḥ śatāvann aśvayor ā |
   iṣam ā vakṣīṣāṃ varṣiṣṭhām mā nas tārīn maghavan rāyo aryaḥ ||

   वरि॑ष्ठे । नः॒ । इ॒न्द्र॒ । व॒न्धुरे॑ । धाः॒ । वहि॑ष्ठयोः । श॒त॒ऽव॒न् । अश्व॑योः । आ ।
   इष॑म् । आ । व॒क्षि॒ । इ॒षाम् । वर्षि॑ष्ठाम् । मा । नः॒ । ता॒री॒त् । म॒घ॒ऽव॒न् । रायः॑ । अ॒र्यः ॥

   वरिष्ठे । नः । इन्द्र । वन्धुरे । धाः । वहिष्ठयोः । शतऽवन् । अश्वयोः । आ ।
   इषम् । आ । वक्षि । इषाम् । वर्षिष्ठाम् । मा । नः । तारीत् । मघऽवन् । रायः । अर्यः ॥

   váriṣṭhe ǀ naḥ ǀ indra ǀ vandhúre ǀ dhāḥ ǀ váhiṣṭhayoḥ ǀ śata-van ǀ áśvayoḥ ǀ ā́ ǀ
   íṣam ǀ ā́ ǀ vakṣi ǀ iṣā́m ǀ várṣiṣṭhām ǀ mā́ ǀ naḥ ǀ tārīt ǀ magha-van ǀ rā́yaḥ ǀ aryáḥ ǁ

   variṣṭhe ǀ naḥ ǀ indra ǀ vandhure ǀ dhāḥ ǀ vahiṣṭhayoḥ ǀ śata-van ǀ aśvayoḥ ǀ ā ǀ
   iṣam ǀ ā ǀ vakṣi ǀ iṣām ǀ varṣiṣṭhām ǀ mā ǀ naḥ ǀ tārīt ǀ magha-van ǀ rāyaḥ ǀ aryaḥ ǁ

   6.47.9 Aṣṭaka 4.7.31.4Anuvāka 6.4.80Interpretations

10. Ṛk 10

    इंद्र॑ मृ॒ळ मह्यं॑ जी॒वातु॑मिच्छ चो॒दय॒ धिय॒मय॑सो॒ न धारां॑ ।
    यत्किं चा॒हं त्वा॒युरि॒दं वदा॑मि॒ तज्जु॑षस्व कृ॒धि मा॑ दे॒ववं॑तं ॥

    इन्द्र मृऌअ मह्यं जीवातुम् इच्छ चोदय धियम् अयसो न धाराम् |
    यत् किं चाहं त्वायुर् इदं वदामि तज् जुषस्व कृधि मा देववन्तम् ||

    índra mṛḷá máhyam jīvā́tumiccha codáya dhíyamáyaso ná dhā́rām ǀ
    yátkím cāhám tvāyúridám vádāmi tájjuṣasva kṛdhí mā devávantam ǁ

    indra mṛḷa mahyaṃ jīvātum iccha codaya dhiyam ayaso na dhārām |
    yat kiṃ cāhaṃ tvāyur idaṃ vadāmi taj juṣasva kṛdhi mā devavantam ||

    इन्द्र॑ । मृ॒ळ । मह्य॑म् । जी॒वातु॑म् । इ॒च्छ॒ । चो॒दय॑ । धिय॑म् । अय॑सः । न । धारा॑म् ।
    यत् । किम् । च॒ । अ॒हम् । त्वा॒ऽयुः । इ॒दम् । वदा॑मि । तत् । जु॒ष॒स्व॒ । कृ॒धि । मा॒ । दे॒वऽव॑न्तम् ॥

    इन्द्र । मृळ । मह्यम् । जीवातुम् । इच्छ । चोदय । धियम् । अयसः । न । धाराम् ।
    यत् । किम् । च । अहम् । त्वाऽयुः । इदम् । वदामि । तत् । जुषस्व । कृधि । मा । देवऽवन्तम् ॥

    índra ǀ mṛḷá ǀ máhyam ǀ jīvā́tum ǀ iccha ǀ codáya ǀ dhíyam ǀ áyasaḥ ǀ ná ǀ dhā́rām ǀ
    yát ǀ kím ǀ ca ǀ ahám ǀ tvā-yúḥ ǀ idám ǀ vádāmi ǀ tát ǀ juṣasva ǀ kṛdhí ǀ mā ǀ devá-vantam ǁ

    indra ǀ mṛḷa ǀ mahyam ǀ jīvātum ǀ iccha ǀ codaya ǀ dhiyam ǀ ayasaḥ ǀ na ǀ dhārām ǀ
    yat ǀ kim ǀ ca ǀ aham ǀ tvā-yuḥ ǀ idam ǀ vadāmi ǀ tat ǀ juṣasva ǀ kṛdhi ǀ mā ǀ deva-vantam ǁ

    6.47.10 Aṣṭaka 4.7.31.5Anuvāka 6.4.81Interpretations

11. Ṛk 11

    त्रा॒तार॒मिंद्र॑मवि॒तार॒मिंद्रं॒ हवे॑हवे सु॒हवं॒ शूर॒मिंद्रं॑ ।
    ह्वया॑मि श॒क्रं पु॑रुहू॒तमिंद्रं॑ स्व॒स्ति नो॑ म॒घवा॑ धा॒त्विंद्रः॑ ॥

    त्रातारम् इन्द्रम् अवितारम् इन्द्रं हवे-हवे सुहवं शूरम् इन्द्रम् |
    ह्वयामि शक्रम् पुरुहूतम् इन्द्रं स्वस्ति नो मघवा धात्व् इन्द्रः ||

    trātā́ramíndramavitā́ramíndram hávehave suhávam śū́ramíndram ǀ
    hváyāmi śakrám puruhūtámíndram svastí no maghávā dhātvíndraḥ ǁ

    trātāram indram avitāram indraṃ have-have suhavaṃ śūram indram |
    hvayāmi śakram puruhūtam indraṃ svasti no maghavā dhātv indraḥ ||

    त्रा॒तार॑म् । इन्द्र॑म् । अ॒वि॒तार॑म् । इन्द्र॑म् । हवे॑ऽहवे । सु॒ऽहव॑म् । शूर॑म् । इन्द्र॑म् ।
    ह्वया॑मि । श॒क्रम् । पु॒रु॒ऽहू॒तम् । इन्द्र॑म् । स्व॒स्ति । नः॒ । म॒घऽवा॑ । धा॒तु॒ । इन्द्रः॑ ॥

    त्रातारम् । इन्द्रम् । अवितारम् । इन्द्रम् । हवेऽहवे । सुऽहवम् । शूरम् । इन्द्रम् ।
    ह्वयामि । शक्रम् । पुरुऽहूतम् । इन्द्रम् । स्वस्ति । नः । मघऽवा । धातु । इन्द्रः ॥

    trātā́ram ǀ índram ǀ avitā́ram ǀ índram ǀ háve-have ǀ su-hávam ǀ śū́ram ǀ índram ǀ
    hváyāmi ǀ śakrám ǀ puru-hūtám ǀ índram ǀ svastí ǀ naḥ ǀ maghá-vā ǀ dhātu ǀ índraḥ ǁ

    trātāram ǀ indram ǀ avitāram ǀ indram ǀ have-have ǀ su-havam ǀ śūram ǀ indram ǀ
    hvayāmi ǀ śakram ǀ puru-hūtam ǀ indram ǀ svasti ǀ naḥ ǀ magha-vā ǀ dhātu ǀ indraḥ ǁ

    6.47.11 Aṣṭaka 4.7.32.1Anuvāka 6.4.82Interpretations

12. Ṛk 12

    इंद्रः॑ सु॒त्रामा॒ स्ववाँ॒ अवो॑भिः सुमृळी॒को भ॑वतु वि॒श्ववे॑दाः ।
    बाध॑तां॒ द्वेषो॒ अभ॑यं कृणोतु सु॒वीर्य॑स्य॒ पत॑यः स्याम ॥

    इन्द्रः सुत्रामा स्ववां अवोभिः सुमृऌईको भवतु विश्ववेदाः |
    बाधतां द्वेषो अभयं कृणोतु सुवीर्यस्य पतयः स्याम ||

    índraḥ sutrā́mā svávām̐ ávobhiḥ sumṛḷīkó bhavatu viśvávedāḥ ǀ
    bā́dhatām dvéṣo ábhayam kṛṇotu suvī́ryasya pátayaḥ syāma ǁ

    indraḥ sutrāmā svavāṃ avobhiḥ sumṛḷīko bhavatu viśvavedāḥ |
    bādhatāṃ dveṣo abhayaṃ kṛṇotu suvīryasya patayaḥ syāma ||

    इन्द्रः॑ । सु॒ऽत्रामा॑ । स्वऽवा॑न् । अवः॑ऽभिः । सु॒ऽमृ॒ळी॒कः । भ॒व॒तु॒ । वि॒श्वऽवे॑दाः ।
    बाध॑ताम् । द्वेषः॑ । अभ॑यम् । कृ॒णो॒तु॒ । सु॒ऽवीर्य॑स्य । पत॑यः । स्या॒म॒ ॥

    इन्द्रः । सुऽत्रामा । स्वऽवान् । अवःऽभिः । सुऽमृळीकः । भवतु । विश्वऽवेदाः ।
    बाधताम् । द्वेषः । अभयम् । कृणोतु । सुऽवीर्यस्य । पतयः । स्याम ॥

    índraḥ ǀ su-trā́mā ǀ svá-vān ǀ ávaḥ-bhiḥ ǀ su-mṛḷīkáḥ ǀ bhavatu ǀ viśvá-vedāḥ ǀ
    bā́dhatām ǀ dvéṣaḥ ǀ ábhayam ǀ kṛṇotu ǀ su-vī́ryasya ǀ pátayaḥ ǀ syāma ǁ

    indraḥ ǀ su-trāmā ǀ sva-vān ǀ avaḥ-bhiḥ ǀ su-mṛḷīkaḥ ǀ bhavatu ǀ viśva-vedāḥ ǀ
    bādhatām ǀ dveṣaḥ ǀ abhayam ǀ kṛṇotu ǀ su-vīryasya ǀ patayaḥ ǀ syāma ǁ

    6.47.12 Aṣṭaka 4.7.32.2Anuvāka 6.4.83Interpretations

13. Ṛk 13

    तस्य॑ व॒यं सु॑म॒तौ य॒ज्ञिय॒स्यापि॑ भ॒द्रे सौ॑मन॒से स्या॑म ।
    स सु॒त्रामा॒ स्ववाँ॒ इंद्रो॑ अ॒स्मे आ॒राच्चि॒द्द्वेषः॑ सनु॒तर्यु॑योतु ॥

    तस्य वयं सुमतौ यज्ञियस्यापि भद्रे सौमनसे स्याम |
    स सुत्रामा स्ववां इन्द्रो अस्मे आराच् चिद् द्वेषः सनुतर् युयोतु ||

    tásya vayám sumatáu yajñíyasyā́pi bhadré saumanasé syāma ǀ
    sá sutrā́mā svávām̐ índro asmé ārā́cciddvéṣaḥ sanutáryuyotu ǁ

    tasya vayaṃ sumatau yajñiyasyāpi bhadre saumanase syāma |
    sa sutrāmā svavāṃ indro asme ārāc cid dveṣaḥ sanutar yuyotu ||

    तस्य॑ । व॒यम् । सु॒ऽम॒तौ । य॒ज्ञिय॑स्य । अपि॑ । भ॒द्रे । सौ॒म॒न॒से । स्या॒म॒ ।
    सः । सु॒ऽत्रामा॑ । स्वऽवा॑न् । इन्द्रः॑ । अ॒स्मे इति॑ । आ॒रात् । चि॒त् । द्वेषः॑ । स॒नु॒तः । यु॒यो॒तु॒ ॥

    तस्य । वयम् । सुऽमतौ । यज्ञियस्य । अपि । भद्रे । सौमनसे । स्याम ।
    सः । सुऽत्रामा । स्वऽवान् । इन्द्रः । अस्मे इति । आरात् । चित् । द्वेषः । सनुतः । युयोतु ॥

    tásya ǀ vayám ǀ su-matáu ǀ yajñíyasya ǀ ápi ǀ bhadré ǀ saumanasé ǀ syāma ǀ
    sáḥ ǀ su-trā́mā ǀ svá-vān ǀ índraḥ ǀ asmé íti ǀ ārā́t ǀ cit ǀ dvéṣaḥ ǀ sanutáḥ ǀ yuyotu ǁ

    tasya ǀ vayam ǀ su-matau ǀ yajñiyasya ǀ api ǀ bhadre ǀ saumanase ǀ syāma ǀ
    saḥ ǀ su-trāmā ǀ sva-vān ǀ indraḥ ǀ asme iti ǀ ārāt ǀ cit ǀ dveṣaḥ ǀ sanutaḥ ǀ yuyotu ǁ

    6.47.13 Aṣṭaka 4.7.32.3Anuvāka 6.4.84Interpretations

14. Ṛk 14

    अव॒ त्वे इं॑द्र प्र॒वतो॒ नोर्मिर्गिरो॒ ब्रह्मा॑णि नि॒युतो॑ धवंते ।
    उ॒रू न राधः॒ सव॑ना पु॒रूण्य॒पो गा व॑ज्रिन्युवसे॒ समिंदू॑न् ॥

    अव त्वे इन्द्र प्रवतो नोर्मिर् गिरो ब्रह्माणि नियुतो धवन्ते |
    उरू न राधः सवना पुरूण्य् अपो गा वज्रिन् युवसे सम् इन्दून् ||

    áva tvé indra praváto nórmírgíro bráhmāṇi niyúto dhavante ǀ
    urū́ ná rā́dhaḥ sávanā purū́ṇyapó gā́ vajrinyuvase sámíndūn ǁ

    ava tve indra pravato normir giro brahmāṇi niyuto dhavante |
    urū na rādhaḥ savanā purūṇy apo gā vajrin yuvase sam indūn ||

    अव॑ । त्वे इति॑ । इ॒न्द्र॒ । प्र॒ऽवतः॑ । न । ऊ॒र्मिः । गिरः॑ । ब्रह्मा॑णि । नि॒ऽयुतः॑ । ध॒व॒न्ते॒ ।
    उ॒रु । न । राधः॑ । सव॑ना । पु॒रूणि॑ । अ॒पः । गाः । व॒ज्रि॒न् । यु॒व॒से॒ । सम् । इन्दू॑न् ॥

    अव । त्वे इति । इन्द्र । प्रऽवतः । न । ऊर्मिः । गिरः । ब्रह्माणि । निऽयुतः । धवन्ते ।
    उरु । न । राधः । सवना । पुरूणि । अपः । गाः । वज्रिन् । युवसे । सम् । इन्दून् ॥

    áva ǀ tvé íti ǀ indra ǀ pra-vátaḥ ǀ ná ǀ ūrmíḥ ǀ gíraḥ ǀ bráhmāṇi ǀ ni-yútaḥ ǀ dhavante ǀ
    urú ǀ ná ǀ rā́dhaḥ ǀ sávanā ǀ purū́ṇi ǀ apáḥ ǀ gā́ḥ ǀ vajrin ǀ yuvase ǀ sám ǀ índūn ǁ

    ava ǀ tve iti ǀ indra ǀ pra-vataḥ ǀ na ǀ ūrmiḥ ǀ giraḥ ǀ brahmāṇi ǀ ni-yutaḥ ǀ dhavante ǀ
    uru ǀ na ǀ rādhaḥ ǀ savanā ǀ purūṇi ǀ apaḥ ǀ gāḥ ǀ vajrin ǀ yuvase ǀ sam ǀ indūn ǁ

    6.47.14 Aṣṭaka 4.7.32.4Anuvāka 6.4.85Interpretations

15. Ṛk 15

    क ईं॑ स्तव॒त्कः पृ॑णा॒त्को य॑जाते॒ यदु॒ग्रमिन्म॒घवा॑ वि॒श्वहावे॑त् ।
    पादा॑विव प्र॒हर॑न्न॒न्यम॑न्यं कृ॒णोति॒ पूर्व॒मप॑रं॒ शची॑भिः ॥

    क ईं स्तवत् कः पृणात् को यजाते यद् उग्रम् इन् मघवा विश्वहावेत् |
    पादाव् इव प्रहरन्न् अन्यम्-अन्यं कृणोति पूर्वम् अपरं शचीभिः ||

    ká īm stavatkáḥ pṛṇātkó yajāte yádugrámínmaghávā viśváhā́vet ǀ
    pā́dāviva prahárannanyámanyam kṛṇóti pū́rvamáparam śácībhiḥ ǁ

    ka īṃ stavat kaḥ pṛṇāt ko yajāte yad ugram in maghavā viśvahāvet |
    pādāv iva praharann anyam-anyaṃ kṛṇoti pūrvam aparaṃ śacībhiḥ ||

    कः । ई॒म् । स्त॒व॒त् । कः । पृ॒णा॒त् । कः । य॒जा॒ते॒ । यत् । उ॒ग्रम् । इत् । म॒घऽवा॑ । वि॒श्वहा॑ । अवे॑त् ।
    पादौ॑ऽइव । प्र॒ऽहर॑न् । अ॒न्यम्ऽअ॑न्यम् । कृ॒णोति॑ । पूर्व॑म् । अप॑रम् । शची॑भिः ॥

    कः । ईम् । स्तवत् । कः । पृणात् । कः । यजाते । यत् । उग्रम् । इत् । मघऽवा । विश्वहा । अवेत् ।
    पादौऽइव । प्रऽहरन् । अन्यम्ऽअन्यम् । कृणोति । पूर्वम् । अपरम् । शचीभिः ॥

    káḥ ǀ īm ǀ stavat ǀ káḥ ǀ pṛṇāt ǀ káḥ ǀ yajāte ǀ yát ǀ ugrám ǀ ít ǀ maghá-vā ǀ viśváhā ǀ ávet ǀ
    pā́dau-iva ǀ pra-háran ǀ anyám-anyam ǀ kṛṇóti ǀ pū́rvam ǀ áparam ǀ śácībhiḥ ǁ

    kaḥ ǀ īm ǀ stavat ǀ kaḥ ǀ pṛṇāt ǀ kaḥ ǀ yajāte ǀ yat ǀ ugram ǀ it ǀ magha-vā ǀ viśvahā ǀ avet ǀ
    pādau-iva ǀ pra-haran ǀ anyam-anyam ǀ kṛṇoti ǀ pūrvam ǀ aparam ǀ śacībhiḥ ǁ

    6.47.15 Aṣṭaka 4.7.32.5Anuvāka 6.4.86Interpretations

16. Ṛk 16

    शृ॒ण्वे वी॒र उ॒ग्रमु॑ग्रं दमा॒यन्न॒न्यम॑न्यमतिनेनी॒यमा॑नः ।
    ए॒ध॒मा॒न॒द्विळु॒भय॑स्य॒ राजा॑ चोष्कू॒यते॒ विश॒ इंद्रो॑ मनु॒ष्या॑न् ॥

    शृण्वे वीर उग्रम्-उग्रं दमायन्न् अन्यम्-अन्यम् अतिनेनीयमानः |
    एधमानद्विऌ उभयस्य राजा चोष्कूयते विश इन्द्रो मनुष्यान् ||

    śṛṇvé vīrá ugrámugram damāyánnanyámanyamatinenīyámānaḥ ǀ
    edhamānadvíḷubháyasya rā́jā coṣkūyáte víśa índro manuṣyān ǁ

    śṛṇve vīra ugram-ugraṃ damāyann anyam-anyam atinenīyamānaḥ |
    edhamānadviḷ ubhayasya rājā coṣkūyate viśa indro manuṣyān ||

    शृ॒ण्वे । वी॒रः । उ॒ग्रम्ऽउ॑ग्रम् । द॒म॒ऽयन् । अ॒न्यम्ऽअ॑न्यम् । अ॒ति॒ऽने॒नी॒यमा॑नः ।
    ए॒ध॒मा॒न॒ऽद्विट् । उ॒भय॑स्य । राजा॑ । चो॒ष्कू॒यते॑ । विशः॑ । इन्द्रः॑ । म॒नु॒ष्या॑न् ॥

    शृण्वे । वीरः । उग्रम्ऽउग्रम् । दमऽयन् । अन्यम्ऽअन्यम् । अतिऽनेनीयमानः ।
    एधमानऽद्विट् । उभयस्य । राजा । चोष्कूयते । विशः । इन्द्रः । मनुष्यान् ॥

    śṛṇvé ǀ vīráḥ ǀ ugrám-ugram ǀ dama-yán ǀ anyám-anyam ǀ ati-nenīyámānaḥ ǀ
    edhamāna-dvíṭ ǀ ubháyasya ǀ rā́jā ǀ coṣkūyáte ǀ víśaḥ ǀ índraḥ ǀ manuṣyā́n ǁ

    śṛṇve ǀ vīraḥ ǀ ugram-ugram ǀ dama-yan ǀ anyam-anyam ǀ ati-nenīyamānaḥ ǀ
    edhamāna-dviṭ ǀ ubhayasya ǀ rājā ǀ coṣkūyate ǀ viśaḥ ǀ indraḥ ǀ manuṣyān ǁ

    6.47.16 Aṣṭaka 4.7.33.1Anuvāka 6.4.87Interpretations

17. Ṛk 17

    परा॒ पूर्वे॑षां स॒ख्या वृ॑णक्ति वि॒तर्तु॑राणो॒ अप॑रेभिरेति ।
    अना॑नुभूतीरवधून्वा॒नः पू॒र्वीरिंद्रः॑ श॒रद॑स्तर्तरीति ॥

    परा पूर्वेषां सख्या वृणक्ति वितर्तुराणो अपरेभिर् एति |
    अनानुभूतीर् अवधून्वानः पूर्वीर् इन्द्रः शरदस् तर्तरीति ||

    párā pū́rveṣām sakhyā́ vṛṇakti vitárturāṇo áparebhireti ǀ
    ánānubhūtīravadhūnvānáḥ pūrvī́ríndraḥ śarádastartarīti ǁ

    parā pūrveṣāṃ sakhyā vṛṇakti vitarturāṇo aparebhir eti |
    anānubhūtīr avadhūnvānaḥ pūrvīr indraḥ śaradas tartarīti ||

    परा॑ । पूर्वे॑षाम् । स॒ख्या । वृ॒ण॒क्ति॒ । वि॒ऽतर्तु॑राणः । अप॑रेभिः । ए॒ति॒ ।
    अन॑नुऽभूतीः । अ॒व॒ऽधू॒न्वा॒नः । पू॒र्वीः । इन्द्रः॑ । श॒रदः॑ । त॒र्त॒री॒ति॒ ॥

    परा । पूर्वेषाम् । सख्या । वृणक्ति । विऽतर्तुराणः । अपरेभिः । एति ।
    अननुऽभूतीः । अवऽधून्वानः । पूर्वीः । इन्द्रः । शरदः । तर्तरीति ॥

    párā ǀ pū́rveṣām ǀ sakhyā́ ǀ vṛṇakti ǀ vi-tárturāṇaḥ ǀ áparebhiḥ ǀ eti ǀ
    ánanu-bhūtīḥ ǀ ava-dhūnvānáḥ ǀ pūrvī́ḥ ǀ índraḥ ǀ śarádaḥ ǀ tartarīti ǁ

    parā ǀ pūrveṣām ǀ sakhyā ǀ vṛṇakti ǀ vi-tarturāṇaḥ ǀ aparebhiḥ ǀ eti ǀ
    ananu-bhūtīḥ ǀ ava-dhūnvānaḥ ǀ pūrvīḥ ǀ indraḥ ǀ śaradaḥ ǀ tartarīti ǁ

    6.47.17 Aṣṭaka 4.7.33.2Anuvāka 6.4.88Interpretations

18. Ṛk 18

    रू॒पंरू॑पं॒ प्रति॑रूपो बभूव॒ तद॑स्य रू॒पं प्र॑ति॒चक्ष॑णाय ।
    इंद्रो॑ मा॒याभिः॑ पुरु॒रूप॑ ईयते यु॒क्ता ह्य॑स्य॒ हर॑यः श॒ता दश॑ ॥

    रूपं-रूपम् प्रतिरूपो बभूव तद् अस्य रूपम् प्रतिचक्षणाय |
    इन्द्रो मायाभिः पुरुरूप ईयते युक्ता ह्य् अस्य हरयः शता दश ||

    rūpáṃrūpam prátirūpo babhūva tádasya rūpám praticákṣaṇāya ǀ
    índro māyā́bhiḥ pururū́pa īyate yuktā́ hyásya hárayaḥ śatā́ dáśa ǁ

    rūpaṃ-rūpam pratirūpo babhūva tad asya rūpam praticakṣaṇāya |
    indro māyābhiḥ pururūpa īyate yuktā hy asya harayaḥ śatā daśa ||

    रू॒पम्ऽरू॑पम् । प्रति॑ऽरूपः । ब॒भू॒व॒ । तत् । अ॒स्य॒ । रू॒पम् । प्र॒ति॒ऽचक्ष॑णाय ।
    इन्द्रः॑ । मा॒याभिः॑ । पु॒रु॒ऽरूपः॑ । ई॒य॒ते॒ । यु॒क्ताः । हि । अ॒स्य॒ । हर॑यः । श॒ता । दश॑ ॥

    रूपम्ऽरूपम् । प्रतिऽरूपः । बभूव । तत् । अस्य । रूपम् । प्रतिऽचक्षणाय ।
    इन्द्रः । मायाभिः । पुरुऽरूपः । ईयते । युक्ताः । हि । अस्य । हरयः । शता । दश ॥

    rūpám-rūpam ǀ práti-rūpaḥ ǀ babhūva ǀ tát ǀ asya ǀ rūpám ǀ prati-cákṣaṇāya ǀ
    índraḥ ǀ māyā́bhiḥ ǀ puru-rū́paḥ ǀ īyate ǀ yuktā́ḥ ǀ hí ǀ asya ǀ hárayaḥ ǀ śatā́ ǀ dáśa ǁ

    rūpam-rūpam ǀ prati-rūpaḥ ǀ babhūva ǀ tat ǀ asya ǀ rūpam ǀ prati-cakṣaṇāya ǀ
    indraḥ ǀ māyābhiḥ ǀ puru-rūpaḥ ǀ īyate ǀ yuktāḥ ǀ hi ǀ asya ǀ harayaḥ ǀ śatā ǀ daśa ǁ

    6.47.18 Aṣṭaka 4.7.33.3Anuvāka 6.4.89Interpretations

19. Ṛk 19

    यु॒जा॒नो ह॒रिता॒ रथे॒ भूरि॒ त्वष्टे॒ह रा॑जति ।
    को वि॒श्वाहा॑ द्विष॒तः पक्ष॑ आसत उ॒तासी॑नेषु सू॒रिषु॑ ॥

    युजानो हरिता रथे भूरि त्वष्टेह राजति |
    को विश्वाहा द्विषतः पक्ष आसत उतासीनेषु सूरिषु ||

    yujānó harítā ráthe bhū́ri tváṣṭehá rājati ǀ
    kó viśvā́hā dviṣatáḥ pákṣa āsata utā́sīneṣu sūríṣu ǁ

    yujāno haritā rathe bhūri tvaṣṭeha rājati |
    ko viśvāhā dviṣataḥ pakṣa āsata utāsīneṣu sūriṣu ||

    यु॒जा॒नः । ह॒रिता॑ । रथे॑ । भूरि॑ । त्वष्टा॑ । इ॒ह । रा॒ज॒ति॒ ।
    कः । वि॒श्वाहा॑ । द्वि॒ष॒तः । पक्षः॑ । आ॒स॒ते॒ । उ॒त । आसी॑नेषु । सू॒रिषु॑ ॥

    युजानः । हरिता । रथे । भूरि । त्वष्टा । इह । राजति ।
    कः । विश्वाहा । द्विषतः । पक्षः । आसते । उत । आसीनेषु । सूरिषु ॥

    yujānáḥ ǀ harítā ǀ ráthe ǀ bhū́ri ǀ tváṣṭā ǀ ihá ǀ rājati ǀ
    káḥ ǀ viśvā́hā ǀ dviṣatáḥ ǀ pákṣaḥ ǀ āsate ǀ utá ǀ ā́sīneṣu ǀ sūríṣu ǁ

    yujānaḥ ǀ haritā ǀ rathe ǀ bhūri ǀ tvaṣṭā ǀ iha ǀ rājati ǀ
    kaḥ ǀ viśvāhā ǀ dviṣataḥ ǀ pakṣaḥ ǀ āsate ǀ uta ǀ āsīneṣu ǀ sūriṣu ǁ

    6.47.19 Aṣṭaka 4.7.33.4Anuvāka 6.4.90Interpretations

20. Ṛk 20

    अ॒ग॒व्यू॒ति क्षेत्र॒माग॑न्म देवा उ॒र्वी स॒ती भूमि॑रंहूर॒णाभू॑त् ।
    बृह॑स्पते॒ प्र चि॑कित्सा॒ गवि॑ष्टावि॒त्था स॒ते ज॑रि॒त्र इं॑द्र॒ पंथां॑ ॥

    अगव्यूति क्षेत्रम् आगन्म देवा उर्वी सती भूमिर् अंहूरणाभूत् |
    बृहस्पते प्र चिकित्सा गविष्टाव् इत्था सते जरित्र इन्द्र पन्थाम् ||

    agavyūtí kṣétramā́ganma devā urvī́ satī́ bhū́miraṃhūraṇā́bhūt ǀ
    bṛ́haspate prá cikitsā gáviṣṭāvitthā́ saté jaritrá indra pánthām ǁ

    agavyūti kṣetram āganma devā urvī satī bhūmir aṃhūraṇābhūt |
    bṛhaspate pra cikitsā gaviṣṭāv itthā sate jaritra indra panthām ||

    अ॒ग॒व्यू॒ति । क्षेत्र॑म् । आ । अ॒ग॒न्म॒ । दे॒वाः॒ । उ॒र्वी । स॒ती । भूमिः॑ । अं॒हू॒र॒णा । अ॒भू॒त् ।
    बृह॑स्पते । प्र । चि॒कि॒त्स॒ । गोऽइ॑ष्टौ । इ॒त्था । स॒ते । ज॒रि॒त्रे । इ॒न्द्र॒ । पन्था॑म् ॥

    अगव्यूति । क्षेत्रम् । आ । अगन्म । देवाः । उर्वी । सती । भूमिः । अंहूरणा । अभूत् ।
    बृहस्पते । प्र । चिकित्स । गोऽइष्टौ । इत्था । सते । जरित्रे । इन्द्र । पन्थाम् ॥

    agavyūtí ǀ kṣétram ǀ ā́ ǀ aganma ǀ devāḥ ǀ urvī́ ǀ satī́ ǀ bhū́miḥ ǀ aṃhūraṇā́ ǀ abhūt ǀ
    bṛ́haspate ǀ prá ǀ cikitsa ǀ gó-iṣṭau ǀ itthā́ ǀ saté ǀ jaritré ǀ indra ǀ pánthām ǁ

    agavyūti ǀ kṣetram ǀ ā ǀ aganma ǀ devāḥ ǀ urvī ǀ satī ǀ bhūmiḥ ǀ aṃhūraṇā ǀ abhūt ǀ
    bṛhaspate ǀ pra ǀ cikitsa ǀ go-iṣṭau ǀ itthā ǀ sate ǀ jaritre ǀ indra ǀ panthām ǁ

    6.47.20 Aṣṭaka 4.7.33.5Anuvāka 6.4.91Interpretations

21. Ṛk 21

    दि॒वेदि॑वे स॒दृशी॑र॒न्यमर्धं॑ कृ॒ष्णा अ॑सेध॒दप॒ सद्म॑नो॒ जाः ।
    अहं॑दा॒सा वृ॑ष॒भो व॑स्न॒यंतो॒दव्र॑जे व॒र्चिनं॒ शंब॑रं च ॥

    दिवे-दिवे सदृशीर् अन्यम् अर्धं कृष्णा असेधद् अप सद्मनो जाः |
    अहन् दासा वृषभो वस्नयन्तोदव्रजे वर्चिनं शम्बरं च ||

    divédive sadṛ́śīranyámárdham kṛṣṇā́ asedhadápa sádmano jā́ḥ ǀ
    áhandāsā́ vṛṣabhó vasnayántodávraje varcínam śámbaram ca ǁ

    dive-dive sadṛśīr anyam ardhaṃ kṛṣṇā asedhad apa sadmano jāḥ |
    ahan dāsā vṛṣabho vasnayantodavraje varcinaṃ śambaraṃ ca ||

    दि॒वेऽदि॑वे । स॒ऽदृशीः॑ । अ॒न्यम् । अर्ध॑म् । कृ॒ष्णाः । अ॒से॒ध॒त् । अप॑ । सद्म॑नः । जाः ।
    अह॑न् । दा॒सा । वृ॒ष॒भः । व॒स्न॒यन्ता॑ । उ॒दऽव्र॑जे । व॒र्चिन॑म् । शम्ब॑रम् । च॒ ॥

    दिवेऽदिवे । सऽदृशीः । अन्यम् । अर्धम् । कृष्णाः । असेधत् । अप । सद्मनः । जाः ।
    अहन् । दासा । वृषभः । वस्नयन्ता । उदऽव्रजे । वर्चिनम् । शम्बरम् । च ॥

    divé-dive ǀ sa-dṛ́śīḥ ǀ anyám ǀ árdham ǀ kṛṣṇā́ḥ ǀ asedhat ǀ ápa ǀ sádmanaḥ ǀ jā́ḥ ǀ
    áhan ǀ dāsā́ ǀ vṛṣabháḥ ǀ vasnayántā ǀ udá-vraje ǀ varcínam ǀ śámbaram ǀ ca ǁ

    dive-dive ǀ sa-dṛśīḥ ǀ anyam ǀ ardham ǀ kṛṣṇāḥ ǀ asedhat ǀ apa ǀ sadmanaḥ ǀ jāḥ ǀ
    ahan ǀ dāsā ǀ vṛṣabhaḥ ǀ vasnayantā ǀ uda-vraje ǀ varcinam ǀ śambaram ǀ ca ǁ

    6.47.21 Aṣṭaka 4.7.34.1Anuvāka 6.4.92Interpretations

22. Ṛk 22

    प्र॒स्तो॒क इन्नु राध॑सस्त इंद्र॒ दश॒ कोश॑यी॒र्दश॑ वा॒जिनो॑ऽदात् ।
    दिवो॑दासादतिथि॒ग्वस्य॒ राधः॑ शांब॒रं वसु॒ प्रत्य॑ग्रभीष्म ॥

    प्रस्तोक इन् नु राधसस् त इन्द्र दश कोशयीर् दश वाजिनो ऽदात् |
    दिवोदासाद् अतिथिग्वस्य राधः शाम्बरं वसु प्रत्य् अग्रभीष्म ||

    prastoká ínnú rā́dhasasta indra dáśa kóśayīrdáśa vājíno’dāt ǀ
    dívodāsādatithigvásya rā́dhaḥ śāmbarám vásu prátyagrabhīṣma ǁ

    prastoka in nu rādhasas ta indra daśa kośayīr daśa vājino 'dāt |
    divodāsād atithigvasya rādhaḥ śāmbaraṃ vasu praty agrabhīṣma ||

    प्र॒स्तो॒कः । इत् । नु । राध॑सः । ते॒ । इ॒न्द्र॒ । दश॑ । कोश॑यीः । दश॑ । वा॒जिनः॑ । अ॒दा॒त् ।
    दिवः॑ऽदासात् । अ॒ति॒थि॒ऽग्वस्य॑ । राधः॑ । शा॒म्ब॒रम् । वसु॑ । प्रति॑ । अ॒ग्र॒भी॒ष्म॒ ॥

    प्रस्तोकः । इत् । नु । राधसः । ते । इन्द्र । दश । कोशयीः । दश । वाजिनः । अदात् ।
    दिवःऽदासात् । अतिथिऽग्वस्य । राधः । शाम्बरम् । वसु । प्रति । अग्रभीष्म ॥

    prastokáḥ ǀ ít ǀ nú ǀ rā́dhasaḥ ǀ te ǀ indra ǀ dáśa ǀ kóśayīḥ ǀ dáśa ǀ vājínaḥ ǀ adāt ǀ
    dívaḥ-dāsāt ǀ atithi-gvásya ǀ rā́dhaḥ ǀ śāmbarám ǀ vásu ǀ práti ǀ agrabhīṣma ǁ

    prastokaḥ ǀ it ǀ nu ǀ rādhasaḥ ǀ te ǀ indra ǀ daśa ǀ kośayīḥ ǀ daśa ǀ vājinaḥ ǀ adāt ǀ
    divaḥ-dāsāt ǀ atithi-gvasya ǀ rādhaḥ ǀ śāmbaram ǀ vasu ǀ prati ǀ agrabhīṣma ǁ

    6.47.22 Aṣṭaka 4.7.34.2Anuvāka 6.4.93Interpretations

23. Ṛk 23

    दशाश्वां॒दश॒ कोशां॒दश॒ वस्त्राधि॑भोजना ।
    दशो॑ हिरण्यपिं॒डांदिवो॑दासादसानिषं ॥

    दशाश्वान् दश कोशान् दश वस्त्राधिभोजना |
    दशो हिरण्यपिण्डान् दिवोदासाद् असानिषम् ||

    dáśā́śvāndáśa kóśāndáśa vástrā́dhibhojanā ǀ
    dáśo hiraṇyapiṇḍā́ndívodāsādasāniṣam ǁ

    daśāśvān daśa kośān daśa vastrādhibhojanā |
    daśo hiraṇyapiṇḍān divodāsād asāniṣam ||

    दश॑ । अश्वा॑न् । दश॑ । कोशा॑न् । दश॑ । वस्त्रा॑ । अधि॑ऽभोजना ।
    दशो॒ इति॑ । हि॒र॒ण्य॒ऽपि॒ण्डान् । दिवः॑ऽदासात् । अ॒सा॒नि॒ष॒म् ॥

    दश । अश्वान् । दश । कोशान् । दश । वस्त्रा । अधिऽभोजना ।
    दशो इति । हिरण्यऽपिण्डान् । दिवःऽदासात् । असानिषम् ॥

    dáśa ǀ áśvān ǀ dáśa ǀ kóśān ǀ dáśa ǀ vástrā ǀ ádhi-bhojanā ǀ
    dáśo íti ǀ hiraṇya-piṇḍā́n ǀ dívaḥ-dāsāt ǀ asāniṣam ǁ

    daśa ǀ aśvān ǀ daśa ǀ kośān ǀ daśa ǀ vastrā ǀ adhi-bhojanā ǀ
    daśo iti ǀ hiraṇya-piṇḍān ǀ divaḥ-dāsāt ǀ asāniṣam ǁ

    6.47.23 Aṣṭaka 4.7.34.3Anuvāka 6.4.94Interpretations

24. Ṛk 24

    दश॒ रथा॒न्प्रष्टि॑मतः श॒तं गा अथ॑र्वभ्यः ।
    अ॒श्व॒थः पा॒यवे॑ऽदात् ॥

    दश रथान् प्रष्टिमतः शतं गा अथर्वभ्यः |
    अश्वथः पायवे ऽदात् ||

    dáśa ráthānpráṣṭimataḥ śatám gā́ átharvabhyaḥ ǀ
    aśvatháḥ pāyáve’dāt ǁ

    daśa rathān praṣṭimataḥ śataṃ gā atharvabhyaḥ |
    aśvathaḥ pāyave 'dāt ||

    दश॑ । रथा॑न् । प्रष्टि॑ऽमतः । श॒तम् । गाः । अथ॑र्वऽभ्यः ।
    अ॒श्व॒थः । पा॒यवे॑ । अ॒दा॒त् ॥

    दश । रथान् । प्रष्टिऽमतः । शतम् । गाः । अथर्वऽभ्यः ।
    अश्वथः । पायवे । अदात् ॥

    dáśa ǀ ráthān ǀ práṣṭi-mataḥ ǀ śatám ǀ gā́ḥ ǀ átharva-bhyaḥ ǀ
    aśvatháḥ ǀ pāyáve ǀ adāt ǁ

    daśa ǀ rathān ǀ praṣṭi-mataḥ ǀ śatam ǀ gāḥ ǀ atharva-bhyaḥ ǀ
    aśvathaḥ ǀ pāyave ǀ adāt ǁ

    6.47.24 Aṣṭaka 4.7.34.4Anuvāka 6.4.95Interpretations

25. Ṛk 25

    महि॒ राधो॑ वि॒श्वज॑न्यं॒ दधा॑नान्भ॒रद्वा॑जान्त्सार्ञ्ज॒यो अ॒भ्य॑यष्ट ॥

    महि राधो विश्वजन्यं दधानान् भरद्वाजान् सार्ञ्जयो अभ्य् अयष्ट ||

    máhi rā́dho viśvájanyam dádhānānbharádvājāntsārñjayó abhyáyaṣṭa ǁ

    mahi rādho viśvajanyaṃ dadhānān bharadvājān sārñjayo abhy ayaṣṭa ||

    महि॑ । राधः॑ । वि॒श्वऽज॑न्यम् । दधा॑नान् । भ॒रत्ऽवा॑जान् । सा॒र्ञ्ज॒यः । अ॒भि । अ॒य॒ष्ट॒ ॥

    महि । राधः । विश्वऽजन्यम् । दधानान् । भरत्ऽवाजान् । सार्ञ्जयः । अभि । अयष्ट ॥

    máhi ǀ rā́dhaḥ ǀ viśvá-janyam ǀ dádhānān ǀ bharát-vājān ǀ sārñjayáḥ ǀ abhí ǀ ayaṣṭa ǁ

    mahi ǀ rādhaḥ ǀ viśva-janyam ǀ dadhānān ǀ bharat-vājān ǀ sārñjayaḥ ǀ abhi ǀ ayaṣṭa ǁ

    6.47.25 Aṣṭaka 4.7.34.5Anuvāka 6.4.96Interpretations

26. Ṛk 26

    वन॑स्पते वी॒ड्वं॑गो॒ हि भू॒या अ॒स्मत्स॑खा प्र॒तर॑णः सु॒वीरः॑ ।
    गोभिः॒ संन॑द्धो असि वी॒ळय॑स्वास्था॒ता ते॑ जयतु॒ जेत्वा॑नि ॥

    वनस्पते वीड्वङ्गो हि भूया अस्मत्सखा प्रतरणः सुवीरः |
    गोभिः संनद्धो असि वीऌअयस्वास्थाता ते जयतु जेत्वानि ||

    vánaspate vīḍváṅgo hí bhūyā́ asmátsakhā pratáraṇaḥ suvī́raḥ ǀ
    góbhiḥ sáṃnaddho asi vīḷáyasvāsthātā́ te jayatu jétvāni ǁ

    vanaspate vīḍvaṅgo hi bhūyā asmatsakhā prataraṇaḥ suvīraḥ |
    gobhiḥ saṃnaddho asi vīḷayasvāsthātā te jayatu jetvāni ||

    वन॑स्पते । वी॒ळुऽअ॑ङ्गः । हि । भू॒याः । अ॒स्मत्ऽस॑खा । प्र॒ऽतर॑णः । सु॒ऽवीरः॑ ।
    गोभिः॑ । सम्ऽन॑द्धः । अ॒सि॒ । वी॒ळय॑स्व । आ॒ऽस्था॒ता । ते॒ । ज॒य॒तु॒ । जेत्वा॑नि ॥

    वनस्पते । वीळुऽअङ्गः । हि । भूयाः । अस्मत्ऽसखा । प्रऽतरणः । सुऽवीरः ।
    गोभिः । सम्ऽनद्धः । असि । वीळयस्व । आऽस्थाता । ते । जयतु । जेत्वानि ॥

    vánaspate ǀ vīḷú-aṅgaḥ ǀ hí ǀ bhūyā́ḥ ǀ asmát-sakhā ǀ pra-táraṇaḥ ǀ su-vī́raḥ ǀ
    góbhiḥ ǀ sám-naddhaḥ ǀ asi ǀ vīḷáyasva ǀ ā-sthātā́ ǀ te ǀ jayatu ǀ jétvāni ǁ

    vanaspate ǀ vīḷu-aṅgaḥ ǀ hi ǀ bhūyāḥ ǀ asmat-sakhā ǀ pra-taraṇaḥ ǀ su-vīraḥ ǀ
    gobhiḥ ǀ sam-naddhaḥ ǀ asi ǀ vīḷayasva ǀ ā-sthātā ǀ te ǀ jayatu ǀ jetvāni ǁ

    6.47.26 Aṣṭaka 4.7.35.1Anuvāka 6.4.97Interpretations

27. Ṛk 27

    दि॒वस्पृ॑थि॒व्याः पर्योज॒ उद्भृ॑तं॒ वन॒स्पति॑भ्यः॒ पर्याभृ॑तं॒ सहः॑ ।
    अ॒पामो॒ज्मानं॒ परि॒ गोभि॒रावृ॑त॒मिंद्र॑स्य॒ वज्रं॑ ह॒विषा॒ रथं॑ यज ॥

    दिवस् पृथिव्याः पर्य् ओज उद्भृतं वनस्पतिभ्यः पर्य् आभृतं सहः |
    अपाम् ओज्मानम् परि गोभिर् आवृतम् इन्द्रस्य वज्रं हविषा रथं यज ||

    diváspṛthivyā́ḥ páryója údbhṛtam vánaspátibhyaḥ páryā́bhṛtam sáhaḥ ǀ
    apā́mojmā́nam pári góbhirā́vṛtamíndrasya vájram havíṣā rátham yaja ǁ

    divas pṛthivyāḥ pary oja udbhṛtaṃ vanaspatibhyaḥ pary ābhṛtaṃ sahaḥ |
    apām ojmānam pari gobhir āvṛtam indrasya vajraṃ haviṣā rathaṃ yaja ||

    दि॒वः । पृ॒थि॒व्याः । परि॑ । ओजः॑ । उत्ऽभृ॑तम् । वन॒स्पति॑ऽभ्यः । परि॑ । आऽभृ॑तम् । सहः॑ ।
    अ॒पाम् । ओ॒ज्मान॑म् । परि॑ । गोभिः॑ । आऽवृ॑तम् । इन्द्र॑स्य । वज्र॑म् । ह॒विषा॑ । रथ॑म् । य॒ज॒ ॥

    दिवः । पृथिव्याः । परि । ओजः । उत्ऽभृतम् । वनस्पतिऽभ्यः । परि । आऽभृतम् । सहः ।
    अपाम् । ओज्मानम् । परि । गोभिः । आऽवृतम् । इन्द्रस्य । वज्रम् । हविषा । रथम् । यज ॥

    diváḥ ǀ pṛthivyā́ḥ ǀ pári ǀ ójaḥ ǀ út-bhṛtam ǀ vánaspáti-bhyaḥ ǀ pári ǀ ā́-bhṛtam ǀ sáhaḥ ǀ
    apā́m ǀ ojmā́nam ǀ pári ǀ góbhiḥ ǀ ā́-vṛtam ǀ índrasya ǀ vájram ǀ havíṣā ǀ rátham ǀ yaja ǁ

    divaḥ ǀ pṛthivyāḥ ǀ pari ǀ ojaḥ ǀ ut-bhṛtam ǀ vanaspati-bhyaḥ ǀ pari ǀ ā-bhṛtam ǀ sahaḥ ǀ
    apām ǀ ojmānam ǀ pari ǀ gobhiḥ ǀ ā-vṛtam ǀ indrasya ǀ vajram ǀ haviṣā ǀ ratham ǀ yaja ǁ

    6.47.27 Aṣṭaka 4.7.35.2Anuvāka 6.4.98Interpretations

28. Ṛk 28

    इंद्र॑स्य॒ वज्रो॑ म॒रुता॒मनी॑कं मि॒त्रस्य॒ गर्भो॒ वरु॑णस्य॒ नाभिः॑ ।
    सेमां नो॑ ह॒व्यदा॑तिं जुषा॒णो देव॑ रथ॒ प्रति॑ ह॒व्या गृ॑भाय ॥

    इन्द्रस्य वज्रो मरुताम् अनीकम् मित्रस्य गर्भो वरुणस्य नाभिः |
    सेमां नो हव्यदातिं जुषाणो देव रथ प्रति हव्या गृभाय ||

    índrasya vájro marútāmánīkam mitrásya gárbho váruṇasya nā́bhiḥ ǀ
    sémā́m no havyádātim juṣāṇó déva ratha práti havyā́ gṛbhāya ǁ

    indrasya vajro marutām anīkam mitrasya garbho varuṇasya nābhiḥ |
    semāṃ no havyadātiṃ juṣāṇo deva ratha prati havyā gṛbhāya ||

    इन्द्र॑स्य । वज्रः॑ । म॒रुता॑म् । अनी॑कम् । मि॒त्रस्य॑ । गर्भः॑ । वरु॑णस्य । नाभिः॑ ।
    सः । इ॒माम् । नः॒ । ह॒व्यऽदा॑तिम् । जु॒षा॒णः । देव॑ । र॒थ॒ । प्रति॑ । ह॒व्या । गृ॒भा॒य॒ ॥

    इन्द्रस्य । वज्रः । मरुताम् । अनीकम् । मित्रस्य । गर्भः । वरुणस्य । नाभिः ।
    सः । इमाम् । नः । हव्यऽदातिम् । जुषाणः । देव । रथ । प्रति । हव्या । गृभाय ॥

    índrasya ǀ vájraḥ ǀ marútām ǀ ánīkam ǀ mitrásya ǀ gárbhaḥ ǀ váruṇasya ǀ nā́bhiḥ ǀ
    sáḥ ǀ imā́m ǀ naḥ ǀ havyá-dātim ǀ juṣāṇáḥ ǀ déva ǀ ratha ǀ práti ǀ havyā́ ǀ gṛbhāya ǁ

    indrasya ǀ vajraḥ ǀ marutām ǀ anīkam ǀ mitrasya ǀ garbhaḥ ǀ varuṇasya ǀ nābhiḥ ǀ
    saḥ ǀ imām ǀ naḥ ǀ havya-dātim ǀ juṣāṇaḥ ǀ deva ǀ ratha ǀ prati ǀ havyā ǀ gṛbhāya ǁ

    6.47.28 Aṣṭaka 4.7.35.3Anuvāka 6.4.99Interpretations

29. Ṛk 29

    उप॑ श्वासय पृथि॒वीमु॒त द्यां पु॑रु॒त्रा ते॑ मनुतां॒ विष्ठि॑तं॒ जग॑त् ।
    स दुं॑दुभे स॒जूरिंद्रे॑ण दे॒वैर्दू॒राद्दवी॑यो॒ अप॑ सेध॒ शत्रू॑न् ॥

    उप श्वासय पृथिवीम् उत द्याम् पुरुत्रा ते मनुतां विष्ठितं जगत् |
    स दुन्दुभे सजूर् इन्द्रेण देवैर् दूराद् दवीयो अप सेध शत्रून् ||

    úpa śvāsaya pṛthivī́mutá dyā́m purutrā́ te manutām víṣṭhitam jágat ǀ
    sá dundubhe sajū́ríndreṇa deváirdūrā́ddávīyo ápa sedha śátrūn ǁ

    upa śvāsaya pṛthivīm uta dyām purutrā te manutāṃ viṣṭhitaṃ jagat |
    sa dundubhe sajūr indreṇa devair dūrād davīyo apa sedha śatrūn ||

    उप॑ । श्वा॒स॒य॒ । पृ॒थि॒वीम् । उ॒त । द्याम् । पु॒रु॒ऽत्रा । ते॒ । म॒नु॒ता॒म् । विऽस्थि॑तम् । जग॑त् ।
    सः । दु॒न्दु॒भे॒ । स॒ऽजूः । इन्द्रे॑ण । दे॒वैः । दू॒रात् । दवी॑यः । अप॑ । से॒ध॒ । शत्रू॑न् ॥

    उप । श्वासय । पृथिवीम् । उत । द्याम् । पुरुऽत्रा । ते । मनुताम् । विऽस्थितम् । जगत् ।
    सः । दुन्दुभे । सऽजूः । इन्द्रेण । देवैः । दूरात् । दवीयः । अप । सेध । शत्रून् ॥

    úpa ǀ śvāsaya ǀ pṛthivī́m ǀ utá ǀ dyā́m ǀ puru-trā́ ǀ te ǀ manutām ǀ ví-sthitam ǀ jágat ǀ
    sáḥ ǀ dundubhe ǀ sa-jū́ḥ ǀ índreṇa ǀ deváiḥ ǀ dūrā́t ǀ dávīyaḥ ǀ ápa ǀ sedha ǀ śátrūn ǁ

    upa ǀ śvāsaya ǀ pṛthivīm ǀ uta ǀ dyām ǀ puru-trā ǀ te ǀ manutām ǀ vi-sthitam ǀ jagat ǀ
    saḥ ǀ dundubhe ǀ sa-jūḥ ǀ indreṇa ǀ devaiḥ ǀ dūrāt ǀ davīyaḥ ǀ apa ǀ sedha ǀ śatrūn ǁ

    6.47.29 Aṣṭaka 4.7.35.4Anuvāka 6.4.100Interpretations

30. Ṛk 30

    आ क्रं॑दय॒ बल॒मोजो॑ न॒ आ धा॒ निः ष्ट॑निहि दुरि॒ता बाध॑मानः ।
    अप॑ प्रोथ दुंदुभे दु॒च्छुना॑ इ॒त इंद्र॑स्य मु॒ष्टिर॑सि वी॒ळय॑स्व ॥

    आ क्रन्दय बलम् ओजो न आ धा नि ष्टनिहि दुरिता बाधमानः |
    अप प्रोथ दुन्दुभे दुच्छुना इत इन्द्रस्य मुष्टिर् असि वीऌअयस्व ||

    ā́ krandaya bálamójo na ā́ dhā níḥ ṣṭanihi duritā́ bā́dhamānaḥ ǀ
    ápa protha dundubhe ducchúnā itá índrasya muṣṭírasi vīḷáyasva ǁ

    ā krandaya balam ojo na ā dhā ni ṣṭanihi duritā bādhamānaḥ |
    apa protha dundubhe ducchunā ita indrasya muṣṭir asi vīḷayasva ||

    आ । क्र॒न्द॒य॒ । बल॑म् । ओजः॑ । नः॒ । आ । धाः॒ । निः । स्त॒नि॒हि॒ । दुः॒ऽइ॒ता । बाध॑मानः ।
    अप॑ । प्रो॒थ॒ । दु॒न्दु॒भे॒ । दु॒च्छुनाः॑ । इ॒तः । इन्द्र॑स्य । मु॒ष्टिः । अ॒सि॒ । वी॒ळय॑स्व ॥

    आ । क्रन्दय । बलम् । ओजः । नः । आ । धाः । निः । स्तनिहि । दुःऽइता । बाधमानः ।
    अप । प्रोथ । दुन्दुभे । दुच्छुनाः । इतः । इन्द्रस्य । मुष्टिः । असि । वीळयस्व ॥

    ā́ ǀ krandaya ǀ bálam ǀ ójaḥ ǀ naḥ ǀ ā́ ǀ dhāḥ ǀ níḥ ǀ stanihi ǀ duḥ-itā́ ǀ bā́dhamānaḥ ǀ
    ápa ǀ protha ǀ dundubhe ǀ ducchúnāḥ ǀ itáḥ ǀ índrasya ǀ muṣṭíḥ ǀ asi ǀ vīḷáyasva ǁ

    ā ǀ krandaya ǀ balam ǀ ojaḥ ǀ naḥ ǀ ā ǀ dhāḥ ǀ niḥ ǀ stanihi ǀ duḥ-itā ǀ bādhamānaḥ ǀ
    apa ǀ protha ǀ dundubhe ǀ ducchunāḥ ǀ itaḥ ǀ indrasya ǀ muṣṭiḥ ǀ asi ǀ vīḷayasva ǁ

    6.47.30 Aṣṭaka 4.7.35.5Anuvāka 6.4.101Interpretations

31. Ṛk 31

    आमूर॑ज प्र॒त्याव॑र्तये॒माः के॑तु॒मद्दुं॑दु॒भिर्वा॑वदीति ।
    समश्व॑पर्णा॒श्चरं॑ति नो॒ नरो॒ऽस्माक॑मिंद्र र॒थिनो॑ जयंतु ॥

    आमूर् अज प्रत्यावर्तयेमाः केतुमद् दुन्दुभिर् वावदीति |
    सम् अश्वपर्णाश् चरन्ति नो नरो ऽस्माकम् इन्द्र रथिनो जयन्तु ||

    ā́mū́raja pratyā́vartayemā́ḥ ketumáddundubhírvāvadīti ǀ
    sámáśvaparṇāścáranti no náro’smā́kamindra rathíno jayantu ǁ

    āmūr aja pratyāvartayemāḥ ketumad dundubhir vāvadīti |
    sam aśvaparṇāś caranti no naro 'smākam indra rathino jayantu ||

    आ । अ॒मूः । अ॒ज॒ । प्र॒ति॒ऽआव॑र्तय । इ॒माः । के॒तु॒ऽमत् । दु॒न्दु॒भिः । वा॒व॒दी॒ति॒ ।
    सम् । अश्व॑ऽपर्णाः । चर॑न्ति । नः॒ । नरः॑ । अ॒स्माक॑म् । इ॒न्द्र॒ । र॒थिनः॑ । ज॒य॒न्तु॒ ॥

    आ । अमूः । अज । प्रतिऽआवर्तय । इमाः । केतुऽमत् । दुन्दुभिः । वावदीति ।
    सम् । अश्वऽपर्णाः । चरन्ति । नः । नरः । अस्माकम् । इन्द्र । रथिनः । जयन्तु ॥

    ā́ ǀ amū́ḥ ǀ aja ǀ prati-ā́vartaya ǀ imā́ḥ ǀ ketu-mát ǀ dundubhíḥ ǀ vāvadīti ǀ
    sám ǀ áśva-parṇāḥ ǀ cáranti ǀ naḥ ǀ náraḥ ǀ asmā́kam ǀ indra ǀ rathínaḥ ǀ jayantu ǁ

    ā ǀ amūḥ ǀ aja ǀ prati-āvartaya ǀ imāḥ ǀ ketu-mat ǀ dundubhiḥ ǀ vāvadīti ǀ
    sam ǀ aśva-parṇāḥ ǀ caranti ǀ naḥ ǀ naraḥ ǀ asmākam ǀ indra ǀ rathinaḥ ǀ jayantu ǁ

    6.47.31 Aṣṭaka 4.7.35.6Anuvāka 6.4.102Interpretations

Text, recitation and interpretations from the Ṛgveda database of theveda.org.in.