पर्ण्यश् चतस्र इति शालपर्णी पृश्निपर्णी मुद्गपर्णी माषपर्णी च ॥ (१।०)

तामलकी भूम्यामलकी ॥ (२।०)

काकनासा नासाफला काकतुण्डक इत्यन्ये ॥ (३।०)

गतरसत्वमिह द्रव्याणां चतुर्भागस्थितजले भवति ॥ (४।०)

निष्कुलमिति निरस्थि ॥ (५।०)

तैलसर्पिषोरिति समासनिर्देशाद् उभाभ्यामेव द्वादशपलानि न पृथक् पृथक् ॥ (६।०)

मत्स्यण्डिका खण्डसंहतिः ॥ (७।०)

अत्र षट्पलत्वेन समयोरपि मधुसर्पिषोर् द्रव्यान्तरयुक्तत्वेनाविरुद्धत्वम् ॥ (८।०)