अत्र त्वाशब्दसामर्थ्याद् गम्यते प्राणसंयमेन समं जप्यं कर्तव्यम् ॥ (१।०)

उपस्पर्शनवत् ॥ (२।०)

तस्माद् अत्र रौद्री नाम तत्पुरुषा ॥ (३।०)

रौद्री च कस्मात् ॥ (४।०)

रुद्रस्योपस्थापकत्वाद् रौद्री ॥ (५।०)

रुद्रो वास्यां चिन्त्यते रुद्रप्रापकत्वाद् वा रौद्री ॥ (६।०)

आह सद्योजातादिबहुप्रकारा तत्र का सा रौद्री ॥ (७।०)

तद् उच्यते गायत्री ॥ (८।०)

अत्र या रौद्री सा गायत्री ॥ (९।०)

गायत्री च कस्मात् ॥ (१०।०)

गीता गातारं त्रायत इति ॥ (११।०)

गायत्रे वा छन्दसि वर्तत इति गायत्री ॥ (१२।०)

अत्र रौद्रीग्रहणाद् वैदिक्यादिगायत्रीप्रतिषेधः ॥ (१३।०)

इह तु गायत्रीग्रहणात् सद्योजातादीनां प्रतिषेधः ॥ (१४।०)

गायत्रीम् इति कर्म ॥ (१५।०)

बहुरूपी नामाघोरा ॥ (१६।०)

बहुरूपी च कस्मात् ॥ (१७।०)

बहुरूपस्योक्तपरिग्रहेष्व् आकारेषु वर्तत इति बहुरूपी ॥ (१८।०)

बहुरूपो वा अस्यां चिन्त्यत इति बहुरूपप्रापकत्वाद् बहुरूपी ॥ (१९।०)

बहुरूपीम् इति कर्म ॥ (२०।०)

वा इति विकल्पे ॥ (२१।०)

उभयोर् अपि ब्रह्मत्वम् उभयोर् अपि तुल्यार्थसाधकत्वम् उभे अपि महेश्वरपरिगृहीते इत्य् अत एकाम् अनेकां वा उपस्पृश्य जपेद् इति मानसी क्रियेत्य् अर्थः ॥ (२२।०)

आह उपस्पर्शनप्राणायामजप्याधिकृतस्य का कार्यनिष्पत्तिः ॥ (२३।०)

तद् उच्यते अकलुषत्वम् ॥ (२४।०)

यस्माद् आह ॥ (२५।०)