अत्र अकारो मानप्रतिषेधे ॥ (१।०)

मानोऽत्र द्विविधः ॥ (२।०)

जात्यभिमानो गृहस्थाभिमानश्च ॥ (३।०)

तत्र जात्यभिमानो नाम ब्राह्मणोऽहमिति ॥ (४।०)

पूज्यत्वाद् ऊर्ध्वगमनादीनां कार्याणाम् उच्छ्रितत्वात् त्रयाणामपि वर्णानामुपदेशेन गुरुत्वाद् यज्ञकर्तृत्वात् त्रैलोक्यस्थितिहेतोः ब्राह्मणोऽहमिति प्रथमो मानो जात्युत्कर्षात् ॥ (५।०)

तथा ब्राह्मणानामपि गृहस्थादीनां पूज्यत्वात् तत्कृतमानश्च ॥ (६।०)

एतच् च मानद्वयमव्यक्तलिङ्गवचनात् प्रतिषिद्धम् ॥ (७।०)

तथा वित्तं बन्धुर्यशः कर्म विद्या भवति पञ्चमी । (८।१)

एतानि मान्यस्थानानि गरीयो यद्यदुत्तरम् ॥ (८।२)

एतानि चैकवासःप्रेताचरणगूढव्रतोपदेशिना सूत्रतः प्रतिषिद्धानीत्यतो मानो न कर्तव्यः ॥ (९।०)

सन् इति प्रशंसायामस्तित्वे च ॥ (१०।०)

अग्रे तदसन्मानचरिप्रकरणविशिष्टं च ॥ (११।०)

हिशब्दो ऽयमुत्तमोत्कर्षापेक्षो द्रष्टव्यः ॥ (१२।०)

यन्त्राणि अग्निष्टोमादीनि मासोपवासादीनि च गृहस्थादीनां शुद्धिवृद्धिकराणि ॥ (१३।०)

यन्त्राणि च कस्मात् ॥ (१४।०)

यन्त्रं कर्मादयः ॥ (१५।०)

यस्माद् अयन्त्रा लौकिका अमर्यादावस्था भवन्तीत्यतो यन्त्राणाम् ॥ (१६।०)

यन्त्राणाम् इति षष्ठीबहुवचनम् ॥ (१७।०)

आह बहुवचनप्रयोगात् संदेहः अथ कियतां यन्त्राणाम् ॥ (१८।०)

तदुच्यते सर्वेषाम् ॥ (१९।१)

अत्र सर्वेषाम् इत्यशेषाणामित्यर्थः ॥ (२०।०)

सर्वेषामिति षष्ठीबहुवचनम् ॥ (२१।०)

आह षष्ठ्याः साकाङ्क्षत्वात् संदेहः ॥ (२२।०)

तेषां कारणात्मानो वर्तन्ते ॥ (२३।०)

तदुच्यते उत्तमः ॥ (२४।०)

अत्रोत्तम इति श्रेष्ठत्वे परमविशुद्धित्यागादानभावादिषु ॥ (२५।०)

उक्तं हि । (२६।१)

वरेण्यः सत्तमो मुख्यो वरिष्ठः शोभनोऽथवा । (२६।२)

उत्तमश्चापरार्धश्च स्वर्थः श्रेष्ठार्थवाचकाः ॥ (२६।३)

श्रेष्ठः ॥ (२७।०)

इह चोक्तम् उत्तम इति ॥ (२८।०)

आह असन्मानः सर्वयन्त्राणामुत्तम इति क्व सिद्धम् ॥ (२९।०)

उच्यते इह ॥ (३०।०)

यस्मादाह स्मृतः ॥ (३१।०)

अत्र स्मृत इत्युक्तपर्यायः महेश्वरेणोक्तं प्रोक्तं कथितं वर्णितमित्यर्थः ॥ (३२।०)

विशिष्टः कस्मात् ॥ (३३।०)

सर्वज्ञवचनाद् अविसंवादित्वाच् च ॥ (३४।०)

नहि प्रत्यक्षदर्शिनां वचनानि विसंवदन्तीत्यर्थः ॥ (३५।०)

आह अस्मिन् क्रमे उत्तमत्वेन व्याख्यायमानं क आद्यः शोधकः ॥ (३६।०)

केन वा इदं विधानं चीर्णम् ॥ (३७।०)

आचरता वा किं फलं प्राप्तम् ॥ (३८।०)

सो ऽस्मत्प्रत्ययार्थम् वाच्यः ॥ (३९।०)

तदुच्यते ॥ (४०।०)