अत्र कुदानानि गोभूहिरण्यसुवर्णादीनि ॥ (१।०)

कस्मात् ॥ (२।०)

अनैकान्तिकानात्यन्तिकसातिशयफलत्वात् कुपथाध्वप्रवादाच् च ॥ (३।०)

तस्मादत्र अतिशब्दो विशेषणम् ॥ (४।०)

अतिदानं चात्मप्रदानम् ॥ (५।०)

कस्मात् ॥ (६।०)

आत्मनः दातृत्वाद् भूयो दानप्रयोजनाभावात् ॥ (७।०)

स्थानशरीरेन्द्रियविषयाद्यप्रापकत्वात् ॥ (८।०)

ऐकान्तिकात्यन्तिकरुद्रसमीपप्राप्तेर् एकान्तेनैवानावृत्तिफलत्वाद् असाधारणफलत्वाच् चात्मप्रदानम् अतिदानम् ॥ (९।०)

तथा कुयजनान्य् अग्निष्टोमादीनि ॥ (१०।०)

कस्मात् ॥ (११।०)

संग्रहप्रतिग्रहहिंसादियुक्तेन श्रवेणाभिनिर्वृत्तिदर्शनात् पत्त्रीरात्रिजदेवतादिसाधारणफलत्वाद् अनित्यसातिशयसंकीर्णफलत्वाच् च कुयजनान्य् अग्निष्टोमादीनि ॥ (१२।०)

तस्माद् अत्रातिशब्दो विशेषणम् ॥ (१३।०)

अतियजनं नाम यदायतने लोके वा ॥ (१४।०)

तत्रायतने स्नानहसिताद्या लोके च क्राथनस्पन्दनाद्या विधिक्रिया ॥ (१५।०)

कस्मात् ॥ (१६।०)

संग्रहप्रतिग्रहहिंसादिरहितेन क्रमेण स्वशरीरसमुत्थाभिः कायिकवाचिकमानसिकाभिरिज्यते यस्मात् ॥ (१७।०)

अतश्चेत्युच्यते अतियजनम् ॥ (१८।०)

आह किं दानं यजनं च साधनद्वयम् एवात्रातिशब्देन विशिष्टं कर्तव्यमिति ॥ (१९।०)

उच्यते न ॥ (२०।०)

यस्मादाह ॥ (२१।०)