अथ भस्मनिर्माल्यवल् लोकादिप्रसिद्धम् आयतनम् ॥ (१।१)

आङ् इति मर्यादायां भवति ॥ (२।१)

यस्माद् एते गृहस्थादयः प्रयतनियतशुचिसाध्वाचाराः स्वस्वमर्यादयोपतिष्ठन्ते यजन्ति च शान्तिकपौष्टिकादिभिः क्रियाभिर् इति ॥ (३।१)

यजनाच् चायतनम् ॥ (४।१)

तस्मिन् परकृत आयतने वस्तव्यम् इति वासी इत्य् आयतनं च परिगृह्णाति ॥ (५।१)

भूप्रदेशे आकाशे वृक्षमूले बहिः प्रादक्षिण्येन वा यत्र क्वचित् प्रतिवसन् शिष्टमर्यादया आयतनवासी भवति ॥ (६।१)

पुलिनवासवद् वसेद् इत्य् अर्थः ॥ (७।१)

पुण्यफलावाप्तिश् चास्याशु भवति ॥ (८।१)

उक्तं हि । (९।१)

ग्रामे वा यदि वारण्ये पुण्यस्थानं हि शूलिनः ॥ (९।२)

आवासो धर्मतृप्तानां सिद्धिक्षेत्रं हि तत् परम् ॥ (१०।०)

आह तस्मिन् आयतने प्रतिवसता काः क्रियाः कर्तव्याः ॥ (११।०)

किं स्नानाद्या उपलेपनाद्या वा ॥ (१२।०)

आहोस्विद् दृष्टा अस्यान्या वैशेषिक्यः क्रियाः कर्तव्याः ॥ (१३।०)

यथा चान्या वैशेषिक्यः क्रियाः कर्तव्याः प्रयोजनं च वक्ष्यामः ॥ (१४।०)