अत्रापि सर्वशब्दः पशुष्व् एव ॥ (१।०)

सर्वेषाम् इति न्यूनपरिग्रहे ॥ (२।०)

चशब्दो ऽभ्यधिकत्वे ॥ (३।०)

अभ्यधिक उत्कृष्टो व्यतिरिक्तश् च भवतीत्य् अर्थः ॥ (४।०)

अवश्य इति ॥ (५।०)

अकारो भूतपूर्वं वश्यत्वं प्रतिषेधयति ॥ (६।०)

भवति इति भूतार्थवादो निःसंशयम् ॥ (७।०)

यदा गुणैर् युक्तः प्राप्तैश्वर्यः सिद्धस् तदा सर्वेषां शक्तेर् अवश्यो भवतीत्य् अर्थः ॥ (८।०)

आह किं स्वशक्त्याध्याक्रान्ता वश्या भवन्ति आहोस्विद् धर्ममर्यादां रक्षन्ति गुरुशिष्यवत् ॥ (९।०)

गुरोः शक्तः शिष्यो नाध्याक्रान्तः ॥ (१०।०)

यस्माद् आह ॥ (११।०)