अत्र ऋषिः इत्येतद् भगवता नामधेयम् ॥ (१।०)

ऋषिः कस्मात् ॥ (२।०)

ऋषिः क्रियायाम् ॥ (३।०)

ऋषित्वं नाम क्रियाशंसनादृषिः ॥ (४।०)

तथा कृत्स्नं कार्यं विद्याद्यमीशत इत्यतः ऋषिः ॥ (५।०)

तथा विप्र इत्येतदपि भगवतो नाम ॥ (६।०)

विप्रः कस्मात् ॥ (७।०)

विद ज्ञाने ॥ (८।०)

विप्रत्वं नाम ज्ञानशक्तिः ॥ (९।०)

व्याप्तमनेन भगवता ज्ञानशक्त्या कृत्स्नं ज्ञेयमित्यतो विप्र इति ॥ (१०।०)

तथा महान् इत्यभ्यधिकत्वे ॥ (११।०)

यदेतद् दृक्क्रियालक्षणमस्ति अनागन्तुकम् अकृतकमैश्वर्यं तद्गुणसद्भावः सतत्त्वं तत्त्वधर्मः तदकृतकं पुरुषचैतन्यवत् तन् नान्यस्येत्यतो ऽभ्यधिकः उत्कृष्टोऽतिरिक्तश्चेति महान् ॥ (१२।०)

एष इति प्रत्यक्षे ॥ (१३।०)

एष यो मया पूर्वम् ॐ इति श्रोत्रप्रत्यक्षीकृतो ऽर्थः असौ विष्णूमाकुमारादीनाम् अन्यतमो न भवति ॥ (१४।०)

कस्मात् ॥ (१५।०)

ऋषित्वाद् विप्रत्वान् महत्त्वाच् चेत्यर्थः ॥ (१६।०)

आह ऋषित्वं विप्रत्वं च कीदृशे महेश्वरे चिन्तनीयम् ॥ (१७।०)

कीदृशो वा ॐकारो ध्येयः ॥ (१८।०)

तदुच्यते ॥ (१९।०)